Read S'gaw Karen လံာ်ယၡါယၤ 19 Bible Online

လံာ်ယၡါယၤ 19 - S'gaw Karen bible

လံာ်ယၡါယၤ 19

¹အအံၤမ့ၢ်တၢ်ကစီၣ်ဘၣ်ဃးကီၢ်အဲၤကူပတူးအဂ့ၢ်န့ၣ်လီၤ. ယွၤဟဲဆူကီၢ်အဲၤကူပတူး, ဒိးတၢ်ချ့မးလၢတၢ်အၢၣ်တလိၣ် အလိၤလီၤ. ကီၢ်အဲၤကူပတူးအတၢ်ဂီၤတၢ်ဖီၣ်တဖၣ်ကနိး ကစုာ်လၢအမဲာ်ညါ, ဒီးပှၤအဲၤကူပတူးဖိတဖၣ် အသးပှံၢ်လီၤဝဲဒၣ်လီၤ.

²ယွၤစံးဝဲဒၣ်, “ယကထိၣ်ဂဲၤထီၣ်ပှၤအဲၤကူပတူးဖိအတၢ်ဒုး ထီဒါလိာ်သးကဒဲကဒဲလီၤ. ဒီပုၢ်ဝဲၢ်ကထီဒါအဒီပုၢ်ဝဲၢ်, ပှၤအိၣ်ဘူးအိၣ်တံၢ်ကထီဒါလိာ်အသး, ဝ့ၢ်တဖၣ်လၢအဂုာ်မၤနၢၤလိာ်အသးကဒုးတၢ်ယၤတၢ်, ဒီးစီၤပၤတဖၣ်လၢအဂုာ်မၤနၢၤလိာ်အသးကဂဲၤပျုၢ် မၤန့ၢ်တၢ်စိတၢ်ကမီၤလီၤ.

³ယကတြီတံာ်တာ်ပှၤအဲၤကူပတူးဖိအတၢ်ကူၣ်ကျဲၤတဖၣ်ဒီး မၤဟးဂီၤအဝဲသ့ၣ်အသးန့ၣ်လီၤ. အဝဲသ့ၣ်ကဃ့အတၢ်ဂီၤတၢ် ဖီၣ်တဖၣ်လၢတၢ်မၤစၢၤအီၤအဂီၢ်, ကလဲၤဃ့တၢ်ဟ့ၣ်ကူၣ်လၢ ပှၤကွဲပှၤသံအကလၤတဖၣ်, ဒီးသံကွၢ်ပှၤသံအကလၤတဖၣ်လၢ တၢ်ဟ့ၣ်ကူၣ်ဟ့ၣ်ဖးအဂီၢ်လီၤ.

⁴ယကဟ့ၣ်လီၤပှၤအဲၤကူပတူးဖိတဖၣ်ဆူပှၤပၢတၢ်အၢအၢသီသီ တဂၤအစုပူၤ, စီၤပၤတဂၤလၢကပၢအဝဲသ့ၣ်အၢအၢသီသီန့ၣ်လီၤ. ယၤ, ယွၤသ့တၢ်လၢာ်ကစၢ်, စံးကတိၤတ့ၢ်တၢ်လီၤ.”

⁵လၢထံကျိနံၤလါအပူၤထံကစှၤလီၤဝဲ, ဒီးထံကျိန့ၣ်ကလီၤ သံးကွံာ်ဝဲကယီကယီလီၤ.

⁶ထံကျိအကျိၤတဖၣ်ကနၢအုၣ်နၢပူးဝဲဖဲထံလီၤသံးကွံာ်ဝဲပှီၢ်ပှီၢ် န့ၣ်လီၤ. ဆှဲဒီးတပိၢ်တဖၣ်ကဃ့ထီကွံာ်ဝဲလီၤ.

⁷ဒီးတၤသူတၤသၣ်လၢအဘၣ်တၢ်သူၣ်လီၤဖျးလီၤအီၤလၢ ထံကျိနံၤလါအကၢၢ်ခိၣ်တဖၣ်န့ၣ်ကဃ့ထီဝဲဒီးကဘၣ်တၢ်အူဒံ ကွံာ်အီၤခဲလၢာ်လီၤ.

⁸ပှၤခဲလၢာ်လၢအလုၢ်အီၣ်အသးသမူခီဖျိတၢ်မၤအီၣ်ညၣ်လၢ ထံကျိနံၤလါအပူၤန့ၣ်ကအုကစွါဒီးကဟီၣ်ဝဲယၢၤဝဲလီၤ. အတခွဲတဖၣ်ဒီးအပှာ်ဧိၤစၤဧိၤကကဲထီၣ်တၢ်လၢပှၤသူတသ့ဘၣ် တဖၣ်လီၤ.

⁹ပှၤလၢအမၤလုၣ်တၢ်ကံးယာ်တဖၣ်အသးကဟးဂီၤဝဲလီၤ.

¹⁰ပှၤထါထၣ်ဒီးပှၤဒိးလဲအသးတဖၣ်အသူၣ်ကအုးသးကအုး ဒီးအသးကလီၤဘှံးလီၤဘှါဝဲလီၤ.

¹¹ဝ့ၢ်စိၤဧၣ်အခိၣ်အနၢ်တဖၣ်မ့ၢ်ပှၤအပျုၢ်တဖၣ်လီၤ. ကီၢ်အဲၤကူပတူးအပှၤကူၣ်သ့ကတၢၢ်တဖၣ်ဟ့ၣ်ကူၣ်တၢ်လၢတၢ် သးတဆးအပူၤလီၤ. အဝဲသ့ၣ်တဲစီၤပၤလၢအဝဲသ့ၣ်မ့ၢ်ပှၤ လီၤစၢၤလီၤသွဲၣ်လၢပှၤကူၣ်သ့ဒီးစီၤပၤလၢပျၢၤတဖၣ်ဘူၣ် ဝဲဒ်လဲၣ်.

¹²ကီၢ်အဲၤကူပတူးအစီၤပၤဧၢ, နပှၤဟ့ၣ်ကူၣ်တၢ်လၢအသ့အဘၣ် တဖၣ်န့ၣ်, အိၣ်ဖဲလဲၣ်. ဘၣ်သ့ၣ်သ့ၣ်အဝဲသ့ၣ်တဲဘၣ်နၤလၢယွၤ သ့တၢ်လၢာ်ကစၢ်အတၢ်ကူၣ်ကျဲၤတဖၣ်လၢကီၢ်အဲၤကူပတူး အဂီၢ်ကသ့ဝဲလီၤ.

¹³ဝ့ၢ်စိၤဧၣ်ဒီးဝ့ၢ်မဲဖံးအခိၣ်အနၢ်တဖၣ်မ့ၢ်ပှၤဟးဂီၤဖိတဖၣ်လီၤ. အဝဲသ့ၣ်ကဘၣ်ဆှၢအပှၤကလုာ်, ဘၣ်ဆၣ်ဒီး, အဝဲသ့ၣ်ဆှၢကမၣ်အီၤလီၤ.

¹⁴ယွၤမၢအဝဲသ့ၣ်ဟ့ၣ်တၢ်ဟ့ၣ်ကူၣ်သဘံၣ်ဘုၣ်တဖၣ်လီၤ. မၤသးဒ်န့ၣ်ဒီး, ကီၢ်အဲၤကူပတူးမၤတၢ်လၢအကမၣ်ခဲလၢာ် ဒီးလဲၤကနူၤကပၤလီၤဂာ်ဒီးပှၤအီမူၤသံးတဂၤလၢအခီၣ်တလံာ် လၢအတၢ်ဘှိးဒၣ်ဝဲအလိၤန့ၣ်လီၤ.

¹⁵ပှၤလၢကီၢ်အဲၤကူပတူးအပူၤ, ထူးတီၤဂ့ၤဖှီၣ်ယာ်ဂ့ၤ, မ့ၢ်ပှၤလၢအကါဒိၣ်ဂ့ၤပှၤတသ့ၣ်ညါအီၤဂ့ၤ, ဟ့ၣ်တၢ်မၤစၢၤတသ့နီတဂၤဘၣ်.

¹⁶တၢ်ဆၢကတီၢ်ဟဲဝဲဖဲပှၤအဲၤကူပတူးဖိတဖၣ်ကပျံၤတၢ်ဒ်ပိာ် မုၣ်တဖၣ်အသိးလီၤ. အဝဲသ့ၣ်ကကနိးကစုာ်လၢတၢ်ပျံၤတၢ် ဖုးဖးဒိၣ်အပူၤဖဲအဝဲသ့ၣ်ထံၣ်ဝဲလၢယွၤသ့တၢ်လၢာ်ကစၢ်ယူာ် ထီၣ်အစုလၢကစံၣ်ညီၣ်အဝဲသ့ၣ်အဂီၢ်အခါန့ၣ်လီၤ.

¹⁷ပှၤအဲၤကူပတူးဖိတဖၣ်ကပျံၤကီၢ်ယူဒၤနးနးကလဲာ်ဖဲအဝဲသ့ၣ် ဘၣ်တၢ်ဒုးသ့ၣ်နီၣ်ထီၣ်အီၤတဘျီလၢ်လၢ်ဘၣ်ဃးတၢ်ဟဲဝံလၢ ယွၤသ့တၢ်လၢာ်ကစၢ်ကတဲာ်ကတီၤပာ်စၢၤလၢအဝဲသ့ၣ်အဂီၢ်န့ၣ်လီၤ.

¹⁸တုၤတၢ်ဆၢကတီၢ်န့ၣ်ဟဲဝဲဒီး, ပှၤဧ့ၤဘြံၤဖိအကျိာ်ကဘၣ်တၢ် ကတိၤအီၤလၢကီၢ်အဲၤကူပတူးအဝ့ၢ်ယဲၢ်ဝ့ၢ်အပူၤန့ၣ်လီၤ. ပှၤဖဲန့ၣ်တဖၣ်ကဆိၣ်လီၤအသးလၢယွၤသ့တၢ်လၢာ်ကစၢ်အမံၤ အပူၤလီၤ. ဝ့ၢ်အကျါတဝ့ၢ်ကဘၣ်တၢ်ကိးအီၤလၢ, “မုၢ်အဝ့ၢ်” န့ၣ်လီၤ.

¹⁹တုၤတၢ်ဆၢကတီၢ်န့ၣ်ဟဲဝဲဒီး, ကီၢ်အဲၤကူပတူးကအိၣ်ဒီးတၢ်လုၢ်လီၢ်လၢယွၤအဂီၢ်ဒီးလၢၢ် ထူၣ်တထူၣ်ကဘၣ်တၢ်ပာ်စီဆှံအီၤလၢယွၤအဂီၢ်ဖဲကီၢ်အဲၤကူပ တူးအဆၢန့ၣ်လီၤ.

²⁰အဝဲသ့ၣ်ကမ့ၢ်တၢ်ပနီၣ်တဖၣ်လၢယွၤသ့တၢ်လၢာ်ကစၢ်အတၢ် အိၣ်လၢကီၢ်အဲၤကူပတူးအပူၤအဂ့ၢ်န့ၣ်လီၤ. ဖဲပှၤအိၣ်ဖဲန့ၣ်တဖၣ် ဘၣ်တၢ်မၤအၢမၤနးအီၤဒီးကိးထီၣ်ယွၤလၢ တၢ်မၤစၢၤအဂီၢ်န့ၣ်, အဝဲကဆှၢလီၤပှၤတဂၤဂၤလၢကမၤ ပူၤဖျဲးအဝဲသ့ၣ်န့ၣ်လီၤ.

²¹ယွၤကလီၣ်ဖျါထီၣ်အသးလၢပှၤအဲၤကူပတူးဖိတဖၣ်ဒီးအဝဲသ့ၣ် ကသ့ၣ်ညါယွၤဒီးဘူၣ်ထီၣ်ဘါထီၣ်အီၤဒီးဟဲစိာ်န့ၢ်အီၤလၢတၢ် လုၢ်တဖၣ်ဒီးတၢ်မၤဘူၣ်တဖၣ်လီၤ. အဝဲသ့ၣ်ကမၤတၢ်အၢၣ် လီၤအီလီၤသညူးသပှၢ်ဒီးအီၤဒီးမၤတၢ်လၢအဝဲသ့ၣ်အၢၣ်လီၤ ဝဲန့ၣ်လီၤ.

²²ယွၤကစံၣ်ညီၣ်ပှၤအဲၤကူပတူးဖိတဖၣ်, ဝံၤဒီးကမၤဘျါက့ၤ အီၤလီၤ. အဝဲသ့ၣ်ကဃၣ်ဃီၤအသးဆူအအိၣ်, ဒီးအဝဲကဒိ ကနၣ်အတၢ်ထုကဖၣ်ဒီးမၤဘျါက့ၤအဝဲသ့ၣ်န့ၣ်လီၤ.

²³တုၤတၢ်ဆၢကတီၢ်န့ၣ်ဟဲဝဲဒီး, ကျဲမုၢ်ဖးဒိၣ်ကအိၣ်ဝဲတဘိ လၢကီၢ်အဲၤကူပတူးဒီးကီၢ်အၤၡူၢ်အဘၢၣ်စၢၤလီၤ. ပှၤတဖၣ်လၢထံကီၢ်ခံဘ့ၣ်အံၤအပူၤကလဲၤလဲၤက့ၤက့ၤလၢ ကျဲအံၤအလိၤဒီးပှၤခံကလုာ်အံၤကဘူၣ်သကိးဘါသကိး တၢ်တပူၤဃီလီၤ.

²⁴ဖဲတၢ်ဆၢကတီၢ်န့ၣ်ဟဲဝဲဒီး, ကီၢ်အံၣ်စရ့လးကအိၣ်တတီၤဃီ ဒီးကီၢ်အဲၤကူပတူးဒီးကီၢ်အၤၡူၢ်, ဒီးထံကီၢ်သၢဘ့ၣ်အံၤ ကကဲထီၣ်တၢ်ဆိၣ်ဂ့ၤလၢဟီၣ်ခိၣ်ဒီဘ့ၣ်အဂီၢ်လီၤ.

²⁵ယွၤသ့တၢ်လၢာ်ကစၢ်ကဆိၣ်ဂ့ၤအဝဲသ့ၣ်ဒီးစံး, “ယကဆိၣ် ဂ့ၤနၤ, ကီၢ်အဲၤကူပတူးယပှၤဂီၢ်မုၢ်, နဲဒၣ်, ကီၢ်အၤၡူၢ်, ပှၤလၢယတ့လီၤပာ်လီၤအီၤ, ဒီးနဲဒၣ်, ကီၢ်အံၣ်စရ့လး, ယပှၤဃုထၢတကလုာ်ဧၢ,” န့ၣ်လီၤ.