Read S'gaw Karen လံာ်ပှၤစံၣ်တဲၤတဲလီၤတၢ် 1 Bible Online

လံာ်ပှၤစံၣ်တဲၤတဲလီၤတၢ် 1 - S'gaw Karen bible

လံာ်ပှၤစံၣ်တဲၤတဲလီၤတၢ် 1

¹တၢ်တဖၣ်အံၤမ့ၢ်စီၤဒၤဝံးအဖိခွါ, စီၤပၤလၢယရူၤၡလ့ၣ်အ ပူၤ, ပှၤဆိကမိၣ်တၢ်အဒိၣ်အယိာ်တဂၤအတၢ်ကတိၤတဖၣ်န့ၣ်လီၤ.

²တၢ်အဘျုးတအိၣ်ဘၣ်. အဘျုးတအိၣ်ဘၣ်, ပှၤဆိကမိၣ်တၢ်အဒိၣ်အယိာ်တဂၤစံးဝဲဒၣ်လီၤ. တၢ်အိၣ်မူအံၤအဘျုးတအိၣ်ဘၣ်. တၢ်ခဲလၢာ်န့ၣ်အဘျုး တအိၣ်ဘၣ်.

³နမၤလၢာ်နတၢ်အိၣ်မူလၢတၢ်ဖံးတၢ်မၤ, တၢ်ကျဲးစၢးလၢာ်ဂံၢ်လၢာ်ဘါ, ဘၣ်ဆၣ်ဒီးနအိၣ်ဒီးတၢ်မနုၤလၢနကပာ်ကဖၢလၢနသးအဂီၢ်လဲၣ်.

⁴ပှၤအစိၤတဖၣ်ဟဲဝဲဒီးပှၤအစိၤတဖၣ်လဲၤဝဲလီၤ. ဘၣ်ဆၣ်, ဟီၣ်ခိၣ်အိၣ်ဒၣ်ဒ်အလီၢ်လီၢ်လီၤ.

⁵မုၢ်ဟဲထီၣ်ဒံးဒၣ်တၢ်ဒီးလီၤနုာ်ဒံးဒၣ်တၢ်ဒီးက့ၤကဒါက့ၤ လၢတၢ်လီၤဘှံးလီၤတီၤအပူၤဆူတၢ်လီၢ်လၢကဘၣ်စးထီၣ်ကဒီး အသးန့ၣ်လီၤ.

⁶ကလံၤအူဆူကလံၤထံး, ကလံၤအူဆူကလံၤစိး, လဲၤတရံးတဝီဝံၤတဝီဒီးဟဲက့ၤကဒီးလီၤ.

⁷ထံကျိကိးဘိဒဲးယွၤနုာ်လီၤဆူပီၣ်လဲၣ်ပူၤ, ဘၣ်ဆၣ်ဒီးပီၣ်လဲၣ်တပှဲၤဒံးဒၣ်လဲာ်ဘၣ်. ထံက့ၤကဒါက့ၤဆူထံ ကျိတဖၣ်အိၣ်ထီၣ်အခီၣ်ထံး, ဒီးစးထီၣ်က့ၤအသးတဘျီကဒီးန့ၣ်လီၤ.

⁸တၢ်ခဲလၢာ်ဆှၢတၢ်ဆူတၢ်ဘှံးသူၣ်တီၤသးအပူၤ, တၢ်ဘှံးသူၣ်တီၤသးလၢအဒိၣ်ကဲၣ်ဆိးတုၤပတဲလၢတၢ်ကတိၤ တဖၣ်တသ့ဘၣ်န့ၣ်လီၤ. ပမဲာ်ချံတဖၣ်ကွၢ်တၢ်သနာ်က့, တလၢကွၢ်ဘၣ်. ပနၢ်တဖၣ်တလၢနၢ်ဟူတၢ်ဘၣ်.

⁹တၢ်လၢအမၤတ့ၢ်လံအသးလၢညါန့ၣ်ကမၤကဒီးအသးလီၤ. တၢ်လၢတၢ်မၤတ့ၢ်လံအီၤလၢညါန့ၣ်, ကဘၣ်တၢ်မၤကဒီးအီၤလီၤ. တၢ်အသီတအိၣ်လၢဟီၣ်ခိၣ်ချၢနီတမံၤဘၣ်.

¹⁰အဝဲသ့ၣ်စံးဝဲ, “ကွၢ်တက့ၢ်. တၢ်အသီအိၣ်ဖဲအံၤတမံၤလီၤ.” ဘၣ်ဆၣ်, တမ့ၢ်ဘၣ်. တၢ်န့ၣ်မၤတ့ၢ်လံအသးလၢညါဃဲးဃဲး, လၢပတချုးအိၣ်ဖျဲၣ်ထီၣ်ဒံးဒၣ်လဲာ်န့ၣ်လီၤ.

¹¹တၢ်လၢအမၤတ့ၢ်အသးလၢအပူၤကွံာ်န့ၣ်, ပှၤတသ့ၣ်နီၣ်လၢၤနီတဂၤ ဘၣ်. ဒီးလၢမုၢ်နံၤလၢအကဟဲတဖၣ်အပူၤန့ၣ်, ပှၤတသ့ၣ်နီၣ်ထီၣ်လၢၤတၢ်မၤတ့ၢ်အသးလၢညါဒီးတၢ်မၤအသးခဲအံၤ အဘၢၣ်စၢၤနီတဂၤဘၣ်.

¹²ယၤ, ပှၤဆိကမိၣ်တၢ်အဒိၣ်အယိာ်, ယမ့ၢ်တ့ၢ်စီၤပၤလၢကီၢ်အံၣ်စရ့ လးအဖီခိၣ်လၢဝ့ၢ်ယရူၤၡလ့ၣ်အပူၤန့ၣ်လီၤ.

¹³ယပာ်လီၤယသးလၢယကသမံသမိးဒီးမၤလိတၢ်ခဲလၢာ်လၢအဘၣ်တၢ်မၤ တ့ၢ်အီၤလၢဟီၣ်ခိၣ်ချၢအံၤန့ၣ်လီၤ.

¹⁴ယထံၣ်တ့ၢ်တၢ်ခဲလၢာ်လၢတၢ်မၤတ့ၢ်လံအီၤလၢဟီၣ်ခိၣ်အံၤ, ဒီးယစံးဘၣ်နၤ, တၢ်ခဲလၢာ်န့ၣ်အဘျုးတအိၣ်ဘၣ်. မၤအသးဒ်တၢ်လူၤဖီၣ်ကလံၤအသိးန့ၣ်လီၤ.

¹⁵တၢ်လၢအက့ၣ်န့ၣ်နမၤဘျၢအီၤတန့ၢ်ဘၣ်. တၢ်လၢအတအိၣ်ဘၣ်တဖၣ်န့ၣ်, နဂံၢ်အီၤတသ့ဘၣ်.

¹⁶ယစံးလီၤတ့ၢ်ယသး, ယကဲထီၣ်ပှၤဖးဒိၣ်တဂၤလံ. ယကူၣ်သ့ဒိၣ်န့ၢ်ဒံးပှၤတဂၤဂ့ၤတဂၤဂ့ၤလၢအပၢဝ့ၢ်ယရူၤၡလ့ၣ် လၢယမဲာ်ညါန့ၣ်လီၤ. တၢ်ကူၣ်သ့ဒီးတၢ်သ့ၣ်ညါ နီၢ်နီၢ်မ့ၢ်တၢ်မနုၤလဲၣ်န့ၣ်, ယသ့ၣ်ညါယဲလီၤ.

¹⁷ယပာ်လီၤယသးလၢယကမၤလိတၢ်သ့ၣ်ညါဒီးတၢ်သးတဆး, တၢ်ကူၣ်သ့ဒီးတၢ်ပျုၢ်အတၢ်လီၤဆီန့ၣ်လီၤ. ဘၣ်ဆၣ်ယထံၣ်သ့ၣ်ညါလၢအအံၤစ့ၢ်ကီးကမ့ၢ်ဒၣ်တၢ်လူၤဖီၣ်ကလံၤ န့ၣ်လီၤ.

¹⁸နဒံးကူၣ်သ့ဒီးနတၢ်ကိၢ်တၢ်ဂီၤဒံးအါထီၣ်လီၤ. နတၢ်သ့ၣ်ညါဒံးအါ, တၢ်န့ၣ်မၤဘၣ်ဒိဘၣ်ထံးနၤဒံးဒိၣ်န့ၣ်လီၤ.