Read S'gaw Karen လံာ်ယၡါယၤ 22 Bible Online

လံာ်ယၡါယၤ 22 - S'gaw Karen bible

လံာ်ယၡါယၤ 22

¹အအံၤမ့ၢ်တၢ်ကစီၣ်တခါဘၣ်ဃးဒီးတၢ်ထံၣ်လၢညါခီ အကစၢၢ်ကဆူးအဂ့ၢ်န့ၣ်လီၤ. တၢ်မနုၤမၤအသးန့ၣ်လဲၣ်. ဘၣ်မနုၤအဃိပှၤလၢဝ့ၢ်ပူၤတဖၣ် မၤမူးသးခုလၢအဟံၣ်တဖၣ်အခိၣ်ဒုးအဖီခိၣ်န့ၣ်လဲၣ်.

²ဝ့ၢ်ဒီဝ့ၢ်ညါသီၣ်သထူၣ်ဘးလီ, ဒီးအိၣ်ပှဲၤဝဲဒီးတၢ်သီၣ်တၢ် သဲဒီးတၢ်ထိၣ်ဂဲၤသူၣ်ထီၣ်ဂဲၤသးန့ၣ်လီၤ. သုပှၤတဖၣ်လၢအသံတ့ၢ်လၢတၢ်ဒုးတၢ်ယၤအပူၤန့ၣ် တသံလၢအဒုးတၢ်အဃိဘၣ်.

³တချုးလၢသုပှၤခိၣ်ပှၤနၢ်တဖၣ်ခးဘၣ်ပျၢ်တဘိဧိၤန့ၣ်, အဝဲသ့ၣ်, ထွးထီၣ်ဃ့ၢ်ဝဲဒီးဘၣ်တၢ်ဖီၣ်န့ၢ်အီၤခဲလၢာ်လီၤ.

⁴ခဲကနံၣ်အံၤ, ပာ်လီၤတဲာ်ယၤထဲတဂၤဧိၤဒ်သိးယကဟီၣ်ယၢၤ နးနးကျံးကျံးလၢယပှၤဂီၢ်မုၢ်ခဲလၢာ်လၢအသံတ့ၢ် တဖၣ်အဂီၢ်န့ၣ်တက့ၢ်. ဂုာ်ကျဲးစၢးမၤမုာ်ထီၣ်က့ၤယၤတဂ့ၤ.

⁵အအံၤမ့ၢ်တၢ်ဆၢကတီၢ်တခါလၢတၢ်ပျံၤတၢ်ဖုး, တၢ်ဃၣ်ကွံာ်, ဒီးတၢ်သဘံၣ်ဘုၣ်မၤအသး လၢတၢ်ထံၣ်လၢညါခီအကစၢၢ်ကဆူးအပူၤ, ဒီးယွၤစိဒိၣ်ကမီၤထီ, သ့တၢ်လၢာ်ကစၢ်ဆှၢ လီၤတ့ၢ်အီၤလၢပဖီခိၣ်န့ၣ်လီၤ. ပဝ့ၢ်အခိၣ်ဒူတဖၣ်ဘၣ်တၢ်တီၢ် လီၤပှီၢ်ကွံာ်အီၤ, ဒီးတၢ်ကိးထီၣ်လၢတၢ်မၤစၢၤအဂီၢ်သီၣ် ကဒါက့ၤလၢကစၢၢ်တဖၣ်အကျါန့ၣ်လီၤ.

⁶ပှၤသုးဖိလၢကီၢ်ဧ့ၤလၣ်တဖၣ်ဟဲဒိးကသ့ၣ်, အိၣ်ဒီးစုကဝဲၤလၢအမ့ၢ်ချံၣ်ဒီးပျၢ်တဖၣ်လီၤ. ပှၤသုးဖိလၢကီၢ်ကံၢ်တဖၣ်ကတဲာ်ကတီၤပာ် အကတီၤတဖၣ်လီၤ.

⁷ကီၢ်ယူဒၤအကစၢၢ်ကဆူးတဖၣ်လၢအအိၣ်ဒီးဟီၣ်ခိၣ်ညၣ်ထ့ၣ် န့ၣ်, ပှဲၤဝဲဒီးလ့ၣ်ကဟၣ်တဖၣ်, ဒီးသုးဖိလၢအဒိးကသ့ၣ်တဖၣ် အိၣ်ဆၢထၢၣ်လၢဝ့ၢ်ယရူၤၡလ့ၣ်အကျဲစၢၤအမဲာ်ညါန့ၣ်လီၤ.

⁸ကီၢ်ယူဒၤအတိာ်ဧိၤတာ်ဧိၤခဲလၢာ်လီၤပှီၢ်ကွံာ်ဝဲလီၤ. ဖဲတၢ်န့ၣ်မၤအသးဒီး, သုဟဲထုးထီၣ်တၢ်စုကဝဲၤတဖၣ်လၢ တၢ်ပာ်စုကဝဲၤအလီၢ်န့ၣ်လီၤ.

⁹သုထံၣ်ဘၣ်တၢ်လီၢ်တဖၣ်ဖဲဝ့ၢ်ယရူၤၡလ့ၣ်အခိၣ်ဒူတဖၣ်လိၣ် ဘၣ်တၢ်ဘှီဂ့ၤထီၣ်က့ၤအီၤန့ၣ်လီၤ.

¹⁰သုကွၢ်ထံက့ၤဟံၣ်ကိးဖျၢၣ်ဒဲးလၢဝ့ၢ်ယရူၤၡလ့ၣ်အပူၤဒီးဂုၤ လီၤပှီၢ်အီၤတနီၤလၢသုကမၤန့ၢ်လၢၢ်တဖၣ်လၢတၢ်ကဘှီက့ၤ ဝ့ၢ်အခိၣ်ဒူအဂီၢ်လီၤ. လၢတၢ်ကပဒၢးဖှိၣ်ထံအဂီၢ်,

¹¹သုဘှီထီၣ်တၢ်ပာ်ကီၤထံအလီၢ်လၢဝ့ၢ်အအိပူၤဒ်သိးသုကမၤ န့ၢ်ထံလၢအဟဲယွၤလီၤဝဲလၢကွံအလီၢ်လံၤလီၤ. ဘၣ်ဆၣ်သုတကနၣ်ဃုာ်ယွၤလၢအကူၣ်ကျဲၤတ့ၢ်တၢ်အံၤဒီး ဒုးကဲထီၣ်လိၣ်ထီၣ်အီၤ, လၢတၢ်ဆၢကတီၢ်လၢအယံာ်တ့ၢ် မးလံတဂၤန့ၣ်ဘၣ်.

¹²ယွၤစိဒိၣ်ကမီၤထီ, သ့တၢ်လၢာ်ကစၢ်ကိးထီၣ်တ့ၢ်လံသုလၢ သုကဟီၣ်တၢ်ယၢၤတၢ်ဒီးသူၣ်အုးသးအုး, လၢသုကလူၤသု ခိၣ်တဖၣ်ဒီးကူထီၣ်ကၤထီၣ်ထၢၣ်တၢ်ကံးယာ်လီၤ.

¹³အခိၣ်တလိၣ်, သုနံၤသုအ့ဒီးမၤတ့ၢ်မူးသးခုလီၤ. သုမၤသံသိဒီးဂီၤဖံးလၢသုကအီၣ်တၢ်အဂီၢ်ဒီးသုအီစပံးထံန့ၣ်လီၤ. သုစံး, “ဂ့ၤပအီၣ်သကိးအီသကိးတခီလီၤ. ခဲဂီၤကိာ်န့ၣ်, ပကသံပဝဲလီၤ.”

¹⁴ယွၤစိဒိၣ်ကမီၤထီ, သ့တၢ်လၢာ်ကစၢ်အကစၢ်ဒၣ်ဝဲကတိၤတ့ၢ် တၢ်ဒီးယၤဒီးစံးဝဲ, “ဖဲအဝဲသ့ၣ်အိၣ်မူဒံးအဖၢမုၢ်ဒီး, တၢ်အၢတၢ်သီအံၤတၢ်ပျၢ်ဖျဲးအီၤတသ့ဘၣ်နီတစုဘၣ်. ယၤ, ယွၤစိဒိၣ်ကမီၤထီ, သ့တၢ်လၢာ်ကစၢ်ကတိၤတ့ၢ်လံတၢ်လီၤ.”

¹⁵တၢ်သုးမုၢ်ဂီၢ်မုၢ်အယွၤသ့တၢ်လၢာ်စံးဘၣ်တ့ၢ်ယၤလၢ ယကလဲၤဆူစီၤၡ့ၤဘနၤလၢအမ့ၢ်ပှၤပၢဆှၢကွၢ်ထွဲစီၤပၤအဟံၣ် အဃီဒီးစံးဘၣ်အီၤ,

¹⁶“နဆိကမိၣ်လီၤနသးလၢနမ့ၢ်မတၤလဲၣ်. လၢနကစိးပျၤတၢ်သွၣ် ခိၣ်တပူၤလၢနဂီၢ်ဒၣ်နဲဖဲလ့ကစၢၢ်ကပၤအဂီၢ်န့ၣ်, နအိၣ်ဒီးတၢ်ခွဲး တၢ်ယာ်မနုၤလဲၣ်.

¹⁷နကမ့ၢ်ပှၤအကါဒိၣ်သ့ၣ်သ့ၣ်လီၤ. ဘၣ်ဆၣ်ဒီး, ယွၤကဟံး ထီၣ်နၤဒီးစူးကွံာ်နၤလီၤ.

¹⁸ကဟံးထီၣ်နၤဒ်တၢ်အဖျၢၣ်တဖျၢၣ်အသိးဒီးကွံာ်လီၤနၤဆူ ထံကီၢ်လၢအလဲၢ်ဒိၣ်တက့ၢ်အပူၤလီၤ. နကသံဖဲန့ၣ်လၢလ့ၣ် ကဟၣ်လၢနပာ်ကဖၢလၢနသးလၢအဃိတဖၣ်အကပၤလီၤ. နမ့ၢ်တၢ်လီၤမဲာ်ဆှးလၢနကစၢ်အဟံၣ်ဒူၣ်ဃီထၢအဂီၢ်လီၤ.

¹⁹ယွၤကသုးကွံာ်နၤလၢနမူနဒါအလီၢ်ဒီးထုးလီၤတဲာ်ကွံာ်နၤလၢ နလီၢ်ဒိၣ်နလၤထီအလီၢ်န့ၣ်လီၤ.”

²⁰ယွၤစံးဘၣ်စီၤၡ့ၤဘနၤ, “ဖဲတၢ်န့ၣ်မၤအသးဒီး, ယကဆှၢ လီၤယခ့ယပှၤစီၤဃံးလကံယၤအဖိခွါစီၤအ့ၤလယါကံၣ်လီၤ.

²¹ယကဒုးကၤထီၣ်အီၤလၢနမူနဒါအဆ့ကၤဒီးနယီၢ်တကိး, ဒီးဟ့ၣ်လီၤအီၤတၢ်စိကမီၤခဲလၢာ်လၢအအိၣ်တ့ၢ်ဒီးနၤလီၤ. အဝဲကလီၤဂာ်ဒီးပၢ်တဂၤလၢဝ့ၢ်ယရူၤၡလ့ၣ်ဒီးကီၢ် ယူဒၤအပှၤဂီၢ်မုၢ်အဂီၢ်န့ၣ်လီၤ.

²²ယကဟ့ၣ်လီၤအီၤတၢ်စိကမီၤလၢာ်လၢာ်ဆ့ဆ့လၢစီၤပၤ တဂၤလၢအဟဲလီၤစၢၤလၢစီၤပၤစီၤဒၤဝံး အဖီလာ်န့ၣ်လီၤ. အဝဲကအိၣ်ဒီးမူဒါလီၢ်လၤအနီၣ်ဝံာ်ခံတဖၣ်လီၤ. တၢ်လၢအအိးထီၣ်ဝဲန့ၣ်, ပှၤတကးတံၢ်နီတဂၤဘၣ်. ဒီးတၢ်လၢအကးတံၢ်ဝဲန့ၣ်, ပှၤတအိးထီၣ်နီတဂၤဘၣ်.

²³ယကစၢတံၢ်အီၤဂၢၢ်ဂၢၢ်ကျၢၤကျၢၤလၢအလီၢ်ဒ်နီၣ်ခိၣ်စူ တဘိအသိး, ဒီးအဝဲကမ့ၢ်တၢ်လၤကပီၤအဂ့ၢ်မိၢ်ပှၢ်လၢ အဒူၣ်ထၢဒီဒူၣ်အဂီၢ်လီၤ.

²⁴ဘၣ်ဆၣ်ဒီး, ကယဲၢ်အဘူးအတံၢ်ဒီးပှၤလၢအသန့ၤအသး လၢအီၤခဲလၢာ်, ကကဲထီၣ်တၢ်ဝံတၢ်ယိးတမံၤလၢအဂီၢ်န့ၣ်လီၤ. အဝဲသ့ၣ်ကဘျးလီၤစဲၤအသးလၢအလိၤဒ်တၢၢ်ဧိၤသပၢၤဧိၤ ဒီးလီခီတဖၣ်ဘျးလီၤစဲၤအသးလၢနီၣ်စဲတဘိအလိၤအသိးန့ၣ်လီၤ.

²⁵ဖဲတၢ်န့ၣ်မၤအသးဒီး, နီၣ်စဲလၢအဘၣ်တၢ်စဲထီအီၤဂၢၢ်ဂၢၢ် ကျၢၤကျၢၤန့ၣ်, ကလီၤဖျုဒီးလီၤတဲာ်ကွံာ်ဝဲန့ၣ်လီၤ. ဒီးတၢ်န့ၣ်, ကမ့ၢ်တၢ်အကတၢၢ်လၢတၢ်ခဲလၢာ်လၢအဘျး လီၤစဲၤအသးလၢအလိၤအဂီၢ်န့ၣ်လီၤ.” ယွၤကတိၤတ့ၢ်လံတၢ်န့ၣ်လီၤ.