Read S'gaw Karen လံာ်ယၡါယၤ 33 Bible Online

လံာ်ယၡါယၤ 33 - S'gaw Karen bible

လံာ်ယၡါယၤ 33

¹ပဒုၣ်ပဒါတဖၣ်ဘၣ်တၢ်စံၣ်ညီၣ်ဃါမနၤလီၤ. အဝဲသ့ၣ်ဂုာ်ဆူၣ်ပျီဆူၣ်တ့ၢ်တၢ်ဒီးဆါလီၤကွံာ်တၢ်ဖဲပှၤ တဂုာ်ဆူၣ်ပျီဆူၣ်တ့ၢ်အဝဲသ့ၣ်မ့ၢ်ဂ့ၤပှၤတဆါ လီၤကွံာ်အဝဲသ့ၣ်မ့ၢ်ဂ့ၤနီတဂၤဘၣ်အဆၢကတီၢ်န့ၣ်လီၤ. ဘၣ်ဆၣ်ဒီးအဝဲသ့ၣ်အတၢ်ဂုာ်ဆူၣ် ပျီဆူၣ်တၢ်ဒီးတၢ်ဆါလီၤကွံာ်တၢ်အ ဆၢကတီၢ်န့ၣ်ကတၢၢ်ဝဲဒီးအဝဲသ့ၣ်အကစၢ်ဒၣ် ဝဲကကဲထီၣ်ပှၤလၢတၢ်မၤနၢၤအီၤလၢ အဘၣ်တၢ်ဂုာ်ဆူၣ်ပျီဆူၣ်ဒီးလီန့ၢ်အီၤတဖၣ်န့ၣ်လီၤ.

²ယွၤဧၢ, သူၣ်ကညီၤသးကညီၤလၢ်ပှၤတက့ၢ်. ပပာ်ပတၢ်မုၢ်လၢ်လၢနပူၤလီၤ. ကဟုကယာ်ပှၤတနံၤဘၣ် တနံၤဒီးအုၣ်က့ၤခီၣ်က့ၤပှၤလၢတၢ်ကိၢ်တၢ်ဂီၤအဆၢကတီၢ် တဖၣ်န့ၣ်တက့ၢ်.

³ဖဲနဒုးတၢ်လၢပဂီၢ်န့ၣ်, ပှၤကလုာ်တဖၣ်ဃ့ၢ်ကွံာ်ဝဲလၢတၢ်ဒုး တၢ်ယၤအတၢ်သီၣ်တၢ်သဲအဃိန့ၣ်လီၤ.

⁴တၢ်ဘၣ်ထွဲဘၣ်ဃးဒီးအဝဲသ့ၣ်တဖၣ်ဘၣ်တၢ်စံၣ်ပှီၤဒီးဟံးန့ၢ် အီၤဒ်တၢ်ဖိတၢ်လံၤလၢတၢ်ဂုာ်န့ၢ်အီၤအသိးလီၤ.

⁵ယွၤန့ၣ်ဒိၣ်ဝဲဆံးဒိၣ်လဲၣ်. အဝဲပၢတၢ်လၢတၢ်ခဲလၢာ်အဖီခိၣ်လီၤ. အဝဲကမၤပှဲၤဝ့ၢ်ယရူၤရှလ့ၣ်ဒီးတၢ်စံၣ်ညီၣ်တီဒီးတၢ်မၤတီ အကလုၢ်,

⁶ဒီးဟ့ၣ်ပှၤကလုာ်လၢတၢ်အိၣ်ဂၢၢ်ဆိးကျၢၤန့ၣ်လီၤ. အဝဲကဟုကယာ်အပှၤဂီၢ်မုၢ်ဒီးဟ့ၣ်အဝဲသ့ၣ် လၢတၢ်ကူၣ်သ့ဒီးတၢ်သ့ၣ်ညါထီဘိလီၤ. အတၢ်လုၢ်ဒိၣ်ပှ့ၤဒိၣ်အဒိၣ်ကတၢၢ်မ့ၢ်ဝဲအဝဲသ့ၣ်အတၢ်ယူး ယီၣ်ယွၤန့ၣ်လီၤ.

⁷ပှၤအဒူတဖၣ်ကိးထီၣ်ဝဲလၢတၢ်မၤစၢၤအဂီၢ်လီၤ. ထံကီၢ်အခၢၣ်စးလၢအကျဲးစၢးမၤဃူမၤဖိးတၢ်တဖၣ် ဟီၣ်ဝဲယၢၤဝဲနးနးကလဲာ်လီၤ.

⁸ကျဲမုၢ်ဒိၣ်တဖၣ်လီၤပျံၤလီၤဘၣ်ယိာ်ဝဲတုၤဒၣ်လဲာ်ပှၤတလဲၤ တၢ်က့ၤတၢ်လၢအလိၤနီတဂၤလၢၤဘၣ်. ထံကီၢ်ကဒဲကဒဲအတၢ် အၢၣ်လီၤလိာ်သးတဖၣ်ဘၣ်တၢ်မၤဟးဂီၤကွံာ်အီၤဒီးတၢ်သး လီၤပလိာ်ဃုာ်တဖၣ်ဘၣ်တၢ်မၤတရီတပါအီၤလီၤ. တၢ်ပာ်ကဲတအိၣ်လၢၤဘၣ်လၢပှၤနီတဂၤအဖီခိၣ်နီ တစုလၢၤဘၣ်.

⁹ထံဧိၤကီၢ်ဧိၤန့ၣ်အိၣ်ကလီဒီးအိၣ်သယုၢ်ဝဲလီၤ. ကီၢ်လဘၤနိၣ်အသ့ၣ်ဒိၣ်ပှၢ်တီၣ်တဖၣ်လီၤညွံးလီၤဘဲကွံာ်ဝဲ, ၡၤရိၣ်အတြီၤလၢဟီၣ်ခိၣ်ညၣ်ထ့ၣ်ဂ့ၤတဖၣ်လီၤဂာ်ဒ်မဲးမုၢ်ခိၣ် တပူၤအသိး, သ့ၣ်အထူၣ်တဖၣ်လၢကီၢ်ဘၤၡၣ်ဒီးကစၢၢ် ကၢ်မ့ၤလးအလိၤန့ၣ်အလၣ်တဖၣ်လီၤဆှုကွံာ်ဝဲလီၤ.

¹⁰ယွၤစံးဘၣ်ပှၤကလုာ်တဖၣ်, “ခဲကနံၣ်အံၤ, ယကမၤတၢ်လီၤ. ယကဒုးနဲၣ်လၢယစိကမီၤဒိၣ်ထဲလဲၣ်ထဲလဲၣ်န့ၣ်လီၤ.

¹¹သုမၤတၢ်ကူၣ်ကျဲၤလၢအလုၢ်အပှ့ၤတအိၣ်တဖၣ်, ဒီးတၢ်လၢသုမၤခဲလၢာ်န့ၣ်မ့ၢ်တၢ်လၢအဘျုးတအိၣ်ဘၣ်လီၤ. ယသးလီၤဂာ်ဒီးမ့ၣ်အူတခါလၢအကမၤဟးဂီၤသုန့ၣ်လီၤ.

¹²သုကဘၣ်တၢ်မၤလီၤကလဲကွံာ်ဒ်လၢၢ်တဖၣ်လၢတၢ်ဒွဲၣ်အူအီၤ ဒ်သိးကကဲထီၣ်ထူၣ်, ဒီးဒ်တၤဆှုၣ် တၤမဲတဖၣ်လၢတၢ်ဒွဲၣ်အူကွံာ် အီၤဆူဖၣ်ဆါအသိးန့ၣ်လီၤ.

¹³မ်ပှၤကိးဂၤဒဲးလၢအဘူးဒီးအယံၤန့ၣ်နၢ်ဟူတၢ်လၢယမၤ တ့ၢ်အီၤဒီးသ့ၣ်ညါအၢၣ်လီၤယတၢ်စိတၢ်ကမီၤန့ၣ်တက့ၢ်.”

¹⁴ပှၤတၢ်ဒဲးဘးဖိလၢဝ့ၢ်စံယိၣ်အပူၤတဖၣ်ကနိးကစုာ်ဝဲလၢအပျံၤ တၢ်ဖုးတၢ်အဃိလီၤ. အဝဲသ့ၣ်စံးဝဲ, “ကစၢ်ယွၤအတၢ်စံၣ်ညီၣ်လီၤဂာ်ဒီးမ့ၣ်အူတခါလၢအကဲၤဝဲလီၤ စိၤလီၤထီန့ၣ်လီၤ. ပှၤလၢပကျါတဂၤဂၤထူၣ်ဖျဲးထီၣ်ကွံာ်လၢ မ့ၣ်အူဒ်သိးအံၤဘၣ်ကသ့ဧါ.”

¹⁵သုမ့ၢ်စံးဒီးမၤတၢ်လၢအဘၣ်န့ၣ်, သုထူၣ်ဖျဲးထီၣ်ကွံာ်သ့လီၤ. သူသုစိကမီၤလၢသုကလီန့ၢ်ပှၤဖှီၣ်ဖိယာ်ဖိဒီးတူၢ်လိာ်ခိၣ်ဖး လာ်ဆှိးတဂ့ၤ. မၤဃုာ်ဒီးပှၤလၢအကူၣ်ကျဲၤတၢ်မၤသံမၤဝီမ့ၢ်ဂ့ၤ, တၢ်အၢတၢ်သီအဂၤတဖၣ်မ့ၢ်ဂ့ၤန့ၣ်တဂ့ၤ.

¹⁶အန့ၣ်ဒီးသုကပူၤဖျဲးသုဝဲလီၤ. သုကအိၣ်ဘံၣ်အိၣ်ဘၢသုဝဲဒ် သုအိၣ်လၢတိာ်ဧိၤတာ်ဧိၤလၢအဂၢၢ်အကျၢၤတခါအပူၤ အသိးန့ၣ်လီၤ. သုကအိၣ်ဒီးတၢ်အီၣ်လၢသုကအီၣ်အီၤ, ဒီးထံလၢသုကအီအဂီၢ်န့ၣ်လီၤ.

¹⁷မၤကဒီးတစုသုကထံၣ်ဘၣ်စီၤပၤတဂၤပၢတၢ်လၢတၢ်လီၤ ဘီလီၤမုၢ်အပူၤလၢထံကီၢ်လၢအသလၣ်ထီၣ်အသးကတၢၢ် မဲာ်ကတၢၢ်နါကိးကပၤဒဲးတဘ့ၣ်အဖီခိၣ်လီၤ.

¹⁸သုတၢ်ပျံၤတၢ်ဖုးလီၢ်လံၤတဖၣ်လၢအဘၣ်ထွဲဒီးပှၤတခီဘီမုၢ် ဖိအပှၤဃ့သွဲတဖၣ်မ့ၢ်ဂ့ၤ, ပှၤကွၢ်ဟုၣ်ကွၢ်စုးတၢ်တဖၣ်မ့ၢ်ဂ့ၤန့ၣ် ကမၤအသးဒ်တၢ်မံမီၢ်တယုၢ်အသိးဧိၤန့ၣ်လီၤ.

¹⁹သုတထံၣ်ဘၣ်လၢၤပှၤတခီဘီမုၢ်ဖိလၢအပာ်ထီၣ်ထီ အသးဒီးကတိၤကျိာ်လၢသုတနၢ်ပၢၢ်အီၤန့ၣ်နီတစုလၢၤဘၣ်.

²⁰ကွၢ်ဃီၤစံယိၣ်, ဝ့ၢ်လၢပမၤပတၢ်ဘူၣ်တၢ်ဘါအမူးတဖၣ်န့ၣ် တက့ၢ်. ကွၢ်ဃီၤဝ့ၢ်ယရူၤရှလ့ၣ်တက့ၢ်. ကမ့ၢ်ဝဲတၢ်ပူၤဖျဲး အလီၢ်တတီၤလၢပကအိၣ်လၢအပူၤမးလဲၣ်. ကလီၤဂာ်ဒီးဒဲတဖျၢၣ်လၢတၢ်တသုးအလီၢ်နီတဘျီဘၣ်, အနီၣ်စဲတဖၣ်တဘၣ်တၢ်ထဲးထီၣ်ကွံာ်အီၤနီတဘျီဘၣ်, ဒီးလၢအပျံၤတဖၣ်တဘၣ်တၢ်မၤတဲာ်ကွံာ်အီၤနီတဘျီဘၣ် န့ၣ်လီၤ.

²¹ယွၤကဒုးနဲၣ်ပှၤလၢအလၤကပီၤလီၤ. ပကအိၣ်ဖဲထံကျိဖးလဲၢ်ဒီးထံကျိဖိတဖၣ်အနံၤလီၤ. ဘၣ်ဆၣ်ဒီးကဘီသုးတဖၣ်တလဲၤတၢ်လၢအဝဲသ့ၣ်အပူၤဘၣ်.

²²ယၢ်ထူၣ်ခဲလၢာ်လၢကဘီတဖၣ်န့ၣ်အလိၤတၢ်သူအီၤ တသ့လၢၤဘၣ်. ယၢ်လၣ်တဖၣ်တၢ်သလၣ်ထီၣ်အီၤတန့ၢ်လၢၤဘၣ်. ပကဂုာ်ဟံးန့ၢ်ဒုၣ်ဒါအသုးမုၢ်တဖၣ်အတၢ်ထူးတၢ်တီၤခဲလၢာ်, ဒီးတၢ်ကအိၣ်အါဝဲဂီၢ်ဝဲတုၤပှၤစုတဆူၣ်အခီၣ်တဂ့ၤတဖၣ်ဒၣ်လဲာ် မၤန့ၢ်တၢ်နီၤဟ့ၣ်တမံၤလၢအဝဲသ့ၣ်အဂီၢ်ကသ့ဝဲလီၤ.

²³အဂ့ၢ်ဒ်အံၤ, ယွၤအကစၢ်ဒၣ်ဝဲမ့ၢ်ပစီၤပၤလီၤ. အဝဲပၢပှၤဒီးဒီဒၣ်အိၣ်ပှိၤပှၤလီၤ.

²⁴ပှၤလၢအအိၣ်လၢပထံလီၢ်ကီၢ်ပူၤတကဒူးကဒ့ၣ်ကဒီးလၢ အဆူးအဆါနီတဂၤလၢၤဘၣ်, ဒီးတၢ်ဒဲးဘးခဲလၢာ်န့ၣ် ကဘၣ်တၢ်ပျၢ်ကွံာ်အီၤလီၤ.