Read S'gaw Karen လံာ်ယၡါယၤ 18 Bible Online

လံာ်ယၡါယၤ 18 - S'gaw Karen bible

လံာ်ယၡါယၤ 18

¹လၢကီၢ်ကူၤၡးအထံကျိတဖၣ်အဝၢ်ဘးခီန့ၣ်, ကီၢ်အိၣ်ဝဲတဘ့ၣ်လၢတၢ်နၢ်ဟူဘၣ်အဒံးဆ့တဖၣ် အတၢ်သီၣ်ထီၣ်လီၤ.

²လၢထံကီၢ်ဝဲန့ၣ်တခီ, ထံကီၢ်အခၢၣ်စးမီၣ်သီတဖၣ်ဟဲလီၤဝဲ လၢထံကျိနံလၤလၢချံဆှဲတဖၣ်အပူၤလီၤ. က့ၤကဒါက့ၤဆူဟံၣ်တက့ၢ်, ပှၤစိာ်တၢ်ကစီၣ်လၢအပ့ၢ်ချ့ တဖၣ်ဧၢ, က့ၤစိာ်တၢ်ကစီၣ်လၢသုထံသုကီၢ်လၢဘၣ်တၢ်နီၤဖး အီၤလၢထံကျိတဖၣ်, ဆူသုကီၢ်လၢအဂံၢ်ဆူၣ်ဒီးအိၣ်ဒီး အစိကမီၤ, ဆူသုပှၤကလုာ်လၢအနီၢ်ထီဒီးအဖံးဘျ့, လၢအဘၣ်တၢ်ပျံၤအီၤလၢဟီၣ်ခိၣ်ဒီဘ့ၣ်ညါအအိၣ်န့ၣ်တက့ၢ်.

³ကယဲၢ်ပှၤအိၣ်လၢဟီၣ်ခိၣ်ချၢခဲလၢာ်သ့ၣ်ဧၢ, ဒိကနၣ်တက့ၢ်. ကွၢ်တၢ်ပနီၣ်အနီၣ်တယၢ်လၢကဘၣ်တၢ်ယူာ်ထီၣ်အီၤ လၢကစၢၢ်တဖၣ်အဒီခိၣ်တက့ၢ်. ဒိကနၣ်ကွဲၤအသီၣ်ထီၣ်တက့ၢ်.

⁴ယွၤစံးဘၣ်ယၤ, “ယကကွၢ်လီၤတၢ်ကစုဒုလၢမူခိၣ်ဒ်ပစီၤထံ လၢအအိၣ်ထီၣ်ဖဲကူးဘုအကတီၢ်လၢ မုၢ်နၤအကိၢ်တဖၣ်အပူၤအသိး, ဒီးဒ်မုၢ်အတၢ်ကပီၤဆှံကပီၤ ထီၣ်ဝဲလၢမုၢ်ဆါခီတၢ်ကိၢ်ခါအသိးန့ၣ်လီၤ.

⁵တချုးဒံးဘၣ်လၢစပံးသၣ်တဖၣ်ဘၣ်တၢ်ပာ်ဖှိၣ်က့ၤအီၤ, ဖဲအဖီတဖၣ်လီၤဆှုဝဲဒီးစပံးသၣ်တဖၣ်မံထီၣ်ဝဲဒံးဘၣ်န့ၣ်, ဒုၣ်ဒါကမၤဟးဂီၤပှၤကူၤၡးဖိတဖၣ်ညီကဒၣ်ဒ်နးတဘ့ၣ်ဒီၣ် တဲာ်ကွံာ်စပံးမုၢ်အဒ့တဖၣ်လၢစပံးတမုၢ်အလိၤအသိးန့ၣ်လီၤ.

⁶အသုးဖိတဖၣ်အစိၣ်ကဘၣ်တၢ်ကွံာ်တ့ၢ်အီၤလၢတၢ်ပျီပူၤဒ်သိး ထိၣ်ဧိၤလံာ်ဧိၤဒီးဆၣ်ဖိကီၢ်ဖိအမံၤတဖၣ်ကထံၣ်အီၤအဂီၢ်န့ၣ်လီၤ. လၢတၢ်ကိၢ်ခါန့ၣ်, ထိၣ်ဧိၤလံာ်ဧိၤကအီၣ်အီၤ, ဒီးလၢ တၢ်ဂိၢ်ခါန့ၣ်ဆၣ်ဖိကီၢ်ဖိတဖၣ်ကအီၣ်အီၤလီၤ.”

⁷တၢ်ဆၢကတီၢ်ကဟဲဝဲဖဲယွၤသ့တၢ်လၢာ်ကစၢ်ကတူၢ်လိာ်တၢ် လုၢ်မၤဘူၣ်တဖၣ်လၢကီၢ်လၢအဘၣ်တၢ်နီၤဖးအီၤလၢထံ ကျိတဖၣ်, ကီၢ်လၢအဂံၢ်ဆူၣ်ဒီးအိၣ်ဒီးအစိကမီၤအံၤ, ပှၤလၢအနီၢ်ထီဒီးအဖံးဘျ့ဒီးဘၣ်တၢ်ပျံၤအီၤလၢ ဟီၣ်ခိၣ်ဒီဘ့ၣ်ညါအံၤ, အအိၣ်န့ၣ်လီၤ. အဝဲသ့ၣ်ကဟဲဆူကစၢၢ်စံယိၣ်ဖဲယွၤသ့တၢ်လၢာ်ကစၢ် ဘၣ်တၢ်ဘူၣ်ထီၣ်ဘါထီၣ်အီၤန့ၣ်လီၤ.