Read S'gaw Karen လံာ်ယၡါယၤ 37 Bible Online

လံာ်ယၡါယၤ 37 - S'gaw Karen bible

လံာ်ယၡါယၤ 37

¹တကီၢ်ခါဖဲစီၤပၤဃံးစကံယၤနၢ်ဟူအဝဲသ့ၣ်အတၢ်ပာ်ဖျါဒီး, အဝဲဖှီအဆ့ကၤတဖၣ်လၢတၢ်သးအုးအပူၤ, ကၤထီၣ်ဆ့ထၢၣ်တၢ်ကံးယာ်, ဒီးလဲၤဝဲဆူယွၤအတၢ်လုၢ်ဟံၣ်လီၤ.

²အဝဲမၢလီၤစီၤအ့လယါကံၣ်, ပဒိၣ်လၢအပၢၤစီၤပၤအနူၢ်အစီၤ, စီၤၡ့ၤဘနၤလၢအမ့ၢ်ကွီၢ်ဘျီၣ်အနဲၣ်ရွဲၣ်, ဒီးအပှၤလုၢ်တၢ်အခိၣ် အဒိၣ်သူၣ်က့သးပှၢ်တဖၣ်န့ၣ်ဆူစီၤအၤမိာ်အဖိခွါဝံယၡါယၤ အအိၣ်လီၤ. အဝဲသ့ၣ်စ့ၢ်ကီးကူကၤဆ့ထၢၣ်တၢ်ကံးယာ်န့ၣ်လီၤ.

³အအံၤမ့ၢ်တၢ်ကစီၣ်လၢအဝဲစံးဘၣ်တ့ၢ်အဝဲသ့ၣ်လၢကလဲၤဟ့ၣ်ဝံ ယၡါယၤအဂီၢ်လီၤ. “မုၢ်တနံၤအံၤမ့ၢ်တၢ်နးတၢ်ဖှီၣ်အမုၢ်တနံၤလီၤ. ပဘၣ်တၢ်စံၣ်ညီၣ်တ့ၢ်ပှၤဒီးပဘၣ်တၢ်မၤမဲာ်ဆှးပှၤလီၤ. ပလီၤဂာ်ဒီးပိာ်မုၣ်တဂၤလၢအိၣ်ကတဲာ်ကတီၤအသးလၢကဆံးစၢ် အဖိ, ဘၣ်ဆၣ်အဂံၢ်အဘါစၢ်ကဲၣ်ဆိးလၢကမၤဝဲအဂီၢ်န့ၣ်လီၤ.

⁴ကီၢ်အၤၡူၢ်အစီၤပၤဖးဒိၣ်ဆှၢလီၤအသုးခိၣ်လၢကဒုၣ်ဒွဲၣ်ကစၢ် ယွၤလၢအမူဝဲတဂၤလီၤ. မ်ယွၤနကစၢ်ယွၤနၢ်ဟူတၢ်ဒုၣ်ဒွဲၣ်တဖၣ်အံၤဒီးစံၣ်ညီၣ်ပှၤ တဖၣ်လၢအစံးကတိၤတၢ်အံၤန့ၣ်တက့ၢ်. လၢတၢ်န့ၣ်အဃိ, ဃ့ထုကဖၣ်တၢ်ဆူကစၢ်ယွၤလၢပှၤလၢအိၣ်မူတ့ၢ်တဖၣ်အဂီၢ် တက့ၢ်.”

⁵ဖဲဝံယၡါယၤဒိးန့ၢ်ဘၣ်စီၤပၤဃံးစကံယၤအတၢ်ကစီၣ်ဒီး,

⁶အဝဲဆှၢကဒါက့ၤတၢ်စံးဆၢအံၤလီၤ. “ယွၤစံးဘၣ်နၤဒ်သိးနသုတပျဲပှၤအၤၡူၢ်ဖိတဖၣ်မၤပျံၤမၤ ဖုးနၤခီဖျိအတၢ်စံးဝဲလၢယွၤမၤပူၤဖျဲးနၤတသ့ဘၣ်န့ၣ် တဂ့ၤ.

⁷ယွၤကပျဲစီၤပၤဖးဒိၣ်နၢ်ဟူဘၣ်တၢ်ကစီၣ်ပစိၣ်ပစ့လၢကဒုးက့ၤ အီၤဆူအထံအကီၢ်ဒၣ်ဝဲ, ဒီးယွၤကပျဲအဝဲကဘၣ်တၢ်မၤသံ အီၤဖဲန့ၣ် န့ၣ်လီၤ.”

⁸ကီၢ်အၤၡူၢ်အသုးခိၣ်သ့ၣ်ညါထွဲဝဲလၢစီၤပၤဖးဒိၣ်ဟးထီၣ် တ့ၢ်လံလၢဝ့ၢ်လၤကံၣ်ဒီးလဲၤဒုးတၢ်ထီဒါဝ့ၢ်တံးဘနၤလၢ အအိၣ်ဘူးဖဲန့ၣ်လီၤ. အန့ၣ်ဒီး, အဝဲလဲၤဝဲဖဲန့ၣ်လၢကကတိၤသကိးတၢ်ဒီးအီၤအဂီၢ်လီၤ.

⁹တၢ်ကစီၣ်တုၤအိၣ်ပှၤအၤၡူၢ်ဖိတဖၣ်လၢကီၢ်အဲၤကူပတူးအသုးမုၢ် လၢအဘၣ်တၢ်ဆှၢအီၤလၢကီၢ်ကူၤၡးအစီၤပၤစီၤတံရဟၤကၤဟဲလံ ဝဲလၢကဒုးအဝဲသ့ၣ်အဂီၢ်လီၤ. ဖဲစီၤပၤနၢ်ဟူတၢ်အံၤဒီးဆှၢလီၤလံာ်ပရၢတဘ့ၣ်ဆူ ယူဒၤအစီၤပၤဃံးစကံယၤအအိၣ်,

¹⁰ဒီးစံးဘၣ်အီၤ, “ကစၢ်လၢသုပာ်သုတၢ်နာ်လၢအပူၤန့ၣ်စံးဘၣ် တ့ၢ်သုလၢတၢ်တဟ့ၣ်လီၤသုလၢပစုပူၤဘၣ်န့ၣ်, နာ်အီၤတဂ့ၤ.

¹¹သုနၢ်ဟူတ့ၢ်ကီၢ်အၤၡူၢ်အစီၤပၤဖးဒိၣ်တဂၤမၤဘၣ်ထံကီၢ်တဘ့ၣ် ဂ့ၤတဘ့ၣ်ဂ့ၤလၢအဝဲပာ်လီၤအသးလၢကမၤဟးဂီၤဝဲဒ်လဲၣ်အဂ့ၢ် န့ၣ်လီၤ. မ့ၢ်သုဆိကမိၢ်လၢသုပူၤဖျဲးကသ့န့ၣ်ဧါ.

¹²ယမိၢ်ပၢ်ဖံဖုတဖၣ်မၤဟးဂီၤကွံာ်ဝ့ၢ်တဖၣ်လၢအမ့ၢ်ဝဲကိစၣ်, ဃရၣ်, ဒီးရ့စ့း, ဒီးမၤသံတ့ၢ်ပှၤဧ့ဒ့ၣ်ဖိလၢအအိၣ်လၢသလး စၢ်အပူၤ, ဒီးအကစၢ်တဖၣ်အုၣ်က့ၤခီၣ်က့ၤအဝဲသ့ၣ်တသ့ နီတဂၤဘၣ်.

¹³ဝ့ၢ်တဖၣ်လၢအမ့ၢ်ဝဲဃမါသး, အၢ်ပး, စဖၤရဝံၣ်, ဟ့နၤ, ဒီးဧၣ်ဝါအစီၤပၤတဖၣ်မ့ၢ်အအိၣ်ဝဲဖဲလဲၣ်.”

¹⁴စီၤပၤဃံးစကံယၤဟံးန့ၢ်လံာ်ပရၢလၢပှၤစိာ်တၢ်ကစီၣ်တဖၣ် အအိၣ်ဒီးဖးအီၤလီၤ. ဝံၤဒီးအဝဲလဲၤဝဲဆူတၢ်လုၢ်ဟံၣ် ဒီးပာ်လီၤလံာ်ပရၢဖဲန့ၣ်လၢယွၤအမဲာ်ညါ,

¹⁵ဒီးဘါထုကဖၣ်တၢ်စံးဝဲ,

¹⁶“ယွၤစိဒိၣ်ကမီၤဒိၣ်, အံၣ်စရ့လးအကစၢ်ယွၤ, လၢအအိၣ်လၢလီၢ်ပစိာ်ထီၣ်ထီလၢခ့ရူာ်တဖၣ်အဖီခိၣ်တဂၤဧၢ, နမ့ၢ်ကစၢ်ယွၤထဲတဂၤဧိၤလၢအပၢဟီၣ်ခိၣ်ဘီမုၢ်တဖၣ်လီၤ. နတ့လီၤတ့ၢ်ဟီၣ်ခိၣ်ဒီးမူကပိာ်လိၤလီၤ.

¹⁷ခဲအံၤ, ယွၤဧၢ, ဒိကနၣ်ပှၤဒီးကွၢ်တၢ်လၢအမၤအသးဒီးပှၤတက့ၢ်. ဒိကနၣ်တၢ်ခဲလၢာ်လၢစီၤပၤစီၤစၤနဃ့ရံာ်စံးဝဲလၢကဒုၣ်ဒွဲၣ်နၤ, ကစၢ်ယွၤလၢအမူဝဲတဂၤန့ၣ်တက့ၢ်.

¹⁸ယွၤဧၢ, ပဝဲခဲလၢာ်ပသ့ၣ်ညါလၢကီၢ်အၤၡူၢ်အစီၤပၤဖးဒိၣ်တဖၣ် မၤဟးဂီၤတ့ၢ်ပှၤကလုာ်အါကလုာ်ဒီးဒုးအိၣ်သယုၢ်သညိ အထံအကီၢ်တဖၣ်,

¹⁹ဒီးဒွဲၣ်အူထီၣ်ကွံာ်အကစၢ်တဖၣ်, လၢတမ့ၢ်ကစၢ်တဖၣ်လ့ၤတက့ၤဘၣ်. မ့ၢ်ဒၣ်တၢ်အက့ၢ်အဂီၤတဖၣ်လၢသ့ၣ်ဒီးလၢၢ်ဧိၤလ့ဧိၤလၢပှၤကညီ မၤအီၤလၢအစုဒၣ်ဝဲန့ၣ်လီၤ.

²⁰ခဲအံၤ, ယွၤပကစၢ်ယွၤဧၢ, မၤပူၤမၤဖျဲးပှၤလၢပှၤအၤၡူၢ်ဖိတဖၣ် အစုပူၤဒ်သိးပှၤကလုာ်ခဲလၢာ်လၢဟီၣ်ခိၣ်ဒီဘ့ၣ်ကသ့ၣ်ညါ ဝဲလၢထဲနၤတဂၤဧိၤန့ၣ်, နမ့ၢ်ကစၢ်ယွၤန့ၣ်တက့ၢ်.”

²¹အန့ၣ်ဒီး, ဝံယၡါယၤဆှၢလီၤတၢ်ကစီၣ်တမံၤဒီးတဲဘၣ်စီၤပၤ ဃံးစကံယၤလၢ, လၢတၢ်စံးဆၢက့ၤစီၤပၤအတၢ်ထုကဖၣ်အဂီၢ်န့ၣ်,

²²ယွၤစံးတ့ၢ်ဝဲဒၣ်, “ဝ့ၢ်ယရူၤၡလ့ၣ်နံၤဘၣ်ဖၣ်လဲနၤဒီးသး ဘၣ်အၢနၤလံ, စီၤပၤစီၤစၤနဃ့ရံာ်ဧၢ.

²³ပှၤလၢနဒုၣ်ဒွဲၣ်ပယွဲဒီးနနံၤဘၣ်ဖၣ်လဲအီၤန့ၣ်နဆိကမိၣ်အမ့ၢ် မတၤလဲၣ်. နတယူးယီၣ်ပာ်ကဲတ့ၢ်ယၤ, အံၣ်စရ့လးအကစၢ်ယွၤစီဆှံတဂၤန့ၣ်ဘၣ်.

²⁴နမၢလီၤနခ့နပှၤတဖၣ်လၢက, ကတိၤဒိၣ်အကိာ်လၢယမဲာ်ညါဒီးစံးဝဲ လၢနမၤန့ၢ်မၤနၢၤကစၢၢ်အထီကတၢၢ်တဖၣ်လၢကီၢ်လဘၤနိၣ်အပူၤန့ၣ် လၢနလ့ၣ်ကဟၣ်ခဲလၢာ်န့ၣ်လီၤ. နကတိၤဒိၣ်လီၤနသးလၢ, ဖဲန့ၣ်, နကူာ်လီၤကွံာ်သ့ၣ်ဆှိအ့ရ့းအထီကတၢၢ်တဖၣ်ဒီးသ့ၣ်ဆှိအဂ့ၤ ကတၢၢ်တဖၣ်, ဒီးနလဲၤတုၤတ့ၢ်လံလၢသ့ၣ်ဒိၣ်ပှၢ်တီၢ်အယိာ် ကတၢၢ်တတီၤလံန့ၣ်လီၤ.

²⁵နကတိၤဒိၣ်လီၤနသးလၢနခူၣ်ထံပူၤတဖၣ်ဒီးအီထံလၢထံဂုၤကီၢ် ဂၤတဖၣ်အပူၤ, ဒီးနပှၤသုးဖိတဖၣ်အခီၣ်ယီၢ်တံၢ်လီၤသံးကွံာ်ထံကျိ နံၤလါလီၤ.

²⁶မ့ၢ်နတနၢ်ဟူတ့ၢ်နဲနီတစုလၢယကူၣ်ကျဲၤတၢ်အံၤယံာ်တ့ၢ်လံ န့ၣ်ဘၣ်ဧါ. ဒီးခဲအံၤ, ယမၤထွဲတ့ၢ်အီၤလံ. ယဟ့ၣ်တ့ၢ်နၤတၢ်စိကမီၤလၢနကဒုးကဲထီၣ်ဝ့ၢ်တဖၣ်လၢအအိၣ်ဒီး တိာ်ဧိၤတာ်ဧိၤဆူတၢ်လီၤပှီၢ်ဟးဂီၤအတၢ်ပာ်ဖှိၣ်တဖၣ်န့ၣ်လီၤ.

²⁷ပှၤအိၣ်တ့ၢ်ဖဲန့ၣ်အစိကမီၤတအိၣ်လၢၤဘၣ်. တၢ်ပျံၤတၢ်ဖုးဒီးတၢ်သးလီၤကတုၤလီၤဘၣ်အဝဲသ့ၣ်လီၤ. အဝဲသ့ၣ်လီၤဂာ်ဒ်တပံၢ်လၢပျီတဘ့ၣ်အပူၤ, မ့တမ့ၢ်, ဒ်နီၣ်ဧိၤမံၤဧိၤမဲထီၣ်လၢဟံၣ်တဖျၢၣ်အခိၣ်ဒုးအလိၤအသိးဖဲ မုၢ်ထီၣ်ကလံၤကိၢ်အူသဖှိဘၣ်အီၤအခါန့ၣ်လီၤ.

²⁸ဘၣ်ဆၣ်ဒီးယသ့ၣ်ညါတၢ်ဘၣ်ဃးဒီးနၤခဲလၢာ်, နမၤတၢ်မနုၤလဲၣ်ဒီးနလဲၤဖဲလဲၣ်န့ၣ်လီၤ.

²⁹ယဒိးန့ၢ်တ့ၢ်တၢ်ပာ်ဖျါဘၣ်ဃးဒီးနတၢ်သူၣ်ဒိၣ်သးဖျိး, ဒီးနတၢ်ပာ်ထီၣ်ထီနသးအဝဲန့ၣ်အဂ့ၢ်လီၤ. ဒီးခဲအံၤယကဘျးနနါစ့ၤလၢနီၣ်ကွးတခါဒီးယကဒုးအ့ၣ်နၤလၢ ထးအ့ၣ်တဘိဒီးယကမိၤကဒါက့ၤနၤလၢကျဲတဘိဃီ လၢနဟဲတ့ၢ်နဲန့ၣ်လီၤ.”

³⁰အန့ၣ်ဒီး, ဝံယၡါယၤစံးဘၣ်စီၤပၤဃံးစကံယၤ “အအံၤမ့ၢ်တၢ် ပနီၣ်တမံၤလၢအကမၤအသးန့ၣ်လီၤ. တနံၣ်အံၤဒီးခဲငါတနံၣ်န့ၣ်တၢ်ကအိၣ်ဒီးသုထဲဘုဧိၤဟုဧိၤ လၢအမဲထီၣ်ဒၣ်အတၢ်တဖၣ်လၢသုကအီၣ်အဂီၢ်လီၤ. ဘၣ်ဆၣ်ဒီးပိာ်ထွဲထီၣ်အခံလၢခံတနံၣ်န့ၣ်, သုကသူၣ်ဘၣ်ဒီးကူးဘၣ်ဘုဧိၤဟုဧိၤ, ဒီးသူၣ်လီၤစပံးမုၢ် တဖၣ်ဒီးအီၣ်ဘၣ်စပံးသၣ်တဖၣ်လီၤ.

³¹ပှၤလၢအအိၣ်မူတ့ၢ်ဒံးဝဲလၢကီၢ်ယူဒၤအပူၤတဖၣ်န့ၣ်ကဘီၣ်ထီၣ် ညီထီၣ်ဝဲဒ်တၢ်မုၢ်တၢ်ဘိတဖၣ်လၢအစဲၤလီၤအဂံၢ်ယိာ်ယိာ်ဆူ ဟီၣ်ခိၣ်လာ်ဒီးဟ့ၣ်ထီၣ်တၤသၣ်အသိးန့ၣ်လီၤ.

³²လၢဝ့ၢ်ယရူၤၡလ့ၣ်အပူၤဒီးလၢကစၢၢ်စံယိၣ်အလိၤန့ၣ်, ပှၤဂီၢ်မုၢ်လၢအအိၣ်မူတ့ၢ်ဒံးတဖၣ်ကအိၣ်ဝဲလီၤ. အဂ့ၢ်ဒ်အံၤ, ယွၤသ့တၢ်လၢာ်ပာ်လီၤတ့ၢ်အသးလၢကမၤကဲထီၣ်လိၣ်ထီၣ်တၢ်အံၤ န့ၣ်လီၤ.

³³အအံၤမ့ၢ်တၢ်လၢယွၤစံးတ့ၢ်ဝဲဘၣ်ဃးဒီးပှၤအၤၡူၢ်ဖိအစီၤပၤ ဖးဒိၣ်န့ၣ်လီၤ. အဝဲတဟဲနုာ်ဘၣ်ဆူဝ့ၢ်အံၤအပူၤမ့ၢ်ဂ့ၤ, တခးထီဒါဘၣ်ပျၢ်နီတဘ့ၣ်မ့ၢ်ဂ့ၤဘၣ်. သုးဖိလၢအအိၣ်ဒီးကတီၤတဖၣ်တဟဲဘူးဘၣ်ဒီးဝ့ၢ်အံၤနီတဂၤ ဘၣ်. ဒီးတၢ်ဒုးတၢ်ယၤအဟီၣ်ခိၣ်ထီၣ်ထီတဖၣ်တဘၣ်တၢ်မၤထီၣ်ဝး တရံးအီၤနီတခါဘၣ်.

³⁴တအိၣ်ဒီးတၢ်ခွဲးတၢ်ယာ်လၢကလဲၤနုာ်ဘၣ်ဆူဝ့ၢ်အံၤအပူၤဘၣ်. အဝဲကက့ၤကဒါက့ၤလၢကျဲတဘိဃီလၢအဟဲဝဲန့ၣ်လီၤ. ယၤ, ယွၤ, ကတိၤတ့ၢ်တၢ်လံ.

³⁵ယကကဟုကယာ်ဝ့ၢ်အံၤဒီးဒီဒၣ်အိၣ်ပှိၤအီၤလၢယလၤကပီၤဒၣ်ယဲ အဂီၢ်, ဒီးလၢယမၤတ့ၢ်တၢ်အၢၣ်လီၤအီလီၤဒီးယခ့ ယပှၤစီၤဒၤဝံးအဃိန့ၣ်လီၤ.”

³⁶ယွၤအကလူးတဂၤလဲၤဆူပှၤအၤၡူၢ်ဖိတဖၣ်သူၣ်ဒဲအလီၢ်ဒီးမၤသံ သုးဖိတကလီၢ်ဃိးကလးယဲၢ်ကထိဂၤန့ၣ်လီၤ. လၢခံတနံၤဂီၤဂီၤန့ၣ်, အဝဲသ့ၣ်အိၣ်စူၣ်လီၤအသးဖဲန့ၣ်ဒီးသံဝဲခဲလၢာ်န့ၣ်လီၤ.

³⁷အန့ၣ်ဒီး, ပှၤအၤၡူၢ်ဖိအစီၤပၤဖးဒိၣ်စၤနဃ့ရံာ်ဂုၤက့ၤဆူ အလီၢ်ခံဒီးက့ၤကဒါက့ၤဆူဝ့ၢ်နံၤနဝ့န့ၣ်လီၤ.

³⁸ဘၣ်တနံၤဖဲအဝဲဘူၣ်တၢ်ဘါတၢ်လၢအကစၢ်နံးစရိးအတၢ် လုၢ်ဟံၣ်ပူၤအဖၢမုၢ်ဒီးအဖိခွါခံဂၤလၢအမ့ၢ်ဝဲစီၤအဒြၤမ့ၤလးဒီးစီၤ ၡၢ်အ့စ့ၢ်, မၤသံကွံာ်အီၤလၢအဝဲသ့ၣ်အနးတဖၣ်, ဒီးဃ့ၢ်ပူၤဖျဲးကွံာ်ဆူ ကီၢ်အရၤရးန့ၣ်လီၤ. အဖိခွါအဂၤတဂၤလၢအမ့ၢ်ဝဲစီၤအ့ၤစၢ်ဃးဒိၣ် ကဲထီၣ်စီၤပၤဖးဒိၣ်လၢအလီၢ်န့ၣ်လီၤ.