Read S'gaw Karen လံာ်ယၡါယၤ 34 Bible Online

လံာ်ယၡါယၤ 34 - S'gaw Karen bible

လံာ်ယၡါယၤ 34

¹ဟဲ, ကယဲၢ်ပှၤကလုာ်ခဲလၢာ်အပှၤဂီၢ်မုၢ်သ့ၣ်ဧၢ, ပာ်ဖှိၣ်သုသးဒီးဒိတနၣ်တက့ၢ်. မ်ဟီၣ်ခိၣ်ဒီဘ့ၣ်ဒီးပှၤခဲ လၢာ်လၢအအိၣ်လၢအပူၤဟဲဖဲအံၤဒီးဒိကနၣ်တၢ်တက့ၢ်.

²ယွၤသးထီၣ်ဘၣ်ပှၤကလုာ်ခဲလၢာ်ဒီးအဝဲသ့ၣ်အသုး မုၢ်သံၣ်ဘိခဲလၢာ်လီၤ. အဝဲစံၣ်ညီၣ်ဃၣ်တ့ၢ်အဝဲသ့ၣ် ဆူတၢ်ဟးဂီၤအပူၤလံ.

³အဝဲသ့ၣ်အစိၣ်တဖၣ်တဘၣ်တၢ်ခူၣ်လီၤအီၤဘၣ်. ကအိၣ်ဒၣ်ဖဲန့ၣ်, အုၣ်သံကျၣ်သံနၢအုၣ်နၢပူး, ဒီးကစၢၢ်ကလိ တဖၣ်ကဂီၤဝဲဒီးတၢ်သွံၣ်လီၤ.

⁴မုၢ်, လါ, ဒီးဆၣ်တဖၣ်ကလီၤကလဲကွံာ်ဒီးကဲထီၣ်ဖၣ်ဆါန့ၣ် လီၤ. မူကပိာ်လိၤကလီၤမၢ်ကွံာ်ဒ်လံာ်ထူတထူဘၣ်တၢ်ထူထီၣ် အီၤအသိး, ဒီးဆၣ်တဖၣ်ကလီၤဆှု ဝဲဒ်သ့ၣ်လၣ်တဖၣ်လီၤဆှုကွံာ်လၢစပံးမုၢ်တမုၢ်, မ့တမ့ၢ်, ချၢၣ်ဒၢတထူၣ်အလိၤအသိး န့ၣ်လီၤ.

⁵ယွၤကတဲာ်ကတီၤတ့ၢ်အနးလၢမူခိၣ်, ဒီးခဲအံၤနးန့ၣ်ကကျီကွံာ်ကီၢ်အဒိၣ် အပှၤဂီၢ်မုၢ်လၢအစံၣ်ညီၣ်ဃၣ်တ့ၢ်ဝဲ ဆူတၢ်ဟးဂီၤအပူၤန့ၣ်လီၤ.

⁶အနးကဘၣ်အၢပှဲၤဒီးအဝဲသ့ၣ်အသွံၣ်ဒီးအသိ, ဒ်သိဖိဒီးမဲာ်တဲးလဲးတဖၣ်အသွံၣ်ဒီးအသိလၢတၢ်လုၢ်ထီၣ် အီၤအသိးလီၤ. ယွၤကလုၢ်ထီၣ်တၢ်လုၢ်အံၤလၢဝ့ၢ်ဘိးစရၤအပူၤလီၤ. အဝဲကဒုးကဲထီၣ်တၢ်အံၤလၢတၢ်မၤသံဖးဒိၣ်လၢကီၢ်အဒိၣ် အပူၤန့ၣ်လီၤ.

⁷ပှၤဂီၢ်မုၢ်တဖၣ်ကလီၤဃံၤသံဝဲဒ်ကျီၢ်ဖါမံၤတဖၣ်ဒီးဂီၤဖံးဖါဖိ တဖၣ်အသိး, ဒီးဟီၣ်ခိၣ်ကဂီၤဝဲဒီးတၢ်သွံၣ်ဒီးဘၣ်အၢပှဲၤဒီး တၢ်အသိလီၤ.

⁸ခဲအံၤကမ့ၢ်တၢ်ဆၢကတီၢ်လၢယွၤကအုၣ်က့ၤခီၣ်က့ၤဝ့ၢ်စံယိၣ် ဒီးဟ့ၣ်ကၣ်အဒုၣ်အဒါတဖၣ်န့ၣ်လီၤ.

⁹ကီၢ်အဒိၣ်အထံကျိတဖၣ်ကကဲထီၣ်ကျဲတံး, ဒီးဟီၣ်ခိၣ်ကကဲထီၣ်ကးလီၤ. ထံကီၢ်ဒီဘ့ၣ်ညါန့ၣ်မ့ၣ်အူကအီၣ် အီၤဒ်ကျဲတံးအသိးလီၤ.

¹⁰ကအီၣ်တၢ်မနၤနၤမဆါဆါ, ဒီးမ့ၣ်အူလုၣ်ကခုၣ်ထီၣ်ဝဲလီၤစိၤ လီၤထီလီၤ. ထံကီၢ်ကအိၣ်သယုၢ်တစိၤဝံၤတစိၤ, ဒီးပှၤတလဲၤတၢ်က့ၤတၢ်ခီဖျိကဒီးအီၤနီတစုနီတဂၤလၢၤဘၣ်န့ၣ်လီၤ.

¹¹ဒိကအိဒီးစိးဝၣ်ဃးတဖၣ်ကအိၣ်ပှဲၤဝဲလၢထံကီၢ်ပူၤလီၤ. ယွၤကဒုးကဲထီၣ်အီၤလၢတၢ်အိၣ်သယုၢ်အိၣ်ကလီအလီၢ် ကဒီးတဘျီဒ်အမ့ၢ်တ့ၢ်ဝဲတချုးလၢတၢ်တ့လီၤပာ်လီၤတၢ် အကတီၢ်အသိးန့ၣ်လီၤ.

¹²စီၤပၤလၢကပၢထံကီၢ်န့ၣ်တအိၣ်ဘၣ်နီတဂၤဘၣ်, ဒီးပှၤခိၣ်ပှၤနၢ်တဖၣ်ကသံကွံာ်ခဲလၢာ်လီၤ.

¹³တၤဆှုၣ် တၤမဲတဖၣ်ကမဲထီၣ်ပှဲၤကယဲၢ်နူၢ်ဧိၤစီၤဧိၤအပူၤဒီးဝ့ၢ် အိၣ်ဒီးအခိၣ်ဒူတဖၣ်အပူၤ, ဒီးထွံၣ်ဟီၣ်ခိၣ်တဖၣ်ဒီးဒိကအိ တဖၣ်ကအိၣ်လၢအဝဲသ့ၣ်အပူၤန့ၣ်လီၤ.

¹⁴ဆၣ်ဖိကီၢ်ဖိအမံၤတဖၣ်ကကညီၤတၢ်ဖဲန့ၣ်ဒီးတၢ်ဝံတၢ်နါတဖၣ် ကကိးလိာ်အသးကဒဲကဒဲလီၤ. မုၢ်နၤခီအတၢ်မုၢ်ဃၢ်ကဟဲဖဲ န့ၣ်ဒ်သိးကဃုထံၣ်တၢ်အိၣ်ဘှံးအလီၢ်တပူၤလီၤ.

¹⁵ဒိကအိတဖၣ်ကမၤထီၣ်အသွံ, ဒံၣ်လီၤ, ဟုဖးထီၣ်အဖိ, ဒီးကဟုကယာ်အီၤဖဲန့ၣ်န့ၣ်လီၤ. လီတာ်တဖၣ်ကဟဲပာ်ဖှိၣ် အသးဖဲန့ၣ်တဘ့ၣ်ဝံၤတဘ့ၣ်န့ၣ်လီၤ.

¹⁶ဃုကွၢ်တၢ်လၢယွၤအလံာ်ပူၤဘၣ်ဃးဆၣ်ဖိကီၢ်ဖိ, တၢ်ဘၣ်တ့လၢအမူတဖၣ်ဒီးဖးတၢ်လၢအစံးဘၣ်သုန့ၣ်တက့ၢ်. ဆၣ်ဖိကီၢ်ဖိတဖၣ်အံၤတလီၤမၢ်ကွံာ်ဝဲဘၣ်, ကအိၣ်ဘၣ်ဒ်ဒီမိၢ်ဖါ အသိးစ့ၢ်ကီး, တအိၣ်ဝဲဘၣ်. ယွၤမၤလိာ်တ့ၢ်ဝဲဒ်န့ၣ်အသိး, ဒီးအကစၢ်ဒၣ်ဝဲကပာ်ဖှိၣ်အဝဲသ့ၣ်တပူၤဃီလီၤ.

¹⁷ပှၤလၢကနီၤဖးတၢ်အိၣ်တၢ်ဆိးအလီၢ်လၢအဝဲသ့ၣ်အဂီၢ်ဒီး ဟ့ၣ်လီၤအဝဲသ့ၣ်တဖုဘၣ်တဖုအတၢ်နီၤဟ့ၣ်န့ၣ်မ့ၢ်ယွၤလီၤ. အဝဲသ့ၣ်ကအိၣ်လၢထံကီၢ်န့ၣ်အပူၤတစိၤဝံၤတစိၤ, ဒီးကကဲထီၣ်အဝဲသ့ၣ်အတၢ်အစိၤစိၤအဃၣ်ဃၣ်လီၤ.