Read S'gaw Karen လံာ်ယၡါယၤ 57 Bible Online

လံာ်ယၡါယၤ 57 - S'gaw Karen bible

လံာ်ယၡါယၤ 57

¹ပှၤအဂ့ၤတဖၣ်သံဝဲ, ဒီးပှၤတသ့ၣ်ညါနၢ်ပၢၢ်ဒီးပာ်သူၣ်ပာ်သး လၢအဂ့ၢ်နီတဂၤဒၣ်လဲာ်ဘၣ်. ဘၣ်ဆၣ်ဖဲအဝဲသ့ၣ်သံဝဲန့ၣ်, တၢ်တတၢးတနါမၤဘၣ်ဒိဘၣ်ထံးအဝဲသ့ၣ်တသ့နီတမံၤဘၣ်.

²ပှၤလၢအအိၣ်မူတၢ်အိၣ်မူအဂ့ၤအဝါတဖၣ်ထံၣ်န့ၢ်တၢ်ဃူ တၢ်ဖိးဒီးတၢ်အိၣ်ဘှံးအလီၢ်လၢတၢ်သံအပူၤန့ၣ်လီၤ.

³သုဝဲပှၤတၢ်ဒဲးဘးဖိသ့ၣ်ဧၢ, ဟဲဖဲအံၤလၢတၢ်ကစံၣ်ညီၣ်သု အဂီၢ်တက့ၢ်. သုတဂ့ၤန့ၢ်ဒံးပှၤသ့အူတၢ်သမူတၢ်တဖၣ်, ပှၤမၤကမၣ်မုၣ်ကမၣ်ခွါတဖၣ်, ဒီးပိာ်မုၣ်ဟးဂီၤတဖၣ်န့ၣ်ဘၣ်.

⁴သုနံၤဘၣ်ဖၣ်လဲမတၤတဖၣ်န့ၣ်လဲၣ်. သုဝဲပှၤလီတၢ်ဝ့ၤတၢ်တ ဖၣ်ကတိၤဒုၣ်ဒွဲၣ်မတၤတဖၣ်န့ၣ်လဲၣ်.

⁵ဒ်ပှၤတစူၢ်တနာ်ယွၤတဖၣ်အသိးန့ၣ်, သုအိၣ်ဃုာ်လိာ်သုသးလၢသ့ၣ် စီဆှံတဖၣ်အဖီလာ်ဖဲတၢ်ဂီၤတၢ်ဖီၣ်တဖၣ်ဘၣ်တၢ်ဘါထီၣ်အီၤ န့ၣ်လီၤ. သုဟ့ၣ်လီၤသုဖိတဖၣ်ဒ်တၢ်လုၢ်တၢ်ပာ်တဖၣ်အသိးလၢလၢၢ် ပူၤလ့ပူၤတဖၣ်ဘူးဒီးထံကျိတကျိအထၣ်န့ၣ်လီၤ.

⁶သုဟံးန့ၢ်လၢၢ်လၢအဘျ့တဖၣ်ဖဲန့ၣ်ဒီးဘူၣ်ထီၣ်ဘါထီၣ်အဝဲ သ့ၣ်ဒ်ကစၢ်တဖၣ်အသိးလီၤ. သုလူလီၤစပံးထံဒ်တၢ်မၤဘူၣ် ဆူအဝဲသ့ၣ်ဒီးဟဲစိာ်န့ၢ်အဝဲသ့ၣ်လၢဘုဧိၤဟုဧိၤဒ်တၢ်မၤဘူၣ် တဖၣ်အသိးလီၤ. မ့ၢ်သုဆိကမိၣ်လၢယကမုာ်သူၣ်မုာ်သးလၢ တၢ်အံၤခဲလၢာ်န့ၣ်ဧါ.

⁷သုလဲၤထီၣ်ဆူကစၢၢ်ထီၣ်ထီတဖၣ်အလိၤလၢသုကလုၢ်ထီၣ် ပာ်ထီၣ်တၢ်အဂီၢ်ဒီးမံဃုာ်အိၣ်ဃုာ်လိာ်သုသးအဂီၢ်န့ၣ်လီၤ.

⁸ဖဲဒၣ်သုဟံၣ်မဲာ်ညါအတြဲၤတဖၣ်အအိပူၤတခီန့ၣ်, သုပာ်ထီၣ်သုတၢ်ဂီၤတၢ်ဖီၣ်တဖၣ်လၢအထိၣ်ဂဲၤတၢ်သးကတၢ လီၤ. သုလဲၤသဒၣ်ကွံာ်ယၤလံ. သုဘ့ၣ်လီၤကွံာ်သုကူသုသိး တဖၣ်ဒီးထီၣ်မံလီၤလၢသုလီၢ်မံဖးဒိၣ်တဖၣ်အဖီခိၣ်, ဒီးဟ့ၣ်တၢ်အပှ့ၤလၢသုကမံဒီးပှၤလၢသုအဲၣ်တဖၣ်အဂီၢ်လီၤ. ဒီးဖဲန့ၣ်, သုမၤလၢပှဲၤသုတၢ်သးကတၢန့ၣ်လီၤ.

⁹သုဖှူထီၣ်သုတၢ်နၢမူတဖၣ်ဒီးလဲၤထီၣ်လၢသုကဘါထီၣ် ကစၢ်မိလးလီၤ. သုဆှၢလီၤပှၤစိာ်တၢ်ကစီၣ်တဖၣ်ဆူတၢ်လီၢ်လၢအယံၤဒီးအလဲၢ်, တုၤဒၣ်လဲာ်ဆူတၢ်သံအကီၢ်ပူၤဒ်သိးသုကထံၣ်န့ၢ်ကစၢ်တဖၣ် လၢသုကဘါထီၣ်အီၤလီၤ.

¹⁰သုစုလၢာ်ခီၣ်လၢာ်လၢသုဃုကစၢ်အဂၤတဖၣ်အဃိ, ဘၣ်ဆၣ်သုတပျဲစုပျဲခီၣ်နီတဘျီဘၣ်. သုဆိကမိၣ်လၢသုတၢ်ဂီၤတၢ်ဖီၣ်တဖၣ်လၢအထိၣ်ဂဲၤတၢ်သး ကတၢန့ၣ်ဟ့ၣ်သုတၢ်ဂံၢ်တၢ်ဘါအဃိဒီးသုတလီၤဘှံးလီၤ တီၤနီတစုဘၣ်န့ၣ်လီၤ.

¹¹ယွၤစံးဝဲ, “တုၤဒၣ်လဲာ်သုဘၣ်တဲယၤတၢ်လီတၢ်ဝ့ၤတဖၣ် ဒီးသးပ့ၤနီၣ်ကွံာ်ယၤလၢာ်လၢာ်ဆ့ဆ့န့ၣ်, မ့ၢ်ကစၢ်မတၤတဖၣ်မၤပျံၤမၤဖုးသုန့ၣ်လဲၣ်. မ့ၢ်သုဆိကတီၢ်ကွံာ်သု တၢ်ယူးယီၣ်ယၤ, မ့ၢ်လၢယအိၣ်ဘှ့ၣ် အိၣ်ဘှီၣ်ကဲၣ်ဆိးအဃိန့ၣ်ဧါ.

¹²သုဆိကမိၣ်လၢတၢ်လၢသုမၤန့ၣ်ဘၣ်လီၤ. ဘၣ်ဆၣ်ဒီးယကမၤဖျါသုသကဲာ်ပဝး, ဒီးသုတၢ်ဂီၤတၢ်ဖီၣ်တဖၣ်မၤစၢၤသုတမ့ၢ်ကသ့ဘၣ်န့ၣ်လီၤ.

¹³ဖဲသုကိးထီၣ်လၢတၢ်မၤစၢၤအဂီၢ်န့ၣ်, ပျဲကွၢ်သုတၢ်ဂီၤတၢ် ဖီၣ်တဖၣ်အုၣ်က့ၤခီၣ်က့ၤသုတက့ၢ်. ကလံၤအူတၢ်တဘီဖိဒၣ်လဲာ်ကစိာ်ကွံာ်အဝဲသ့ၣ်ခဲလၢာ်လီၤ. မ့မ့ၢ်, ပှၤတဖၣ်လၢအပာ်အတၢ်နာ်လၢယပူၤန့ၣ်, ကအိၣ်ကဆိးဝဲလၢထံကီၢ်အပူၤဒီးကဘူၣ်ထီၣ်ဘါထီၣ် ယၤလၢယတၢ်လုၢ်ဟံၣ်အပူၤလီၤ.”

¹⁴ယွၤစံးဝဲဒၣ်, “မ်ယပှၤဂီၢ်မုၢ်ဟဲက့ၤကဒါက့ၤဆူယအိၣ်တက့ၢ်. မ်တၢ်နိးတၢ်ဘျးကိးမံၤဒဲးလၢအကျဲသုးကွံာ်အသးတက့ၢ်. မ်ကျဲတဖၣ်ဘှီထီၣ်အသးဒီးအိၣ်ကတဲာ်ကတီၤအသးတက့ၢ်.

¹⁵ယဲဒၣ်အံၤ, ယမ့ၢ်ကစၢ်ယွၤလၢအအိၣ်ထီၣ်ထီဒီးစီဆှံဝဲ, ယွၤလၢအအိၣ်မူအစိၤစိၤအဃၣ်ဃၣ်လီၤ. ယအိၣ်လၢတၢ်လီၢ်ထီၣ်ထီဒီးစီဆှံတတီၤ, ဘၣ်ဆၣ်ဒီးယအိၣ်စ့ၢ် ကီးလၢပှၤဂီၢ်မုၢ်လၢအဆီၣ်လီၤအသးဒီးပီၢ်ယၢ်လီၤက့ၤအသး အကျါ, ဒ်သိးယဟ့ၣ်က့ၤအဝဲသ့ၣ်အတၢ်နာ် န့ၢ်ဒီးတၢ်မုၢ်လၢ်ကသ့ဝဲအဂီၢ်လီၤ.

¹⁶ယဟ့ၣ်တ့ၢ်ယပှၤဂီၢ်မုၢ်လၢတၢ်မူ, ဒီးယတပာ်တၢ်ကမၣ် လၢအဝဲသ့ၣ်အလိၤဒီးသူၣ်ဒိၣ်သးဖျိးအဝဲသ့ၣ်လီၤစိၤလီၤ ထီလၢၤဘၣ်.

¹⁷ယသူၣ်ဒိၣ်သးဖျိးအဝဲသ့ၣ်မ့ၢ်လၢအတၢ်ဒဲးဘးဒီးအတၢ်သူၣ် လီသးကွံအဃိလီၤ. လၢတၢ်န့ၣ်အဃိယစံၣ်ညီၣ်အဝဲသ့ၣ်ဒီး ဟးသဒၣ်ကွံာ်အဝဲသ့ၣ်လီၤ. အန့ၣ်ဒၣ်လဲာ်, အဝဲသ့ၣ်အခိၣ် ကိၤဒီးလဲၤဒံးဒၣ်လၢအကျဲဒၣ်ဝဲန့ၣ်လီၤ.

¹⁸အဝဲသ့ၣ်ဖံးတၢ်မၤတၢ်ဒ်လဲၣ်န့ၣ်ယထံၣ်တ့ၢ်, နာ်သက့ယကမၤဘျါအဝဲသ့ၣ်လီၤ. ယကဆှၢဒီးမၤစၢၤအဝဲသ့ၣ်ဒီး ယကမၤမုာ်ပှၤလၢအသူၣ်အုးသးအုးတဖၣ်လီၤ.

¹⁹ယဟ့ၣ်တၢ်ဃူတၢ်ဖိးဆူပှၤခဲလၢာ်, ပှၤလၢအဘူးမ့ၢ်ဂ့ၤ, အယံၤမ့ၢ်ဂ့ၤလီၤ. ယကမၤဘျါယပှၤဂီၢ်မုၢ်လီၤ.

²⁰မ့မ့ၢ်ပှၤအၢပှၤသီတဖၣ်လီၤဂာ်ဒ်ပီၣ်လဲၣ်လၢတအိၣ်ဂၢၢ်ဘၣ်, လၢအလပီတဖၣ်တဆိကတီၢ်စံၣ်ပီပုနီတဘျီအသိး, ဟဲစိာ်ဃုာ်ဒီးတၢ်ဘၣ်အၢဘၣ်သီဒီးတၢ်အ့ၣ်တၢ်ဆံၣ်တဖၣ်န့ၣ်လီၤ.

²¹ပှၤတၢ်ဒဲးဘးဖိတဖၣ်အဂီၢ်န့ၣ်, တၢ်ပူၤဖျဲးတအိၣ်ဘၣ်.” ယွၤစံးဝဲဒၣ်.