Read S'gaw Karen လံာ်ယၡါယၤ 1 Bible Online

လံာ်ယၡါယၤ 1 - S'gaw Karen bible

လံာ်ယၡါယၤ 1

¹လံာ်အံၤအိၣ်ဃုာ်ဒီးတၢ်ကစီၣ်ဘၣ်ဃးကီၢ်ယူဒၤ ဒီးဝ့ၢ်ယရူၤၡလ့ၣ်အဂ့ၢ်လၢကစၢ်ယွၤလီၣ်ဖျါထီၣ်တ့ၢ်ဆူစီၤအၤမိာ် အဖိခွါဝံယၡါယၤဖဲစီၤဧူးစံယါ, စီၤယိၤသၣ်, စီၤအၤဃး, ဒီးစီၤ ဃံးစကံယၤမ့ၢ်စီၤပၤတဖၣ်လၢကီၢ်ယူဒၤအဆၢကတီၢ်န့ၣ်လီၤ.

²ယွၤစံးဝဲဒၣ်, “ဟီၣ်ခိၣ်ဒီးမူခိၣ်ဧၢ, ကနၣ်တၢ်လၢယကတိၤ အီၤတက့ၢ်. ဖိလၢယလုၢ်ဒိၣ်ထီၣ်အီၤတဖၣ်ပူထီၣ်တၢ်ထီဒါ တ့ၢ်ယၤလီၤ.

³ဂီၤဘုၣ်ဂီၤဖံးသ့ၣ်ညါအကစၢ်, ဒီးကသ့ၣ်ယီၤတဖၣ်သ့ၣ်ညါ အကစၢ်လုၢ်အီၣ်လုၢ်အီအီၤဖဲလဲၣ်န့ၣ်လီၤ. ဘၣ်ဆၣ်တၢ်အံၤအါ န့ၢ်ဒံးတၢ်လၢယပှၤဂီၢ်မုၢ်အံၣ်စရ့လးသ့ၣ်ညါဝဲန့ၣ်လီၤ. အဝဲသ့ၣ်တနၢ်ပၢၢ်ဒၣ်လဲာ်ဘၣ်.”

⁴ပှၤတၢ်ဒဲးဘးဖိတကလုာ်, ပှၤဟးဂီၤဒီးပှၤအၢပှၤသီသ့ၣ်ဧၢ, သုဘၣ်တၢ်စံၣ်ညီၣ်ဃါမနၤလီၤ. သုတၢ်ဒဲးဘးတဖၣ်ထုး လီၤသုဒီးသုတတူၢ်လိာ်ကစၢ်, အံၣ်စရ့လးအကစၢ်ယွၤစီဆှံ ဘၣ်, ဒီးသုဒီသုချၢလၢအီၤလီၤ.

⁵ဘၣ်မနုၤအဃိသုပူထီၣ်ဒံးအီၤန့ၣ်လဲၣ်. မ့ၢ်သုအဲၣ်ဒိးတၢ်စံၣ် ညီၣ်သုအါန့ၢ်ဒံးအလီၢ်အံၤဧါ. အံၣ်စရ့လးဧၢ, သုခိၣ် ဘၣ်တၢ်ကးဘၢတ့ၢ်လံအီၤလၢတၢ်ပူၤလီၢ်ပူၤကျဲတဖၣ်ဒီး သုသးဒီးတၢ်ဆိကမိၣ်တဖၣ်ဆိးက့ဝဲလီၤ.

⁶စးထီၣ်လၢခိၣ်ဒီးတုၤလၢခီၣ်န့ၣ်, လၢသုနီၢ်ခိအဖီခိၣ်တၢ်အ မုာ်အဂ့ၤတအိၣ်နီတတီၤလၢၤဘၣ်. သုဘၣ်တၢ်ကးဘၢသုဒီး တၢ်ဘၣ်တီၢ်အလီၢ်, တၢ်ပူၤလီၢ်ပူၤကျဲ, ဒီးတၢ်ဘၣ်ဒိဘၣ်ထံးသ့ၣ်မုၢ်သ့ၣ် ဖးတဖၣ်လီၤ. သုပူၤလီၢ်ပူၤကျဲတဖၣ်တဘၣ်တၢ်မၤကဆှဲ ကဆှီအီၤဒီးဘိၣ်ဘံၣ်ဘၢအီၤဘၣ်. တဘၣ်တၢ်ဖူ အီၤလၢကသံၣ်ဖူစ့ၢ်ကီးဘၣ်.

⁷သုထံသုကီၢ်ဘၣ်တၢ်မၤဟးဂီၤမၤလီၤဃီအီၤ, ဒီးသုဝ့ၢ်တဖၣ်ဘၣ်တၢ်ဒွဲၣ်အူလီၤပှီၢ်အီၤန့ၣ်လီၤ. ဖဲသုကွၢ်ဒံးတၢ်န့ၣ်, ပှၤတခီဘီမုၢ်ဖိတဖၣ်ဟံး န့ၢ်ကွံာ်သုထံသုကီၢ်ဒီးမၤဟးဂီၤကွံာ် တၢ်ခဲလၢာ်န့ၣ်လီၤ.

⁸အိၣ်လီၤတဲာ်တ့ၢ်ဒၣ်ထဲဝ့ၢ်ယရူၤၡလ့ၣ် တဖျၢၣ်ဧိၤလၢတၢ်ကဝီၤတံၢ်ဃးအီၤဒီး မၤစၢၤဒီဒၣ်လီၤက့ၤအသးတသ့ဘၣ်ဒ်ပှၤပၢၤ တၢ်ဖိအဒဲလၢစပံးလီၢ်အပူၤ, မ့တမ့ၢ်, ဒ်ဒဲဖိတဖျၢၣ်လၢဒံအကျီးပူၤအသိးန့ၣ်လီၤ.

⁹ယွၤသ့တၢ်လၢာ်တဂၤမ့ၢ်တပျဲပှၤမူတ့ၢ်တနီၤဘၣ်ဒီး, ဝ့ၢ်ယရူၤၡလ့ၣ်ကဘၣ်တၢ်မၤဟးဂီၤတ့ၢ်အီၤလၢာ်လၢာ်ဆ့ ဆ့ဒ်ပှၤအိၣ်လၢဝ့ၢ်စဒိၣ်ဒီးဂမိရၤတဖၣ်အသိးန့ၣ်လီၤ.

¹⁰ယရူၤၡလ့ၣ်ဧၢ, နပှၤပၢတၢ်တဖၣ်ဒီး နပှၤဂီၢ်မုၢ်တဖၣ်လီၤဂာ်ဒၣ်ဒီးပှၤအိၣ်လၢဝ့ၢ်စဒိၣ်ဒီးဂမိရၤတဖၣ်လီၤ. ကနၣ်တၢ်လၢယွၤစံးဘၣ်နၤန့ၣ်တက့ၢ်. ပာ်သူၣ်ပာ်သးလၢတၢ်လၢ ပကစၢ်ယွၤသိၣ်လိသီလိနၤန့ၣ်တက့ၢ်.

¹¹အဝဲစံး, “မ့ၢ်သုဆိကမိၣ်လၢယသးလီကယဲၢ်တၢ်လုၢ်တၢ်ပာ်တဖၣ် လၢသုလုၢ်ထီၣ်ယၤတထံၣ်ဃီအံၤန့ၣ်ဧါ. သိတဖၣ်လၢသုဒွဲၣ် အူအီၤလၢမ့ၣ်အူဒ်တၢ်လုၢ်တၢ်ပာ်တဖၣ် အသိးဒီးသုဆၣ်ဖိကီၢ်ဖိအဂ့ၤတဖၣ်အသိန့ၣ်ယဒိးန့ၢ်တ့ၢ်အီၤ အါန့ၣ်ယလိၣ်ဘၣ်အီၤလံ. ယသးလၢာ်ဂီၤဖံးတဖၣ်, သိတဖၣ်, ဒီးမဲာ်တဲးလဲးတဖၣ်အသွံၣ်လံ.

¹²မ့ၢ်မတၤမၢသုလၢသုကဘၣ်ဟဲစိာ်တၢ်သ့ၣ်တဖၣ် အံၤဖဲသုဟဲဘူၣ်ထီၣ်ဘါထီၣ်ယၤအကတီၢ်န့ၣ်လဲၣ်. မ့ၢ်မတၤမၢသုလၢသုကဝ့ၤဝီၤဟးထီၣ်ဟးလီၤတၢ်လၢ ယတၢ်လုၢ်ဟံၣ်ပူၤအံၤန့ၣ်လဲၣ်.

¹³သုဟဲစိာ်သုတၢ်လုၢ်မၤဘူၣ်တဖၣ်န့ၣ်အဘျုးတအိၣ် ဘၣ်. တၢ်နၢမူတဖၣ်လၢသုဒွဲၣ်ထီၣ်အီၤန့ၣ်ယသးဘၣ် အၢဘၣ်သီအီၤလီၤ. သုလါထီၣ်သီအမူးတဖၣ်, သုမုၢ်အိၣ်ဘှံးအနံၤတဖၣ်ဒီးသုတၢ်ဘူၣ်တၢ်ဘါ အတၢ်ရ့လိာ်မုာ်လိာ်တဖၣ်, ယတူၢ်အီၤတပှဲၤဘၣ်. သုတၢ်ဒဲးဘးတၣ်မၤဟးဂီၤကွံာ်တၢ်န့ၣ်တဖၣ်ခဲလၢာ်လီၤ.

¹⁴ယသးဟ့သုလါထီၣ်သီအမူးတဖၣ်ဒီးသုမုၢ်နံၤစီဆှံတဖၣ်လီၤ. မ့ၢ်တၢ်ဝံတၢ်ယိးလၢအဒုးဘှံးသူၣ်တီၤသးယၤလီၤ.

¹⁵ဒီးတုၤသုယူာ်ထီၣ်သုစုလၢတၢ် ထုကဖၣ်အပူၤဒီး, ယတကွၢ်သုဘၣ်. သုဘါထုကဖၣ်ထဲထဲအံၤနာ်က့, ယတဒိကနၣ်ဘၣ်. အဂ့ၢ်ဒ်အံၤ, သုစုတဖၣ်ပှဲၤဒီးတၢ်သွံၣ်လီၤ.

¹⁶သ့စီကွံာ်သုသးဒီးမၤကဆှီထီၣ်သုသးတက့ၢ်. ဆိကတီၢ်တၢ်အၢလၢယထံၣ်လၢသုမၤအီၤအံၤန့ၣ်တက့ၢ်. မ့ၢ်လီၤ, ဆိကတီၢ်တၢ်မၤအၢမၤသီတၢ်,

¹⁷ဒီးမၤလိမၤတၢ်အဘၣ်တက့ၢ်. တၢ်စံၣ်ညီၣ်တီမၤအသးကစီ ဒီဧါန့ၣ်, ပာ်သူၣ်ပာ်သးတက့ၢ်. မၤစၢၤပှၤလၢအဘၣ်တၢ်မၤ အၢမၤနးအီၤတဖၣ်တက့ၢ်. ဟ့ၣ်ဖိၣ်ဃဲတဖၣ်အတၢ်ခွဲးတၢ်ယာ်, ဒီးဒီဒၣ်အိၣ်ပှိၤမုၣ်ကမဲတဖၣ်တက့ၢ်.”

¹⁸ယွၤစံးဝဲဒၣ်, “ခဲကနံၣ်အံၤ, မ်ပမၤလိၤမၤဘၣ်သကိးတၢ်ဂ့ၢ် န့ၣ်တက့ၢ်. သုဘၣ်အၢဘၣ်သီဂီၤဆှုၣ်ကလာ်လၢတၢ်ဒဲးဘးအဃိ, ဘၣ်ဆၣ်ဒီးယကသ့စီသုဝါဒ်မူခိၣ်ဖီအသိးလီၤ. သုတၢ်ဘၣ်အၢတဖၣ် မ့ၢ်ဂီၤဆှုၣ်ကလာ်နာ်က့သုကဝါဒ်သိအဆူၣ်အသိးလီၤ.

¹⁹ထဲသုမ့ၢ်ဒိကနၣ်ယၤန့ၣ်ဒီး, သုကအီၣ်တၢ်အဂ့ၤတဖၣ်လၢ ထံကီၢ်ဟ့ၣ်ထီၣ်ဝဲန့ၣ်လီၤ.

²⁰ဘၣ်ဆၣ်သုမ့ၢ်ခီၣ်ဆၢယၤဒီး, သုကဘၣ်တၢ်စံၣ်ညီၣ်ဃါမနၤ ဆူတၢ်သံလီၤ. ယၤ, ယွၤန့ၣ်, ကတိၤလံတၢ်လံ.”

²¹ဝ့ၢ်လၢတဘျီအကလုၢ်တီဝဲန့ၣ်, အိၣ်မူမၤဝဲဒ်ဃဲသဲမုၣ်တဂၤ အသိးလီၤ. တဘျီန့ၣ်, ပှဲၤဝဲဒီးပှၤတီပှၤလိၤတဖၣ်, ဘၣ်ဆၣ်ခဲအံၤအိၣ်တီၢ်ဒၣ်ထဲပှၤ မၤသံတၢ်တဖၣ်လီၤ.

²²ယရူၤၡလ့ၣ်ဧၢ, တဘျီန့ၣ်နလီၤဂာ်ဒ်စ့အသိး, ဘၣ်ဆၣ်အခဲအံၤနလုၢ်နပှ့ၤတအိၣ်ဘၣ်. တဘျီန့ၣ်နလီၤဂာ်ဒီးစပံး ထံလၢအဂ့ၤ, ဘၣ်ဆၣ်အခဲအံၤနမ့ၢ်ဒၣ်ထဲထံလီၤ.

²³နပှၤခိၣ်ပှၤနၢ်တဖၣ်န့ၣ်မ့ၢ်ပှၤပူထီၣ်တၢ်ဒီးမ့ၢ်တၢ်ဘျၣ်တဖၣ်အတံၤ သကိးလီၤ. အဝဲသ့ၣ်တူၢ်လိာ်တၢ်ဟ့ၣ်တဖၣ်ဒီးခိၣ်ဖးလာ်ဆှိးတဖၣ် ထီဘိလီၤ. အဝဲသ့ၣ်တဒီဒၣ်အိၣ်ပှိၤပှၤဖိၣ်ဃဲတဖၣ်လၢ ကွီၢ်ဘျီၣ်ပူၤမ့ၢ်ဂ့ၤ, တဒိကနၣ်ဝဲဒၣ်ဖဲမုၣ်ကမဲတဖၣ်ဆှၢထီၣ် အကွီၢ်မ့ၢ်ဂ့ၤနီတစုဘၣ်ဒီးပှၤမုၣ်ကမဲတဖၣ်အတၢ်လိာ်ကွီၢ်န့ၣ်, တဒိကနၣ်ဝဲဘၣ်.

²⁴မၤသးဒ်န့ၣ်ဒီး, ခဲကနံၣ်အံၤ, ဒိကနၣ်တၢ်လၢယွၤသ့တၢ်လၢာ်, အံၣ်စရ့လးအကစၢ်ယွၤလၢအ စိဒိၣ်ကမီၤဒိၣ်တဂၤစံးဝဲ, “ယဒုၣ်ယဒါသ့ၣ်ဧၢ, ယကဟ့ၣ်ကၣ်သုဒီးသုမၤကီမၤခဲယၤတသ့လၢၤနီတမံၤဘၣ်လီၤ.

²⁵ယကမၤတၢ်ထီဒါသုလီၤ. ယကမၤကဆှီသုဒ်တိၢ်ဧိၤထးဧိၤဘၣ်တၢ်မၤဆှံထီၣ်အီၤအသိး ဒီးသုးကွံာ်ကယဲၢ်သုတၢ်တကဆှီခဲလၢာ်န့ၣ်လီၤ.

²⁶ယကဟ့ၣ်လီၤသုလၢပှၤပၢတၢ်ဒီးပှၤဟ့ၣ်ကူၣ်တၢ်တဖၣ်, ဒ်ပှၤတဖၣ်လၢသုဒိးန့ၢ်တ့ၢ်လၢပျၢၤအသိးလီၤ. အန့ၣ်တစုဝ့ၢ်ယရူၤၡလ့ၣ် ကဘၣ်တၢ်ကိးအီၤလၢဝ့ၢ်လၢအတီအလိၤဒီးဝ့ၢ်လၢအသူၣ် တီသးတီန့ၣ်လီၤ.”

²⁷မ့ၢ်လၢယွၤတီဝဲလိၤဝဲအဃိဒီး, အဝဲကအုၣ်က့ၤခီၣ်က့ၤဝ့ၢ်ယ ရူၤၡလ့ၣ်ဒီးပှၤအိၣ်ဖဲန့ၣ်ကိးဂၤဒဲးလၢအပီၢ်ယၢ်လီၤက့ၤအသးလီၤ.

²⁸မ့မ့ၢ်, ပှၤလၢအမၤတၢ်ဒဲးဘးဒီးပူထီၣ်ထီဒါအီၤန့ၣ်, ကမၤလီၤသဘှံးဝဲကိးဂၤဒဲးလီၤ. အဝဲကမၤသံပှၤကိးဂၤဒဲး လၢအညိကွံာ်အီၤန့ၣ်လီၤ.

²⁹မ့ၢ်လၢသုဘူၣ်ထီၣ်ဘါထီၣ်တ့ၢ်သ့ၣ်ထူၣ်တဖၣ်ဒီးသုသူၣ်လီၤတ့ၢ် ဘၣ်ဖီကရၢၢ်စီဆှံတဖၣ်ဒီး, သုသးကအုးလၢတၢ်န့ၣ်အဃိလီၤ.

³⁰သုကဃ့ထီၣ်ကွံာ်ဝဲဒ်သ့ထိးဖၣ်တထံးလၢအကသံဝဲအသိး, ဒီးဒ်ဖီကရၢၢ်တခါလၢပှၤတလူထံနီတဂၤအသိးလီၤ.

³¹ဒ်ဘုလီၢ်လၢမ့ၣ်အူအီၣ်အီၤခီဖျိမ့ၣ်အူဖီတဖီးအသိး, ပှၤလၢအဂံၢ်ဆူၣ်ဘါဆူၣ်တဖၣ်ကဘၣ်တၢ်မၤဟးဂီၤအီၤ ခီဖျိအတၢ်မၤအအၢအသီတဖၣ်, ဒီးပှၤဆိကတီၢ်ကွံာ်တၢ်မၤ ဟးဂီၤအံၤတသ့နီတဂၤဘၣ်.