Read S'gaw Karen လံာ်ယၡါယၤ 56 Bible Online

လံာ်ယၡါယၤ 56 - S'gaw Karen bible

လံာ်ယၡါယၤ 56

¹ယွၤစံးဘၣ်အပှၤဂီၢ်မုၢ်, “မၤတၢ်လၢအတီဒီးအဘၣ်တက့ၢ်. အဂ့ၢ်ဒ်အံၤ, တယံာ်လၢၤဘၣ်ဒီးယကအုၣ်က့ၤခီၣ်က့ၤသုလီၤ.

²ယကဆိၣ်ဂ့ၤပှၤတဖၣ်လၢထီဘိ တိၢ်န့ၢ်မုၢ်အိၣ်ဘှံးနံၤဒီးတသူကမၣ်ဝဲဘၣ်န့ၣ်လီၤ. ယကဆိၣ်ဂ့ၤပှၤတဖၣ်လၢတမၤတၢ်အၢ တၢ်သီနီတမံၤဘၣ်န့ၣ်လီၤ.”

³ပှၤတခီဘီမုၢ်ဖိတဂၤလၢအပာ်ဖှိၣ်အသးဒီးယွၤအပှၤဂီၢ်မုၢ်န့ၣ် တကြၢးစံးဝဲလၢ, “ယွၤတပျဲယဘူၣ်တၢ်ဘါတၢ်ဒီးအပှၤ ဂီၢ်မုၢ်န့ၣ်ဘၣ်.” ပှၤတဂၤလၢတၢ်ဒ့ကွံာ်အဒံၣ်, တကြၢးဆိ ကမိၣ်ဝဲနီတစုလၢမ့ၢ်လၢအဖိအိၣ်တသ့ဘၣ်အဃိန့ၣ်, ကဲထီၣ်ပှၤဘၣ်ဃးဒီးကစၢ်ယွၤအပှၤဂီၢ်မုၢ်တသ့ဝဲနီတစုန့ၣ်ဘၣ်.

⁴ယွၤစံးဘၣ်ပှၤဒ်န့ၣ်အသိးတဂၤ, “နမ့ၢ်ယူးယီၣ်ယၤခီဖျိနတိၢ်န့ၢ်မုၢ်အိၣ်ဘှံးနံၤ, နမ့ၢ်မၤတၢ်လၢအမၤသးမုာ်ယၤ ဒီးဟံးဃာ်ယတၢ်အၢၣ်လီၤအီလီၤ လၢတၢ်သူၣ်တီသးရၤအပူၤဒီး,

⁵နမံၤကဘၣ်တၢ်သ့ၣ်နီၣ်ထီၣ်အီၤလၢယတၢ်လုၢ်ဟံၣ်အပူၤဒီး လၢယပှၤဂီၢ်မုၢ်အကျါယံာ်န့ၢ်ဒံးနမ့ၢ်အိၣ်တ့ၢ်ဒီးနဖိခွါတဖၣ်ဒီး နဖိမုၣ်တဖၣ်တက့ၢ်န့ၣ်လီၤ. နတဘၣ်တၢ်သးပ့ၤနီၣ်နၤနီတစုဘၣ်.”

⁶ဒီးယွၤစံးဘၣ်ပှၤတခီဘီမုၢ်ဖိတဖၣ်န့ၣ်လၢအကဲထီၣ်ပှၤဘၣ်ဃး ဒီးအပှၤဂီၢ်မုၢ်, ပှၤလၢအအဲၣ်အီၤဒီးမၤအတၢ်မၤ, ပှၤလၢအတိၢ်န့ၢ်မုၢ်အိၣ်ဘှံးနံၤဒီးဟံးဃာ်အတၢ်အၢၣ်လီၤ အီလီၤလၢတၢ်သူၣ်တီသးရၤအပူၤ,

⁷“ယကဟဲစိာ်သုဆူဝ့ၢ်စံယိၣ်, ယတၢ်လူၢ်စီဆှံ, ယကဟ့ၣ်သု တၢ်သးခုလၢယတၢ်ထုကဖၣ်အဟံၣ်ပူၤ, ဒီးတူၢ်လိာ်တၢ်လုၢ်တၢ်ပာ်တဖၣ်လၢသု လုၢ်ထီၣ်ပာ်ထီၣ်အီၤလၢယတၢ်လုၢ်လီၢ် အဖီခိၣ်န့ၣ်လီၤ. ယတၢ်လုၢ်ဟံၣ်ကဘၣ် တၢ်ကိးအီၤလၢတၢ်ထုကဖၣ်အဟံၣ်တဖျၢၣ်လၢပှၤဂီၢ်မုၢ် ကိးကလုာ်ဒဲးအဂီၢ်လီၤ.”

⁸ယွၤပၢဘၣ်တၢ်ခဲလၢာ်ကစၢ်, လၢအဟဲက့ၤစိာ်အပှၤဂီၢ်မုၢ် အံၣ်စရ့လးလၢတၢ်စိာ်မၢကဲကုၢ်အလီၢ်ဆူဟံၣ်န့ၣ်, အၢၣ်လီၤစ့ၢ်ကီးဝဲလၢကဟဲစိာ်ဒံးပှၤဂီၢ်မုၢ်အဂၤတဖၣ် လၢကဟဲပာ်ဖှိၣ်ဃုာ်အသးဒီးအဝဲသ့ၣ်န့ၣ်လီၤ.

⁹ယွၤစံးဘၣ်တခီဘီမုၢ်အပှၤကလုာ်တဖၣ်လၢ ကဟဲဒ်ဆၣ်ဖိကီၢ်ဖိအမံၤတဖၣ်အသိးဒီးအီၣ်ကွံာ် အပှၤဂီၢ်မုၢ်န့ၣ်လီၤ.

¹⁰အဝဲစံး, “ခိၣ်နၢ်ခဲလၢာ်လၢအကဘၣ်ဟ့ၣ်ပလီၢ် ယပှၤဂီၢ်မုၢ်န့ၣ်အမဲာ်ဘျီၣ်လီၤ. အဝဲသ့ၣ်တသ့ၣ် ညါတၢ်နီတမံၤဘၣ်. အဝဲသ့ၣ်လီၤဂာ်ဒီးထွံၣ်ခိးတၢ် တဖၣ်လၢတမီၤတၢ်ဘၣ်, အိၣ်ဒၣ်ထဲစူၣ်လီၤအသးဒီးမံမီၢ်တၢ်န့ၣ်လီၤ. အဝဲသ့ၣ်အဲၣ်တၢ်မံဒိၣ်မးလဲၣ်.

¹¹အဝဲသ့ၣ်လီၤဂာ်ဒီးထွံၣ်တဖၣ်လၢသးကွံတၢ်အီၣ်ဒီးအီၣ်တၢ် တလၢအီၣ်နီတစုဘၣ်န့ၣ်လီၤ. ခိၣ်နၢ်တဖၣ်အံၤအတၢ်သ့ၣ်ညါ နၢ်ပၢၢ်တအိၣ်ဘၣ်. အဝဲသ့ၣ်ကိးဂၤဒဲးမၤတၢ်ဒ်တၢ်သးအိၣ် ဒၣ်ဝဲအသိးဒီးဃုအဘျုးဒၣ်ဝဲန့ၣ်လီၤ.

¹²ပှၤလၢအမူၤလၢသံးတဖၣ်စံးဝဲ, မ်ပကမၤန့ၢ်စပံးထံတနီၤဒီး အီခဲလၢာ်ဖဲပအီကဲန့ၣ်တက့ၢ်. ခဲမုၢ်ဆ့ၣ်တနံၤန့ၣ်, ကဂ့ၤဒိၣ်န့ၢ်ဒံးတနံၤညါအံၤတက့ၢ်လီၤ.”