Read S'gaw Karen လံာ်ယၡါယၤ 53 Bible Online

လံာ်ယၡါယၤ 53 - S'gaw Karen bible

လံာ်ယၡါယၤ 53

¹ပှၤဂီၢ်မုၢ်စံးဆၢကဒါက့ၤဝဲ, “တၢ်လၢပပာ်ဖျါခဲအံၤမ့ၢ်မတၤကနာ်အီၤန့ၣ်လဲၣ်. မ့ၢ်မတၤထံၣ်ယွၤအစုမၤတၢ်လၢတၢ်အံၤအပူၤ ကသ့န့ၣ်လဲၣ်.

²မ့ၢ်တၢ်ဘၣ်ယွၤအသးလၢအခ့အပှၤကဒိၣ်ထီၣ် ဒ်သ့ၣ်တထံးစဲၤလီၤအဂံၢ်လၢဟီၣ်ခိၣ်ဃ့ထီအပူၤအသိးန့ၣ်လီၤ. အသူးအသ့ၣ်မ့ၢ်ဂ့ၤ, အတၢ်ဃံတၢ်လၤမ့ၢ်ဂ့ၤ လၢပကပာ်သူၣ်ပာ်သးအီၤအဂီၢ်န့ၣ် တအိၣ်ဘၣ်နီတမံၤဘၣ်. တအိၣ်ဘၣ်ဒီးတၢ်နီတမံၤလၢအလီၤထုးသူၣ်ထုးသး, ဒီးတၢ်လၢအကထုးန့ၢ်ပှၤဆူအအိၣ်တအိၣ် နီတမံၤဘၣ်.

³ပသးဘၣ်အၢအီၤဒီးပညိကွံာ်အီၤလီၤ. အဝဲတူၢ်ဘၣ်တၢ်နးတၢ်ဖှီၣ်ဒီးတၢ်ဆူးတၢ်ဆါန့ၣ်လီၤ. ပှၤတကွၢ်ဃီၤအီၤဒၣ်လဲာ်နီတဂၤဘၣ်. ပကွၢ်ကပာ်ကွံာ်အီၤဒ်အဝဲတမ့ၢ်တၢ်နီတမံၤဘၣ်အသိးန့ၣ်လီၤ.

⁴ဘၣ်ဆၣ်ဒီး, တၢ်နးတၢ်ဖှီၣ်လၢပကဘၣ်တူၢ်ဒၣ်ပဝဲ, တၢ်ဆူးတၢ်ဆါလၢပကဘၣ်ဝံထီၣ် ယိးထီၣ်ဒၣ်ပဝဲန့ၣ်အဝဲဒၣ်တူၢ်ဝဲလီၤ. ထီဘိတထံၣ်ဃီန့ၣ်ပဆိကမိၣ်ဒၣ်လၢအဝဲအတၢ်တူၢ်ဘၣ်တၢ်အံၤ မ့ၢ်တၢ်စံၣ်ညီၣ်ဟဲလၢကစၢ်ယွၤလီၤ.

⁵မ့မ့ၢ်တခီ, လၢပတၢ်ဒဲးဘးတဖၣ်အဃိ တၢ်မၤဘၣ်ဒိဆါအီၤ, ဒီးဘၣ်တၢ်ဒိအီၤတီၢ်အီၤလၢ တၢ်အၢတၢ်သီလၢပမၤတ့ၢ်တဖၣ်အဃိလီၤ. ပဘၣ်တၢ်မၤဘျါက့ၤပှၤခီဖျိတၢ်စံၣ်ညီၣ်လၢအတူၢ်ဝဲအဃိ ဒီးပဘျါက့ၤလၢအဝဲဒၣ်ဘၣ်တီၢ်အပူၤလီၢ် တဖၣ်အဃိလီၤ.

⁶ပဝဲခဲလၢာ်ပလီၤဂာ်ဒီးသိတဖၣ်လၢအဟးဖျိးကျဲ, တဂၤလဲၤလၢအကျဲဒၣ်ဝဲစုာ်စုာ်လီၤ. ဘၣ်ဆၣ်ဒီးယွၤဒုးလီၤဘၣ်တၢ်စံၣ်ညီၣ်လၢအလိၤ, တၢ်စံၣ်ညီၣ်လၢပဝဲခဲလၢာ်ပကြၢးဒိးဘၣ်ဝဲန့ၣ်လီၤ.

⁷အဝဲဘၣ်တၢ်မၤအီၤနးနးကျံၤကျံၤလီၤ. ဘၣ်ဆၣ်ဒီးတူၢ်ဝဲလၢ တၢ်ဆီၣ်လီၤသးအပူၤကစုဒုလီၤ. တကတိၤတၢ်နီတဘီနီတစုဘၣ်. ဒ်သိဖိတဒုလၢအကဘၣ်တၢ်မၤသံအီၤအသိး, ဒ်သိတဒုလၢပှၤကတံာ်အဆူၣ်အသိး တကတိၤတၢ်နီတဘီနီတစုဘၣ်.

⁸အဝဲဘၣ်တၢ်ဖီၣ်အီၤဒီးစံၣ်ညီၣ်အီၤဒီးဆှၢထီၣ်ကွံာ်အီၤလၢ တၢ်ကမၤသံအီၤအဂီၢ်လီၤ. ဒီးတၢ်မၤအသးဒီးအီၤန့ၣ်ပှၤတကနၣ်ဃုာ်နီတဂၤဘၣ်. အဝဲဘၣ်တၢ်မၤသံအီၤလၢပပှၤဂီၢ်မုၢ်အတၢ်ဒဲးဘးတဖၣ် အဃိလီၤ.

⁹အဝဲတမၤတ့ၢ်တၢ်အၢတၢ်သီနီတစုဘၣ်ဒီးတကတိၤလီတၢ် နီတဘျီဘၣ်ဒၣ်လဲာ်န့ၣ်အဝဲဘၣ်တၢ်ပာ်လီၤအီၤလၢတၢ်သွၣ်ခိၣ် တပူၤဃုာ်ဒီးပှၤအၢပှၤသီတဖၣ်လီၤ. အဝဲဘၣ်တၢ်ခူၣ်လီၤအီၤဃုာ်ဒီးပှၤထူးပှၤတီၤလီၤ.”

¹⁰ယွၤစံးဝဲဒၣ်, “မ့ၢ်တၢ်ဘၣ်ယသးလၢအဝဲကဘၣ်တူၢ်တၢ်လီၤ. အတၢ်သံ န့ၣ်မ့ၢ်တၢ်လုၢ်တၢ်ပာ်တမံၤလၢကဟဲစိာ်တၢ်ပျၢ်တၢ်ကမၣ်အဂီၢ်လီၤ. မၤသးဒ်န့ၣ်ဒီး, အဝဲကထံၣ်ဘၣ်အစၢၤအသွဲၣ်တဖၣ်လီၤ. အဝဲကအိၣ်မူတၢ်အိၣ်မူအိၣ်ကၢအိၣ်ခိး ဒီးခီဖျိအီၤန့ၣ်, ယတၢ်တိာ်ကလၢထီၣ်ပှဲၤထီၣ်ဝဲလီၤ.

¹¹ဖဲတၢ်တူၢ်တၢ်နးတၢ်ဖှီၣ်အတၢ်အိၣ်မူတခါဝံၤအလီၢ်ခံန့ၣ်, အဝဲကအိၣ်ဒီးတၢ်သူၣ်ခုသးခုကဒီးတဘျီလီၤ. ကသ့ၣ်ညါဝဲလၢအတူၢ်တ့ၢ်တၢ်န့ၣ်တမ့ၢ်တၢ်ကလီ ကလီဘၣ်န့ၣ်လီၤ. ယခ့ယပှၤလၢအတီဒီးယၤ, လၢယဘၣ်ယသးလၢအီၤတဂၤ, ကဝံထီၣ်ယိးထီၣ်တၢ်စံၣ်ညီၣ်လၢပှၤအါဂၤအဂီၢ်, ဒီးလၢအဝဲဒၣ်အဃိယကပျၢ်အဝဲသ့ၣ်အတၢ်ကမၣ်လီၤ.

¹²မၤသးဒ်န့ၣ်ဒီး, ယကဟ့ၣ်အီၤတၢ်လၤတၢ်ကပီၤအလီၢ်တတီၤ, တၢ်လီၢ်တတီၤလၢပှၤအဒိၣ်စိဒိၣ်ကမီၤတဖၣ်အကျါလီၤ. အဝဲဟ့ၣ်လီၤကွံာ်အသးလၢတၢ်သးအိၣ်အပူၤ ဒီးတူၢ်သကိးတၢ်ဒီးတၢ်ဘူၣ်တၢ်တီၢ်လၢအလီၤဘၣ်ပှၤ အၢပှၤသီတဖၣ်န့ၣ်လီၤ. အဝဲဟံးန့ၢ်ပှၤတၢ်ဒဲးဘးဖိအါဂၤအလီၢ်ဒီးဘါထုကဖၣ်ဝဲလၢ အဝဲသ့ၣ်အတၢ်ဒဲးဘးကဘၣ်တၢ်ပျၢ်အီၤအဂီၢ်လီၤ.”