Read S'gaw Karen လံာ်ယၡါယၤ 11 Bible Online

လံာ်ယၡါယၤ 11 - S'gaw Karen bible

လံာ်ယၡါယၤ 11

¹အစီၤလိၣ်စီၤပၤအတၢ်လီၤစၢၤလီၤသွဲၣ်လၢစီၤဒၤဝံးန့ၣ်လီၤ ဂာ်ဒ်သ့ၣ်တထံးလၢအဘၣ်တၢ်ကူာ်လီၤကွံာ်အီၤအသိးလီၤ. ဘၣ်ဆၣ်ဒီး, ဒ်သ့ၣ်ဒ့အသီတဖၣ်ဟဲဒိးပဒုၣ်ထီၣ်ဝဲလၢသ့ၣ်ခိၣ် ဆၢၣ်အလိၤအသိးန့ၣ်, စီၤပၤအသီတဂၤကဟဲအိၣ်ထီၣ်ဝဲလၢစီၤဒၤ ဝံးအစၢၤအသွဲၣ်တဖၣ်အကျါန့ၣ်လီၤ.

²ယွၤအသးကဟ့ၣ်အီၤတၢ်ကူၣ်သ့, ဒီးတၢ်သ့ၣ်ညါဒီးတၢ်သ့တၢ်ဘၣ်လၢကပၢအပှၤဂီၢ်မုၢ်အဂီၢ်လီၤ. အဝဲကသ့ၣ်ညါယွၤအတၢ်ဘၣ် အသးဒီးကအိၣ်ဒီးတၢ်ယူးယီၣ်ပျံၤအီၤ,

³ဒီးကမုာ်လၤဝဲလၢတၢ်စူၢ်အီၤအပူၤလီၤ. အဝဲတစံၣ်ညီၣ်တၢ်ဒ်တၢ်အဖျါလၢခိမ့ၢ်ဂ့ၤ, ဒ်တၢ်ဟူထီသါလီၤပစံၣ်ပစိအသိးမ့ၢ်ဂ့ၤန့ၣ်ဘၣ်.

⁴အဝဲကစံၣ်ညီၣ်ပှၤဖှီၣ်ဖိယာ်ဖိတဖၣ်တီတီလိၤလိၤ ဒီးဒီဒၣ်ခီၣ်ဆၢန့ၢ်ပှၤလၢအမၤစၢၤလီၤအသးတသ့တဖၣ် အတၢ်ခွဲးတၢ်ယာ်န့ၣ်လီၤ. လၢအတၢ်စိတၢ်ကမီၤအကလုၢ်န့ၣ်, ပှၤဂီၢ်မုၢ်ကဘၣ်တၢ်စံၣ်ညီၣ် အီၤ ဒီးပှၤအၢပှၤသီတဖၣ်ကသံဝဲလီၤ.

⁵အဝဲကပၢအပှၤဂီၢ်မုၢ်လၢတၢ်စံၣ်ညီၣ်တီဒီးတၢ်မၤတီအကလုၢ်လီၤ.

⁶ထွံၣ်မံၤဒီးသိဖိတဖၣ်ကအိၣ်မူသကိးလၢတၢ်ဃူတၢ်ဖိးအပူၤ, ဒီးခ့စံၣ်ပိၣ်တဖၣ်ကမံလီၤသကိးဒီးမဲာ်တဲးလဲးဖိ တဖၣ်လီၤ. ဂီၤဖံးဖိဒီးခ့ယုၢ်ဖိတဖၣ်ကအီၣ်သကိးတၢ်ဒ်သိးသိး, ဒီးဖိသၣ်ဆံးဖိတဖၣ်ကအံးက့ၤကွၢ်က့ၤအဝဲသ့ၣ်လီၤ.

⁷ဂီၤဖံးမိၢ်ဒီးတၤသူမိၢ်တဖၣ်ကအီၣ်အဆၣ်ဒ်သိးသိး, ဒီးဂီၤဖံးဖိဒီးတၤသူဖိတဖၣ်ကမံလီၤလၢတၢ်ဃူတၢ်ဖိးအပူၤလီၤ. ခ့ယုၢ်တဖၣ်ကအီၣ်ဘုလီၢ်ဒ်ကျီၢ်တဖၣ်အသိးလီၤ.

⁸ဖိသၣ်ဖိတဂၤ, မ့ၢ်လိာ်ကွဲဘူးဒီးဂုၢ်လၢအစုၣ်အိၣ်တဘိဒၣ်လဲာ်, တဘၣ်ဒိဘၣ်ထံးဝဲဘၣ်.

⁹လၢစံယိၣ်, ကစၢ်ယွၤအကစၢၢ်စီဆှံအဒီခိၣ်န့ၣ်, တၢ်လၢအကမၤဘၣ်ဒိဘၣ်ထံးတၢ်, မ့တမ့ၢ်, ကမၤအၢမၤသီ တၢ်တအိၣ်ဘၣ်နီတမံၤဘၣ်. ဒ်ပီၣ်လဲၣ်တဖၣ်ပှဲၤဝဲဒီးထံအသိး, ဟီၣ်ခိၣ်ကပှဲၤဝဲဒီးတၢ်သ့ၣ်ညါ ယွၤအလၢအပှဲၤန့ၣ်လီၤ.

¹⁰မုၢ်တနံၤကဟဲဝဲဖဲစီၤပၤအသီလၢအဟဲလီၤစၢၤလီၤသွဲၣ်လၢစီၤပၤဒၤဝံးကအိၣ်ထီၣ်ဝဲဒီးကမ့ၢ်တၢ်ပနီၣ်လၢပှၤကလုာ်တဖၣ်အဂီၢ် န့ၣ်လီၤ. အဝဲသ့ၣ်ကပာ်ဖှိၣ်အသးလၢအစီၤပၤအဝ့ၢ်ဒီးကဟ့ၣ် အီၤတၢ်လၤကပီၤန့ၣ်လီၤ.

¹¹ဖဲမုၢ်နံၤန့ၣ်ဟဲတုၤဝဲဒီး, ယွၤကသူကဒီးအစိကမီၤတဘျီ ဒီးဟဲက့ၤစိာ်က့ၤအပှၤဂီၢ်မုၢ်ဆူဟံၣ်အပှၤဂီၢ်မုၢ်လၢအအိၣ် လီၤတဲာ်လၢကီၢ်အၤၡူၢ်ဒီးကီၢ်အဲၤကူပတူးကလံၤထံး, ဒီးလၢကီၢ်အဲၤကူပတူးကလံၤစိးပၤသြိၣ်, ကီၢ်ကူၤၡး, ကီၢ်အံၣ်ရး, ကီၢ်ဘၤဘူလိၣ်, ကီၢ်ဆၣ်ဃမါသး, ဒီးလၢပီၣ်လဲၣ်ကၢၢ် နံၤတဖၣ်ဒီးလၢပီၣ်လဲၣ်အကီးတဖၣ်အပူၤန့ၣ်လီၤ.

¹²ယွၤကယူာ်ထီၣ်တၢ်ပနီၣ်, နီၣ်တယၢ်လၢကဒုးနဲၣ်ပှၤကလုာ်တဖၣ် လၢအဝဲပာ်ဖှိၣ်က့ၤကဒီးကီၢ်အံၣ်စရ့လးဒီးကီၢ်ယူဒၤအပှၤဂီၢ်မုၢ် လၢအလီၤပြံလီၤပြါတဖၣ်ဒီးဟဲက့ၤစိာ်ကဒါက့ၤအဝဲသ့ၣ် လၢဟီၣ်ခိၣ်အသနၢၣ်လွံၢ်နၢၣ်န့ၣ်လီၤ.

¹³ကီၢ်အံၣ်စရ့လးအဘီမုၢ်တသးက့ၣ်သးကါလၢၤကီၢ်ယူဒၤ အဘီမုၢ်လၢၤဘၣ်, ဒီးကီၢ်ယူဒၤတမ့ၢ်လၢၤကီၢ်အံၣ်စရ့လး အဒုၣ်အဒါလၢၤဘၣ်.

¹⁴အဝဲသ့ၣ်ကပာ်ဖှိၣ်အသးဒီးကဒုးတၢ်ထီဒါပှၤဖလ့ၡသးဖိလၢ မုၢ်နုာ်တခီဒီးဂုာ်ဆူၣ်ပျီဆူၣ်ပှၤလၢအအိၣ်လၢမုၢ်ထီၣ်တကပၤ န့ၣ်လီၤ. အဝဲသ့ၣ်ကမၤန့ၢ်မၤနၢၤပှၤအဒိၣ်ဒီးမိၤအး, ဒီးပှၤဧၣ်မိၣ်ဖိကစူၢ်အဝဲသ့ၣ်လီၤ.

¹⁵ယွၤကမၤဃ့ထီကွံာ်စူအဲးအပီၣ်လဲၣ်က့ၣ်ကျီၤ, ဒီးကဟဲစိာ်ကလံၤအကိၢ်ဒ်သိးအကမၤဃ့ထီကွံာ်ထံကျိဖရၤသး, ဒီးကပာ်တီၢ်ဝဲထံကျိဆံးဖိနွံကျိဒ် သိးပှၤတဂၤဂ့ၤတဂၤဂ့ၤလဲၤခီဂာ်အီၤကသ့အဂီၢ်လီၤ.

¹⁶ကျဲမုၢ်ဖးဒိၣ်တဘိကဟးထီၣ်လၢကီၢ်အၤၡူၢ်လၢအပှၤအံၣ်စရ့လး ဖိလၢအအိၣ်မူတ့ၢ်ဖဲန့ၣ်တဖၣ်အဂီၢ်, ဒ်အအိၣ်လၢအမိၢ်ပၢ်ဖံဖု လၢပျၢၤတဖၣ်အဂီၢ်အသိး, ဖဲအဝဲသ့ၣ်ဟးထီၣ်လၢကီၢ် အဲၤကူပတူးအခါန့ၣ်လီၤ.