Read S'gaw Karen လံာ်ယၡါယၤ 36 Bible Online

လံာ်ယၡါယၤ 36 - S'gaw Karen bible

လံာ်ယၡါယၤ 36

¹ဖဲစီၤဃံးစကံယၤကဲထီၣ်ကီၢ်ယူၤဒၤအစီၤပၤပှဲၤထီၣ်တဆံလွံၢ်နံၣ်တနံၣ်န့ၣ်, ကီၢ်အၤၡူၢ်အစီၤပၤစီၤစၤနဃ့ရံာ်ဟဲထီၣ်ဒုးကီၢ်ယူဒၤ အဝ့ၢ်တဖၣ်လၢအအိၣ်ဒီးအခိၣ်ဒူခဲလၢာ်ဒီးမၤနၢၤမၤန့ၢ်အီၤလီၤ.

²ဝံၤဒီးအဝဲဟ့ၣ်လီၤအကလုၢ်လၢအသုးခိၣ်ကျၢၢ်ကလဲၤတၢ်လၢဝ့ၢ်လၤ ကံၣ်ဆူဝ့ၢ်ယရူၤရှလ့ၣ်အိၣ်ဒီးသုးမုၢ်ဖးဒိၣ်တဖုဒ်သိးကမၢဆူၣ် စီၤပၤဃံးစကံယၤလၢအကပာ်လီၤအစုကဝဲၤအဂီၢ်လီၤ. သုးခိၣ်ဖးဒိၣ်န့ၣ်ပၢၤဃးကျဲတဘိဖဲပှၤစုၣ်တၢ်ကံးယာ်တဖၣ် မၤတၢ်, ဖဲထံကျိၤလၢအဟဲစိာ်လီၤထံလၢကွံလၢထးတတီၤန့ၣ်လီၤ.

³ပှၤယူဒၤဖိသၢဂၤလၢအမ့ၢ်ဝဲစီၤဃံးစကံယၤအဖိခွါစီၤအ့လယါ ကံၣ်လၢအပၢၤစီၤပၤအနီ, ကွီၢ်ဘျီၣ်အနဲၣ်ရွဲၣ်စီၤၡ့ၤဘနၤ, ဒီးစီၤအၤစာ်အဖိခွါစီၤယိၤအၤလၢအမ့ၢ်ပဒိၣ်လၢအပၢၤတၢ် ကွဲးနီၣ်တဖၣ်ဟဲထီၣ်ဒ်သိးအကထံၣ်လိာ်အီၤန့ၣ်လီၤ.

⁴ကီၢ်အၤၡူၢ်အပဒိၣ်စံးဘၣ်အဝဲသ့ၣ်လၢအစီၤပၤဖးဒိၣ်သးအိၣ်သ့ၣ် ညါဝဲလၢဘၣ်မနုၤအဃိစီၤပၤဃံးစကံယၤနာ်န့ၢ်လီၤအသးထဲန့ၣ် ညါလဲၣ်န့ၣ်လီၤ.

⁵အဝဲသံကွၢ်ဝဲ, “မ့ၢ်သုဆိကမိၣ်လၢတၢ်ကတိၤတဖၣ်ဟံးန့ၢ်သုး မုၢ်အတၢ်သ့တၢ်ဘၣ်ဒီးအဂံၢ်အဘါအသဟီၣ်အလီၢ်န့ၣ်ကသ့ဧါ. သုဆိကမိၣ်မတၤကမၤစၢၤသုလၢသုတၢ်ပူထီၣ်ထီဒါကီၢ် အၤၡူၢ်န့ၣ်လဲၣ်.

⁶သုမုၢ်လၢ်လၢကီၢ်အဲၤကူပတူးကမၤစၢၤသုလီၤ. ဘၣ်ဆၣ်တၢ်န့ၣ်ကလီၤဂာ်ဒီးတၢ်သူတပိၢ်တဘိဒ်နီၣ်ထိးဘိ တဘိအသိးန့ၣ်လီၤ. ကကၢ်ကွံာ်ဝဲဒီးကဆဲးတိၢ်ဘၣ်သုစုန့ၣ်လီၤ. ကီၢ်အဲၤကူပတူးအစီၤပၤမ့ၢ်တၢ်ဒ်န့ၣ်ဖဲပှၤတဂၤဂ့ၤတဂၤဂ့ၤ သန့ၤအသးလၢအီၤန့ၣ်လီၤ.

⁷ပှၤအၤၡူၢ်ဖိအပဒိၣ်တဲအါထီၣ်ဝဲ, ‘‘မ့ၢ်သုကတဲယၤလၢသုဒိးသန့ၤထီၣ်သုသးလၢကစၢ်ယွၤ, သုယွၤန့ၣ်ဧါ. တၢ်န့ၣ်မ့ၢ်ကစၢ်ယွၤအတၢ်လီၢ်ထီၣ်ထီတဖၣ် ဒီးအတၢ်လုၢ်လီၢ်တဖၣ်လၢစီၤဃံးစကံယၤမၤဟးဂီၤကွံာ်အီၤ ဖဲအဝဲတဲဘၣ်ကီၢ်ယူဒၤဒီးဝ့ၢ်ယရူၤရှလ့ၣ်အပှၤဂီၢ်မုၢ်လၢ ကဘူၣ်ထီၣ်ဘါထီၣ်ဒၣ်တၢ်ဖဲလၢတၢ်လုၢ်လီၢ်တပူၤဧိၤန့ၣ်လီၤ.

⁸ယကတၤသုလၢယစီၤပၤဖးဒိၣ်အမံၤအပူၤလီၤ. သုဃုပှၤဒိးကသ့ၣ်သ့အါအါမ့ၢ်ဘၣ်ဒီး, ယကဟ့ၣ်လီၤသုလၢကသ့ၣ်အဒုခံကထိန့ၣ်လီၤ.

⁹သုတီၤတထီၣ်ဘးဒၣ်လဲာ်ကီၢ်အၤၡူၢ်အသုးခိၣ်အဆံးကတၢၢ် တဂၤဘၣ်. ဒီးခဲအံၤတခီသုမုၢ်လၢ်လၢပှၤအဲၤကူပတူးဖိတဖၣ် ကဆှၢန့ၢ်သုလ့ၣ်ကဟၣ်တဖၣ်ဒီးကသ့ၣ်ဒုးသုးတဖၣ်န့ၣ်လီၤ.

¹⁰မ့ၢ်သုဆိကမိၣ်လၢယဒုးသုထံသုကီၢ်ဒီးမၤဟးဂီၤတ့ၢ်အီၤန့ၣ်, တအိၣ်ဘၣ်ဒီးယွၤအတၢ်မၤစၢၤဘၣ်န့ၣ်ဧါ. ယွၤအနီၢ်ကစၢ်ဒၣ်ဝဲစံးဘၣ်တ့ၢ်ယၤလၢယကလဲၤထီၣ်ဒုးအီၤဒီး မၤဟးဂီၤအီၤလီၤ.”

¹¹အန့ၣ်ဒီး, စီၤအ့ၤလယါကံၣ်, စီၤၡ့ၤဘနၤ, ဒီးစီၤယိၤအၤတဖၣ် စံးဘၣ်သုးခိၣ်န့ၣ်, “ကတိၤတၢ်ဒီးပှၤလၢအၤရၣ်အကျိာ်တက့ၢ်. ပနၢ်ပၢၢ်အီၤကစီဒီန့ၣ်လီၤ. ကတိၤတၢ်လၢဧ့ၤဘြံၤ အကျိာ်တဂ့ၤ. ပှၤဂီၢ်မုၢ်လၢဝ့ၢ်ခိၣ်ဒူအဖီခိၣ်တဖၣ်ဒိကနၣ်တၢ်လီၤ.”

¹²အဝဲစံးဆၢတၢ်ဒီးစံးဝဲ, “သုဆိကမိၣ်လၢယစီၤပၤဖးဒိၣ်မၢ လီၤယၤလၢယကစံးဘၣ်တဲဘၣ်တၢ်သ့ၣ်တဖၣ်အံၤထဲဒၣ်လၢသုဝဲဒီး သုစီၤပၤအဂီၢ်ဧိၤန့ၣ်ဧါ. တမ့ၢ်ဘၣ်. ယကတိၤစ့ၢ်ကီးတၢ်ဆူပှၤဂီၢ်မုၢ်လၢအဆ့ၣ်နီၤလၢဝ့ၢ် ခိၣ်ဒူအဖီခိၣ်လၢအကဘၣ်အီၣ်အအ့ၣ်ဒၣ်ဝဲဒီးအီအဆံၣ်ထံဒၣ်ဝဲ, ဒ်သုကဘၣ်မၤအီၤအသိးအဂီၢ်န့ၣ်လီၤ.”

¹³အန့ၣ်ဒီးသုးခိၣ်န့ၣ်ဆၢထၢၣ်ဝဲဒီးကိးထီၣ်ဝဲလၢဧ့ၤဘြံၤအကျိာ်, “ဒိကနၣ်တၢ်လၢအၤၡူၢ်အစီၤပၤဖးဒိၣ်စံးဘၣ်သုန့ၣ်တက့ၢ်.

¹⁴အဝဲဟ့ၣ်ပလီၢ်သုဒ်သိးသုသုတပျဲစီၤပၤဃံးစကံယၤလီန့ၢ်သု တဂ့ၤလီၤ. စီၤပၤဃံးစကံယၤမၤပူၤမၤဖျဲးသုတသ့ဘၣ်.

¹⁵ဒီးပျဲအကတိၤလွဲန့ၢ်သုလၢသုကသန့ၤသုသးလၢယွၤန့ၣ်တဂ့ၤ. ဆိကမိၣ်လၢယွၤကအုၣ်က့ၤခီၣ်က့ၤသုဒီးကဆိကတီၢ်ပကီၢ် အၤၡူၢ်အသုးမုၢ်လၢကမၤန့ၢ်သုဝ့ၢ်အဂီၢ်တဂ့ၤ.

¹⁶ဒိကနၣ်စီၤပၤဃံးစကံယၤတဂ့ၤ. ကီၢ်အၤၡူၢ်အစီၤပၤဖးဒိၣ် ဟ့ၣ်လီၤအကလုၢ်လၢသုကဟဲထီၣ်လၢဝ့ၢ်အပူၤဒီးဟ့ၣ်လီၤသုသး န့ၣ်လီၤ. သုဝဲခဲလၢာ်တၢ်ကပျဲသုအီၣ်စပံးသၣ်တဖၣ်လၢသုစပံးလီၢ်ဒၣ်ဝဲ ဒီးချၢၣ်ဒၢသၣ်တဖၣ်လၢသုချၢၣ်ဒၢအထူၣ်ဒၣ်ဝဲ, ဒီးသုကအီထံလၢသုထံပူၤဒၣ်ဝဲတဖၣ်,

¹⁷တုၤလၢစီၤပၤဖးဒိၣ်ပာ်လီၤက့ၤသုတၢ်အိၣ်တၢ်ဆိးအလီၢ်လၢထံ ကီၢ်တဘ့ၣ်လၢအလီၤဂာ်မးဒီးသုထံသုကီၢ်ဒၣ်ဝဲတစု, ဖဲစပံးလီၢ်တဖၣ်အိၣ်ဝဲလၢကဟ့ၣ်ထီၣ်စပံးထံ, ဒီးဘုဧိၤဟုဧိၤအိၣ်ဝဲလၢတၢ်ကမၤကိၣ်အဂီၢ်လီၤ.

¹⁸ပျဲစီၤပၤဃံးစကံယၤလွဲန့ၢ်သုဆူတၢ်ဆိကမိၣ်လၢယွၤကမၤ ပူၤဖျဲးသုန့ၣ်တဂ့ၤ. ပှၤကလုာ်အဂၤအကစၢ်တဖၣ်မ့ၢ်အမၤပူၤဖျဲးတ့ၢ်အထံအကီၢ် တဖၣ်လၢကီၢ်အၤၡူၢ်အစီၤပၤဖးဒိၣ်အစုပူၤန့ၣ်ဧါ.

¹⁹ခဲအံၤ, ဝ့ၢ်ဃမါသးဒီးဝ့ၢ်အၢ်ပးအကစၢ်တဖၣ်အိၣ်ဖဲလဲၣ်. ဝ့ၢ်စဖၤရဝံၣ်အကစၢ်တဖၣ်အိၣ်ဖဲလဲၣ်. ပှၤမၤပူၤဖျဲးတ့ၢ်ကီၢ်ၡၤ မရံတဂၤဂၤဧါ.

²⁰ထံကီၢ်ခဲလၢာ်အံၤအကစၢ်တဖၣ်အကျါတဂၤဂၤမ့ၢ်အမၤပူၤဖျဲးတ့ၢ် အထံအကီၢ်လၢပစီၤပၤဖးဒိၣ်အစုပူၤဖဲလဲၣ်ခါလဲၣ်. မ့မ့ၢ်ဒ်န့ၣ်ဒီး, မ့ၢ်တၢ်မနုၤဒုးဆိကမိၣ်သုလၢယွၤမၤပူၤဖျဲးဝ့ၢ်ယရူၤရှလ့ၣ်သ့န့ၣ်လဲၣ်.”

²¹ပှၤဂီၢ်မုၢ်အိၣ်ဘှီၣ်ကလာ်ဝဲဒ်စီၤပၤဃံးစကံယၤစံးဘၣ်တ့ၢ် အဝဲသ့ၣ်အသိးဒီးအဝဲသ့ၣ်တကတိၤတၢ်နီတဘီဘၣ်န့ၣ်လီၤ.

²²အန့ၣ်ဒီး, စီၤအ့ၤလယါကံၣ်, စီၤၡ့ၤဘနၤ, ဒီစီၤယိၤအၤဖှီ ယာ်အဆ့ကၤတဖၣ်လၢတၢ်သးအုးအပူၤဒီးလဲၤတၢ်ဒီးပာ်ဖျါထီၣ် က့ၤတၢ်လၢကီၢ်အၤၡူၢ်အသုးခိၣ်စံးဘၣ်တ့ၢ်ဝဲဆူစီၤပၤ အအိၣ်န့ၣ်လီၤ.