Read S'gaw Karen လံာ်ယၡါယၤ 5 Bible Online

လံာ်ယၡါယၤ 5 - S'gaw Karen bible

လံာ်ယၡါယၤ 5

¹ဖဲယသးဝံၣ်န့ၢ်နၤတၢ်သးဝံၣ်အံၤ, ယတံၤသကိးဒီးအစပံးလီၢ် အတၢ်သးဝံၣ်တယုၢ်အံၤန့ၣ်, ဒိကနၣ်တက့ၢ်. ယတံၤသကိးအိၣ်ဒီးအစပံးလီၢ်တလီၢ်လၢအအိၣ်လၢကစၢၢ်ဖိ လၢဟီၣ်ခိၣ်ညၣ်ထ့ၣ်ဂ့ၤဒိၣ်မးအဒီခိၣ်လီၤ.

²အဝဲခူၣ်ကဖီထီၣ်ဟီၣ်ခိၣ်ဒီးထုးထီၣ်ကွံာ်လၢၢ်ဖိတဖၣ် ဒီးသူၣ်လီၤဖျးလီၤစပံးမုၢ်အဂ့ၤကတၢၢ်တဖၣ်လီၤ. အဝဲဘှီထီၣ်ပၢၤတၢ်အလီၢ်လၢတၢ်ပၢၤစပံးမုၢ်တဖၣ်အဂီၢ် ဒီးခူၣ်လီၤတၢ်ပူၤတပူၤလၢတၢ်ယီၢ်စပံး သၣ်တဖၣ်အဂီၢ်လီၤ. အဝဲခိးဝဲဒ်သိးစပံးသၣ်တဖၣ်ကမံထီၣ်အဂီၢ်, ဘၣ်ဆၣ်စပံးသၣ်ကိးဖျၢၣ်ဒဲးန့ၣ်ဆံၣ်ဝဲလီၤ.

³လၢတၢ်န့ၣ်အဃိခဲအံၤယတံၤသကိးစံးဝဲဒၣ်, “သုဝဲလၢအအိၣ်လၢဝ့ၢ်ယရူၤၡလ့ၣ်ဒီးကီၢ်ယူဒၤတဖၣ်ဧၢ, စံၣ်ညီၣ်တၢ်လၢယၤဒီးယစပံးလီၢ်အဘၢၣ်စၢၤတက့ၢ်.

⁴မ့ၢ်တၢ်လၢယဂ့ၤမၤဒီးယတမၤဘၣ်န့ၣ်အိၣ်တမံၤမံၤဧါ. မ့မ့ၢ်ဒ်န့ၣ်ဒီး, စပံးလီၢ်အံၤဟ့ၣ်ထီၣ်စပံးသၣ်လၢအဆံၣ်ဒီး တမ့ၢ်ဘၣ်စပံးသၣ်လၢအဂ့ၤဒ်ယမုၢ်လၢ်အသိးန့ၣ်, မ့ၢ်အဘၣ်မနုၤလဲၣ်.

⁵ယကမၤတၢ်အံၤလၢယစပံးလီၢ်အဂီၢ်လီၤ. ယကဟံးထီၣ်က ရၢၢ်လၢအအိၣ်ဝးတရံးအီၤ, ဂုၤလီၤပှီၢ်တၢ်အဒူၣ်လၢအဒီဒၣ်အီၤ, ဒီးပျဲဆၣ်ဖိကီၢ်ဖိအမံၤတဖၣ်အီၣ်အီၤဒီးယီၢ်တံၢ်အီၤလီၤ.

⁶ယကပျဲနီၣ်ဧိၤမံၤဧိၤခဲဘၢအီၤလီၤ. ယတပဲာ်ဟိကဆှီစပံးမုၢ် တဖၣ်ဒီးဖျးကဖီထီၣ်ဟီၣ်ခိၣ်ဘၣ်. အခိၣ်တလိာ်ယကပျဲတၤဆှုၣ်တၤမဲကးဘၢအီၤလီၤ. ယကတြီဒၣ်လဲာ်တၢ်အၢၣ်တဖၣ် ဒ်သိးအသုတပျဲတၢ်စူၤလီၤလၢအဖီခိၣ်တဂ့ၤအဂီၢ်လီၤ.”

⁷ကီၢ်အံၣ်စရ့လးမ့ၢ်ယွၤသ့တၢ်လၢာ်အစပံးလီၢ် ဒီးကီၢ်ယူဒၤအပှၤဂီၢ်မုၢ်မ့ၢ်စပံးမုၢ်လၢ အဝဲသူၣ်လီၤဖျးလီၤဝဲလီၤ. အဝဲမုၢ်လၢ်ဝဲလၢအဝဲသ့ၣ်ကမၤတၢ်လၢအဂ့ၤ, ဘၣ်ဆၣ်အခိၣ်တလိာ်န့ၣ်, အဝဲသ့ၣ်မၤသံမၤဝီတၢ်လီၤ. အဝဲမုၢ်လၢ်ဝဲလၢအဝဲသ့ၣ်ကမၤတၢ်အဘၣ်, ဘၣ်ဆၣ်ဒီးပှၤလၢအဝဲသ့ၣ်မၤအၢမၤသီတ့ၢ်တဖၣ်ကိးထီၣ်လၢတၢ် စံၣ်ညီၣ်တီအဂီၢ်လီၤ.

⁸သုဘၣ်တၢ်စံၣ်ညီၣ်ဃါမနၤလီၤ. သုပှ့ၤအါထီၣ်ဟံၣ်ဃီဒီးစံာ်လီၢ် တဖၣ်ဒီးပာ်ဖှိၣ်အါထီၣ်အီၤဒီးတၢ်လၢအအိၣ်တ့ၢ်ဒီးသုလီၤ. တယံာ်လၢၤဘၣ်ဒီး, ပှၤအဂၤကအိၣ်ဆိးတၢ်အလီၢ်တအိၣ်လၢၤ ဘၣ်ဒီးပှၤအိၣ်လၢကီၢ်အံၤအပူၤန့ၣ်ကမ့ၢ်ဒၣ်ထဲသုဝဲတဖၣ်ဧိၤလီၤ.

⁹ယနၢ်ဟူတ့ၢ်ယွၤသ့တၢ်လၢာ်ကစၢ်စံးဝဲဒၣ်, “ဟံၣ်လၢအဒိၣ်ဒီးဂ့ၤဝဲခဲလၢာ်အံၤကလီၤ ဟိဒီးဟးဂီၤကွံာ်ခဲလၢာ်လီၤ.

¹⁰စပံးမုၢ်တဖၣ်လၢအမဲထီၣ်လၢတဆံယဲၢ်အ့ကၢၢ်အဖီခိၣ်န့ၣ်ကဟ့ၣ် ထီၣ်စပံးထံထဲတဘၤသးဧိၤလီၤ. ဒီးတၢ်အချံတဧိၤမ့ၣ်န့ၣ်ကဟ့ၣ်ထီၣ်ဒၣ်ထဲဘုခ့တအ့ဖးဧိၤလီၤ.”

¹¹သုဘၣ်တၢ်စံၣ်ညီၣ်ဃါမနၤလီၤ. သုပၢၢ်ထီၣ်လၢဂီၤထၢၣ်သၢဒ်သိး သုကစးထီၣ်အီသံးအဂီၢ်ဒီးသုမၤလၢာ်ဖးထီတၢ်ဆၢက တီၢ်လၢမုၢ်ဟါလၢတၢ်မူၤတၢ်ဘှီးအပူၤလီၤ.

¹²လၢသုတၢ်အီၣ်အမူးတဖၣ်အပူၤသုအိၣ်ဒီးတနၢ်သီတူၢ်, ဒၢဧိၤမိၤဧိၤ, ပံဧိၤတြၤဧိၤဒီးစပံးထံလီၤ. ဘၣ်ဆၣ်သုတနၢ်ပၢၢ်တၢ်လၢယွၤမၤဝဲန့ၣ်ဘၣ်.

¹³သတးဒီးသုကဘၣ်တၢ်စိာ်ကွံာ်သုဒ်ပှၤဃိာ်ဖိတဖၣ်အသိးလီၤ. သုခိၣ်သုနၢ်တဖၣ်ကသၣ်ဝံၤလီၤဒိသံဝဲလီၤ. ဒီးပှၤမုၢ်ဆ့ၣ်မုၢ်ဂီၤတဖၣ်ကသံလၢတၢ်သူအသးလၢထံအဃိလီၤ.

¹⁴ပှၤသံတဖၣ်အကီၢ်န့ၣ်သၣ်ဝံၤလီၤဒိလၢအဝဲသ့ၣ်ဒီးအိးထီၣ်အကိာ် ပူၤဖးလဲာ်န့ၣ်လီၤ. ယူၢ်လီၤကွံာ်ဝ့ၢ်ယရူၤၡလ့ၣ်အပှၤတူၢ်ဒိၣ်ကီၤဒိၣ် တဖၣ်ဃုာ်ဒီးပှၤမုၢ်ဆ့ၣ်မုၢ်ဂီၤလၢ အသီၣ်သဲပိၢ်ကလာ်တဖၣ်န့ၣ်လီၤ.

¹⁵ပှၤကိးဂၤဒဲးကဘၣ်တၢ်မၤမဲာ်ဆှးအီၤ ဒီးပှၤလၢအပာ်ထီၣ်ထီအသးကိးဂၤဒဲးကဘၣ်တၢ်ဆီၣ်လီၤအီၤလီၤ.

¹⁶ဘၣ်ဆၣ်ယွၤသ့တၢ်လၢာ်ကစၢ်ဒုးနဲၣ်အတၢ်ဒိၣ်တၢ်မုၢ်ခီဖျိ အမၤတၢ်အဘၣ်ဒီးအဝဲလီၣ်ဖျါထီၣ်အတၢ်စီတၢ်ဆှံခီဖျိ တၢ်စံၣ်ညီၣ်အပှၤဂီၢ်မုၢ်န့ၣ်လီၤ.

¹⁷လၢဝ့ၢ်တဖၣ်အတၢ်ဟးဂီၤအပူၤန့ၣ်, သိဖိတဖၣ်ကအီၣ်တပံၢ် ဒီးမဲာ်တဲးလဲးဖိတဖၣ်ကထံၣ်န့ၢ်တၢ်အီၣ်ဆၣ်အလီၢ်လီၤ.

¹⁸သုဘၣ်တၢ်စံၣ်ညီၣ်ဃါမနၤလီၤ. သုမၤထူၣ်ဖျဲးကွံာ်သုသးလၢတၢ် ဒဲးဘးတဖၣ်တန့ၢ်ဘၣ်.

¹⁹သုစံး, “ပျဲယွၤမၤချ့ချ့ဒီးမၤတၢ်လၢအစံးဝဲလၢအကမၤဝဲဒ်သိး ပကထံၣ်ဘၣ်အီၤအဂီၢ်တက့ၢ်. မ်အံၣ်စရ့လးအကစၢ်ယွၤစီဆှံမၤ ကဲထီၣ်လိၣ်ထီၣ်အတၢ်တိာ်ကျဲၤတဖၣ်တက့ၢ်. မ်ပကကွၢ်တၢ်မနုၤတမံၤအိၣ်လၢအသးပူၤလဲၣ်တက့ၢ်.”

²⁰သုဘၣ်တၢ်စံၣ်ညီၣ်ဃါမနၤလီၤ. သုကိးတၢ်အၢတၢ်သီလၢ တၢ်ဂ့ၤ, ဒီးတၢ်ဂ့ၤလၢတၢ်အၢတၢ်သီလီၤ. သုဘိးကဒါတၢ်ခံးဆူတၢ်ကပီၤဒီးတၢ်ကပီၤဆူတၢ်ခံးလီၤ. တၢ်အခၣ်န့ၣ်သုဒုးကဲထီၣ်အီၤလၢတၢ်အဆၢ, ဒီးတၢ်လၢအဆၢန့ၣ် သုမၤခၣ်အီၤလီၤ.

²¹သုဘၣ်တၢ်စံၣ်ညီၣ်ဃါမနၤလီၤ. သုဆိကမိၣ်လၢသုကူၣ်တၢ်သ့, ဒီးသုသ့သုဘၣ်ဒိၣ်မးလီၤ.

²²သုဘၣ်တၢ်စံၣ်ညီၣ်ဃါမနၤလီၤ. စပံးထံပလီအပှၤဒူပှၤဃိၤသ့ၣ် ဧၢ, ဖဲသုကျဲၣ်ကျီသံးဧိၤဂာ်ဧိၤန့ၣ်, သုဒူ သုဃိၤဒီးတၢ်ပျံၤတၢ်ဖုးတအိၣ်ဒီးသုဘၣ်.

²³ဘၣ်ဆၣ်, ထဲလၢခိၣ်ဖးတခါအဃိသုပျဲပူၤပှၤလၢအတၢ်ကမၣ် အိၣ်တဖၣ်, ဒီးသုတြီဃာ်ပှၤလၢအတၢ်ကမၣ်တအိၣ်ဒ်သိး အသုတန့ၢ်ဘၣ်တၢ်စံၣ်ညီၣ်တီတဂ့ၤအဂီၢ်လီၤ.

²⁴လၢတၢ်န့ၣ်အဃိအခဲအံၤ, ဒ်ဘုလီၢ်ဒီးကပံာ်ဃ့သွံးထီၣ်ကွံာ် ဒီးမ့ၣ်အူအီၣ်အီၤအသိး, သုဂံၢ်တဖၣ်ကအုၣ်ကကျၣ်ကွံာ် ဒီးသုသိၣ်သုဖီတဖၣ်ကဃ့ထီဒီးဒံကွံာ်ဝဲလီၤ. အဂ့ၢ်ဒ်အံၤ, သုညိကွံာ်တၢ်လၢယွၤသ့တၢ်လၢာ်ကစၢ်, အံၣ်စရ့လးအကစၢ်ယွၤစီဆှံ, သိၣ်လိတ့ၢ်ပှၤအဃိန့ၣ်လီၤ.

²⁵ယွၤသးဒိၣ်အပှၤဂီၢ်မုၢ်ဒီးယူာ်ထီၣ်အစုလၢကစံၣ်ညီၣ်အဝဲသ့ၣ်အဂီၢ်လီၤ. ကစၢၢ်ကလိတဖၣ်ကဟူးဝးဝဲဒီးပှၤလၢအသံတဖၣ်အစိၣ်ကဘၣ်တၢ် ပာ်တ့ၢ်အီၤလၢကျဲခိၣ်ဒ်တၢ်တပှီာ်တပှာ်တဖၣ်အသိးလီၤ. အန့ၣ်ဒၣ်လဲာ်, ယွၤအတၢ်သးဒိၣ်ထီၣ်တကတၢၢ်ဒံးဘၣ်, ဒီးအစုကယၤထီၣ်ဒံးအ သးလၢကစံၣ်ညီၣ်တၢ်အဂီၢ်လီၤ.

²⁶ယွၤဟ့ၣ်တၢ်ပနီၣ်လၢတၢ်ကကိး ပှၤကလုာ်လၢထံယံၤကီၢ်ယံၤအဂီၢ်လီၤ. အဝဲညိၣ်ကလံၤလၢအဝဲသ့ၣ် အဂီၢ်ဒ်သိးအကဟဲလၢဟီၣ်ခိၣ်အကတၢၢ်ဒီး ကွၢ်ကွၢ်အဝဲသ့ၣ်ဟဲဝဲပ့ၢ်ပ့ၢ်ဆှါဆှါဒီးချ့ချ့လီၤ.

²⁷တလီၤဘှံးလီၤတီၤနီတဂၤဘၣ်ဒီးအခီၣ်တဘၣ်တိၢ်နီတဂၤဘၣ်. တမံခ့ဒီးတမံဘၣ်အသးဘၣ်. ယီၢ်တကိးတလီၤဃ့ၣ်နီတခါဘၣ်. ခီၣ်ဖံးပျံၤတထီၣ်တဲာ်နီတဘိဘၣ်.

²⁸အပျၢ်တဖၣ်အကနၣ်အ့ၣ်ဝဲဒီးအချံၣ်တဖၣ်အိၣ်ကတဲာ်ကတီၤ အသးလၢကခးတၢ်အဂီၢ်လီၤ. အကသ့ၣ်တဖၣ်အခီၣ်မ့ၣ်ကိၤ ဝဲဒ်လၢၢ်မ့ၣ်အသိးဒီးအလ့ၣ်ကဟၣ်အလ့ၣ်ဖံဘၣ်တဖၣ်တရံးဝဲဒ် ကလံၤသဝံးအသိးလီၤ.

²⁹သုးဖိတဖၣ်ကညီၤထီၣ်ဝဲဒ်ခ့ယုၢ်တဖၣ်အသိး, လၢအမၤသံ ဆၣ်ဖိကီၢ်ဖိဒီးစိာ်ကွံာ်အီၤဆူတၢ်လီၢ်လၢပှၤဟံးန့ၢ်က့ၤအီၤ လၢအအိၣ်တသ့နီတဂၤဘၣ်န့ၣ်လီၤ.

³⁰ဖဲမုၢ်နံၤအဝဲန့ၣ်ဟဲတုၤဝဲဒီး, အဝဲသ့ၣ်ကညီၤဝဲလၢအံၣ်စရ့ လးအဖီခိၣ်ဒ်ပီၣ်လဲၣ်သီၣ်ဒိၣ်သီၣ်သွါအသိးလီၤ. ကွၢ်ထံကီၢ်အံၤတက့ၢ်. တၢ်ခံးတၢ်နၤဒီးတၢ်သူၣ်အုးသးအုးလီၤ. တၢ်ကပီၤဘၣ်တၢ်ယူၢ်လီၤကွံာ် အီၤလၢတၢ်ခံးတၢ်နၤလီၤ.