Read S'gaw Karen လံာ်ယၡါယၤ 25 Bible Online

လံာ်ယၡါယၤ 25 - S'gaw Karen bible

လံာ်ယၡါယၤ 25

¹ယွၤဧၢ, နမ့ၢ်ယကစၢ်ယွၤလီၤ. ယကမၤလၤကပီၤနၤဒီးစံးထီၣ်ပတြၢၤနမံၤလီၤ. နမၤတ့ၢ်တၢ်လၢအလီၤလိၢ်လီၤလးမးတဖၣ်လီၤ. နတၢ်ကူၣ်တၢ်ကျဲၤလၢပျၢၤတဖၣ်န့ၣ်နမၤလၢထီၣ် ပှဲၤထီၣ်အီၤလၢတၢ်သူၣ်တီသးရၤအပူၤလီၤ.

²နဘိးကဒါတ့ၢ်ဝ့ၢ်တဖၣ်ဆူတၢ်ဟးဂူာ်ဟးဂီၤအပူၤ ဒီးမၤဟးဂီၤကွံာ်အတိာ်ခၢၣ်သနၢၣ်တဖၣ်လီၤ. နူၢ်ဧိၤစီၤဧိၤတဖၣ်လၢပဒုၣ်ပဒါတဖၣ်သူၣ်ထီၣ်တ့ၢ်အီၤန့ၣ် လီၤမၢ်ကွံာ်အထူအယိာ်လီၤ.

³ပှၤကလုာ်တဖၣ်လၢအစိကမီၤ ဒိၣ်ဝဲအပှၤဂီၢ်မုၢ်ကစံးထီၣ်ပတြၢၤ နၤလီၤ. နကဘၣ်တၢ်ပျံၤနၤလၢပှၤက လုာ်အအၢအသီတဖၣ်အဝ့ၢ်ပူၤလီၤ.

⁴ပှၤအဖှီၣ်ဒီးပှၤလၢတၢ်မၤစၢၤအီၤ တအိၣ်တဖၣ်ဃ့ၢ်ဃီၤဆူနအိၣ် ဒီးအိၣ်ပူၤအိၣ်ဖျဲးလၢတၢ်မၤကိၢ်မၤဂီၤအကတီၢ်န့ၣ်လီၤ. နဟ့ၣ်အဝဲသ့ၣ်လၢတၢ်အိၣ်တ ဒၢအလီၢ်ဖဲကလံၤမုၢ်လီၤအကတီၢ်, ဒီးဒုးအိၣ်ကဒုတ့ၢ်အီၤလၢတၢ် ကိၢ်ဂီၤကဲၤအကတီၢ်န့ၣ်လီၤ. ပှၤအၢပှၤသီတဖၣ်ထီၣ်ဒုးတၢ် ဒ်တၢ်ဂိၢ်ကတီၢ်ကလံၤမုၢ်လီၤဝဲအသိး, ဒီးဒ်တၢ်ယီၤဃ့လၢကီၢ်လၢအဃ့ထီ တဘ့ၣ်အပူၤအသိးလီၤ.

⁵မ့မ့ၢ်နဲဒၣ်, ယွၤဧၢ, နဒုးအိၣ် ဘှီၣ်ပဒုၣ်ပဒါတဖၣ်လီၤ. နဒုးအိၣ်ဘှီၣ်ပှၤအၢပှၤသီ တဖၣ်အတၢ်ကိးပသူထီၣ်ဒ်တၢ်အၢၣ် တလိၣ်မၤခုၣ်လီၤနံၤအကိၢ်တနံၤအသိးန့ၣ်လီၤ.

⁶ဖဲအံၤလၢကစၢၢ်စံယိၣ်အဖီခိၣ်န့ၣ်, ယွၤသ့တၢ်လၢာ်ကကတဲာ် ကတီၤတၢ်အီၣ်အမူးတမူးလၢကယဲၢ်ပှၤကလုာ်ခဲလၢာ်လၢ ဟီၣ်ခိၣ်ချၢအဂီၢ်လီၤ. မ့ၢ်တၢ်အီၣ်အဝံၣ်အဘဲကတၢၢ်ဒီး စပံးထံအဂ့ၤကတၢၢ်အမူးတမူးလီၤ.

⁷ဖဲအံၤယွၤကသုးကွံာ်တၢ်သးအုးအတၢ်အၢၣ်လၢအအိၣ်လၢ ကယဲၢ်ပှၤကလုာ်ခဲလၢာ်အဖီခိၣ်သတူၢ်ကလာ်လီၤ.

⁸ယွၤလၢအပၢဘၣ်တၢ်ခဲလၢာ်ကမၤဟးဂီၤကွံာ်တၢ်သံလီၤထူ လီၤယိာ်လီၤ. အဝဲကထွါကွံာ်မဲာ်ထံတဖၣ်လၢပှၤကိးဂၤ ဒဲးအမဲာ်ချံဒီးစိာ်ကွံာ်တၢ်မဲာ်ဆှးလၢအပှၤဂီၢ်မုၢ်ဘၣ်တူၢ်တ့ၢ် ဝဲလၢဟီၣ်ခိၣ်ဒီဘ့ၣ်ညါန့ၣ်လီၤ. ယွၤအကစၢ်ဒၣ်ဝဲကတိၤတ့ၢ်တၢ်လီၤ.

⁹ဖဲတၢ်အံၤမၤအသးဒီး, ပှၤကိးဂၤဒဲးကစံးဝဲ, “အဝဲဒၣ်မ့ၢ်ပကစၢ်ယွၤလီၤ. ပပာ်ပတၢ်နာ်လၢအပူၤဒီးခဲအံၤ, ပသူၣ်ဖှံသးညီဒီးသူၣ်ခုသးခုလီၤ. အဂ့ၢ်ဒ်အံၤ, အုၣ်က့ၤခီၣ်က့ၤတ့ၢ်ပှၤလီၤ.”

¹⁰ကစၢ်ယွၤကဒီဒၣ်အိၣ်ပှိၤကစၢၢ်စံယိၣ်လီၤ. မ့မ့ၢ်ကီၢ်မိၤအးအပှၤဂီၢ်မုၢ်န့ၣ်ကဘၣ်တၢ်ယီၢ်လီၤတံၢ်အီၤဒ် ဘုလီၢ်ဘၣ်တၢ်ယီၢ်တံၢ်အီၤလၢတၢ်အ့ၣ်တၢ်ဆံၣ်အပူၤအသိးလီၤ.

¹¹အဝဲသ့ၣ်ကယူာ်ထီၣ်အစုတဖၣ်ဒီးကမၤမၢးအသးဒ် အဝဲသ့ၣ်ဂုာ်ကျဲးစၢးလၢကပှီၢ်ထံအဂီၢ်အသိးလီၤ. ဘၣ်ဆၣ်ဒီးကစၢ်ယွၤကဆီၣ်လီၤအဝဲသ့ၣ်, ဒီးအဝဲသ့ၣ်အစုတဖၣ်ကလီၤဘျၢဝဲလၢတၢ် မၤစၢၤတအိၣ်ဘၣ်အပူၤလီၤ.

¹²အဝဲကမၤဟးဂီၤကီၢ်မိၤအးအတိာ်ဧိၤတာ်ဧိၤတဖၣ်ဃုာ်ဒီး အဝ့ၢ်ခိၣ်ဒူလၢအထီတဖၣ်ဒီးမၤလီၤပှီၢ်လီၤကလဲကွံာ်အီၤဆူ ဖၣ်ကမူၣ်ဖၣ်ဆါအကျါန့ၣ်လီၤ.