Read S'gaw Karen လံာ်ယၡါယၤ 43 Bible Online

လံာ်ယၡါယၤ 43 - S'gaw Karen bible

လံာ်ယၡါယၤ 43

¹ကီၢ်အံၣ်စရ့လးဧၢ, ယွၤလၢအတ့လီၤပာ်လီၤတ့ၢ်နၤစံးဝဲ, “ပျံၤတၢ်တဂ့ၤ. ယကအုၣ်က့ၤခီၣ်က့ၤနၤလီၤ. ယကိးတ့ၢ်နၤလၢနမံၤ, နမ့ၢ်ယတၢ်လီၤ.

²ဖဲနလဲၤခီဖျိထံလၢအယိာ်န့ၣ်, ယကအိၣ်ဒီးနၤလီၤ. နတၢ်ကီတၢ်ခဲတဖၣ်တလုၣ်ဘၢနၤဘၣ်. ဖဲနလဲၤခီဖျိမ့ၣ်အူန့ၣ်, မ့ၣ်အူတအီၣ်နၤဘၣ်. တၢ်မၤကွၢ်အကီအခဲတဖၣ်လၢအဟဲန့ၣ်, တမၤဘၣ်ဒိဘၣ်ထံးနၤဘၣ်.

³အဂ့ၢ်ဒ်အံၤ, ယမ့ၢ်ယွၤ, နကစၢ်ယွၤ, ကီၢ်အံၣ်စရ့လးအကစၢ်ယွၤစီဆှံလၢအအုၣ်က့ၤခီၣ်က့ၤနၤလီၤ. ယကဟ့ၣ်လီၤကွံာ်ကီၢ်အဲၤကူပတူးလၢနကထူၣ်ဖျဲးထီၣ်အဂီၢ်လီၤ. ယကဟ့ၣ်လီၤကွံာ်ကီၢ်ကူၤၡးဒီးကီၢ်စဘၤလၢ နလီၢ်လီၤ.

⁴ယကဟ့ၣ်လီၤကွံာ်ပှၤဒီကလုာ်ခဲလၢာ်ခဲဆ့လၢတၢ်အုၣ်က့ၤခီၣ်က့ၤ နသးသမူအဂီၢ်လီၤ. အဂ့ၢ်ဒ်အံၤ, နမ့ၢ်တၢ်လုၢ်ဒိၣ်ပှ့ၤဒိၣ်လၢယဂီၢ်, ဒီးမ့ၢ်စ့ၢ်ကီးလၢယအဲၣ်နၤဒီးဟ့ၣ်နၤတၢ်လၤကပီၤအဃိန့ၣ် လီၤ.

⁵ပျံၤတၢ်တဂ့ၤ. ယအိၣ်ဒီးနၤလီၤ. ယကဟဲက့ၤစိာ်နပှၤဂီၢ်မုၢ်လၢတၢ်လီၢ်အယံၤဒီးတၢ်လီၢ်အယံၤ ကတၢၢ်လၢမုၢ်နုာ်ဆူအဟံၣ်လီၤ.

⁶ယကတဲဘၣ်ကလံၤစိးလၢကပျဲအဝဲသ့ၣ်ဟးထီၣ်, ဒီးကလံၤထံးလၢအသုတတြီဃာ်အဝဲသ့ၣ်တဂ့ၤအဂီၢ်လီၤ. ပျဲယပှၤဂီၢ်မုၢ်ဟဲက့ၤကဒါက့ၤလၢထံယံၤကီၢ်ယံၤတဖၣ်ဒီးလၢ ဟီၣ်ခိၣ်ကိးသနၢၣ်ဒဲးန့ၣ်တက့ၢ်.

⁷အဝဲသ့ၣ်မ့ၢ်ယပှၤဂီၢ်မုၢ်ဒၣ်ယဲ, ဒီးယတ့လီၤပာ်လီၤတ့ၢ်အဝဲသ့ၣ်လၢကဟဲစိာ်န့ၢ်ယၤတၢ်လၤကပီၤ န့ၣ်လီၤ.”

⁸ကစၢ်ယွၤစံးဝဲ, “ကိးဖှိၣ်ပှၤဂီၢ်မုၢ်ဆူကွီၢ်ဘျီၣ်တက့ၢ်. အဝဲသ့ၣ်အမဲာ်ချံအိၣ်, ဘၣ်ဆၣ်အဝဲသ့ၣ်အမဲာ်ချံဘျီၣ်လီၤ. အဝဲသ့ၣ်အနၢ်အိၣ်, ဘၣ်ဆၣ်အဝဲသ့ၣ်အနၢ်တအၢလီၤ.

⁹ကိးဖှိၣ်ပှၤကလုာ်တဖၣ်လၢအကဟဲဆူတၢ်သမံသမိးအလီၢ်တက့ၢ်. မတၤလၢအဝဲသ့ၣ်အကစၢ်တဖၣ်အကျါကတိၤဆိပာ်စၢၤလၢခါဆူညါတၢ် ကမၤအသးအဂ့ၢ်သ့တဂၤဂၤလဲၣ်. မတၤလၢအဝဲသ့ၣ်အကျါတဲဆိပာ်တၢ်လၢအမၤအသးခဲအံၤန့ၣ်လဲၣ်. မ်ကစၢ်တဖၣ်အံၤကဟဲစိာ်နုာ်အပှၤအုၣ်အသးတဖၣ် လၢကဒုးနဲၣ်ဖျါလၢအဝဲသ့ၣ်အတၢ်ဘၣ်, ဒီးကအုၣ်အသးလၢအတၢ်ကတိၤတဖၣ်အတၢ်မ့ၢ်တၢ်တီန့ၣ်တက့ၢ်.

¹⁰ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, သုမ့ၢ်ယပှၤအုၣ်အသးတဖၣ် လီၤ. ယဃုထၢသုလၢသုကမ့ၢ်ယခ့ယပှၤ, ဒ်သိးသုကသ့ၣ်ညါဒီးစူၢ်က့ၤနာ်က့ၤဒီးနၢ်ပၢၢ်လၢယမ့ၢ်ကစၢ် ယွၤထဲတဂၤဧိၤန့ၣ်လီၤ. လၢယၤအမဲာ်ညါကစၢ်အဂၤတအိၣ်နီတဂၤဘၣ်. ခါလၢအပူၤကွံာ်မ့ၢ်ဂ့ၤ, ခါဆူညါမ့ၢ်ဂ့ၤ, တအိၣ်ဘၣ်နီတဂၤနီတစုဘၣ်.

¹¹ထဲယၤတဂၤဧိၤယမ့ၢ်ကစၢ်, ပှၤထဲတဂၤဧိၤလၢအအုၣ်က့ၤခီၣ်က့ၤသုသ့လီၤ.

¹²ယကတိၤဆိတ့ၢ်တၢ်လၢအကမၤအသးဝံၤဒီးယဟဲတ့ၢ်ယဲလၢတၢ်မၤစၢၤ သုအဂီၢ်လီၤ. တခီဘီမုၢ်အကစၢ်တမၤတ့ၢ်တၢ်အံၤနီတစုနီတဂၤဘၣ်. သုမ့ၢ်ယပှၤအုၣ်အသးတဖၣ်လီၤ.

¹³ယမ့ၢ်ကစၢ်ယွၤဒီးကမ့ၢ်ယဲထီဘိလီၤ. ပှၤဃ့ၢ်ပူၤဖျဲးလၢယစိကမီၤအဖီလာ်တသ့နီတဂၤဘၣ်. တၢ်လၢယမၤအီၤန့ၣ်ပှၤလဲလိာ်ကွံာ်အီၤ, တသ့နီတဂၤဘၣ်.”

¹⁴ကီၢ်အံၣ်စရ့လးအကစၢ်ယွၤစီဆှံ, ယွၤလၢအအုၣ်က့ၤခီၣ်က့ၤသု စံးဝဲ, “လၢတၢ်ကအုၣ်က့ၤခီၣ်က့ၤသုအဂီၢ်, ယကဆှၢလီၤသုးမုၢ်တဖုထီ ဒါကီၢ်ဘၤဘူၤလိၣ်လီၤ. ယကမၤလီၤပှီၢ်ဝ့ၢ်အတြဲၤတဖၣ်, ဒီးအဝဲသ့ၣ်အပှၤဂီၢ်မုၢ်အတၢ်ကိးပသူထီၣ်တဖၣ်န့ၣ်, ကလဲလိာ်အသးဆူတၢ်ဟီၣ်တၢ်ယၢၤလီၤ.

¹⁵ယမ့ၢ်ယွၤ, သုကစၢ်ယွၤစီဆှံတဂၤလီၤ. ကီၢ်အံၣ်စရ့လးဧၢ, ယတ့လီၤပာ်လီၤနၤဒီး ယမ့ၢ်နစီၤပၤလီၤ.”

¹⁶ပူၤကွံာ်လၢညါယံာ်တ့ၢ်မးလံန့ၣ်, ယွၤမ့ၢ်တ့ၢ်ကျဲမုၢ်တဘိ ခီဖျိပီၣ်လဲၣ်, ကျဲဖိတဘိခီဖျိထံသဝံးအပူၤလီၤ.

¹⁷အဝဲဆှၢသုးမုၢ်ဂံၢ်ဆူၣ်ဘါဆူၣ်တဖုဆူတၢ်ဟးဂီၤ, သုးမုၢ်တဖုလၢအအိၣ်ဒီးလ့ၣ်ကဟၣ်တဖၣ်ဒီး ကသ့ၣ်တဖၣ်လီၤ. အဝဲသ့ၣ်လီၤဃံၤကွံာ်ဝဲဒီးတဂဲၤဆၢထၢၣ်က့ၤ နီတဘျီလၢၤဘၣ်. အဝဲသ့ၣ်ဘၣ်တၢ်မၤပံာ်ကွံာ်အီၤဒ်မ့ၣ်အူဒၢ အမ့ၣ်အူလၣ်အသိးလီၤ.

¹⁸ဘၣ်ဆၣ်ဒီးယွၤစံးဝဲ, “ဘျးစဲဘူးထီဃးသုသးလၢတၢ်မၤအသးလၢအပူၤကွံာ်တဖၣ် တဂ့ၤ. ဒီးတၢ်လၢအမၤတ့ၢ်လံအသးလၢအပူၤကွံာ်လၢညါယံာ်တ့ၢ်မးတဖၣ် န့ၣ်, ဆိကမိၣ်လၢအဂ့ၢ်တဂ့ၤ.

¹⁹အိၣ်ခိးကွၢ်လၢ်တၢ်အသီလၢယကမၤအီၤန့ၣ်တက့ၢ်. မၤတ့ၢ်လံအသးလံ. သုထံၣ်ဘၣ်အီၤခဲအံၤသ့လီၤ. ယကမၤကျဲမုၢ်တဘိခီဖျိပှၢ်မုၢ်ကနၢ ဒီးဟ့ၣ်သုထံကျိဖိတဖၣ်ဖဲန့ၣ်လီၤ.

²⁰ဆၣ်ဖိကီၢ်ဖိအမံၤတဖၣ်ဒၣ်လဲာ်ကမၤလၤကပီၤယၤဒီး ထွံၣ်ဟီၣ်ခိၣ်ဒီးထိၣ်ကီၤလၤအူးတဖၣ်ကစံးထီၣ်ပတြၢၤယၤဖဲ ယဒုးယွၤလီၤ ထံကျိတဖၣ်လၢမဲးမုၢ်ခိၣ်အပူၤ ဒီးဟ့ၣ်လီၤထံလၢယပှၤဂီၢ်မုၢ်လၢယဃုထၢအီၤ အဂီၢ်န့ၣ်လီၤ.

²¹အဝဲသ့ၣ်မ့ၢ်ပှၤဂီၢ်မုၢ်တဖုလၢယတ့လီၤလၢယဂီၢ်ဒၣ်ယဲ ဒီးအဝဲသ့ၣ်ကသးဝံၣ်ယတၢ်စံးထီၣ်ပတြၢၤ တဖၣ်လီၤ.”

²²ယွၤစံးဝဲ, “ဘၣ်ဆၣ်ကီၢ်အံၣ်စရ့လးဧၢ, နသးဟးဂီၤကွံာ်လၢယဃိ ဒီးနတဘူၣ်ထီၣ်ဘါထီၣ်လၢၤယၤဘၣ်.

²³နတဟဲစိာ်န့ၢ်ယၤသိဖိတဖၣ်လၢနတၢ်လုၢ်မ့ၣ်အူတဖၣ်အဂီၢ်န့ၣ်ဘၣ်. နတမၤလၤကပီၤယၤလၢနတၢ်လုၢ်တၢ်ပာ် တဖၣ်န့ၣ်ဘၣ်. ယတပာ်တၢ်ဝံတၢ်ယိးလၢနဖီခိၣ်ဒီးဃ့ဆူၣ်နၤ တၢ်မၤဘူၣ်တဖၣ်မ့ၢ်ဂ့ၤ, ယတမၤလီၤဘှံးလီၤတီၤကွံာ်နၤဒီးဃ့တၢ်ဆိၣ်ကဲၤနၢမူ မ့ၢ်ဂ့ၤန့ၣ်ဘၣ်.

²⁴နတပှ့ၤတၢ်ဆိၣ်ကဲၤနၢမူလၢယဂီၢ်မ့ၢ်ဂ့ၤ, နတမၤမံသူၣ်မံသးယၤလၢနဆၣ်ဖိကီၢ်ဖိတဖၣ်အသိမ့ၢ်ဂ့ၤန့ၣ် ဘၣ်. အခိၣ်တလိာ်, နဒုးဝံယၤယိးယၤလၢနတၢ်ဒဲးဘးတဖၣ် ဒီးမၤလီၤဘှံးလီၤတီၤကွံာ်ယၤလၢတၢ်ကမၣ်တဖၣ်လၢနမၤတ့ၢ်နဲ န့ၣ်လီၤ.

²⁵အန့ၣ်ဒၣ်လဲာ်, ယမ့ၢ်ကစၢ်ယွၤလၢအပျၢ်နတၢ်ဒဲးဘးတဖၣ် ဒီးယမၤတၢ်အံၤမ့ၢ်လၢယမ့ၢ်ပှၤလၢယမ့ၢ်အဃိလီၤ. ယတစၢဃာ်နတၢ်ဒဲးဘးတဖၣ်ထီဒါနၤဘၣ်.

²⁶မ်ပကလဲၤဆူကွီၢ်ဘျီၣ်တက့ၢ်. ဟဲစိာ်နတၢ်လိာ်ဘၢလိာ်ကွီၢ် အဂ့ၢ်တက့ၢ်. ဆှၢထီၣ်နတၢ်ဂ့ၢ်ဒ်သိးနကဘၣ်တၢ်ပာ်တီပာ်လိၤနၤအဂီၢ်တက့ၢ်.

²⁷နမိၢ်ပၢ်ဖံဖုအဆိကတၢၢ်တဖၣ်အကျါတဂၤ မၤတ့ၢ်တၢ်ဒဲးဘးလီၤ. နပှၤခိၣ်ပှၤနၢ်တဖၣ်မၤတ့ၢ်တၢ်ဒဲးဘးထီဒါယၤလီၤ.

²⁸ဒီးနပှၤပၢတၢ်တဖၣ်မၤတရီတပါယလီၢ်စီဆှံလီၤ. လၢတၢ်န့ၣ်အဃိ, ယဟဲစိာ်တ့ၢ်တၢ်ဟးဂီၤလၢ ကီၢ်အံၣ်စရ့လးအဖီခိၣ် ဒီးယပျဲယပှၤဂီၢ်မုၢ်ဒၣ်ယဲဘၣ်တၢ်မၤအီၤ တရီတပါလီၤ.”