Read S'gaw Karen လံာ်ယၡါယၤ 7 Bible Online

လံာ်ယၡါယၤ 7 - S'gaw Karen bible

လံာ်ယၡါယၤ 7

¹ဖဲစီၤပၤအၤဃးလၢအမ့ၢ်စီၤယိၤသၣ်အဖိခွါ, ဒီးစီၤဧူးစံယါအလံၤခွါ, ပၢကီၢ်ယူဒၤအဆၢကတီၢ်န့ၣ်, တၢ်ဒုးကဲထီၣ်ဝဲလီၤ. ကီၢ်စူၤရံအစီၤပၤရစံၣ်ဒီးကီၢ်အံၣ်စရ့လး အစီၤပၤပ့ကးလၢအမ့ၢ်စီၤရမါလယၤအဖိခွါဟဲထီၣ်ဒုးဝ့ၢ်ယရူၤ ၡလ့ၣ်လီၤ. ဘၣ်ဆၣ်ဒီးဒုးဝဲတန့ၢ်ဘၣ်.

²ဖဲတၢ်ကစီၣ်ဟဲတုၤဆူကီၢ်ယူဒၤအစီၤပၤအအိၣ်လၢကီၢ်စူၤရံ အသုးမုၢ်သံၣ်ဘိတဖၣ်အိၣ်တ့ၢ်လံလၢအံၣ်စရ့လးအကီၢ်ပူၤန့ၣ်, အဝဲဒီးအပှၤဂီၢ်မုၢ်တဖၣ်ပျံၤတၢ်ဒိၣ်မးတုၤဒၣ်လဲာ်အဝဲသ့ၣ် ကနိးကစုာ်ဝဲဒ်သ့ၣ်တဖၣ်ဟူးဝးလၢကလံၤအူတၢ်အဃိအသိးလီၤ.

³ယွၤစံးဘၣ်ဝံယၡါယၤ, “ဟံးန့ၢ်နဖိခွါစီၤၡယၤၡူာ်ဒီးလဲၤ သဂၢၢ်စီၤပၤအၤဃးတက့ၢ်. နကထံၣ်ဘၣ်အီၤဖဲ ပှၤမၤတၢ်ကံးယာ်တဖၣ်အမၤတၢ်ကျဲအလိၤ, ဖဲထံကျိၤလၢအဟဲစိာ် လီၤထံလၢနိၣ်လၢထးခီ, အကတၢၢ်န့ၣ်လီၤ.

⁴စံးဘၣ်တဲဘၣ်အီၤလၢကစီၣ်မဲာ်စီၣ်နါ, ကပာ်အသးဂၢၢ်ဂၢၢ်, ဒီးအသုတပျံၤတၢ်ဒီးအသးသုတတံာ်တာ်တဂ့ၤ အဂီၢ်တက့ၢ်. စီၤပၤရစံၣ်ဒီးအပှၤစူၤရံဖိတဖၣ်, ဒီးစီၤပၤပ့ကးအတၢ်သးထီၣ်န့ၣ်တလီၤဘၣ်ယိာ်ဘၣ်ဘီထဲသိးဒီးမ့ၣ် အူခံ, ခံဘိအတၢ်ခုၣ်ထီၣ်ဘၣ်လီၤ.

⁵ကီၢ်စူၤရံ, ဃုာ်ဒီးကီၢ်အံၣ်စရ့လးဒီးအစီၤပၤတဖၣ်ကူၣ်ထီၣ် တ့ၢ်တၢ်အၢတမံၤလီၤ.

⁶အဝဲသ့ၣ်ပာ်လီၤအသးလၢကနုာ်လီၤဒုးကီၢ်ယူဒၤ, မၤပျံၤမၤဖုးပှၤဂီၢ်မုၢ်ဒ်သိးကဘျုးအသးဆူအဝဲသ့ၣ်အအိၣ် တခီ, ဝံၤဒီးကပာ်ထီၣ်စီၤတၤဘအ့လးအဖိခွါလၢစီၤပၤအလီၢ်န့ၣ်လီၤ.

⁷ဘၣ်ဆၣ်ယၤ, ယွၤ, ယစံး, တၢ်အံၤတမၤအသးလ့ၤတက့ၤဘၣ်.

⁸ဘၣ်မနုၤအဃိလဲၣ်. မ့ၢ်လၢကီၢ်စူၤရံအဂံၢ်အဘါတဆူၣ်ထဲသိး ဒီးအဝ့ၢ်ခိၣ်, ဝ့ၢ်ဒၤမ့ၤစ့းဘၣ်, ဒီးဝ့ၢ်ဒၤမ့ၤစ့းစ့ၢ်ကီးအဂံၢ် အဘါတဆူၣ်ထဲသိးဒီးစီၤပၤရစံၣ်ဘၣ်. မ့မ့ၢ်ကီၢ်အံၣ်စရ့လး န့ၣ်, လၢဃုဆံယဲၢ်နံၣ်အပူၤအတ့ၤကဟးဂီၤဝဲတုၤဒၣ်လဲာ် ကအိၣ်မူဝဲဒ်ပှၤတကလုာ်အသိးန့ၣ်တသ့လၢၤဘၣ်လီၤ.

⁹ကီၢ်အံၣ်စရ့လးအဂံၢ်အဘါတဆူၣ်ထဲသိးဒီးဝ့ၢ်ၡၤမရံ, လၢအမ့ၢ်အဝ့ၢ်ခိၣ်, ဒီးဝ့ၢ်ၡၤမရံအဂံၢ်အဘါတဆူၣ်ထဲသိးဒီးစီၤပၤပ့ကးဘၣ်လီၤ. သုတၢ်စူၢ်တၢ်နာ်မ့ၢ်တဂၢၢ်တကျၢၤဘၣ်ဒီး, သုအိၣ်ဂၢၢ်ဆိးကျၢၤတန့ၢ်ဘၣ်ဝဲဘၣ်.”

¹⁰ယွၤဆှၢတၢ်ကစီၣ်အဂၤတမံၤဆူစီၤပၤအၤဃးအအိၣ်လီၤ.

¹¹“ဃ့ယွၤနကစၢ်လၢကဟ့ၣ်နၤတၢ်ပနီၣ်တမံၤတက့ၢ်. မ့ၢ်တၢ်ဟဲထီၣ်လၢတၢ်ယိာ်ပူၤလၢပှၤသံတဖၣ်အကီၢ်ပူၤ, မ့တမ့ၢ်, တၢ်ဟဲလီၤလၢမူခိၣ်တၢ်လီၢ်ထီၣ်ထီမ့ၢ်ဂ့ၤ, သ့ဝဲန့ၣ်လီၤ.”

¹²စီၤပၤအၤဃးစံးဆၢတၢ်ဒီးစံးဝဲ, “ယတဃ့တၢ်ပနီၣ်တမံၤန့ၣ် ဘၣ်. ယတမၤကွၢ်ယွၤလၢတၢ်ဂ့ၢ်အံၤဘၣ်.”

¹³ဘၣ်ဃးတၢ်အံၤန့ၣ်ဝံယၡါယၤစံးဆၢတၢ်ဒီးစံးဝဲ, “အခဲအံၤ, ဒိကနၣ်တက့ၢ်, စီၤပၤစီၤဒၤဝံးအစၢၤအသွဲၣ်သ့ၣ် ဧၢ, သုမၤလၢာ်ကွံာ်ပှၤကညီအတၢ်သးစူၤန့ၣ်အၢတ့ၢ်မးလံ. မ့ၢ်သုကမၤလၢာ်ကွံာ်ကစၢ်ယွၤအတၢ်သးစူၤစ့ၢ်ကီးဧါ.

¹⁴ဂ့ၤလံ. ယွၤအကစၢ်ဒၣ်ဝဲကဟ့ၣ်သုတၢ်ပနီၣ်တမံၤလီၤ. ပိာ်မုၣ်သးစၢ်တဂၤလၢအဒၢထီၣ်ဝဲန့ၣ်ကအိၣ်ဒီးအဖိခွါတဂၤ ဒီးကယုၢ်န့ၢ်အမံၤဝဲလၢ “ဧံးမၤနူၤအ့လး” လီၤ.

¹⁵တုၤအဝဲအသးပှၢ်ထီၣ်တုၤထီၣ်ထီၣ်ဘးလၢအကစၢ်ဒၣ်ဝဲ ကစံၣ်ညီၣ်နီၤဖးပဲာ်ဖးတၢ်အကတီၢ်န့ၣ်, ပှၤဂီၢ်မုၢ်ကအီတၢ်နုၢ် ထံဒီးကအီၣ်ကနဲစီန့ၣ်လီၤ.

¹⁶တချုးတၢ်ဆၢကတီၢ်အဝဲန့ၣ်တုၤဒၣ်လဲၣ်န့ၣ်, စီၤပၤခံဂၤလၢအမၤ ပျံၤမၤဖုးသုတဖၣ်အံၤအထံအကီၢ်တဖၣ်ကအိၣ်သယုၢ်သညိဝဲလီၤ.

¹⁷ယွၤကဒုးဘၣ်သု, သုပှၤဂီၢ်မုၢ်, ဒီးသုစီၤပၤအဒူၣ်အထၢ ခဲလၢာ်လၢမုၢ်နံၤအကိၢ်အဂီၤတဖၣ်လၢအအၢန့ၢ်ဒံးမုၢ်နံၤလၢ အဟဲတ့ၢ်လံဖဲကီၢ်အံၣ်စရ့လးအဘီအမုၢ်လီၤဖးဒီးကီၢ်ယူဒၤ အကတီၢ်န့ၣ်လီၤ. အဝဲကမၢလီၤကီၢ်အၤၡူၢ်အစီၤပၤဟဲဝဲန့ၣ်လီၤ.

¹⁸ဖဲတၢ်ဆၢကတီၢ်န့ၣ်တုၤဃီၤဝဲဒီး, ယွၤကညိၣ်ကလံၤဒ်တၢ် ပနီၣ်တမံၤအသိးလၢပှၤအဲၤကူပတူးဖိတဖၣ်ကကဲဝဲဒ်သၣ်ဘုလါ တဖၣ်လၢထံကျိနံၤလါအဒ့အတြၢ်အယံၤကတၢၢ်တဖၣ်အသိး, ဒီးပှၤအၤၡူၢ်ဖိတဖၣ်ကဟဲဝဲလၢအထံအကီၢ်ဒ်ကနဲတဖၣ်အသိး န့ၣ်လီၤ.

¹⁹အဝဲသ့ၣ်ကဟဲလီၤဖှိၣ်ဒီးမၤပှဲၤကစၢၢ်ခိၣ်ကစၢၢ်လာ်ကစၢၢ်ကဆူး တဖၣ်, လၢၢ်ကအိလ့ကဆူးတဖၣ်အပူၤ, ဒီးအဝဲသ့ၣ်ကကးဘၢတၤဆှုၣ်တပှီာ် တဖၣ်ဒီးတၢ်အီၣ်ဆၣ်အလီၢ်ခဲလၢာ်လီၤ.

²⁰ဖဲတၢ်ဆၢကတီၢ်အဝဲန့ၣ်တုၤဃီၤဝဲဒီး, ယွၤကဒိးလဲပှၤတံာ်ခိၣ် သူတဂၤလၢထံကျိဖရၤသးဝၢ်ဘးခီတခီ, လၢအမ့ၢ်ဝဲကီၢ်အၤၡူၢ် အစီၤပၤ, ဒီးအဝဲကလူၤကွံာ်သုခၣ်ဆူၣ်, ဒီးသုခိၣ်သူလၢ သုခိၣ်တဖၣ်အလိၤ, ဒီးသုဆူၣ်လၢသုနီၢ်ခိတဖၣ်အလိၤလီၤ.

²¹ဖဲတၢ်ဆၢကတီၢ်န့ၣ်တုၤဃီၤဝဲဒီး, ပှၤထူစံၣ်ဖိတဂၤမ့ၢ်ပာ် ကီၤန့ၢ်ဒၣ်ထဲဂီၤဖံးမိၢ်သးစၢ်တဒုဒီးမဲာ်တဲးလဲးခံဒုဒၣ်လဲာ်န့ၣ်,

²²အဝဲသ့ၣ်ကဟ့ၣ်ထီၣ်အနုၢ်ထံအါအါဂီၢ်ဂီၢ်တုၤဒၣ်လဲာ်အဝဲက အိၣ်ဒီးတၢ်လၢအလိၣ်ဘၣ်ဝဲခဲလၢာ်လီၤ. သပှၢ်တၢၢ်န့ၣ်, ပှၤလၢအအိၣ်လီၤတဲာ်စှၤဂၤလၢထံကီၢ်အပူၤန့ၣ်, ကအိၣ်ဒီးတၢ်နုၢ်ထံဒီး ကနဲစီလၢကအီၣ်ဝဲအီဝဲအဂီၢ်လီၤ.

²³ဖဲတၢ်ဆၢကတီၢ်န့ၣ်တုၤဃီၤဝဲဒီး, စပံးလီၢ်အဂ့ၤတဖၣ်, လၢတလီၢ်တလီၢ်အိၣ်ဒီးစပံးမုၢ်လၢအကထိစုာ်စုာ်, ဒီးတလီၢ်တလီၢ်လၢအကၢကီၣ်စ့တကထိစုာ်စုာ်န့ၣ်, ကဘၣ်တၢ်ခဲဘၢအီၤလၢတၤဆှုၣ်တပှီာ်တဖၣ်ဒီးတၤဆှုၣ်တၤမဲတဖၣ်လီၤ.

²⁴ပှၤကလဲၤလူၤခးတၢ်ဖဲန့ၣ်လၢချံၣ်တဖၣ်ဒီးပျၢ်တဖၣ်လီၤ. သပှၢ်တၢၢ်န့ၣ်, ထံကီၢ်ဒီဘ့ၣ်ကပှဲၤဝဲဒီးတၤဆှုၣ် တၤမဲတဖၣ်ဒီးတၤဆှုၣ်တပှီာ်တဖၣ်လီၤ.

²⁵ကယဲၢ်တၢ်လူၢ်ခဲလၢာ်လၢတၢ်မုၢ်တၢ်ဘိတဖၣ်ညီနူၢ်မဲထီၣ်သၣ် ထီၣ်အလီၢ်န့ၣ်, တၢ်ကဒိၣ်ဘၢခဲဘၢအီၤလၢတၤဆှုၣ်တဖၣ် တုၤဒၣ်လဲာ်ပှၤတလဲၤဖဲန့ၣ်နီတဂၤလၢၤဘၣ်. ကမ့ၢ်ဝဲတၢ်လီၢ်တတီၤ လၢဂီၤဖံးဒီးသိတဖၣ်အီၣ်ဆၣ်အလီၢ်န့ၣ်လီၤ.”