Read S'gaw Karen လံာ်ယၡါယၤ 13 Bible Online

လံာ်ယၡါယၤ 13 - S'gaw Karen bible

လံာ်ယၡါယၤ 13

¹အအံၤမ့ၢ်တၢ်ကစီၣ်ဘၣ်ဃးကီၢ်ဘၤဘူၤလိၣ်အဂ့ၢ်, လၢစီၤအၤမိာ်အဖိခွါစီၤယၡါယၤဒိးန့ၢ်ဘၣ်ဝဲလၢကစၢ်ယွၤ အအိၣ်န့ၣ်လီၤ.

²ထူၣ်ထီၣ်တၢ်ဒုးအနီၣ်တယၣ်လၢကစၢၢ်လ့ၤခိၣ်တဖျၢၣ်အဒီခိၣ်တက့ၢ်. ကိးပသူထီၣ်ဆူသုးဖိတဖၣ်အအိၣ်ဒီးယူာ်ထီၣ်နစုဒုၣ်စုတီၤဒ် တၢ်ပနီၣ်လၢအဝဲသ့ၣ်ကလဲၤထီၣ်ဒုးတၢ်ဖဲဝ့ၢ်လၢအပာ်ထီၣ် ထီအသးအကျဲစၢၤတဖၣ်န့ၣ်တက့ၢ်.

³ယွၤကိးထီၣ်တ့ၢ်အသုးဖိလၢအပာ်စီဆှံတ့ၢ်ဝဲတဖၣ်ဒီးပှၤလၢ အသးခုလၢယွၤပာ်ထီၣ်ထီအီၤအဃိတဖၣ်လၢကဒုးတၢ်ဒုးစီဆှံဒီးစံၣ် ညီၣ်ပှၤလၢယွၤအသးကဲၤထီၣ်ဘၣ်အီၤတဖၣ်န့ၣ်လီၤ.

⁴ဒိကနၣ်တၢ်သီၣ်တၢ်သဲလၢကစၢၢ်တဖၣ်အဒီခိၣ်လၢအမ့ၢ်ပှၤဂီၢ် မုၢ်ဖးဒိၣ်တဖုအတၢ်သီၣ်တၢ်သဲ, ပှၤကလုာ်ဒီးဘီမုၢ်တဖၣ် အတၢ်ပာ်ဖှိၣ်သးအတၢ်သီၣ်တၢ်သဲန့ၣ်တက့ၢ်. တၢ်သုးမုၢ်ဂီၢ်မုၢ် အယွၤကတဲာ်ကတီၤအသုးမုၢ်သံၣ်ဘိတဖၣ်လၢတၢ်ဒုးအဂီၢ်လီၤ.

⁵အဝဲသ့ၣ်ဟဲဝဲလၢထံကီၢ်အယံၤတဖၣ်လၢဟီၣ်ခိၣ်အကတၢၢ်လီၤ. လၢအတၢ်သးကဲၤထီၣ်အပူၤ, ယွၤဟဲလၢကမၤဟးဂီၤဝဲ ထံကီၢ်ဒီဘ့ၣ်လီၤ.

⁶ဟီၣ်အိၣ်ယူၤလၢတၢ်ဆါအ့ၣ်ထုးအ့ၣ်စိၢ်အဃိတက့ၢ်. ယွၤအမုၢ်တနံၤန့ၣ်အိၣ်ဘူးဝဲ, မုၢ်တနံၤဖဲသ့တၢ်လၢာ်, ဟဲစိာ်တၢ်ဟးဂီၤန့ၣ်လီၤ.

⁷ပှၤကိးဂၤဒဲးအစုတဖၣ်ကလီၤစၢ်လီၤစဲၤဒီးပှၤကိးဂၤဒဲးအတၢ် သးဒူကဟးမၢ်ကွံာ်ဝဲလီၤ.

⁸အဝဲသ့ၣ်ခဲလၢာ်ကပျံၤတၢ်ဖုးတၢ်ဒီးတၢ်ဆိးကဲးကလုၣ်ဘၢအီၤ, ဒ်တၢ်ဆိးကဲးအိၣ်ဒီးပိာ်မုၣ်အဟုးဆါတဂၤအသိးန့ၣ်လီၤ. ကကွၢ်လိာ်အသးတဂၤဒီးတဂၤလၢတၢ်ပျံၤတၢ်ဖုးအပူၤ, ဒီးအမဲာ်သၣ်တဖၣ်ကကိၢ်ဝဲဒီးတၢ်မဲာ်ဆှးလီၤ.

⁹ယွၤအမုၢ်တနံၤဟဲဝဲလံ. မ့ၢ်အတၢ်သးထီၣ်ဆူၣ်ဒီးအတၢ်သး ကဲၤထီၣ်အမုၢ်နံၤအအၢအသီတနံၤလီၤ. ဟီၣ်ခိၣ်ကဘၣ်တၢ်ဒုးကဲ ထီၣ်အီၤလၢတၢ်အိၣ်သယုၢ်အလီၢ်, ဒီးကယဲၢ်ပှၤတၢ်ဒဲးဘးဖိ ကဘၣ်တၢ်မၤဟးဂီၤကွံာ်အီၤလီၤ.

¹⁰ဆၣ်ကိးဖျၢၣ်ဒဲးဒီးဆၣ်ဒီတကရူၢ်ကဆိကတီၢ်လၢတၢ်ဟ့ၣ်ထီၣ်တၢ် ကပီၤအဂီၢ်လီၤ. တုၤမုၢ်ဟဲထီၣ်ဒီးတၢ်ကခံးလီၤဝဲဒီးလါတဟ့ၣ်ထီၣ်ဘၣ်တၢ်ကပီၤဘၣ်.

¹¹ယွၤစံးဝဲဒၣ်, “ယကဟဲစိာ်န့ၢ်ဟီၣ်ခိၣ်လၢတၢ်ဟးဂီၤဒီးစံၣ်ညီၣ် ပှၤအၢပှၤသီခဲလၢာ်လၢအတၢ်ဒဲးဘးတဖၣ်အဃိလီၤ. ယကဆီၣ် လီၤပှၤကိးဂၤဒဲးလၢအပာ်ထီၣ်ထီအသး, ဒီးစံၣ်ညီၣ် ပှၤကိးဂၤဒဲးလၢအသးထီၣ်ထီဒီးအၢဝဲသီဝဲန့ၣ်လီၤ.

¹²ပှၤလၢအအိၣ်တ့ၢ်ဒံးတဖၣ်အနီၣ်ဂံၢ်ကစှၤဝဲဒီးကကၤ ဒိၣ်န့ၢ်ဒံးထူတက့ၢ်လီၤ.

¹³ယကမၤတုၤမူခိၣ်တဖၣ်ကနိးကစုာ်ဝဲ, ဒီးဟီၣ်ခိၣ်ကဘၣ်တၢ်တြုၤ ဖျိးကွံာ်အီၤလၢအလီၢ်ဒၣ်ဝဲလၢမုၢ်တနံၤဖဲယၤ, ယွၤသ့တၢ် လၢာ်ကစၢ်ဒုးနဲၣ်ယတၢ်သးကဲၤထီၣ်န့ၣ်လီၤ.

¹⁴ပှၤတခီဘီမုၢ်ဖိတဖၣ်လၢအအိၣ်လၢကီၢ်ဘၤဘူၤလိၣ်အပူၤကထွးထီၣ် ဃ့ၢ်ဆူအထံအကီၢ်ဒၣ်ဝဲ, လီၤဂာ်ဒီးတၤဟိလၢအထူၣ်ဖျဲးထီၣ် လၢပှၤခးတၢ်ဖိတဖၣ်အစုပူၤ, ဒီးကလီၤဂာ်ဒ်သိလၢအပှၤကွၢ် သိတအိၣ်ဘၣ်အသိးန့ၣ်လီၤ.

¹⁵ပှၤလၢအဘၣ်တၢ်ဖီၣ်န့ၢ်အီၤတဂၤလၢ်လၢ်ကဘၣ်တၢ်ဆဲးသံကွံာ်လီၤ.

¹⁶ဖဲအဝဲသ့ၣ်ကွၢ်တၢ်လၢတၢ်မၤစၢၤတအိၣ်ဘၣ်အပူၤန့ၣ်, အဖိဆံးဖိတဖၣ်ကဘၣ်တၢ်တီၢ်သံကွံာ်အီၤ, အဟံၣ်တဖၣ် ကဘၣ်တၢ်ဂုာ်ဆူၣ်ပျီဆူၣ်အီၤ, ဒီးအမါတဖၣ်ကဘၣ်တၢ်မၤ ဆူၣ်မၤစိးအီၤန့ၣ်လီၤ.”

¹⁷ယွၤစံးဝဲဒၣ်, “ယထိၣ်ဂဲၤထီၣ်ပှၤမၤဒဲဖိတဖၣ် လၢကဒုးတၢ်ထီဒါဘၤဘူၤလိၣ်လီၤ. အဝဲသ့ၣ်တပာ်လုၢ်ပာ်ပှ့ၤ စ့ဘၣ်ဒီးတၢ်လ့ပစီအီၤလၢထူတန့ၢ်ဘၣ်.

¹⁸ကမၤသံပှၤပိာ်ခွါသးစၢ်တဖၣ်လၢအချံၣ်ဧိၤပျၢ်ဧိၤလီၤ. တဒုးနဲၣ်တၢ်သးကညီၤလၢဖိဆံးဖိတဖၣ်ဒီးအတၢ်သးကညီၤ တအိၣ်ဘၣ်လၢဖိသၣ်တဖၣ်အဂီၢ်ဘၣ်.

¹⁹ဘၤဘူၤလိၣ်မ့ၢ်ဘီမုၢ်လၢအဃံလၤကတၢၢ်လၢဘီမုၢ်ခဲလၢာ် အကျါဒီးမ့ၢ်အထံဖိကီၢ်ဖိအတၢ်ပာ်ကဖၢလၢသးအလီၢ်လီၤ. ဘၣ်ဆၣ်ဒီး, ယၤ, ယွၤ, ကမၤဟးဂီၤဘၤဘူၤလိၣ်ဒ်ယမၤတ့ၢ် စဒိၣ်ဒီးဂမိရၤအသိးန့ၣ်လီၤ.

²⁰ပှၤတအိၣ်တဆိးဘၣ်လၢအပူၤနီတဂၤနီတစုလၢၤဘၣ်. ပှၤဧ့ရ့းဖိလၢအဟးဝ့ၤဝီၤတဖၣ်တသူၣ်ထီၣ်ဘၣ်အဒဲဖဲန့ၣ်နီတစု ဘၣ်ဒီးပှၤကွၢ်သိတဒုးကိာ်လီၤအသိတဖၣ်ဖဲန့ၣ်နီတဂၤနီတစု လၢၤဘၣ်.

²¹ကကဲထီၣ်တၢ်လီၢ်လၢမဲးမုၢ်ခိၣ်အဆၣ်ဖိကီၢ်ဖိတဖၣ်အိၣ်ဝဲဆိး ဝဲဒီးဖဲဒိကအိတဖၣ်မၤအသွံတဖၣ်န့ၣ်လီၤ. ထိၣ်ကီၤလၤအုးတဖၣ် ကအိၣ်ကဆိးဖဲန့ၣ်, ဒီးမဲာ်တဲးလဲးအမံၤတဖၣ်ကစံၣ်ဝ့ၤစံၣ်ဝီၤလၢတၢ် ဟးဂီၤတဖၣ်အကျါန့ၣ်လီၤ.

²²ထွံၣ်မံၤဒီးထွံၣ်ဟီၣ်ခိၣ်တဖၣ်အတၢ်မီၤအသီၣ်ကသီၣ်ဆၢက့ၤလၢ ပၢၤတၢ်အလီၢ်ဒီးနူၢ်ဧိၤစီၤဧိၤအပူၤန့ၣ်လီၤ. ကီၢ်ဘၤဘူၤလိၣ်အဆၢကတီၢ်ဟဲတုၤဝဲလံ. အမုၢ်နံၤတဖၣ်ကလၢာ်ဘူးထီၣ်လံ.”