Read S'gaw Karen လံာ်တၢ်ကူၣ်သ့အတၢ်ကတိၤ 4 Bible Online

လံာ်တၢ်ကူၣ်သ့အတၢ်ကတိၤ 4 - S'gaw Karen bible

လံာ်တၢ်ကူၣ်သ့အတၢ်ကတိၤ 4

¹ယဖိခွါသ့ၣ်ဧၢ, ဒိကနၣ်တၢ်လၢသုပၢ်သိၣ်လိသီလိသုတက့ၢ်. ပာ်သူၣ်ပာ်သးသပှၢ်ပှၢ်ဒီးသုကအိၣ်ဒီးတၢ်သ့ၣ်ညါနၢ်ပၢၢ်လီၤ.

²တၢ်လၢယသိၣ်လိသီလိသုန့ၣ်မ့ၢ်တၢ်အဂ့ၤ, အဃိဒီးသ့ၣ်နီၣ်ထီၣ်က့ၤအီၤခဲလၢာ်တက့ၢ်.

³ဖဲယမ့ၢ်ဒံးဖိသၣ်ဆံးတဂၤ, ယမိၢ်ယပၢ်အဖိခွါထဲတဂၤဧိၤအခါ,

⁴ယပၢ်သိၣ်လိသီလိယၤလီၤ. အဝဲစံးဝဲ, “သ့ၣ်နီၣ်ထီၣ်တၢ်လၢ ယစံးဘၣ်နၤဒီးသးပ့ၤနီၣ်အီၤနီတစုတဂ့ၤ. မၤဒ်ယစံးဘၣ်နၤအသိးဒီးနကမူလီၤ.

⁵မၤန့ၢ်တၢ်ကူၣ်သ့ဒီးတၢ်ထံၣ်တၢ်လၢသးအမဲာ်တက့ၢ်. သးပ့ၤနီၣ်ဒီးလဲၤသဒၣ်တၢ်လၢယစံးဘၣ်နၤန့ၣ်တဂ့ၤ.

⁶ညိကွံာ်တၢ်ကူၣ်သ့တဂ့ၤ. ဒီးအဝဲဒၣ်ကဒီဒၣ်နၤလီၤ. အဲၣ်အီၤတက့ၢ်. ဒီးအဝဲဒၣ်ကပၢၤဃာ်နၤလီၤ.

⁷တၢ်မၤန့ၢ်တၢ်ကူၣ်သ့, မ့ၢ်တၢ်အကါဒိၣ်ကတၢၢ်လၢနမၤအီၤသ့လီၤ. မၤန့ၢ်တၢ်ထံၣ်တၢ်လၢသးအမဲာ်လၢတၢ်တမံၤလၢ်လၢ်လၢနမၤန့ၢ်အီၤ အပူၤန့ၣ်တက့ၢ်.

⁸အဲၣ်တၢ်ကူၣ်သ့တက့ၢ်. ဒီးအဝဲဒၣ်ကပာ်ဒိၣ်ပာ်ထီနၤလီၤ. ဖိးဟုအီၤတက့ၢ်. ဒီးအဝဲကဟဲစိာ်န့ၢ်နၤတၢ်လၤကပီၤလီၤ.

⁹အဝဲကမ့ၢ်နတၢ်လၤကပီၤအခိၣ်သလုးန့ၣ်လီၤ.”

¹⁰ယဖိခွါဧၢ, ဒိကနၣ်ယၤတက့ၢ်. တၢ်လၢယစံးဘၣ်နၤန့ၣ်, တူၢ်လိာ်ပာ်ကဲအီၤလ့ၤတုာ်လ့ၤတီၤတက့ၢ်. ဒီးနကအိၣ်မူအါနံၣ်အါလါလီၤ.

¹¹ယသိၣ်လိတ့ၢ်နၤလၢတၢ်ကူၣ်သ့ဒီးကျဲအဘၣ်လၢနကအိၣ်မူထွဲ အဂီၢ်လီၤ.

¹²နမ့ၢ်လဲၤတၢ်လၢတၢ်ကူၣ်သ့အပူၤဒီးတၢ်မၤတံာ်တာ်တအိၣ်ဝဲ လၢနကျဲပူၤဘၣ်. ဒီးတုၤနဃ့ၢ်ဒီးနခီၣ်တဘၣ်တိၢ်ဘၣ်ဝဲဘၣ်.

¹³သ့ၣ်နီၣ်တၢ်လၢနမၤလိတ့ၢ်တဖၣ်ထီဘိတက့ၢ်. နတၢ်မၤလိမၤဒိးန့ၣ်မ့ၢ်နတၢ်မူလီၤ.

¹⁴လဲၤတၢ်လၢပှၤအၢပှၤသီအကျဲတဂ့ၤ. ဒီးပိာ်ထွဲပှၤတတီတလိၤအကျဲဧိၤကပူၤဧိၤတဂ့ၤ.

¹⁵မၤအီၤတဂ့ၤ. ဟးဆှဲးတၢ်အၢတၢ်သီတက့ၢ်. ဂ့ၢ်လိာ်အီၤဒီးလဲၤလၢနကျဲဒၣ်နဲတက့ၢ်.

¹⁶ပှၤတတီတလိၤတဖၣ်န့ၣ်, မ့ၢ်တမၤကမၣ်ဘၣ်တၢ်တမံၤမံၤဒီးမံဝဲ တန့ၢ်ဘၣ်. မ့ၢ်တမၤဆါဘၣ်ပှၤတဂၤဂၤဘၣ်ဒီး, တမံဘၣ်ဝဲဘၣ်.

¹⁷အဂ့ၢ်ဒ်အံၤ, တၢ်တတီတလိၤဒီးတၢ်မၤဆူၣ်မၤစိးတဖၣ်လီၤဂာ်ဒီး တၢ်အီၣ်တၢ်အီလၢအဝဲသ့ၣ်အဂီၢ်န့ၣ်လီၤ.

¹⁸ကျဲလၢပှၤတီပှၤလိၤပိာ်ဝဲန့ၣ်လီၤဂာ်ဒ်မုၢ်ဟဲထီၣ်ဒီးကပီၤ ဒံးယံာ်ဒံးဂ့ၤထီၣ်တုၤလၢမုၢ်ထူၣ်အသိးန့ၣ်လီၤ.

¹⁹မ့မ့ၢ်, ပှၤတတီတလိၤအကျဲခံးဝဲဒ်မုၢ်နၤအသိးလီၤ. အဝဲသ့ၣ်လီၤဃံၤဝဲဒီးအခီၣ်ဘၣ်တိၢ်လၢမနုၤမနုၤလဲၣ်န့ၣ် အဝဲသ့ၣ်ထံၣ်ဝဲတသ့ဘၣ်.

²⁰ယဖိခွါဧၢ, ပာ်သူၣ်ပာ်သးသပှၢ်ပှၢ်လၢတၢ်လၢယစံးဘၣ်နၤန့ၣ် တက့ၢ်. ဒိကနၣ်ယတၢ်ကတိၤတဖၣ်တက့ၢ်.

²¹ပျဲအလဲၤပူၤကွံာ်နၤနီတစုတဂ့ၤ. သ့ၣ်နီၣ်ထီၣ်အီၤဒီးပၢၤ အီၤလၢနသးကံၢ်ပူၤတက့ၢ်.

²²အဝဲသ့ၣ်ကဟ့ၣ်တၢ်မူဒီးတၢ်အိၣ်ဆူၣ်အိၣ်ချ့ဆူပှၤ တဂၤလၢ်လၢ်လၢအသ့ၣ်ညါနၢ်ပၢၢ်အီၤန့ၣ်လီၤ.

²³နဆိကမိၣ်တၢ်ဒ်လဲၣ်ဒ်လဲၣ်န့ၣ်ပလီၢ်နသးတက့ၢ်. အဂ့ၢ်ဒ်အံၤ, နတၢ်အိၣ်မူအက့ၢ်အဂီၤမ့ၢ်တၢ်ဒ်နတၢ်ဆိကမိၣ်တဖၣ်အသိးလီၤ.

²⁴တၢ်တတီတလိၤန့ၣ်ကတိၤအီၤနီတစုတဂ့ၤ. မၤဘၣ်ထွဲနသးဒီးတၢ်လီတၢ်ဝ့ၤ, ဒီးတၢ်ကတိၤတဖၣ်လၢကဆှၢ ကမၣ်တၢ်နၢ်ပၢၢ်န့ၣ်တဂ့ၤ.

²⁵မ်နမဲာ်ကွၢ်တၢ်ဆူညါလိၤလိၤအိၣ်ဒီးတၢ်နာ်တၢ်နီၢ်နီၢ်ဒီး ဆှိလီၤနခိၣ်လၢတၢ်မဲာ်ဆှးအပူၤတဂ့ၤ.

²⁶တၢ်လၢနမၤအီၤန့ၣ်, ရဲၣ်လီၤကျဲၤလီၤအီၤလီၤတံၢ်လီၤဆဲးတက့ၢ်. ဒီးတၢ်လၢနမၤအီၤတမံၤလၢ်လၢ်န့ၣ်ကဘၣ်ဘျီးဘၣ်ဒါဝဲလီၤ.

²⁷ဟးဆှဲးတၢ်အၢတၢ်သီဒီးလဲၤတၢ်ဆူညါလိၤလိၤတက့ၢ်. သုးကွံာ်နခီၣ်ခါတကါဒၣ်လဲာ်လၢကျဲအဘၣ်တဂ့ၤ.