Read S'gaw Karen လံာ်တၢ်ကူၣ်သ့အတၢ်ကတိၤ 29 Bible Online

လံာ်တၢ်ကူၣ်သ့အတၢ်ကတိၤ 29 - S'gaw Karen bible

လံာ်တၢ်ကူၣ်သ့အတၢ်ကတိၤ 29

¹ဖဲနဘၣ်တၢ်သိၣ်ဃီၣ်နၤကိးဘျီဒဲးန့ၣ်နခိၣ်မ့ၢ်ကိၤအါထီၣ်ဒီး, မုၢ်ကအိၣ်ဝဲတနံၤလၢနကဘၣ်တၢ်မၤလီၤကလဲနၤဒီး တၢ်မၤဘျါက့ၤနၤတအိၣ်လၢၤနီတဘျီဘၣ်.

²ဒုးနဲၣ်ယၤပှၤပၢတၢ်အတီအလိၤတဂၤတက့ၢ်. ဒီးယကဒုးနဲၣ်နၤပှၤဂီၢ်မုၢ်လၢအသူၣ်ဖှံသးညီတဖုလီၤ. ဒုးနဲၣ်ယၤပှၤပၢတၢ်အအၢအသီတဂၤတက့ၢ်. ဒီးယကဒုးနဲၣ်နၤပှၤဂီၢ်မုၢ်လၢအဘၣ်ကိၢ်ဘၣ်ဂီၤတဖုန့ၣ်လီၤ.

³နမ့ၢ်ပာ်လုၢ်ပာ်ပှ့ၤတၢ်ကူၣ်သ့ဒီး, နပၢ်ကပာ်ကဖၢလၢအသးလၢ နဃိလီၤ. တၢ်မၤလၢာ်စ့လၢပှၤဃဲသဲမုၣ်တဖၣ်အဂီၢ်န့ၣ်, မ့ၢ်တၢ်လၢာ်ကလီကလီလၢတၢ်မၢးအပူၤလီၤ.

⁴ဖဲစီၤပၤပာ်ဒိၣ်ပာ်ကဲတၢ်စံၣ်ညီၣ်တီဒီး, ထံကီၢ်အဂံၢ်အဘါကဆူၣ်ဝဲလီၤ. ဘၣ်ဆၣ်ဖဲအဝဲပာ်ဒိၣ်ပာ်ကဲဒၣ်ထဲကျိၣ်ဧိၤစ့ဧိၤဒီး, အဝဲကမၤဟးဂီၤက့ၤအထံအကီၢ်န့ၣ်လီၤ.

⁵နမ့ၢ်ကတိၤပတြၢၤမုာ်နၢ်နတံၤသကိးတဖၣ်ဒီး, နဆဲထီၣ်ထုတခါလၢနဂီၢ်ဒၣ်နဲလီၤ.

⁶ဖဲပှၤအတီအလိၤတဖၣ်သူၣ်ဖှံသးညီဒီးသဘျ့ဝဲဒၣ်န့ၣ်, ပှၤအၢပှၤသီတဖၣ်ဘၣ်ပျံၤသကွီၤလၢအနီၢ်ကစၢ်ဒၣ်ဝဲအတၢ်ဒဲးဘး တဖၣ်န့ၣ်လီၤ.

⁷ပှၤအဂ့ၤတဂၤသ့ၣ်ညါပှၤဖှီၣ်ဖိယာ်ဖိအတၢ်ခွဲးတၢ်ယာ်တဖၣ်န့ၣ် လီၤ. မ့မ့ၢ်ပှၤအအၢအသီတဖၣ်နၢ်ပၢၢ်တၢ်ဒ်သိးအံၤတဖၣ်တသ့ဘၣ်.

⁸ပှၤလၢအတၢ်ပာ်ကဲပှၤဂၤတအိၣ်ဘၣ်တဖၣ်, ဒုးအိၣ်ထီၣ်တၢ်သဘံၣ်ဘုၣ်လၢဝ့ၢ်ဒီဝ့ၢ်ညါသ့ဝဲန့ၣ်လီၤ. မ့မ့ၢ်ပှၤလၢအကူၣ်တၢ်သ့တဖၣ်န့ၣ်, ဒုးအိၣ်ခုၣ်အိၣ်မုာ်တၢ်န့ၣ်လီၤ.

⁹ဖဲပှၤအိၣ်ဒီးတၢ်သူၣ်ဆးသးဆးတဂၤလိာ်ကွီၢ်ထီဒါတၢ်ဒီးပှၤ အမၢးတဂၤန့ၣ်, ပှၤအမၢးဖိနံၤဒၣ်အတၢ်ဒၣ်ဝဲ, ကတိၤထီၣ်တၢ်သီၣ်ဒိၣ်သီၣ်သွါဒီးရၢၢ်ရၢၢ်စၢၢ်စၢၢ်န့ၣ်လီၤ.

¹⁰ပှၤအၢတူာ်ကိာ်တဖၣ်သးဟ့ပှၤသူၣ်လိၤသးဘျၢတဂၤလၢ်လၢ်န့ၣ်လီၤ. မ့မ့ၢ်, ပှၤအတီအလိၤတဖၣ်ကဒီဒၣ်အိၣ်ပှိၤပှၤဒ်န့ၣ်သိးတဂၤအတၢ် အိၣ်မူန့ၣ်လီၤ.

¹¹ပှၤလၢအသးတဆးတဖၣ်န့ၣ်ပျဲဟးထီၣ်အတၢ်သူၣ်ဒိၣ်သးဖျိးလၢာ်လၢာ် ဆ့ဆ့လီၤ. မ့မ့ၢ်, ပှၤလၢအအိၣ်ဒီးတၢ်သူၣ်ဆးသးဆးန့ၣ်အသးစူၤဒီးပၢၤ ဃာ်အသးန့ၣ်လီၤ.

¹²ပှၤပၢတၢ်တဂၤမ့ၢ်ကနၣ်ဃုာ်တၢ်ကစီၣ်တတီတလိၤတဖၣ်ဒီး, အပဒိၣ်ပပှၢ်ခဲလၢာ်ကမ့ၢ်ပှၤလီတၢ်တဖၣ်န့ၣ်လီၤ.

¹³ပှၤအဖှီၣ်အယာ်တဂၤဒီးပှၤလၢအမၤအၢမၤနးအီၤန့ၣ်အိၣ်ဒီးတၢ် တမံၤဃီလီၤ. ယွၤဟ့ၣ်အဝဲသ့ၣ်ခံဂၤလိာ်လၢမဲာ်ချံ တဖၣ်န့ၣ်လီၤ.

¹⁴စီၤပၤတဂၤမ့ၢ်ဒီဒၣ်စၢၤပှၤဖှီၣ်ဖိယာ်ဖိအတၢ်ခွဲးတၢ်ယာ်တဖၣ် ဒီး, အဝဲကပၢတၢ်ယံာ်ယံာ်ထၢထၢလီၤ.

¹⁵တၢ်သိၣ်ဂ့ၤသီဘၣ်အနီၣ်တီၢ်န့ၣ်ဟ့ၣ်လီၤတၢ်ကူၣ်သ့လီၤ. မ့မ့ၢ်, တၢ်ပျဲဖိသၣ်အိၣ်ဒၣ်အတၢ်န့ၣ်ကဒုးမဲာ်ဆှးအမိၢ်လီၤ.

¹⁶ဖဲပှၤအၢပှၤသီတဖၣ်ဒိၣ်စိဒိၣ်ကမီၤန့ၣ်, တၢ်မၤကမၣ်ထီဒါ သဲစးအါထီၣ်ဝဲလီၤ. ဘၣ်ဆၣ်ဒီးပှၤအတီအလိၤတဖၣ်ကအိၣ်မူဒီးထံၣ်ဘၣ်ပှၤဒ်န့ၣ်သိးတဖၣ် အတၢ်ဟးဂီၤန့ၣ်လီၤ.

¹⁷သိၣ်က့ၤဘှီက့ၤနဖိခွါတက့ၢ်. ဒီးနပာ်ကဖၢလၢနသးလၢအဃိ ထီဘိကသ့ဝဲလီၤ. တၢ်ဂ့ၢ်လၢအဝဲကမၤမဲာ်ဆှးနၤတအိၣ်နီ တစုဘၣ်.

¹⁸တၢ်ထံၣ်လၢညါမ့ၢ်တအိၣ်နီတမံၤဘၣ်ဒီးပှၤဂီၢ်မုၢ်ဟးဂီၤဝဲ လီၤ. မ့မ့ၢ်ပှၤလၢအတိၢ်န့ၢ်ကစၢ်ယွၤအတၢ်သိၣ်တၢ်သီန့ၣ်, ဘၣ်ဆိၣ်ဂ့ၤဝဲလီၤ.

¹⁹နသိၣ်ဂ့ၤသီဘၣ်တၢ်ခ့တၢ်ပှၤတဂၤထဲလၢတၢ်ကတိၤတဖၣ်ဧိၤန့ၣ်တသ့ ဘၣ်. ဘၣ်သ့ၣ်သ့ၣ်ကနၢ်ပၢၢ်ဝဲလီၤ. ဘၣ်ဆၣ်ဒီးတပာ်လ့ၤပာ်ကါဝဲဘၣ်.

²⁰ပှၤဟးဂီၤဖိလၢအမၢးတဂၤန့ၣ်တၢ်မုၢ်လၢ်အိၣ်လၢအဂီၢ်အါန့ၢ် ဒိၣ်န့ၢ်ဒံးပှၤတဂၤဂၤလၢအကတိၤတၢ်တအိၣ်ဒီးတၢ်ဆိကမိၣ်ဆိကမး န့ၣ်တက့ၢ်လီၤ.

²¹စးထီၣ်လၢအမ့ၢ်ဖိသၣ်လံၤလံၤန့ၣ်, နမ့ၢ်ဟ့ၣ်လီၤနခ့နပှၤလၢတၢ်ခဲလၢာ်ဒ်အသးလီဝဲအသိးန့ၣ်ဒီး, မုၢ်ကအိၣ်ဝဲတနံၤလၢအဝဲကဟံးန့ၢ်ကယဲၢ်တၢ်လၢအမ့ၢ် နတၢ်ခဲလၢာ်န့ၣ်လီၤ.

²²ပှၤလၢအသးထီၣ်ချ့န့ၣ်ထိၣ်ဂဲၤထီၣ်တၢ်အ့ၣ်လိာ်ဆိးက့လိာ်ဒီး ဒုးအိၣ်ထီၣ်တၢ်ကီတၢ်ခဲအါမးလီၤ.

²³တၢ်ပာ်ထီၣ်ထီသးကဟဲစိာ်န့ၢ်နၤနတၢ်ဟးဂီၤလီၤ. ဘၣ်ဆၣ်နမ့ၢ်ဆီၣ်လီၤနသးဒီး, နကဘၣ်တၢ်ပာ်ကဲနၤန့ၣ်လီၤ.

²⁴ပှၤလၢအဒီတံၤဒီသကိးဒီးပှၤဟုၣ်တၢ်ဖိန့ၣ်, သးဟ့လီၤအသးဒၣ်ဝဲလီၤ. အဝဲမ့ၢ်တဲတၢ်မ့ၢ်တၢ်တီလၢကွီၢ်ဘျီၣ်ဒီး, ကဘၣ်တၢ်စံၣ်ညီၣ်အီၤလီၤ. ဒီးအဝဲမ့ၢ်တတဲတၢ်မ့ၢ်တၢ်တီဘၣ်ဒီး, ယွၤကဆိၣ်အၢအီၤလီၤ.

²⁵နသးမ့ၢ်စၢၢ်ဆၢဒၣ်ထဲလၢပှၤဂုၤပှၤဂၤတဖၣ်အတၢ်ဆိကမိၣ်လၢ နဖီခိၣ်န့ၣ်, မ့ၢ်တၢ်လီၤပျံၤဒိၣ်မးလီၤ. ဘၣ်ဆၣ်နမ့ၢ်နာ်ယွၤဒီးနကအိၣ်ခၢၣ် သနၢၣ်လီၤ.

²⁶ပှၤကိးဂၤန့ၢ်ဘၣ်ပှၤပၢတၢ်အတၢ်ဘၣ်သူၣ်ဘၣ်သးန့ၣ်လီၤ. ဘၣ်ဆၣ်ဒီး, တၢ်စံၣ်ညီၣ်တီန့ၣ်နမၤန့ၢ်သ့ထဲဒၣ်လၢယွၤတဂၤဧိၤအအိၣ်လီၤ.

²⁷ပှၤတီပှၤလိၤသးဟ့ပှၤအၢပှၤသီ, ဒီးပှၤအၢပှၤသီသးဟ့ ပှၤတီပှၤလိၤလီၤ.