Read S'gaw Karen စံးထီၣ်ပတြၢၤ 98 Bible Online

စံးထီၣ်ပတြၢၤ 98 - S'gaw Karen bible

စံးထီၣ်ပတြၢၤ 98

¹သးဝံၣ်ထီၣ်ယွၤလၢတၢ်သးဝံၣ်အသီတက့ၢ်. အဂ့ၢ်ဒ်အံၤ, အဝဲမၤတ့ၢ်တၢ်လီၤလးတဖၣ်လီၤ. အစုထွဲဒီးအစုဒုၣ်စီဆှံ မၤတ့ၢ်တၢ်အုၣ်က့ၤခီၣ်က့ၤလၢအဂီၢ်လီၤ.

²ယွၤဒုးသ့ၣ်ညါတ့ၢ်အတၢ်အုၣ်က့ၤခီၣ်က့ၤဒီး လီၣ်ဖျါထီၣ်တ့ၢ်အတၢ်တီတၢ်လိၤ ဆူပှၤကလုာ်တဖၣ်န့ၣ်လီၤ.

³အဝဲသ့ၣ်နီၣ်ထီၣ်တ့ၢ်အတၢ်အဲၣ်ဂၢၢ်ကျၢၤ ဒီးအတၢ်သးတီလၢ အံၣ်စရ့လးအပှၤဟံၣ်ဖိအဂီၢ်န့ၣ်လီၤ. ဟီၣ်ခိၣ်အကတၢၢ်ခဲလၢာ်ထံၣ်ဘၣ်တ့ၢ်လံ ပကစၢ်ယွၤအတၢ်အုၣ်က့ၤခီၣ်က့ၤန့ၣ်လီၤ.

⁴ပှၤဟီၣ်ခိၣ်ဖိခဲလၢာ်သ့ၣ်ဧၢ, သးဝံၣ်ထီၣ်ယွၤလၢတၢ်သးခု, စံးထီၣ်ပတြၢၤအီၤလၢတၢ်သးဝံၣ် ဒီးကိးထီၣ်အီၤလၢတၢ်သူၣ်ဖှံသးညီန့ၣ်တက့ၢ်.

⁵သးဝံၣ်စံးထီၣ်ပတြၢၤယွၤတက့ၢ်. ဒီးဒ့တၢ်သးဝံၣ်အကလုၢ်လၢသီတူၢ်တဖၣ်တက့ၢ်.

⁶အူထီၣ်ကွဲၤတဖၣ်ဒီး တနွဲတဖၣ်ဒီး ကိးထီၣ်လၢတၢ်သးခုဆူ ယွၤ, ပစီၤပၤတက့ၢ်.

⁷မ်ပီၣ်လဲၣ်ဒီး တၢ်ဘၣ်တ့လၢအပူၤတဖၣ်သီၣ်ထီၣ်, ဟီၣ်ခိၣ်ဒီးပှၤအိၣ်ဝဲဆိးဝဲလၢအပူၤခဲလၢာ် သးဝံၣ်တၢ်တက့ၢ်.

⁸မ်ထံကျိတဖၣ်ဒဲအစုတက့ၢ်. မ်ကစၢၢ်ကလိတဖၣ်သးဝံၣ်တၢ်လၢ တၢ်သူၣ်ဖှံသးညီအပူၤ, လၢယွၤအမဲာ်ညါတက့ၢ်.

⁹အဂ့ၢ်ဒ်အံၤ, အဝဲဟဲဒ်သိးကပၢဟီၣ်ခိၣ်န့ၣ်လီၤ. အဝဲကပၢပှၤဂီၢ်မုၢ်လၢဟီၣ်ခိၣ်ချၢလၢ တၢ်စံၣ်ညီၣ်တီဒီး တၢ်တီတၢ်လိၤအပူၤန့ၣ်လီၤ.