Read S'gaw Karen လံာ်တၢ်ကူၣ်သ့အတၢ်ကတိၤ 31 Bible Online

လံာ်တၢ်ကူၣ်သ့အတၢ်ကတိၤ 31 - S'gaw Karen bible

လံာ်တၢ်ကူၣ်သ့အတၢ်ကတိၤ 31

¹အအံၤမ့ၢ်တၢ်ကတိၤသညူးသပှၢ်တဖၣ်လၢစီၤပၤလမူၤအ့လးအမိၢ်စံး ဘၣ်အီၤန့ၣ်လီၤ.

²ယဖိခွါဧၢ, ယဒၢလီၢ်အတၤသၣ်ဧၢ, ဖိခွါလၢအမ့ၢ်တၢ်ထု ကဖၣ်အတၢ်စံးဆၢဧၢ,

³မၤလၢာ်နဂံၢ်နဘါခဲလၢာ်လၢတၢ်မုာ်ဖံးမုာ်ညၣ်ဒီးနကျိၣ်နစ့ခဲ လၢာ်လၢပိာ်မုၣ်တဖၣ်အဃိတဂ့ၤ. အဝဲသ့ၣ်တဖၣ်မၤဟးဂီၤတ့ၢ် စီၤပၤတဖၣ်ဒၣ်လဲာ်လီၤ.

⁴ဒိကနၣ်ယၤတက့ၢ်စီၤလမူၤအ့လးဧၢ, စီၤပၤတဖၣ်တကြၢးအီ စပံးထံမ့ၢ်ဂ့ၤ, တကြၢးအိၣ်ဒီးသးလၢအဆၢအီသံးအီဂာ်မ့ၢ်ဂ့ၤ န့ၣ်ဘၣ်.

⁵ဖဲအဝဲသ့ၣ်အီတၢ်ဒီး, အဝဲသ့ၣ်သးပ့ၤနီၣ်ကွံာ်တၢ်သိၣ်တၢ်သီ တဖၣ်ဒီးကွၢ်ကပာ်ကွံာ်ပှၤလၢအလိၣ်ဘၣ်တၢ်မၤစၢၤတဖၣ်အခွဲး အယာ်န့ၣ်လီၤ.

⁶သံးဧိၤဂာ်ဧိၤမ့ၢ်ဒၣ်လၢပှၤအကသံတဖၣ်အဂီၢ်ဒီးပှၤလၢအသူၣ်ကိၢ် သးဂီၤတဖၣ်အဂီၢ်န့ၣ်လီၤ.

⁷ပျဲအဝဲသ့ၣ်အီဒၣ်ဝဲဒီးသးပ့ၤနီၣ်ကွံာ်အတၢ်ဖှီၣ်တၢ်ယာ်ဒီး အတၢ်သူၣ်တမုာ်သးတမုာ်န့ၣ်တက့ၢ်.

⁸ကတိၤထီၣ်တၢ်လၢပှၤလၢအကတိၤတၢ်လၢအဂီၢ်ဒၣ်ဝဲတသ့ တဖၣ်အဂီၢ်န့ၣ်တက့ၢ်. ပှၤလၢအမၤစၢၤလီၤအသးတသ့တဖၣ်န့ၣ်, ဒီဒၣ်အိၣ်ပှိၤအတၢ်အခွဲးအယာ်တဖၣ်တက့ၢ်.

⁹ကတိၤတၢ်လၢအဝဲသ့ၣ်အဂီၢ်ဒီးကဲထီၣ်စံၣ်ညီၣ်ကွီၢ်လၢအတီ တဂၤတက့ၢ်. ဒီဒၣ်အိၣ်ပှိၤပှၤဖှီၣ်ဖိဒီးပှၤလၢအတၢ်တအိၣ်တဖၣ်အတၢ်ခွဲး တၢ်ယာ်တဖၣ်တက့ၢ်.

¹⁰မါလၢအထီၣ်ဘးတဂၤန့ၣ်ပဃုထံၣ်န့ၢ်အီၤကီမးလဲၣ်. အဝဲလုၢ်ဒိၣ်ပှ့ၤဒိၣ်န့ၢ်ဒံးတၢ်မျၢ်ပလဲတဖၣ်တက့ၢ်လီၤ.

¹¹အဝၤပာ်အတၢ်နာ်နီၢ်နီၢ်လၢအပူၤအဃိဒီး, တဖှီၣ်လီၤယာ်လီၤဝဲ နီတစုဘၣ်.

¹²အတၢ်အိၣ်မူတစိၤဒၣ်အီၤန့ၣ်, မၤဂ့ၤအဝၤဒီးတမၤဘၣ်ဒိဘၣ်ထံး အီၤနီတစုဘၣ်.

¹³ဃုန့ၢ်ဝဲသိဆူၣ်ဒီးဘဲ, ဒီးမၤတၢ်လၢအစုတဖၣ်လီၤ.

¹⁴အဝဲဟဲက့ၤစိာ်တၢ်အီၣ်တၢ်အီလၢတၢ်လီၢ်တဖၣ် လၢတၢ်ဒ့ၣ်စၢၤဖးယံၤဆူဟံၣ်, ဒ်ပှၤကူၣ်တၢ်ကၤတၢ်အကဘီတဖၣ်မၤဝဲအသိးန့ၣ်လီၤ.

¹⁵ဆၢထၢၣ်လၢဂီၤထၢၣ်သၢဒ်သိးကကတဲာ်ကတီၤတၢ်အီၣ်တၢ်အီလၢအဒူၣ်ဖိ ထၢဖိအဂီၢ်ဒီးကတဲဘၣ်အခ့အပှၤပိာ်မုၣ်တဖၣ်လၢအကဘၣ်မၤတၢ်မနုၤ မနုၤအဂီၢ်န့ၣ်လီၤ.

¹⁶ဃုထံၣ်ဟီၣ်ခိၣ်ဒီးပှ့ၤဝဲ, ဒီးစ့လၢအမၤန့ၢ်ဝဲန့ၣ်အဝဲသူၣ်လီၤဖျးလီၤစပံးလီၢ်တလီၢ်န့ၣ်လီၤ.

¹⁷အဝဲမ့ၢ်ပှၤလၢအမၤတၢ်ဆူၣ်, အဂံၢ်အဘါဆူၣ်ဒီးမၤတၢ်ခုတဂၤန့ၣ် လီၤ.

¹⁸အဝဲသ့ၣ်ညါတၢ်လၢအမၤဝဲကိးမံၤဒဲးအလုၢ်အပှ့ၤဒီးမၤတၢ်တုၤ လၢမုၢ်နၤယိာ်ဒၣ်လဲာ်လီၤ.

¹⁹အဝဲလ့ၢ်အလုၣ်ဒၣ်ဝဲဒီးထါအကူအသိးဒၣ်ဝဲလီၤ.

²⁰အဝဲဟ့ၣ်တၢ်ညီလၢပှၤဖှီၣ်ဖိယာ်ဖိဒီးပှၤလၢအတၢ်တအိၣ်တဖၣ်န့ၣ် လီၤ.

²¹ဖဲမူခိၣ်ဖီလီၤန့ၣ်အဝဲတကိၢ်တၢ်ဂီၤတၢ်ဘၣ်. အဂ့ၢ်ဒ်အံၤ, အဟံၣ်ဖိဃီဖိအိၣ်ဒီးတၢ်ကူတၢ်ကၤအလၢၤန့ၣ်လီၤ.

²²အဝဲမၤလီၢ်မံဒါတဖၣ်ဒီးကူဝဲသိးဝဲတၢ်ကူတၢ်ကၤတဖၣ်လၢအဘၣ် တၢ်မၤအီၤလၢဘဲလုးတကုာ်အဂ့ၤကတၢၢ်န့ၣ်လီၤ.

²³အဝၤဘၣ်တၢ်သ့ၣ်ညါအီၤဂ့ၤမးမ့ၢ်လၢအမ့ၢ်ပှၤခိၣ်ပှၤနၢ်လၢ ထံဖိကီၢ်ဖိအဖျိးစိအကျါတဂၤအဃိန့ၣ်လီၤ.

²⁴အဝဲမၤတၢ်ကူတၢ်သိးဒီးယီၢ်တကိးတဖၣ်ဒီးဆါလီၤဝဲဆူ ပှၤကူၣ်တၢ်ကၤတၢ်တဖၣ်အအိၣ်န့ၣ်လီၤ.

²⁵အဝဲအဂံၢ်ဆူၣ်အဘါဆူၣ်ဒီးဘၣ်တၢ်ပာ်ကဲအီၤဒီးတပျံၤတၢ်လၢ ကကွၢ်ဆၢၣ်မဲာ်ခါဆူညါအဂီၢ်ဘၣ်.

²⁶အဝဲကတိၤတၢ်အိၣ်ဒီးတၢ်ကတိၤကပုာ်လုးဖိလၢတၢ်ကူၣ်သ့ တမံၤအပူၤန့ၣ်လီၤ.

²⁷အဝဲအတၢ်မၤအါထီဘိဒီးကွၢ်ထွဲအဟံၣ်ဖိဃီဖိအတၢ်လိၣ်တဖၣ် န့ၣ်လီၤ.

²⁸အဖိတဖၣ်ပာ်ဖျါအတၢ်စံးဘျုးစံးဖှိၣ်အီၤဒီးအဝၤန့ၣ်စံးထီၣ် ပတြၢၤအီၤလီၤ.

²⁹အဝဲစံးဝဲ, “ပိာ်မုၣ်အါဂၤမ့ၢ်မါလၢအဂ့ၤလီၤ. ဘၣ်ဆၣ်နဲနမ့ၢ်ပှၤအဂ့ၤကတၢၢ်လၢအဝဲသ့ၣ်ခဲလၢာ်အကျါလီၤ.”

³⁰တၢ်လီၤအဲၣ်လီၤကွံန့ၣ်လီန့ၢ်တၢ်သ့, ဒီးတၢ်ဃံတၢ်လၤန့ၣ် လီၤမၢ်ကွံာ်ဝဲလီၤ. မ့မ့ၢ်, ပိာ်မုၣ်တဂၤလၢအမၤလၤကပီၤယွၤန့ၣ်, ကြၢးဘၣ်တၢ်စံးထီၣ်ပတြၢၤအီၤလီၤ.

³¹ဟ့ၣ်အီၤတၢ်စံးထီၣ်ပတြၢၤလၢတၢ်လၢအမၤဝဲခဲလၢာ်အဃိ န့ၣ်တက့ၢ်. အဝဲကြၢးန့ၢ်ဘၣ်ပှၤခဲလၢာ်အတၢ်ပာ်ဒိၣ်ပာ်ကဲအီၤ န့ၣ်လီၤ.