Read S'gaw Karen လံာ်ယၡါယၤ 42 Bible Online

လံာ်ယၡါယၤ 42 - S'gaw Karen bible

လံာ်ယၡါယၤ 42

¹ယွၤစံးဝဲ, “အအံၤမ့ၢ်ယခ့ယပှၤလၢယဟ့ၣ်ဂံၢ်ဟ့ၣ်ဘါအီၤ, ပှၤတဂၤလၢယဃုထၢအီၤဒီးဘၣ်သူၣ်ဘၣ်သးယၤဒိၣ်မးန့ၣ်လီၤ. ယမၤပှဲၤအီၤဒီးယသးဒၣ်ယဲ, ဒီးအဝဲကဟဲစိာ်တၢ်စံၣ်ညီၣ်တီဆူ ပှၤကိးကလုာ်ဒဲးလီၤ.

²အဝဲတကိးပသူထီၣ်မ့ၢ်ဂ့ၤ, မၤသီၣ်ဒိၣ်ထီၣ်အကလုၢ်မ့ၢ်ဂ့ၤ, ကတိၤတၢ်ဒိၣ်ဒိၣ်သွါသွါမ့ၢ်ဂ့ၤလၢကျဲတဖၣ်အပူၤဘၣ်.

³အဝဲတမၤကၢ်ကွံာ်တပိၢ်တဘိလၢအသဘှံးမ့ၢ်ဂ့ၤ, မၤပံာ်ကွံာ်မ့ၣ်အူလၢအကပီၤပံာ်လ့ပံာ်လ့မ့ၢ်ဂ့ၤ န့ၣ်ဘၣ်. အဝဲကဟဲစိာ်တၢ်စံၣ်ညီၣ်တီအိၣ်လီၤထူလီၤယိာ်လၢပှၤခဲလၢာ် အဂီၢ်လီၤ.

⁴တုၤလၢအဝဲဒုးအိၣ်ထီၣ်ဂၢၢ်ကျၢၤတၢ်စံၣ်ညီၣ်တီလၢဟီၣ်ခိၣ်အံၤ တစုန့ၣ်တပျဲတၢ်မုၢ်လၢ်မ့ၢ်ဂ့ၤတၢ်သူၣ်ဒူသးဒူမ့ၢ်ဂ့ၤကလီၤ မၢ်ကွံာ်န့ၣ်ဘၣ်. အဂ့ၢ်ဒ်အံၤ, ကီၢ်လၢအယံၤတဖၣ်အိၣ်ခိးကွၢ်လၢ်အတၢ်သိၣ်လိလၢတၢ် သူၣ်ဆူၣ်သးဂဲၤအပူၤလီၤ.”

⁵ကစၢ်ယွၤတ့လီၤပာ်လီၤမူခိၣ်မူကပိာ်လိၤဒီးသလၣ်ထီၣ်အဝဲ သ့ၣ်လီၤ. အဝဲဒုးကဲထီၣ်ဟီၣ်ခိၣ်ဒီးကယဲၢ်တၢ်အိၣ်ဖဲန့ၣ်ခဲလၢာ်အက့ၢ် အဂီၤလီၤ. အဝဲဟ့ၣ်တၢ်မူဒီးတၢ်သါဆူအပှၤဂီၢ်မုၢ်ခဲလၢာ်လီၤ. ဒီးခဲအံၤ, ယွၤ, ကစၢ်ယွၤစံးဘၣ်အခ့အပှၤ,

⁶“ယၤ, ယွၤအံၤ, ယကိးထီၣ်သုဒီးဟ့ၣ်သုတၢ်စိတၢ်ကမီၤ ဒ်သိးသုကကွၢ်ထွဲမၤတၢ်စံၣ်ညီၣ်တီအဂ့ၢ်အခၢးလၢဟီၣ်ခိၣ်အံၤ န့ၣ်လီၤ. ခီဖျိသုန့ၣ်, ယကမၤတၢ်အၢၣ်လီၤအီလီၤတမံၤဒီးပှၤဂီၢ်မုၢ်ခဲ လၢာ်လီၤ. ခီဖျိသုန့ၣ်, ယကဟဲစိာ်တၢ်ကပီၤဆူပှၤကလုာ်တဖၣ်အအိၣ်လီၤ.

⁷သုကအိးထီၣ်ပှၤမဲာ်ဘျီၣ်တဖၣ်အမဲာ်ချံ, ဒီးမၤထူၣ်ဖျဲးထီၣ်ပှၤဘၣ်တၢ်စၢဃာ်လၢဃိာ်အဒၢးခံးသူတဖၣ် အပူၤန့ၣ်လီၤ.

⁸ထဲယၤတဂၤဧိၤ, ယမ့ၢ်ယွၤသုကစၢ်ယွၤလီၤ. ယတဟ့ၣ်ဘၣ်ယလၤကပီၤဆူကစၢ်အဂၤတဖၣ်ဘၣ်. တၢ်ဂီၤတၢ်ဖီၣ်တဖၣ်န့ၣ်ယတဟ့ၣ်အီၤတၢ်စံးထီၣ်ပတြၢၤဘၣ်.

⁹ခဲအံၤတၢ်လၢယကတိၤဆိပာ်တဖၣ်လၢထီၣ်ပှဲၤထီၣ်လံ. ခဲအံၤ, ယကစံးဘၣ်တဲဘၣ်သုတၢ်အသီတဖၣ်တချုးလၢအစးထီၣ်မၤအသး ဒံးဘၣ်ဒၣ်လဲာ်လီၤ.”

¹⁰သးဝံၣ်ထီၣ်တၢ်သးဝံၣ်အသီတယုၢ်ဆူယွၤတက့ၢ်. ကယဲၢ်တၢ်အိၣ်လၢဟီၣ်ခိၣ်ခဲလၢာ်သ့ၣ်ဧၢ, သးဝံၣ်အတၢ်စံးထီၣ်ပ တြၢၤတက့ၢ်. သုဝဲလၢအလဲၤတၢ်လၢပီၣ်လဲၣ်သ့ၣ်ဧၢ, စံးထီၣ်ပတြၢၤအီၤတ က့ၢ်. ကယဲၢ်ပှၤလၢအအိၣ်လၢထံယံၤကီၢ်ယံၤခဲလၢာ်သ့ၣ်ဧၢ, သးဝံၣ်ထီၣ်တက့ၢ်.

¹¹မ်မဲးမုၢ်ခိၣ်ဒီးအဝ့ၢ်တဖၣ်စံးထီၣ်ပတြၢၤကစၢ်ယွၤတက့ၢ်. မ်က့ဒၢ်အပှၤဂီၢ်မုၢ်စံးထီၣ်ပတြၢၤအီၤတက့ၢ်. မ်ပှၤအိၣ်လၢဝ့ၢ်စ့လၤအပူၤတဖၣ်ကိးထီၣ်လၢတၢ်သးခုအဃိ လၢကစၢၢ်တဖၣ်အဒီခိၣ်န့ၣ်တက့ၢ်.

¹²မ်ပှၤအိၣ်လၢထံယံၤကီၢ်ယံၤတဖၣ် ဟ့ၣ်ထီၣ်တၢ်စံးထီၣ်ပတြၢၤဒီးတၢ်လၤကပီၤဆူယွၤအအိၣ်တက့ၢ်.

¹³ယွၤလဲၤထီၣ်လၢအကဒုးတၢ်ဒ်ပှၤသုးဖိတဂၤအသိးလီၤ. အဝဲအိၣ်ကတဲာ်ကတီၤအသးဒီးသူၣ်ဆူၣ်သးဂဲၤလၢတၢ်ဒုးတၢ်ယၤ အဂီၢ်လီၤ. အဝဲကိးထီၣ်တၢ်ဒုးတၢ်ယၤအသီၣ်ဒီးတၢ်ထီ ဒုၣ်ထီဒါအတၢ်ကိးသတြီထီၣ်န့ၣ်လီၤ. အဝဲဒုးနဲၣ်အစိအကမီၤလၢအဒုၣ်အဒါတဖၣ် အဖီခီၣ်လီၤ.

¹⁴ကစၢ်ယွၤစံးဝဲ, “ယအိၣ်ဘှ့ၣ်အိၣ်ဘှီၣ်ယံာ်တ့ၢ်မးလံ ဒီးယတစံးဆၢယပှၤဂီၢ်မုၢ်ဘၣ်. ဘၣ်ဆၣ်ဒီးခဲအံၤန့ၣ်တၢ်ဆၢကတီၢ်လၢယကမၤတၢ်အဂီၢ်တုၤလံ. ယကိးထီၣ်ဒ်ပိာ်မုၣ်တဂၤလၢအဟုးဆါဒီးကဆံးစၢ်ဝဲအသိးလီၤ.

¹⁵ယကမၤဟးဂီၤကွံာ်တၢ်လူၢ်ဒီးကစၢၢ်တဖၣ် ဒီးမၤဃ့ထီကွံာ်နီၣ်ဧိၤမံၤဧိၤဒီးသ့ၣ်ထူၣ်တဖၣ်လီၤ. ယကဒုးကဲထီၣ်က့ၤထံကျိအတြီၤတဖၣ်ဆူမဲးမုၢ်ခိၣ် ဒီးမၤဃ့ထီကွံာ်ထံအကွံတဖၣ်လီၤ.

¹⁶ယကဆှၢယပှၤမဲာ်ဘျီၣ်တဖၣ် လၢကျဲတဖၣ်လၢအဝဲသ့ၣ်တလဲၤဘၣ်ဝဲ နီတဘျီန့ၣ်လီၤ. ယကဒုးကဲထီၣ်က့ၤအဝဲသ့ၣ်အတၢ်ခံးဆူတၢ်ကပီၤဒီးမၤပၢၤထံ ကီၢ်လၢအကနၢၣ်ခိၣ်ချၢန့ၣ်, လၢအဝဲသ့ၣ်အမဲာ်ညါလီၤ. တၢ်တဖၣ်အံၤမ့ၢ်ယတၢ်အၢၣ်လီၤအီလီၤ ဒီးယကဟံးဃာ်အီၤသပှၢ်ကတၢၢ်လီၤ.

¹⁷ကယဲၢ်ပှၤလၢအသန့ၤအသးလၢတၢ်ဂီၤ စိးပျၤအသးတဖၣ် ဒီးကိးတၢ်ဂီၤသိအသးတဖၣ်လၢအကစၢ်န့ၣ်, ကဘၣ်တၢ်မၤမဲာ်ဆှးအီၤနးနးကလဲာ်ဒီးအလၤကပီၤကလီၤမၢ်ကွံာ် ဝဲလီၤ.”

¹⁸ယွၤစံးဝဲ, “သုဝဲပှၤလၢအနၢ်တအၢသ့ၣ်ဧၢ, ဒိကနၣ်တၢ်တက့ၢ်. သုဝဲပှၤလၢအမဲာ်ဘျီၣ်သ့ၣ်ဧၢ, ကွၢ်ထံတၢ်တက့ၢ်.

¹⁹မ့ၢ်ပှၤတဂၤဂၤအမဲာ်ဘျီၣ်ဒိၣ်န့ၢ်ယခ့ယပှၤဧါ. မ့ၢ်အနၢ်တအၢဒိၣ်န့ၢ်ဒံးပှၤစိာ်တၢ်ကစီၣ်လၢ ယဆှၢလီၤန့ၣ်ဧါ.

²⁰ကီၢ်အံၣ်စရ့လးဧၢ, နထံၣ်တ့ၢ်တၢ်အါမးလံ. ဘၣ်ဆၣ်တၢ်အံၤအခီပညီအိၣ်လၢနဂီၢ်ဒ်လဲၣ်. နအိၣ်ဒီးနနၢ်တဖၣ်လၢနကနၢ်ဟူတၢ်အဂီၢ်, ဘၣ်ဆၣ်ဒီးတၢ်လၢနနၢ်ဟူတ့ၢ်နီၢ်နီၢ်န့ၣ် မ့ၢ်တၢ်မနုၤလဲၣ်.”

²¹ယွၤမ့ၢ်ကစၢ်ယွၤတဂၤလၢအသူၣ်ဆူၣ်သးဂဲၤဒ်သိးအကအုၣ်က့ၤခီၣ် က့ၤတၢ်န့ၣ်လီၤ. သတးဒီး, အဝဲယူာ်ထီၣ်ထီအတၢ်သိၣ်တၢ်သီဒီးအတၢ်သိၣ်လိတဖၣ်, ဒီးအဲၣ်ဒိးဝဲလၢအပှၤဂီၢ်မုၢ်ကယူးယီၣ်ပာ်ကဲတၢ်သ့ၣ်တဖၣ်န့ၣ်လီၤ.

²²ဘၣ်ဆၣ်ဒီးခဲအံၤန့ၣ်အပှၤဂီၢ်မုၢ်သ့ၣ်တဖၣ်ဘၣ်တၢ်ဂုာ်ဆူၣ်ပျီ ဆူၣ်အီၤလံ. အဝဲသ့ၣ်ဘၣ်တၢ်စၢဃာ်အီၤလၢတၢ်ပူၤခံးသူတဖၣ်အပူၤ ဒီးဘၣ်တၢ်ပာ်တဒၢကွံာ်အီၤလၢဃိာ်တဖၣ်အပူၤလီၤ. အဝဲသ့ၣ်ဘၣ်တၢ်တမျိၤတမျးအီၤဒီးဘၣ်တၢ်ဂုာ်ဆူၣ်ပျီဆူၣ်အီၤ ဒီးပှၤလၢကဟဲလၢတၢ်မၤပူၤမၤဖျဲးအဝဲသ့ၣ်အဂီၢ်တအိၣ်နီတဂၤ ဘၣ်လီၤ.

²³မ့ၢ်သုဝဲတဂၤဂၤကဒိကနၣ်တၢ်အံၤဧါ. စးထီၣ်ခဲအံၤဒီးဆူညါန့ၣ်, မ့ၢ်သုကဒိကနၣ်တၢ်လၢတၢ်သူၣ်အိၣ်သးအိၣ်အပူၤကစီဒီဧါ.

²⁴မတၤဟ့ၣ်လီၤကွံာ်ကီၢ်အံၣ်စရ့လးဆူပှၤဂုာ်ဆူၣ်ပျီဆူၣ်တၢ်တဖၣ် အစုပူၤလဲၣ်. မ့ၢ်ယွၤအနီၢ်ကစၢ်ဒၣ်ဝဲလၢပမၤတၢ်ဒဲးဘးထီဒါအီၤ တဂၤန့ၣ်လီၤ. ပတအိၣ်မူတ့ၢ်ပဝဲဒ်အဝဲအဲၣ်ဒိးလၢပကအိၣ်မူအသိး မ့ၢ်ဂ့ၤ, စူၢ်တၢ်သိၣ်လိတဖၣ်လၢအဝဲဟ့ၣ်လီၤတ့ၢ်ပှၤမ့ၢ်ဂ့ၤန့ၣ်ဘၣ်.

²⁵လၢတၢ်န့ၣ်အဃိ, အဝဲဒၣ်ဒုးကလၢၢ်ပှၤလၢအတၢ်သးဒိၣ်အသဟီၣ် ဒီးဒုးတူၢ်ပှၤတၢ်ဒုးတၢ်ယၤအတၢ်မၤဆူၣ်မၤစိးန့ၣ်လီၤ. ဒ်မ့ၣ်အူအီၣ်တၢ်အသိးအတၢ်သးထီၣ်အီၣ်တၢ်သကုၤကီၢ်အံၣ်စရ့လး လီၤ. ဘၣ်ဆၣ်ဒီးတၢ်မနုၤမနုၤမၤအသးန့ၣ် ပတနၢ်ပၢၢ်နီတစုဘၣ်. လၢတၢ်အံၤန့ၣ်, ပတမၤလိတ့ၢ်တၢ်နီတမံၤဘၣ်.