Read S'gaw Karen လံာ်ယၡါယၤ 17 Bible Online

လံာ်ယၡါယၤ 17 - S'gaw Karen bible

လံာ်ယၡါယၤ 17

¹ယွၤစံးဝဲဒၣ်, “ဒၤမ့းစ့းတမ့ၢ်ဝ့ၢ်တဖျၢၣ်ယံာ်ယံာ်လၢၤဘၣ်. ကမ့ၢ်ဒၣ်တၢ်လီၤပှီၢ်ဟးဂီၤတဖၣ်အတၢ်ပာ်ဖှိၣ်ထီၣ်အသးအလီၢ် တတီၤလီၤ.

²ကီၢ်စူၤရံအဝ့ၢ်တဖၣ်ကဘၣ်တၢ်ဟးသဒၣ်ကွံာ်အီၤလီၤထူလီၤယိာ် လီၤ. ကကဲထီၣ်သိဒီးကျီၢ်အီၣ်ဆၣ်အလီၢ်, ဒီးပှၤတနီၣ်ထီၣ်ဟီထီၣ်ကွံာ်အဝဲသ့ၣ်နီတဂၤဘၣ်.

³ကီၢ်အံၣ်စရ့လးအတိာ်ဧိၤတာ်ဧိၤတအိၣ်လၢၤဘၣ်ဒီးဝ့ၢ်ဒၤမ့ၤစ့း အတၢ်သဘျ့ကလီၤမၢ်ကွံာ်န့ၢ်အီၤလီၤ. ပှၤစူၤရံဖိတဖၣ်လၢအအိၣ်မူတ့ၢ်ဒံးဝဲန့ၣ်ကအိၣ်လၢတၢ်မဲာ်ဆှးအပူၤဒ် ပှၤအံၣ်စရ့လးဖိတဖၣ်အသိးလီၤ. ယၤ, ယွၤသ့တၢ်လၢာ်ကစၢ်ကတိၤလံ တၢ်လံ.”

⁴ယွၤစံးဝဲဒၣ်, “မုၢ်တနံၤကဟဲဝဲဖဲအံၣ်စရ့လးအတၢ်ဒိၣ်တၢ်မုၢ် ကဆိကတီၢ်အသးဒီးတၢ်ဖှီၣ်တၢ်ယာ်က ဟံးန့ၢ်အတၢ်ထူးတၢ်တီၤအလီၢ်န့ၣ်လီၤ.

⁵ကီၢ်အံၣ်စရ့လးကလီၤဂာ်ဒ်စံာ်ပျီတပျီဖဲဘုချံဘၣ်တၢ်ကူးကွံာ် ဒီးပာ်ဖှိၣ်တ့ၢ်အီၤအသိးဒီးကလီၤဃီဒ်စံာ်ပျီလၢကစၢၢ်ရၤဖၤ အတြီၤပူၤလၢတၢ်ကူးကွံာ်အီၤလၢကလၤတၤကူၤအသိးလီၤ.

⁶ပှၤအိၣ်မူတ့ၢ်ကမ့ၢ်ဒၣ်ထဲပှၤစှၤဂၤဧိၤ, ဒီးကီၢ်အံၣ်စရ့လးက မၤသးဒ်သ့ၣ်စၤယံးတထံးလၢတၢ်ဒဲးကွံာ်အသၣ်ခဲလၢာ်, ဒီးတၢ်အိၣ်လီၤတဲာ်မ့ၢ်ဒၣ်ထဲလၢအစိးနါခံဖျၢၣ်သၢဖျၢၣ်ဒီး စှၤဖျၢၣ်လၢအဒ့လၢလာ်တဖၣ်အလိၤန့ၣ်လီၤ. ယၤ, ကီၢ်အံၣ်စရ့လးအကစၢ်ယွၤ, ကတိၤလံတၢ်လံ.”

⁷ဖဲမုၢ်နံၤန့ၣ်ဟဲဝဲဒီးပှၤကဃၣ်အသးလၢတၢ်မၤစၢၤအဂီၢ် ဆူအတၢ်ဘၣ်တ့အကစၢ်, ကီၢ်အံၣ်စရ့လးအကစၢ်ယွၤစီဆှံ အအိၣ်န့ၣ်လီၤ.

⁸အဝဲသ့ၣ်တသန့ၤလၢၤအသးလၢတၢ်လုၢ်လီၢ်တဖၣ်လၢ အဘှီထီၣ်ဝဲလၢအစုဒၣ်ဝဲမ့ၢ်ဂ့ၤ, တနာ်လၢၤအစုအတၢ်ဖံးတၢ် မၤဒၣ်ဝဲလၢအမ့ၢ်တၢ်ပနီၣ်တဖၣ်ဘၣ်ဃးကစၢ်မုၣ် အၡ့ရၤဒီးတၢ်လုၢ်လီၢ်တဖၣ်လၢတၢ်လုၢ်ထီၣ်တၢ်နၢ မူလၢမ့ၣ်အူမ့ၢ်ဂ့ၤဘၣ်န့ၣ်လီၤ.

⁹ဖဲမုၢ်နံၤန့ၣ်ဟဲဝဲဒီး, ဝ့ၢ်လၢအအိၣ်ဒီးတိာ်ဧိၤတာ်ဧိၤဂ့ၤ ဂ့ၤကလဲာ်တဖၣ်ဒၣ်လဲာ်ကဘၣ်တၢ်ဟးသဒၣ်ကွံာ်အီၤ ဒီးပာ်တီၢ်အီၤလၢတၢ်ဟးဂီၤအပူၤဒ်ဝ့ၢ်တဖၣ်လၢ ပှၤဃံၤဝံဖိတဖၣ်ဒီးပှၤအမိၢ်ဖိတဖၣ်ပာ်လီၤတဲာ်ကွံာ်အသိး, ဖဲအဝဲသ့ၣ်ဃ့ၢ်ကွံာ်ဝဲလၢပှၤအံၣ်စရ့လးဖိတဖၣ်အမဲာ်ညါ အခါန့ၣ်လီၤ.

¹⁰ကီၢ်အံၣ်စရ့လးဧၢ, နသးပ့ၤနီၣ်ကစၢ်ယွၤလၢအအုၣ်က့ၤခီၣ် က့ၤနၤဒီးဒီဒၣ်အိၣ်ပှိၤနၤဒ်လၢၢ်မုၢ်လ့တီလၢအဂံၢ်ဆူၣ်ဘါဆူၣ် တဖျၢၣ်အသိးန့ၣ်လီၤ. အခိၣ်တလိာ်, နသူၣ်လီၤဖီကရၢၢ်စီဆှံ တဖၣ်လၢနကဘူၣ်ထီၣ်ဘါထီၣ်တခီဘီမုၢ်အကစၢ်အဂီၢ်လီၤ.

¹¹ဘၣ်ဆၣ်ဒီး, အဝဲသ့ၣ်မ့ၢ်မဲထီၣ်ဒီးဘိၣ်ထီၣ်ဖးထီၣ်ဒၣ်လဲာ်, မုၢ်တဂီၤဃီလၢနသူၣ်လီၤအဝဲသ့ၣ်န့ၣ်, နတကူးက့ၤဘၣ်တၢ်ဘၣ်ဒီး နတပာ်ဖှိၣ်ဘၣ်တၢ်ဘၣ်. ကအိၣ်ဒၣ်ထဲတၢ်ကိၢ်တၢ်ဂီၤဒီး တၢ်ဆါလၢတၢ်မၤဘျါအီၤတန့ၢ်ဘၣ်န့ၣ်လီၤ.

¹²ပှၤကလုာ်အိၣ်ဒီးအစိအကမီၤတဖၣ်တၢထီၣ်တၢလီၤအိၣ်ဒီး အတၢ်သီၣ်ထီၣ်လီၤဂာ်ဒ်ပီၣ်လဲၣ်သီၣ်ကညီၤထီၣ်ဝဲအသိး ဒီးဒ်လပီဖးဒိၣ်တဖၣ်ဒိဘၣ်ကၢၢ်ပၤနံၤအသီၣ်ရူၢ်ရူၢ်အသိး န့ၣ်လီၤ.

¹³ပှၤကလုာ်တဖၣ်လဲၤထီၣ်ဝဲဒ်လပီတဖၣ်သဖှိထီၣ်ဝဲအသိး, ဘၣ်ဆၣ်ကစၢ်ယွၤသိၣ်ဆါအဝဲသ့ၣ်သတးဒီးအဝဲသ့ၣ်ဂုၤက့ၤ ဆူအလီၢ်ခံလီၤ. ဒီးဘၣ်တၢ်နီၣ်ထီၣ်ဟီထီၣ်ကွံာ်အီၤဒ် ဖၣ်ကမူၣ်လၢကစၢၢ်ကပၤအသိးဒီးဒ်ဘုလီၢ်လၢကလံၤ သဝံးအပူၤအသိးန့ၣ်လီၤ.

¹⁴လၢမုၢ်ဟါန့ၣ်, အဝဲသ့ၣ်မၤပျံၤမၤဖုးတၢ်, ဘၣ်ဆၣ်ဒီး, တုၤမုၢ်ဂီၤအကတီၢ်န့ၣ်, အဝဲသ့ၣ်လဲၤပူၤကွံာ်ဝဲလီၤ. တၢ်န့ၣ်မ့ၢ်ပှၤကိးဂၤဒဲးလၢအဂုာ်ဆူၣ်ပျီဆူၣ်ပထံပကီၢ်အတၢ် ဟဲဝံဟဲစိာ်န့ၣ်လီၤ.