Read S'gaw Karen လံာ်ယၡါယၤ 51 Bible Online

လံာ်ယၡါယၤ 51 - S'gaw Karen bible

လံာ်ယၡါယၤ 51

¹ယွၤစံးဝဲ, “ဒိကနၣ်ယၤ, သုဝဲလၢအသးအိၣ်န့ၢ် ဘၣ်တၢ်အုၣ်က့ၤခီၣ်က့ၤ, သုဝဲလၢအဟဲဆူယအိၣ်လၢ တၢ်မၤစၢၤအဂီၢ်သ့ၣ်ဧၢ. ဆိကမိၣ်ထီၣ်လၢၢ်လၢပှၤစိးပျၤဒုးကဲထီၣ်သုဒီး လၢၢ်ပူၤဖဲသုဘၣ်တၢ်ခူၣ်ထုးထီၣ်သုန့ၣ်တက့ၢ်.

²ဆိကမိၣ်ထီၣ်သုမိၢ်ပၢ်ဖးဒိၣ်လၢပျၢၤစီၤအၤဘြၤဟၣ် ဒီးနီၢ်စၤရါလၢသုဟဲလီၤစၢၤလီၤသွဲၣ်လၢအီၤန့ၣ်တက့ၢ်. ဖဲယကိးထီၣ်စီၤအၤဘြၤဟၣ်န့ၣ်အဖိတအိၣ်ဘၣ်. ဘၣ်ဆၣ်ယဆိၣ်ဂ့ၤတ့ၢ်အီၤဒီးဟ့ၣ်အီၤအဖိတဖၣ်လီၤ. ယဒုးအိၣ်ထီၣ်အစၢၤအသွဲၣ်တဖၣ် အါအါဂီၢ်ဂီၢ်န့ၣ်လီၤ.

³ယကဒုးနဲၣ်ယတၢ်သးကညီၤဆူဝ့ၢ်ယရူၤၡလ့ၣ်ဒီး, ဆူပှၤခဲလၢာ်လၢအအိၣ်လၢအတၢ်ဟးဂီၤတဖၣ်အပူၤလီၤ. အလီၢ်အကျဲမ့ၢ်မဲးမုၢ်ခိၣ်ဒၣ်လဲာ်, ယကဒုးကဲထီၣ်အီၤလၢ တၤသၣ်လီၢ်တလီၢ် လၢအလီၤဂာ်ဒီးတၤသၣ်လီၢ်လၢယသူၣ်လီၤတ့ၢ်အီၤလၢဧ့ၤဒ့ၣ်န့ၣ်လီၤ. တၢ်သူၣ်ခုသးခုဒီးတၢ်သူၣ်ဖှံသးညီ, တၢ်စံးထီၣ်ပတြၢၤဒီးတၢ်စံးဘျုးစံးဖှိၣ်ယၤ အတၢ်သးဝံၣ်တဖၣ်ကအိၣ်ဖဲန့ၣ်လီၤ.

⁴ဒိကနၣ်ယၤ, ယပှၤဂီၢ်မုၢ်သ့ၣ်ဧၢ, ဒိကနၣ်တၢ်လၢယစံးဘၣ်သုတက့ၢ်. ယဟ့ၣ်ယတၢ်သိၣ်လိဆူပှၤကလုာ်တဖၣ်ဒီး ယတၢ်သိၣ်တၢ်သီတဖၣ်ကဟဲစိာ်န့ၢ်အဝဲသ့ၣ် လၢတၢ်ကပီၤလီၤ.

⁵ယကဟဲချ့ချ့ဒီးအုၣ်က့ၤခီၣ်က့ၤအဝဲသ့ၣ်, ယတၢ်မၤနၢၤ အဆၢကတီၢ်ဘူးထီၣ်လံ. ယၤ, ယကစၢ်ဒၣ်ယဲ, ယကပၢတၢ်လၢပှၤကလုာ်တဖၣ်အဖီခိၣ်လီၤ. ထံယံၤကီၢ်ယံၤတဖၣ်အိၣ်ခိးယၤလၢယကဟဲအဂီၢ်, အဝဲသ့ၣ်အိၣ်ခိးဝဲပှဲၤဒီးတၢ်မုၢ်လၢ်လၢယကအုၣ်က့ၤခီၣ်က့ၤ အီၤအဂီၢ်လီၤ.

⁶ကွၢ်ထီၣ်တၢ်ဆူမူခိၣ်မူကပိာ်လိၤ, ကွၢ်တၢ်ဆူဟီၣ်ခိၣ်တက့ၢ်. မူခိၣ်မူကပိာ်လိၤကလီၤမၢ်ကွံာ်ဝဲဒ်မ့ၣ်အူလုၣ်အသိး, ဟီၣ်ခိၣ်ကလီၢ်လံၤဖီဃးကွံာ်ဝဲဒ်ဆ့ကၤလီၢ်လံၤ အသိးလီၤ. ဒီးအပှၤဂီၢ်မုၢ်ခဲလၢာ်ကသံဝဲဒ် သၣ်ဘုလါတဖၣ်အသိးလီၤ. ဘၣ်ဆၣ်ဒီးတၢ်မၤပူၤဖျဲးလၢယဟဲစိာ်န့ၣ် ကအိၣ်ဝဲလီၤထူလီၤယိာ် ဒီးယတၢ်မၤနၢၤအကတၢၢ်တအိၣ်ဝဲဘၣ်လီၤ.

⁷ဒိကနၣ်ယၤ, သုဝဲလၢအသ့ၣ်ညါတၢ်လၢအဘၣ်, သုဝဲလၢယတၢ်သိၣ်လိအိၣ်စဲထီဃာ် လၢအသးပူၤသ့ၣ်ဧၢ, ဖဲပှၤကတိၤဆဲးအဲးသုဒီးဒုၣ် ဒွဲၣ်စံးအၢသုန့ၣ်ပျံၤတၢ်တဂ့ၤ.

⁸အဝဲသ့ၣ်ကဟါမၢ်ကွံာ်ဝဲဒ်တၢ် ကူတၢ်ကၤလၢအဃၢ်အီၣ်ကွံာ်အီၤအသိးလီၤ. မ့မ့ၢ်, တၢ်မၤပူၤဖျဲးလၢယဟဲစိာ်န့ၢ်သုန့ၣ်, ကအိၣ်ဂၢၢ်ဆိးကျၢၤဝဲလီၤထူလီၤယိာ်လီၤ. ယတၢ်မၤနၢၤကအိၣ်ဂၢၢ်အိၣ်ကျၢၤ ကိးဆၢကိးကတီၢ်ဒဲးလီၤ.”

⁹ယွၤဧၢ, ဖုးသံနီၣ်ထီၣ်ဒီးမၤစၢၤပှၤတက့ၢ်. သူနတၢ်စိတၢ်ကမီၤဒီးအုၣ်က့ၤခီၣ်က့ၤပှၤတက့ၢ်, သူအီၤဒ်နသူတ့ၢ်အီၤလၢပျၢၤ လၢကစၢၤအသိးန့ၣ်တက့ၢ်. နမ့ၢ်တ့ၢ်ပှၤလၢအကျီကွံာ်ပီၣ်လဲၣ် အတၢ်မုၢ်ဃၢ်ဖးဒိၣ်ရၤဃးတကူာ်တကူာ်န့ၣ်လီၤ.

¹⁰နမ့ၢ်စ့ၢ်ကီးပှၤလၢအမၤလီၤ သံးကွံာ်ပီၣ်လဲၣ်ဒီးကတဲာ်က တီၤတ့ၢ်ကျဲတဘိလၢပီၣ်လဲၣ်ခံဒး ဒ်သိးပှၤတဖၣ်လၢနအုၣ်က့ၤ ခီၣ်က့ၤအီၤခီဂာ်တၢ်ကသ့အဂီၢ်န့ၣ်လီၤ.

¹¹ပှၤတဖၣ်လၢနမၤပူၤဖျဲးတ့ၢ်အီၤန့ၣ် ကလဲၤတုၤဝ့ၢ်ယရူၤရှလ့ၣ် လၢတၢ်သူၣ်ဖှံသးညီအပူၤ ဒီးကသးဝံၣ်တၢ်ဒီးကကိးထီၣ် ဝဲလၢတၢ်သူၣ်ခုသးခုအဂ့ၢ်န့ၣ်လီၤ. အဝဲသ့ၣ်ကသူၣ်ဖှံသးညီလီၤစိၤလီၤဃၣ် ဒီးပူၤဖျဲးကွံာ်ဒီးတၢ်ဘၣ်မိၣ်ဘၣ်မးဒီးတၢ်သူၣ် အုးသးအုးလီၤထူလီၤယိာ်န့ၣ်လီၤ.

¹²ယွၤစံးဝဲ, “ယမ့ၢ်ပှၤတဂၤလၢအဟ့ၣ်ဆူၣ်ထီၣ်သုဂံၢ်သုဘါလီၤ. ဘၣ်မနုၤအဃိသုဘၣ်ပျံၤဘၣ်ဖုးပှၤကညီလၢ အသံသ့အံၤ, လၢအအိၣ်ဂၢၢ်ဆိးကျၢၤသ့ယံာ်ထဲသိးဒၣ် နီၣ်ဧိၤမံၤဧိၤအံၤန့ၣ်လဲၣ်.

¹³သုသးပ့ၤနီၣ်ကွံာ်ယွၤတဂၤန့ၣ်လၢအတ့လီၤပာ်လီၤသု, ဒီးသလၣ်ထီၣ်မူခိၣ်မူကပိာ်လိၤ, ဒီးပာ်လီၤဟီၣ်ခိၣ်အခီၣ်ထံးတဖၣ်လံဧါ. ဘၣ်မနုၤသုအိၣ်မူတထံၣ်ဃီလၢတၢ်ပျံၤဘၣ်ဖုးဘၣ်လၢပှၤလၢ အမၤအၢမၤနးသုအတၢ်သးကဲၤထီၣ်, ဒီးပှၤလၢအိၣ်ကတဲာ်ကတီၤအသးလၢကမၤဟးဂီၤသုန့ၣ်လဲၣ်. အဝဲသ့ၣ်အတၢ်သးကဲၤထီၣ်မၤဘၣ်ဒိဘၣ်ထံးသု တသ့လၢၤဘၣ်.

¹⁴ပှၤတဖၣ်လၢအဘၣ်တၢ်စၢဃာ်အီၤ လၢဃိာ်ပူၤန့ၣ်တယံာ်လၢၤဘၣ်ဒီး ကဘၣ်တၢ်မၤထူၣ်ဖျဲးအီၤလီၤ. အဝဲသ့ၣ်ကအိၣ်မူလၢတၢ်အိၣ်ကၢအိၣ်ခိးအပူၤ ဒီးကအိၣ်ဒီးတၢ်အီၣ်ခဲလၢာ်လၢအလိၣ်ဘၣ်ဝဲန့ၣ်လီၤ.

¹⁵ယမ့ၢ်ယွၤ, သုကစၢ်ယွၤလီၤ. ယထိၣ်ဂဲၤထီၣ်ပီၣ်လဲၣ် ဒီးဒုးသီၣ်ထီၣ်အလပီတဖၣ်ရူၢ်ရူၢ်လီၤ. ယမံၤမ့ၢ်ဝဲယွၤသ့တၢ်လၢာ်န့ၣ်လီၤ.

¹⁶ယသလၣ်ထီၣ်မူခိၣ်မူကပိာ်လိၤ ဒီးပာ်လီၤဟီၣ်ခိၣ်အခီၣ်ထံးတဖၣ်လီၤ. ယစံးဘၣ်ဝ့ၢ်ယရူၤၡလ့ၣ်, နမ့ၢ်ယပှၤဂီၢ်မုၢ်လီၤ. ယဟ့ၣ်နၤယတၢ်သိၣ်လိတဖၣ်, ဒီးယဒီဒၣ်အိၣ်ပှိၤနၤလၢယစုဒၣ်ယဲလံ.”

¹⁷ဝ့ၢ်ယရူၤၡလ့ၣ်ဧၢ, ဖုသံနီၣ်ထီၣ်တက့ၢ်. ထိၣ်ဂဲၤထီၣ်နသးဒီးဆၢထၢၣ်တက့ၢ်. နအီတ့ၢ်တၢ်စံၣ်ညီၣ်အလီခီလၢယွၤ, လၢအတၢ်သးထီၣ်အပူၤ, ဟ့ၣ်နၤလၢနကအီအဂီၢ်လံ. နအီလၢာ်ကွံာ်အီၤဒီးဒုးလဲၤနၤကနူၤနူၤကပၤပၤလီၤ.

¹⁸ပှၤလၢအကဆှၢနၤတအိၣ်နီတဂၤဘၣ်, ဒီးလၢနပှၤဂီၢ်မုၢ်ဒၣ်နဲအကျါ ပှၤလၢအကဟံးနၤလၢအစုတအိၣ်နီတဂၤဘၣ်.

¹⁹တၢ်တတၢးတနါခံမံၤဟဲလီၤဘၣ်လၢနလိၤလီၤ. နလီၢ်နကျဲဘၣ်တၢ်မၤဟးဂီၤအီၤလၢ တၢ်ဒုးတၢ်ယၤအဃိ ဒီးနပှၤဂီၢ်မုၢ်သၣ်ဝံၤလီၤဒိဝဲလီၤ. ပှၤကဒုးနဲၣ်နၤလၢအတၢ်သးကညီၤ တအိၣ်နီတဂၤဘၣ်.

²⁰ဖဲကျဲကိးဘိဒဲးအသနၢၣ်န့ၣ်, နပှၤဂီၢ်မုၢ်လီၤဘှံးလီၤတီၤဝဲလၢအဂံၢ်စၢ်ဘါစၢ်အဃိ, ဒီးအဝဲသ့ၣ်လီၤဂာ်ဒ်တၤဖးဘၣ်ထု လၢပှၤခးတၢ်ဖိတဂၤအပှာ်ပူၤအသိးန့ၣ်လီၤ. အဝဲသ့ၣ်ကလၢၢ်ဘၣ်ကစၢ်ယွၤအတၢ်သးဒိၣ်ထီၣ်အသဟီၣ်န့ၣ်လီၤ.

²¹သုဝဲပှၤဝ့ၢ်ယရူၤၡလ့ၣ်ဖိလၢအတူၢ်ဘၣ်ခီၣ်ဘၣ်တၢ်, သုဝဲလၢအဟးကပၤကပၤဒ် ပှၤအီမူၤသံးအသိးသ့ၣ်ဧၢ,

²²ကစၢ်, သုကစၢ်ယွၤကဟုကယာ်သုဒီးစံးဝဲ, “ယကဟံးထီၣ်ကွံာ်လီခီလၢယဟ့ၣ်သု လၢယတၢ်သးဒိၣ်သးဖျိးအပူၤန့ၣ်လီၤ. သုတဘၣ်အီလၢၤစပံးထံလၢအဒုးလဲၤသု ကနူၤနူၤကပၤပၤန့ၣ်နီတစုဘၣ်.

²³ယကဟ့ၣ်လီၤအီၤဆူ, ပှၤတဖၣ်လၢအမၤအၢမၤနးသု, လၢအမၢသုမံလီၤလၢကျဲဘိတဖၣ်အပူၤ ဒီးယီၢ်တံၢ်သုဒ်ဟီၣ်ခိၣ်ကမူၣ်အသိး, အအိၣ်န့ၣ်လီၤ.”