Read S'gaw Karen လံာ်ယၡါယၤ 64 Bible Online

လံာ်ယၡါယၤ 64 - S'gaw Karen bible

လံာ်ယၡါယၤ 64

¹နတအိးထီၣ်မူကပိာ်လိၤဒီးဟဲလီၤန့ၣ်ဘၣ်မနုၤအဃိလဲၣ်. ကစၢၢ်တဖၣ်ကထံၣ်ဘၣ်နၤဒီးကဟူးဝးဝဲလၢတၢ်ပျံၤတၢ်ဖုး အပူၤလီၤ.

²အဝဲသ့ၣ်ဟူးဝးဝဲဒ်ထံကလာ်ထီၣ်ဝဲလၢမ့ၣ်အူကိၢ်အဖီခိၣ် အသိးန့ၣ်လီၤ. ဟဲဒီးလီၣ်ဖျါထီၣ်နစိနကမီၤဆူနဒုၣ်နဒါတဖၣ်, ဒီးဒုးကနိးကစုာ်ပှၤကလုာ်တဖၣ်လၢနမဲာ်ညါန့ၣ်တက့ၢ်.

³အဆၢကတီၢ်အိၣ်တ့ၢ်ဝဲတဘျီဖဲနဟဲဒီးမၤတ့ၢ်တၢ်လီၤပျံၤလီၤဖုး တဖၣ်လၢပတမုၢ်လၢ်တ့ၢ်ဘၣ်, ကစၢၢ်တဖၣ်ထံၣ်တ့ၢ်နၤဒီးဟူးဝးဝဲလၢတၢ်ပျံၤတၢ်ဖုးအပူၤလီၤ.

⁴ကစၢ်ယွၤဒ်နၤတဂၤအသိး, လၢအမၤတၢ်ဒ်န့ၣ်တဖၣ်လၢပှၤ လၢအပာ်အတၢ်မုၢ်လၢ်လၢနပူၤအဂီၢ်န့ၣ်ပှၤတထံၣ်တ့ၢ်ဒီးနၢ်ဟူ တ့ၢ်နီတဂၤဘၣ်.

⁵နတူၢ်လိာ်မုာ်ပှၤတဖၣ်လၢအထံၣ်န့ၢ်တၢ်သးခုလၢတၢ်မၤတၢ် အလိၤအဘၣ်, ပှၤတဖၣ်လၢအသ့ၣ်နီၣ်ထီၣ်ဝဲလၢနအဲၣ်ဒိး လၢအဝဲသ့ၣ်ကအိၣ်မူဝဲဒ်လဲၣ်န့ၣ်လီၤ. နသူၣ်ဒိၣ်သးဖျိးဘၣ်ပှၤ, ဘၣ်ဆၣ်ပမၤထွဲဒံးဒၣ်တၢ်ဒဲးဘးလီၤ. စးထီၣ်လၢပျၢၤလံၤလံၤန့ၣ်, နသးကဲၤထီၣ်ပှၤဒိၣ်ဒိၣ်မုၢ်မုၢ်ဒၣ်လဲာ်, ပတဆိတ့ၢ်လၢတၢ်မၤကမၣ်တၢ်န့ၣ်ဘၣ်.

⁶ပဝဲခဲလၢာ်အံၤပပှဲၤတ့ၢ်ဒီးတၢ်ဒဲးဘးတုၤပတၢ်မၤအဂ့ၤကတၢၢ် တဖၣ်ဒၣ်လဲာ်ဘၣ်အၢဘၣ်သီဝဲလၢာ်လၢာ်ဆ့ဆ့လီၤ. လၢပတၢ်ဒဲးဘးတဖၣ်အဃိပလီၤဂာ်ဒ်သ့ၣ်လၣ်တဖၣ်လၢအလီၤ ညွံးကွံာ်ဝဲဒီးဘၣ်တၢ်အူဒံကွံာ်အီၤလၢကလံၤအသိးန့ၣ်လီၤ.

⁷ပှၤတဃၣ်ဃီၤအသးဆူနအိၣ်လၢတၢ်ထုကဖၣ်အပူၤနီတဂၤ, ပှၤတလဲၤဆူနအိၣ်လၢတၢ်မၤစၢၤအဂီၢ်နီတဂၤဘၣ်. နပာ်ခူသူၣ်ကွံာ်နသးလၢပှၤဒီးစူးကွံာ်ညိကွံာ်တ့ၢ်ပှၤလၢပတၢ် ဒဲးဘးတဖၣ်အဃိလီၤ.

⁸ဘၣ်ဆၣ်ဒီး, ယွၤဧၢ, နမ့ၢ်ဒၣ်ပပၢ်လီၤ. ပလီၤဂာ်ဒီးကပံာ် ဒီးနဲနလီၤဂာ်ဒီးပှၤတ့သပၢၤလီၤ. နတ့လီၤပာ်လီၤတ့ၢ်ပှၤ,

⁹လၢတၢ်န့ၣ်အဃိဒီး, တဘၣ်သးဒိၣ်ပှၤကဲၣ်ဆိးမ့ၢ်ဂ့ၤ, စၢဃာ်ပတၢ်ဒဲးဘးတဖၣ်ထီဒါပှၤမ့ၢ်ဂ့ၤ, လီၤထူလီၤယိာ်တဂ့ၤ. ပမ့ၢ်နပှၤဂီၢ်မုၢ်ဒီးသူၣ်ကညီၤသးကညီၤလၢ်ပှၤတက့ၢ်.

¹⁰နဝ့ၢ်စီဆှံတဖၣ်လီၤဂာ်ဒီးမဲးမုၢ်ခိၣ်တပူၤ, ဒီးဝ့ၢ်ယရူၤၡလ့ၣ်မ့ၢ်တၢ် ဟးဂီၤလီၤဃီအလီၢ်တပူၤ,

¹¹ဒီးပတၢ်လုၢ်ဟံၣ်, တၢ်အလီၢ်စီဆှံဒီးဃံဝဲလၤဝဲဖဲပမိၢ်ပၢ် ဖံဖုလၢပျၢၤတဖၣ်စံးထီၣ်ပတြၢၤတ့ၢ်နၤန့ၣ်, ဘၣ်တၢ်မၤဟးဂီၤကွံာ်အီၤလၢမ့ၣ်အူလံ. ကယဲၢ်တၢ်လီၢ်တဖၣ် လၢပအဲၣ်တ့ၢ်အီၤအိၣ်လၢတၢ်ဟးဂီၤအပူၤလံ.

¹²ယွၤဧၢ, မ့ၢ်နသးတဘၣ်ဒိဘၣ်ထံးလၢတၢ်အံၤအဃိဘၣ်ဧါ. မ့ၢ်နတမၤတၢ်နီတမံၤဒီးဒုးတူၢ်ဘၣ်ပှၤတၢ်အါန့ၢ်ပတူၢ်အီၤ ကဲဒီးသ့တက့ၢ်န့ၣ်ဧါ.