Read S'gaw Karen လံာ်ယၡါယၤ 66 Bible Online

လံာ်ယၡါယၤ 66 - S'gaw Karen bible

လံာ်ယၡါယၤ 66

¹ယွၤစံးဝဲဒၣ်, “မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ် ယခီၣ်ယီၢ်လီၤတၢ်အလီၢ်လီၤ. ဟံၣ်လၢသုသူၣ် ထီၣ်လၢယဂီၢ်ကသ့, ကမ့ၢ်ဟံၣ်ဒ်လဲၣ်တကလုာ်လဲၣ်. ကမ့ၢ်တၢ်လီၢ်ဒ်လဲၣ်တကလုာ်လၢယကအိၣ်ကဆိးလၢ အပူၤအဂီၢ်န့ၣ်လဲၣ်.

²ယကစၢ်ဒၣ်ယဲယတ့လီၤပာ်လီၤဟီၣ်ခိၣ်မူခိၣ်ခဲလၢာ်လီၤ. ယသးမံသးမုာ်ဒီးပှၤတဖၣ်လၢအဆီၣ်လီၤအသးဒီးပီၢ်ယၢ် လီၤအသး, လၢအပျံၤယၤဒီးစူၢ်ယၤန့ၣ်လီၤ.

³ပှၤဂီၢ်မုၢ်မၤတၢ်ဒ်တၢ်ဘၣ်အသးဒၣ်ဝဲအသိးလီၤ. တၢ်မၤသံကျီၢ်ဖါတဒုလၢတၢ်လုၢ်တၢ်ပာ်တမံၤအဂီၢ်မ့ၢ်ဂ့ၤ, တၢ်လုၢ်ပှၤကညီတဂၤမ့ၢ်ဂ့ၤ, တၢ်လုၢ်ထီၣ်သိဖိတဒုမ့ၢ်ဂ့ၤ, တၢ်ဘိးကၢ်ကွံာ်ထွံၣ်တဒုအကိာ်မ့ၢ်ဂ့ၤ, တၢ်လုၢ်ထီၣ်ဘုဧိၤဟုဧိၤအတၢ်မၤဘူၣ်တမံၤမ့ၢ်ဂ့ၤ, တၢ်လုၢ်ထီၣ်ထိးအသွံၣ်မ့ၢ်ဂ့ၤ, တၢ်လုၢ်ထီၣ်တၢ်နၢမူမ့ၢ်ဂ့ၤ, တၢ်ထုကဖၣ်ဆူတၢ်ဂီၤတၢ်ဖီၣ်မ့ၢ်ဂ့ၤ, တၢ်ခဲလၢာ်အံၤမ့ၢ်ဒၣ်တၢ်ဒ်သိးသိးလၢအဝဲသ့ၣ်အဂီၢ်န့ၣ်လီၤ. အဝဲသ့ၣ်မုာ်လၤသးခုဝဲလၢတၢ်ဘူၣ်ထီၣ်ဘါထီၣ်အကျဲတဖၣ် လၢအလီၤသးဘၣ်အၢအံၤအပူၤန့ၣ်လီၤ.

⁴လၢတၢ်န့ၣ်အဃိ, ယကဟဲစိာ်တၢ်တတၢးတနါလၢအဝဲသ့ၣ် အဖီခိၣ်, တၢ်သ့ၣ်တဖၣ်လၢအဝဲသ့ၣ်ပျံၤဘၣ်ဝဲန့ၣ်လီၤ. မ့ၢ်လၢ, ဖဲယကိးထီၣ်န့ၣ်ပှၤတစံးဆၢနီတဂၤဘၣ်မ့ၢ်ဂ့ၤ, ဖဲယကတိၤတၢ်န့ၣ်, ပှၤတဒိကနၣ်နီတဂၤဘၣ်မ့ၢ်ဂ့ၤအဃိလီၤ. အဝဲသ့ၣ်ဃုထၢတ့ၢ်တၢ်တစူၢ်ယၤဒီးမၤတၢ်အၢတၢ်သီလီၤ.”

⁵သုဝဲပှၤလၢအပျံၤယွၤဒီးစူၢ်အီၤသ့ၣ်ဧၢ, ဒိကနၣ်တၢ်လၢယွၤစံးဝဲန့ၣ် တက့ၢ်. “မ့ၢ်လၢသုသးတီဒီးယၤအဃိ, ပှၤတနီၤလၢသုပှၤဂီၢ်မုၢ်ဒၣ်ဝဲအကျါသးဟ့သုဒီးတမၤဘၣ်ဃး အသးဒီးသုနီတမံၤဘၣ်. အဝဲသ့ၣ်ဒုၣ်ဒွဲၣ်သုဒီးစံးဝဲ, ပျဲယွၤဒုးနဲၣ်အတၢ်ဒိၣ်တၢ်မုၢ်ဒီးအုၣ်က့ၤခီၣ်က့ၤသုဒ်သိး ပကထံၣ်ဘၣ်သုသူၣ်ဖှံသးညီန့ၣ်, ဘၣ်ဆၣ်ဒီးအဝဲသ့ၣ်အကစၢ် ဒၣ်ဝဲကဘၣ်တၢ်မၤမဲာ်ဆှးအီၤလီၤ.

⁶ဒိကနၣ်, တၢ်သီၣ်ဖးဒိၣ်လၢဝ့ၢ်အပူၤဒီးတၢ်အသီၣ်လၢတၢ် လုၢ်ဟံၣ်ပူၤန့ၣ်တက့ၢ်. မ့ၢ်ယွၤအတၢ်စံၣ်ညီၣ်အဒုၣ်အဒါတဖၣ် အတၢ်သီၣ်န့ၣ်လီၤ.

⁷ယဝ့ၢ်စီဆှံအံၤလီၤဂာ်ဒီးပိာ်မုၣ်တဂၤလၢအဆံးစၢ်ထီၣ်ဖိသၣ် တဂၤသတူၢ်ကလာ်တအိၣ်ဒီးတၢ်လဲၤခီဖျိတၢ်ဟုးဆါဘၣ် န့ၣ်လီၤ.

⁸ပှၤတဂၤဂၤထံၣ်တ့ၢ်ဒီးနၢ်ဟူတ့ၢ်တၢ်ဒ်သိးအံၤတစုစုဧါ. ပှၤကလုာ်တကလုာ်အိၣ်ဖျဲၣ်ထီၣ်ဝဲလၢတနံၤဃီအတီၢ်ပူၤ တစုစုလံဧါ. တချုးလၢပှၤကလုာ်အိၣ်ဖျဲၣ်ထီၣ်ဒံးဘၣ်န့ၣ်, ကစၢၢ်စံယိၣ်တတူၢ်ဘၣ်တၢ်ယံာ်ယံာ်လၢၤဘၣ်.

⁹ဆိကမိၣ်လၢယကဟဲစိာ်ယပှၤဂီၢ်မုၢ်ဆူတၢ်အိၣ်ဖျဲၣ်ဘူးထီၣ် အဆၢကတီၢ်, ဒီးတပျဲအအိၣ်ဖျဲၣ်ထီၣ်ဘၣ်န့ၣ်တဂ့ၤ.” ယွၤကတိၤတ့ၢ်လံတၢ်လံ.

¹⁰သူၣ်ခုသးခုဃုာ်ဒီးဝ့ၢ်ယရူၤၡလ့ၣ်, သူၣ်ဖှံသးညီလၢအဃိသု ဝဲပှၤလၢအအဲၣ်ဘၣ်ဝ့ၢ်အံၤခဲလၢာ်သ့ၣ်ဧၢ သူၣ်ခုသးခုဃုာ်ဒီးအီၤခဲအံၤ, သုဝဲပှၤလၢအသူၣ်အုးသးအုး လၢအဃိခဲလၢာ်သ့ၣ်ဧၢ.

¹¹သုကမုာ်လၤသးခုဘၣ်လၢအတၢ်ဘီၣ်ထီၣ်ညီထီၣ်အဃိ, ဒ်ဖိသၣ်တဂၤလၢအအီအမိၢ်အနုၢ်ထံအသိးန့ၣ်လီၤ.

¹²ယွၤစံးဝဲဒၣ်, “ယကဟဲစိာ်န့ၢ်သုတၢ်ဘီၣ်တၢ်ညီအဂၢၢ်အကျၢၤ လီၤ. ပှၤကလုာ်တဖၣ်အတၢ်ထူးတၢ်တီၤကတုၤအိၣ်သုဒ် ထံကျိတဘိလၢအတလီၤသံးနီတစုဘၣ်အသိးန့ၣ်လီၤ. သုကလီၤဂာ်ဒ်ဖိသၣ်တဂၤလၢအမိၢ်ဒုးအီၣ်နုၢ်အီၤ, စိာ်အီၤလၢအစုလိၤ, ဒီးကွၢ်တ့ၢ်အီၤလၢတၢ်အဲၣ်တၢ်ကွံ အပူၤအသိးန့ၣ်လီၤ.

¹³ယကမၤမုာ်သုလၢဝ့ၢ်ယရူၤၡလ့ၣ်အပူၤ, ဒ်မိၢ်တဂၤမၤမုာ်အဖိအသိးလီၤ.

¹⁴ဖဲသုထံၣ်ဘၣ်တၢ်အံၤမၤအသးဒီး, သုကသူၣ်ဖှံသးညီဝဲလီၤ. တၢ်အံၤကဒုးဆူၣ်ထီၣ်သုဂံၢ် သုဘါဒီးဒုးအိၣ်ဆူၣ်အိၣ်ချ့သုလီၤ. အန့ၣ်ဒီးသုကသ့ၣ်ညါလၢယၤ, ယွၤအံၤ, မၤစၢၤပှၤတဖၣ်လၢအစူၢ်ယၤ, ဒီးယဒုးနဲၣ်ယတၢ်သးဒိၣ် ထီၣ်ထီဒါယဒုၣ်ယဒါတဖၣ်န့ၣ်လီၤ.”

¹⁵ယွၤကဟဲဝဲဒီးမ့ၣ်အူလီၤ. အဝဲကဟဲဒီးကလံၤမုၢ်အဒံးဆ့ တဖၣ်ဒ်သိးအကစံၣ်ညီၣ်ပှၤတဖၣ်လၢအသးဒိၣ်ဘၣ်ဝဲလီၤ.

¹⁶လၢမ့ၣ်အူဒီးနးန့ၣ်အဝဲကစံၣ်ညီၣ်ပှၤဂီၢ်မုၢ်လၢဟီၣ်ခိၣ်ချၢခဲလၢာ် လၢအထံၣ်ဘၣ်ဝဲလၢအတၢ်ကမၣ်အိၣ်, ဒီးပှၤအါဂၤကဘၣ်တၢ်မၤသံအီၤန့ၣ်လီၤ.

¹⁷ယွၤစံးဝဲဒၣ်, “တၢ်အကတၢၢ်ဘူးထီၣ်လၢပှၤလၢအမၤကဆှီ အသးလၢပှၤတစူၢ်တနာ်ယွၤအတၢ်ဘူၣ်တၢ်ဘါအဂီၢ်, ပှၤလၢအလဲၤသကိးတၢ်ဆူတၤသၣ်လီၢ်စီဆှံတဖၣ်, ဒီးပှၤလၢအအီၣ်ထိးညၣ်, ယုၢ်ညၣ်ဒီးတၢ်အီၣ်အဂၤလၢ အလီၤသးဘၣ်အၢတဖၣ်အဂီၢ်လံ.

¹⁸ယသ့ၣ်ညါအဝဲသ့ၣ်အတၢ်ဆိကမိၣ်တဖၣ်ဒီးအတၢ်မၤတဖၣ် န့ၣ်လီၤ. ယဟဲယဲဒ်သိးယကပာ်ဖှိၣ်ကယဲၢ်ပှၤကလုာ်တဖၣ် အပှၤဂီၢ်မုၢ်န့ၣ်လီၤ. ဖဲအဝဲသ့ၣ်ဟဲပာ်ဖှိၣ်အသးခဲလၢာ်န့ၣ်, အဝဲသ့ၣ်ကထံၣ်ယတၢ်စိကမီၤမၤတၢ်မနုၤသ့,

¹⁹ဒီးကသ့ၣ်ညါဝဲလၢယမ့ၢ်ပှၤတဂၤလၢအစံၣ်ညီၣ်အဝဲသ့ၣ်န့ၣ်လီၤ. ဘၣ်ဆၣ်ယကပျဲဖျဲးကွံာ်အဝဲသ့ၣ်တနီၤ, ဒီးဆှၢအဝဲသ့ၣ်ဆူပှၤကလုာ်တဖၣ်အအိၣ်ဒီးဆူထံကီၢ်အယံၤ တဖၣ်လၢအတနၢ်ဟူတ့ၢ်ဘၣ်ယတၢ်မံၤဟူသၣ်ဖျါမ့ၢ်ဂ့ၤ တထံၣ်တ့ၢ်ဘၣ်ယတၢ်ဒိၣ်တၢ်မုၢ်ဒီးယတၢ်စိတၢ်ကမီၤမ့ၢ်ဂ့ၤ ဒ်, ကီၢ်စပၤနံ, ကီၢ်လံးဘယၣ်, ဒီးကီၢ်လူၤဒံ, လၢအအိၣ်ဒီးအပှၤခးချံၣ်သ့တဖၣ်, ဒီးဆူကီၢ်တူၤဘလးဒီးကီၢ်ကြံး(စ်) န့ၣ်လီၤ. လၢပှၤကလုာ်တဖၣ်အံၤအကျါန့ၣ်, အဝဲသ့ၣ်ကစံးဘၣ်တဲဘၣ် ယတၢ်ဒိၣ်တၢ်မုၢ်န့ၣ်လီၤ.

²⁰အဝဲသ့ၣ်ကဟဲစိာ်ကဒါက့ၤသုထံဖိကီၢ်ဖိခဲလၢာ်လၢပှၤကလုာ် တဖၣ်အအိၣ်ဒ်အမ့ၢ်တၢ်ဟ့ၣ်တမံၤလၢယဂီၢ်အသိးန့ၣ်လီၤ. အဝဲသ့ၣ်ကဟဲစိာ်ပှၤတဖၣ်န့ၣ်ဆူယကစၢၢ်စီဆှံလၢဝ့ၢ်ယရူၤၡလ့ၣ် အပူၤလၢကသ့ၣ်တဖၣ်, ကသ့ၣ်လၤတဖၣ်ဒီးကီၤလၤအူးတဖၣ် အလိၤ, ဒီးလၢလ့ၣ်ကဟၣ်တဖၣ်ဒီးလ့ၣ်တဖၣ်အပူၤ, ဒ်ပှၤအံၣ်စရ့လးဖိတဖၣ်ဟဲစိာ်တၢ်မၤဘူၣ်ဘုဧိၤ ဟုဧိၤဆူတၢ်လုၢ်ဟံၣ်, လၢတလါဒၢဖးဒိၣ်တဖၣ်လၢ တၢ်မၤကဆှီတ့ၢ်လံအီၤအပူၤအသိးန့ၣ်လီၤ.

²¹ယကဒုးကဲထီၣ်အဝဲသ့ၣ်တနီၤလၢပှၤလုၢ်တၢ်အဒိၣ်တဖၣ်ဒီး ပှၤလ့ၤဝံဖိတဖၣ်န့ၣ်လီၤ.

²²ဒ်ဟီၣ်ခိၣ်အသီဒီးမူခိၣ်အသီအိၣ်ဂၢၢ်အိၣ်ကျၢၤဝဲလၢယတၢ်စိ တၢ်ကမီၤအဃိအသိးန့ၣ်, သုစၢၤသုသွဲၣ်တဖၣ်ဒီးသုမံၤကအိၣ် ဂၢၢ်ဆိးကျၢၤဝဲလီၤ.

²³လၢလါထီၣ်သီအဘူၣ်ကိးဘျီဒဲးဒီးမုၢ်အိၣ်ဘှံးနံၤကိးဘျီဒဲး န့ၣ်, ပှၤကလုာ်ခဲလၢာ်အပှၤဂီၢ်မုၢ်ကဟဲဒ်သိးကဘူၣ်ထီၣ်ဘါ ထီၣ်ယၤဖဲဝ့ၢ်ယရူၤၡလ့ၣ်အပူၤအံၤလီၤ.” ယွၤစံးဝဲဒၣ်.

²⁴“ဖဲအဝဲသ့ၣ်ဟးထီၣ်အဖၢမုၢ်န့ၣ်, အဝဲသ့ၣ်ကထံၣ်ဘၣ်ပှၤတဖၣ် လၢအပူထီၣ်တၢ်ထီဒါတ့ၢ်ယၤအစိၣ်န့ၣ်လီၤ. လၢၣ်တဖၣ်လၢအအီၣ်အဝဲ သ့ၣ်န့ၣ်တသံနီတစုဘၣ်, ဒီးမ့ၣ်အူလၢအအီၣ်အဝဲ သ့ၣ်န့ၣ်တၢ်တမၤလီၤပံာ်ကွံာ်အီၤနီတစုဘၣ်. တၢ်ထံၣ်ဘၣ် တၢ်တဖၣ်အံၤကမ့ၢ်တၢ်လီၤသးဘၣ်အၢလၢပှၤဟီၣ်ခိၣ်ဖိ ခဲလၢာ်အဂီၢ်န့ၣ်လီၤ.”