Read S'gaw Karen လံာ်ယၡါယၤ 3 Bible Online

လံာ်ယၡါယၤ 3 - S'gaw Karen bible

လံာ်ယၡါယၤ 3

¹ခဲအံၤယွၤ, ယွၤသ့တၢ်လၢာ်, ကဟံးထီၣ် ကွံာ်တၢ်ခဲလၢာ်ဒီးပှၤကိးဂၤဒဲးလၢ ပှၤဂီၢ်မုၢ်သန့ၤအသးလၢအီၤလၢအအိၣ်ဝဲလၢ ဝ့ၢ်ယရူၤရှလ့ၣ်ဒီးကီၢ်ယူဒၤအပူၤ, ဒီးအဝဲကစိာ်ကွံာ်အတၢ်အီၣ်ဒီးအထံဧိၤနိဧိၤ,

²အပှၤဒူပှၤဃိၤတဖၣ်, အသုးမုၢ်သံၣ်ဘိတဖၣ်, အစံၣ်ညီၣ်ကွီၢ်တဖၣ်ဒီးအဝံတဖၣ်, အပှၤဖးတၢ်ဟဲဝံဟဲစိာ် တဖၣ်ဒီးအပဒိၣ်ပၢတၢ်ပြးတၢ်တဖၣ်,

³အသုးခိၣ်သုးနၢ်ဒီးထံဖိကီၢ်ဖိခိၣ်နၢ်တဖၣ်, အထံဂ့ၢ်ကီၢ်ဂ့ၢ်ခိၣ် နၢ်တဖၣ်ဒီးပှၤကိးဂၤဒဲးလၢအသူတၢ်မၤကဒါမဲာ်ဒ်သိးကပၢ ဆူၣ်တၢ်လၢအမၤအသးတဖၣ်န့ၣ်လီၤ.

⁴ယွၤကပျဲပိာ်ခွါဖိသၣ်လၢတဒိၣ်တုာ်ခိၣ်ပှဲၤ တဖၣ်ကပၢပှၤဂီၢ်မုၢ်န့ၣ်လီၤ.

⁵ပှၤကိးဂၤဒဲးကဟံးန့ၢ်တၢ်ခွဲးတၢ်ယာ် လၢပှၤအဂၤကိးဂၤဒဲးအဖီခိၣ်န့ၣ်လီၤ. ပှၤသးစၢ်တဖၣ်တပာ်ကဲ အပှၤသူၣ်က့သးပှၢ်တဖၣ်ဘၣ်ဒီးပှၤလၢအလုၢ် အပှ့ၤတအိၣ်တဖၣ်တပာ်ကဲပှၤလၢအလီၢ်ထီန့ၢ်အီၤတဖၣ်ဘၣ်လီၤ.

⁶တၢ်ဆၢကတီၢ်ကဟဲဝဲဖဲပှၤတဒူၣ်တကရူၢ်အဒူၣ်ဖိထၢဖိတဖၣ် ကဃုထၢပှၤလၢအဝဲသ့ၣ်အကျါတဂၤဒီးစံးဘၣ်အီၤ, “နဲဒၣ်အစှၤကတၢၢ်နအိၣ်ဒီးတၢ်လၢနကကူသိးအီၤ, အဃိသတးဒီးကဲထီၣ်ပခိၣ်ပနၢ်လၢတၢ်ကီတၢ်ခဲအဆၢကတီၢ် အပူၤအံၤတက့ၢ်,” န့ၣ်လီၤ.

⁷ဘၣ်ဆၣ်အဝဲကစံးဆၢဝဲ, “ယတမၤဘၣ်. ယမၤစၢၤသုတသ့ဘၣ်. ယတၢ်အီၣ်ဒီးယကူယကၤစ့ၢ်ကီးတအိၣ်ဘၣ်. ဒုးကဲထီၣ်ယၤလၢသုးခိၣ်သုးနၢ်တဂ့ၤ,” န့ၣ်လီၤ.

⁸မ့ၢ်လီၤ. ဝ့ၢ်ယရူၤရှလ့ၣ်ဘၣ်တၢ်စံၣ်ညီၣ်ဃါမနၤလီၤ. ကီၢ်ယူဒၤကလီၤပှီၢ်ဝဲလီၤ. ကယဲၢ်တၢ်လၢအဝဲသ့ၣ်စံးဝဲဒီး မၤဝဲန့ၣ်မ့ၢ်တၢ်ထီဒါယွၤလီၤ. အဝဲသ့ၣ်ကတိၤတရီတပါယွၤ အကစၢ်ဒၣ်ဝဲဖျိဖျိဖျါဖျါလီၤ.

⁹အတၢ်ကွၢ်မဲာ်လၢတၢ်ထံၣ်တဆှံတဖၣ်ကဘၣ်တၢ်ဟံးဃာ်အီၤ လၢတၢ်ထီဒါက့ၤအဝဲသ့ၣ်အဂီၢ်လီၤ. အဝဲသ့ၣ်မၤတၢ်ဒဲးဘးဖျိ ဖျိဖျါဖျါဒ်ပှၤအိၣ်လၢဝ့ၢ်စဒိၣ်တဖၣ်မၤတ့ၢ်ဝဲအသိးလီၤ. အဝဲသ့ၣ်ဘၣ်တၢ်စံၣ်ညီၣ်ဃါမနၤလီၤ. အဝဲ သ့ၣ်ဟဲစိာ်တၢ်အံၤလၢအဖီခိၣ်ဒၣ်ဝဲလီၤ.

¹⁰ပှၤအတီအလိၤတဖၣ်ကသူၣ်ဖှံသးညီဒီးတၢ်ခဲလၢာ်ကလဲၤအသး ဂ့ၤဂ့ၤဘၣ်ဘၣ်လၢအဝဲသ့ၣ်အဂီၢ်လီၤ. အဝဲသ့ၣ်ကမုာ်လၤသးခု ဘၣ်ဝဲလၢတၢ်လၢအမၤတ့ၢ်ဝဲအဃိန့ၣ်လီၤ.

¹¹ဘၣ်ဆၣ်, ပှၤအၢပှၤသီတဖၣ်ဘၣ်တၢ်စံၣ်ညီၣ်ဃါမနၤလီၤ. တၢ်လၢအဝဲသ့ၣ်မၤဘၣ်တ့ၢ်ပှၤတဖၣ်န့ၣ်ခဲအံၤတၢ်ကမၤဘၣ်က့ၤ အဝဲသ့ၣ်လီၤ.

¹²ဖိဒံဖိသၣ်တဖၣ်မၤနးမၤဖှီၣ်ယပှၤဂီၢ်မုၢ်, ဒီးပိာ်မုၣ်တဖၣ်ပၢတၢ်လၢအဖီခိၣ်လီၤ. အိ, ယပှၤဂီၢ်မုၢ်သ့ၣ်ဧၢ, သုခိၣ်သုနၢ်တဖၣ်ဆှၢကမၣ်သုတုၤဒၣ် လဲာ်သုကဘၣ်လဲၤကျဲလၢလဲၣ်န့ၣ်သုတသ့ၣ်ညါအီၤဘၣ်လီၤ.

¹³ယွၤအိၣ်ကတဲာ်ကတီၤအသးလၢကတဲဖျါထီၣ်အကွီၢ်, ဒီးအိၣ်ကတဲာ်ကတီၤအသးလၢကစံၣ်ညီၣ်အပှၤဂီၢ်မုၢ်လီၤ.

¹⁴ယွၤဆှၢနုာ်အပှၤဂီၢ်မုၢ်အသူၣ်က့သးပှၢ်တဖၣ်ဒီးအခိၣ်အနၢ် တဖၣ်ဆူတၢ်စံၣ်ညီၣ်အပူၤ, ဒီးလိာ်ဘၢလိာ်ကွီၢ်ထီဒါအဝဲသ့ၣ်, စံးဝဲ, “သုဂုာ်ဆူၣ်ပျီဆူၣ်စပံးလီၢ်တဖၣ်, ဒီးသုဟံၣ်တဖၣ်ပှဲၤဝဲဒီးတၢ်လၢသု ဟံးန့ၢ်လၢပှၤဖှီၣ်ဖိယာ်ဖိတဖၣ်အအိၣ်လီၤ.

¹⁵သုတၢ်ခွဲးတၢ်ယာ်တအိၣ်ဘၣ်လၢ သုကဆီၣ်လီၤသဘှံးယပှၤဂီၢ်မုၢ်ဒီးဟံးန့ၢ်ဘျုးတၢ်လၢပှၤဖှီၣ်ဖိ ယာ်ဖိအအိၣ်န့ၣ်ဘၣ်. ယၤ, ယွၤပၢဘၣ်တၢ်ခဲလၢာ်ကစၢ်, ကတိၤလံတၢ်လံ.”

¹⁶ယွၤစံးဝဲဒၣ်, “ကွၢ်, ပိာ်မုၣ်လၢယရူၤရှလ့ၣ် တဖၣ်ပာ်ထီၣ်ထီအသးထဲလဲၣ်. အဝဲသ့ၣ်လဲၤတၢ်အနါစ့ၤ တဖၣ်အိၣ်လၢကလံၤကျါလီၤ. အဝဲသ့ၣ်မၤလီၤအဲၣ်အသး ဒ်သိးကလွဲန့ၢ်တၢ်ထီဘိလီၤ. လဲၤတၢ်လၢခီၣ်ခါဃံလၤဖိတ ဖၣ်ဒီးခီၣ်ကျီၤလၢအခီၣ်ဒ့တဖၣ်အလိၤသီၣ်ကြ့ကြိၣ်လီၤ.

¹⁷ဘၣ်ဆၣ်ဒီးယကစံၣ်ညီၣ်အဝဲသ့ၣ်, ယကလူၤကျိကွံာ်အခိၣ်တဖၣ်ဒီးပာ်အီၤလ့ၤကဒိလီၤ.”

¹⁸မုၢ်တနံၤကဟဲဝဲဖဲယွၤကဟံးထီၣ် ကွံာ်တၢ်လၢဝ့ၢ်ယရူၤရှလ့ၣ်အပှၤပိာ်မုၣ်တဖၣ်အအိၣ်န့ၣ်, အတၢ်ကိးမံၤဒဲးလၢအပာ်ကဖၢလၢ အသးလၢအဃိဒ်တၢ်ကယၢကယဲ တဖၣ်လၢအသိးဝဲလၢအခီၣ်ဒ့တဖၣ်အလိၤ, လၢအခိၣ်တဖၣ်အဖီခိၣ်, လၢအကိာ်တဖၣ်အလိၤ,

¹⁹ဒီးလၢအစုဒ့တဖၣ်အလိၤလီၤ. အဝဲကဟံးထီၣ်ကွံာ်အတၢ်ကံး ယာ်ကျၢၢ်ဘၢမဲာ်တဖၣ်,

²⁰ဒီးအခိၣ်ကျီၤတဖၣ်, တၢ်ရဲၢ်တၢ်သမူပယၢ်အတၢ်က ယၢကယဲတဖၣ်လၢအစုဒုၣ်စုတီၤဒီးအယီၢ်ဒ့အလိၤ,

²¹ပသံးတဖၣ်လၢအသိးဝဲလၢအစုမုၢ်ဒီးကွီၤတဖၣ်လၢအနါဒ့တဖၣ် အလိၤ,

²²အဆ့ကၤဖးထီတဖၣ်, ဆ့ကၤဖးဒိၣ်တဖၣ်, ဆ့ကၤဖးဒိၣ်လၢအစုတအိၣ်တဖၣ်, ဒီးအစ့ထၢၣ်တဖၣ်,

²³အတၢ်ကူတၢ်ကၤဘူသလါ, အစုဖီၣ်, ဒီးတၢ်ကံးယာ်တဝံာ်ကိာ်ဒီးခိၣ်ဖၢၣ် တဖၣ်လၢအခိၣ်တဖၣ်အလိၤန့ၣ်လီၤ.

²⁴လၢကသူတၢ်နၢမူတဖၣ်အလီၢ်အဝဲသ့ၣ် ကနၢအုၣ်နၢပူးလီၤ. ဒီးလၢယီၢ်တကိးအ ဂ့ၤတဖၣ်အလီၢ်န့ၣ်ကသူဝဲပျံၤသွဲးတဖဲး တဖၣ်လီၤ. ဒီးလၢကအိၣ်ဒီးခိၣ်သူဃံလၤ အလီၢ်အခိၣ်ကကျိလီၤ. ဒီးလၢတၢ်ကူတၢ်ကၤဃံ လၤတဖၣ်အလီၢ်, အဝဲသ့ၣ်ကကူထီၣ်ကၤထီၣ်တၢ်ယာ်ဘုၣ်ယာ်ဖျ့တဖၣ်, ဒီးအတၢ်ဃံတၢ် လၤကဘၣ်တၢ်ဘိးကဒါအီၤဆူတၢ်မဲာ်ဆှးန့ၣ်လီၤ.

²⁵ပှၤပိာ်ခွါလၢဝ့ၢ်ပူၤတဖၣ်, ပိာ်ခွါလၢအဂံၢ် ဆူၣ်တဖၣ်ဒၣ်လဲာ်, ကဘၣ်တၢ်မၤသံအီၤလၢတၢ်ဒုး တၢ်ယၤအပူၤလီၤ.

²⁶ဝ့ၢ်အတြဲၤတဖၣ်ကသူၣ်အုးသးအုးဒီးဟီၣ်ဝဲယၢၤဝဲ, ဒီးဝ့ၢ်အကစၢ်ဒၣ်ဝဲကလီၤဂာ်ဒ်ပိာ်မုၣ်အိၣ်ဘ့ၣ်ဆ့ တဂၤဆ့ၣ်နီၤလၢဟီၣ်ခိၣ်လိၤအသိးန့ၣ်လီၤ.