Read S'gaw Karen လံာ်ယၡါယၤ 21 Bible Online

လံာ်ယၡါယၤ 21 - S'gaw Karen bible

လံာ်ယၡါယၤ 21

¹အအံၤမ့ၢ်တၢ်ကစီၣ်ဘၣ်ဃးကီၢ်ဘၤဘူၤလိၣ်အဂ့ၢ်န့ၣ်လီၤ. ဒ်ကလံၤသဝံးအူတၢ်ဆူၣ်ဆူၣ်ခီဂာ်ပှၢ်မုၢ်ကနၢအသိး, တၢ်တတၢးတနါကဟဲထီၣ်လၢကီၢ်လၢအလီၤပျံၤလီၤဖုး တဘ့ၣ်အပူၤလီၤ.

²ယထံၣ်တ့ၢ်တၢ်ထံၣ်လၢညါခီဘၣ်ဃးတၢ်မၤအသးအၢအၢ သီသီတဖၣ်, တၢ်ထံၣ်လၢညါခီဘၣ်ဃးတၢ် ဟ့ၣ်လီၤကွံာ်ဒီးတၢ်မၤဟးဂီၤတၢ်လီၤ. ကီၢ်ဧ့ၤလၣ်အသုးမုၢ်ဧၢ, လဲၤဒုးတၢ်တက့ၢ်. ကီၢ်မၤဒဲအသုး မုၢ်ဧၢ, ကဝီၤဃာ်ဝ့ၢ်တဖၣ်န့ၣ်တက့ၢ်. ကစၢ်ယွၤကမၤကတၢၢ် ကွံာ်တၢ်နးတၢ်ဖှီၣ်လၢကီၢ်ဘၤဘူၤလိၣ်ဒုးအိၣ်ထီၣ်ဝဲန့ၣ်လီၤ.

³တၢ်လၢယထံၣ်ဒီးနၢ်ဟူတ့ၢ်လၢတၢ်ထံၣ်လၢညါခီအပူၤတဖၣ် မၤပှဲၤယသးဒီးတၢ်ပျံၤတၢ်ဖုးဒီးတၢ်ဆူးတၢ်ဆါ, တၢ်ဆူးတၢ်ဆါလၢအလီၤဂာ်ဒီးပိာ်မုၣ်အဟုးဆါထီၣ်န့ၣ်လီၤ.

⁴ယခိၣ်တရံးအသးဒီးယကနိးကစုာ်လၢတၢ်ပျံၤတၢ်ဖုးအဃိလီၤ. ယဆၢတ့ၢ်မးလၢမုၢ်ဟါကဟဲတုၤအိၣ်ဝဲ, ဘၣ်ဆၣ်တၢ်လၢ အဟဲတုၤအိၣ်ဝဲမ့ၢ်ဒၣ်ထဲတၢ်ပျံၤတၢ်ဖုးလီၤ.

⁵လၢတၢ်ထံၣ်လၢညါခီအပူၤန့ၣ်ယထံၣ်ဘၣ်တၢ်အီၣ်အစီၢ်နီၤခိၣ် အိၣ်ကတဲာ်ကတီၤအသးဒီးလီၢ်ဒါတဖၣ်သလၣ်လီၤအသး လၢသမှံၤတဖၣ်ကဆ့ၣ်နီၤလၢအဖီခိၣ်အဂီၢ်လီၤ. အဝဲသ့ၣ်အီၣ်တၢ်ဒီးအီတၢ်လီၤ. သတူၢ်ကလာ်န့ၣ်တၢ်ကိးသတြီထီၣ်ဝဲ, “သုးခိၣ်သုးနၢ်တဖၣ်ဧၢ, ကတဲာ်ကတီၤထီၣ်သုကတီၤတဖၣ်တက့ၢ်.”

⁶အန့ၣ်ဒီးယွၤစံးဘၣ်ယၤ, “လဲၤဒီးပာ်လီၤပှၤခိးတၢ်တဂၤ, ဒီးတဲဘၣ်အီၤလၢကတဲဖျါက့ၤတၢ်လၢအထံၣ်ဝဲတက့ၢ်.

⁷အဝဲမ့ၢ်ထံၣ်ပှၤဟဲဒိးကသ့ၣ်, ခံဂၤခံဂၤစုာ်စုာ်, ဒီးပှၤဒိးကသ့ၣ်ယီၤဒီးကီၤလးအူးတဖၣ်ဒီး, အဝဲကဘၣ်ကွၢ်ထံပှၤတဖၣ်အံၤလီၤတံၢ်လီၤဆဲးလီၤ.”

⁸ပှၤခိးတၢ်ဖိကိးထီၣ်ဝဲ, “တၢ်ဒိၣ်ဧၢ, ယဆၢထၢၣ်ခိးတ့ၢ်တၢ် လၢယလီၢ်မနၤနၤမဆါဆါလီၤ.”

⁹သတူၢ်ကလာ်, လၢအံၤအဝဲသ့ၣ်ဟဲဝဲလံ. ပှၤဒိးကသ့ၣ်ခံဂၤခံဂၤ စုာ်စုာ်လီၤ. ပှၤခိးတၢ်ဖိဆှၢတၢ်ကစီၣ်, “ကီၢ်ဘၤဘူၤလိၣ်လီၤကွံာ်လံ. တၢ်ဂီၤတၢ်ဖီၣ်တဖၣ်လၢအဝဲသ့ၣ် ဘူၣ်ထီၣ်ဘါထီၣ်ဝဲခဲလၢာ်ကၢ်လီၤကလဲဒီးဒါလီၤ အသးလၢဟီၣ်ခိၣ်လိၤလီၤ.”

¹⁰ယပှၤဂီၢ်မုၢ်အံၣ်စရ့လးဧၢ, သုဘၣ်တၢ်ယီၢ်သုဒ်ပှၤယီၢ်ဘုဟု အသိး, ဘၣ်ဆၣ်အခဲအံၤယဘိးဘၣ်သ့ၣ်ညါသုတၢ်ကစီၣ် အမုာ်လၢယနၢ်ဟူတ့ၢ်လၢယွၤသ့တၢ်လၢာ်ကစၢ်, အံၣ်စရ့လးအကစၢ်ယွၤ, အအိၣ်န့ၣ်လီၤ.

¹¹အအံၤမ့ၢ်တၢ်ကစီၣ်ဘၣ်ဃးကီၢ်အဒိၣ်အဂ့ၢ်န့ၣ်လီၤ. ပှၤတဂၤကိးဃီၤတၢ်ဆူယအိၣ်လၢကီၢ်အဒိၣ်တခီဒီးစံး, “ပှၤခိးတၢ်ဖိဧၢ, မုၢ်နၤကလၢာ်ကွံာ်ဝဲဖဲလဲၣ်အခါလဲၣ်. ကကတၢၢ်အခါဖဲလဲၣ်န့ၣ်တဲဘၣ်ယၤတက့ၢ်.”

¹²ယစံးဆၢအီၤ, “မုၢ်ဂီၤဟဲဝဲလံ, ဘၣ်ဆၣ်မုၢ်နၤကဟဲကဒီး လီၤ. နမ့ၢ်အဲၣ်ဒိးသံကွၢ်ကဒီးန့ၣ်, ဟဲက့ၤကဒါက့ၤဒီးသံကွၢ် တက့ၢ်.”

¹³အအံၤမ့ၢ်တၢ်ကစီၣ်ဘၣ်ဃးကီၢ်ဧ့ရ့းအဂ့ၢ်န့ၣ်လီၤ. သုဝဲပှၤဒဒၣ်ဖိလၢအလဲၤသကိးတၢ်ဒီဖုဒီးပှၤသူၣ်ဒဲလၢကီၢ်ဧ့ရ့းအလီၢ်လီၤဃီသ့ၣ်ဧၢ,

¹⁴ပှၤလၢတၢ်သူအသးလၢထံဒီးဟဲဆူသုအိၣ်တဖၣ်န့ၣ်, ဟ့ၣ်အီအီၤလၢထံတက့ၢ်. သုဝဲပှၤကီၢ်တ့မၤဖိသ့ၣ်ဧၢ, ဟ့ၣ်လီၤတၢ်အီၣ်လၢပှၤဘၣ်ဃ့ၢ်မှံဟးဖျိးတဖၣ်အဂီၢ်တက့ၢ်.

¹⁵ပှၤသ့ၣ်တဖၣ်အံၤထွးထီၣ်ဃ့ၢ်ဝဲဒ်သိးကထူၣ်ဖျဲးထီၣ်လၢ နးတဖၣ်လၢအိၣ်ကတဲာ်ကတီၤအသးလၢကမၤသံအဝဲသ့ၣ်, လၢချံၣ်တဖၣ်လၢအိၣ်ကတဲာ်ကတီၤအသးလၢကခးတၢ်, ဒီးလၢတၢ်ဒုးတၢ်ယၤအတၢ်လီၤဘၣ်ယိၣ်ခဲလၢာ်န့ၣ်လီၤ.

¹⁶အန့ၣ်ဒီးယွၤစံးဘၣ်ယၤ, “လၢတနံၣ်တီတီအပူၤန့ၣ်, က့ဒၢ်အဒူၣ်တဖၣ်အတၢ်ဒိၣ်တၢ်မုာ်ကတုၤ လၢတၢ်အကတၢၢ်လီၤ.

¹⁷ပှၤခးချံၣ်တဖၣ်မ့ၢ်ပှၤအဒူကတၢၢ်လၢပှၤက့ဒၢ်ဖိအကျါလီၤ. ဘၣ်ဆၣ်, အဝဲသ့ၣ်ကအိၣ်တီၢ်ဒၣ်စှၤဂၤလီၤ. ယၤ, အံၣ်စရ့လးအကစၢ်ယွၤကတိၤတ့ၢ်လံတၢ်လီၤ.”