Read S'gaw Karen လံာ်တၢ်ဘူၣ်ထီၣ်ဘါထီၣ် 23 Bible Online

လံာ်တၢ်ဘူၣ်ထီၣ်ဘါထီၣ် 23 - S'gaw Karen bible

လံာ်တၢ်ဘူၣ်ထီၣ်ဘါထီၣ် 23

¹ဒီးယွၤစံးဘၣ်စီၤမိၤၡ့, “စံးဘၣ်ပှၤအံၣ်စရ့လးဖိတဖၣ်လၢအပာ်ဖှိၣ်ထီၣ်အသးလၢတၢ်ဘူၣ် တၢ်ဘါအဂီၢ်ဘၣ်ဃးဒီးတၢ်ဘူၣ်တၢ်ဘါအမူးတဖၣ်အတၢ်သိၣ်တၢ်ဘျၢဒ်လၢလာ်အသိးန့ၣ်တက့ၢ်.

³သုအိၣ်ဒီးမုၢ်နံၤဃုနံၤလၢသုကမၤသုတၢ်မၤအဂီၢ်လီၤ. ဘၣ်ဆၣ်ဒီးသ့ၣ်နီၣ်ထီၣ်က့ၤလၢနွံနံၤတနံၤန့ၣ်မ့ၢ်မုၢ် အိၣ်ဘှံးအနံၤတနံၤလၢသုကဘၣ်အိၣ်ဘှံးန့ၣ်လီၤ. သုတဘၣ်မၤတၢ်လၢမုၢ်နံၤအဝဲန့ၣ်ဘၣ်. မ့မ့ၢ်ပာ်ဖှိၣ်ထီၣ်သုသးလၢတၢ်ဘူၣ်တၢ်ဘါအဂီၢ်တက့ၢ်. မုၢ်အိၣ်ဘှံးနံၤန့ၣ်ဘၣ်ဃးဒီးယွၤဖဲသုအိၣ်တပူၤလၢ်လၢ်န့ၣ်လီၤ.

⁴အအံၤမ့ၢ်တၢ်ဘူၣ်တၢ်ဘါအမူးတဖၣ်လၢသုဘၣ်ဒုးဟူထီသါလီၤအီၤ ဖဲအဆၢကတီၢ်ဘၣ်န့ၣ်လီၤ.

⁵ဘူၣ်လဲၤကပာ်န့ၣ်ဘၣ်တၢ်မၤအီၤလၢတၢ်မၤလၤကပီၤယွၤဒီးဘၣ်တၢ် စးထီၣ်မၤအီၤလၢလါခီၣ်ထံးတလါတဆံလွံၢ်နံၤတနံၤမုၢ်ဟါလီၤအကတီၢ်န့ၣ်လီၤ.

⁶ဒီးလၢတဆံယဲၢ်နံၤတနံၤန့ၣ်ဘူၣ်ကိၣ်တအိၣ်ဘၣ်ဒီးကိၣ်မံၣ် အမူးဘၣ်တၢ်စးထီၣ်မၤအီၤန့ၣ်လီၤ. နွံနံၤန့ၣ်သုဘၣ်အီၣ်ကိၣ်တအိၣ်ဘၣ်ဒီးကိၣ်မံၣ်န့ၣ်လီၤ.

⁷မုၢ်ခီၣ်ထံးတနံၤန့ၣ်သုဘၣ်ပာ်ဖှိၣ်ထီၣ်သုသးလၢတၢ်ဘူၣ်တၢ်ဘါ အဂီၢ်ဒီးသုတဘၣ်မၤသုတၢ်မၤနီတမံၤဘၣ်.

⁸သုဘၣ်လုၢ်တၢ်လုၢ်မ့ၣ်အူလၢယွၤအဂီၢ်နွံနံၤလီၤ. လၢနွံနံၤတနံၤန့ၣ်သုကဘၣ်ပာ်ဖှိၣ်ထီၣ်ကဒီးသုသးလၢတၢ်ဘူၣ် တၢ်ဘါအဂီၢ်ဒီးသုတဘၣ်မၤသုတၢ်မၤနီတမံၤဘၣ်.”

⁹ဒီးယွၤစံးဘၣ်စီၤမိၤၡ့, ဒီးစံးဝဲဒၣ်, “စံးဘၣ်ပှၤအံၣ်စရ့လးဖိ, တုၤသုလဲၤနုာ်ဆူကီၢ်တဘ့ၣ်လၢယဟ့ၣ်လီၤသုဒီးသုကကူး အဘုန့ၣ်ဒီးသုဘၣ်ဟဲစိာ်ဘုသၣ်ဆိတကဒိၣ်လၢသုဘုဧိၤဟုဧိၤ အကျါဆူပှၤလုၢ်တၢ်အခိၣ်အအိၣ်န့ၣ်လီၤ.

¹¹ဒီးအဝဲဒၣ်ဘၣ်ပာ်ထီၣ်ဘုတကဒိၣ်န့ၣ်ဒ်တၢ်လုၢ်မၤဘူၣ်လီၤဆီ ဆူယွၤအအိၣ်လၢသုကဘၣ်တၢ်တူၢ်လိာ်သုအဂီၢ်န့ၣ်လီၤ. ပှၤလုၢ်တၢ်အခိၣ်ကလုၢ်ထီၣ်အီၤလၢမုၢ်အိၣ်ဘှံးနံၤဝံၤအလီၢ်ခံတနံၤန့ၣ်လီၤ.

¹²မုၢ်တနံၤလၢသုလုၢ်ထီၣ်တၢ်မၤဘူၣ်ဘုဧိၤဟုဧိၤန့ၣ်, သုကဘၣ်လုၢ်ထီၣ်သိဖါတနံၣ်ဖိတဒုလၢအတအိၣ်ဒီးနီၢ်ခိ အတၢ်လီၤတူာ်လီၤကာ်ဒ်တၢ်လုၢ်မ့ၣ်အူအသိးစ့ၢ်ကီးန့ၣ်လီၤ.

¹³ဃုာ်ဒီးတၢ်န့ၣ်သုကဘၣ်လုၢ်ထီၣ်ကိၣ်ကမူၣ်အဃၢလီၤတယၢၢ် ခံအ့စရိၣ်ဃါဃုာ်ဒီးသ့ၣ်စၤယံးအသိးဒ်တၢ်လုၢ်တၢ်မၤဘူၣ်ကိၣ်တမံၤ, တၢ်နၢမူလၢအဘၣ်ယွၤအသးန့ၣ်လီၤ. သုကဘၣ်လုၢ်ထီၣ်ဃုာ်စပံးထံတဟံၣ်လွံၢ်ပူတပူန့ၣ်လီၤ.

¹⁴ဒီးတချုးလၢသုဟဲစိာ်တၢ်လုၢ်မၤဘူၣ်အံၤဆူကစၢ်ယွၤအအိၣ်န့ၣ်, ကိၣ်ဂ့ၤ, ဘုဝဲာ်လၢမ့ၣ်အူဂ့ၤ, ဘုအစဲၤအသံကစဲာ်ဂ့ၤအီၣ်အီၤတဂ့ၤ. အအံၤမ့ၢ်တၢ်သိၣ်တၢ်ဘျၢလၢသုစၢၤသုသွဲၣ်ဘၣ်တိၢ်န့ၢ်မၤထွဲ အီၤအစိၤစိၤအဃၣ်ဃၣ်န့ၣ်လီၤ.

¹⁵ဒီးလၢမုၢ်အိၣ်ဘှံးနံၤဝံၤအလီၢ်ခံတနံၤ, မုၢ်တနံၤလၢသုဟဲစိာ်ဘုသၣ်ဆိတကဒိၣ်ဝံၤ အလီၢ်ခံန့ၣ်သုဘၣ်ဂံၢ်နွံအိၣ်ဘှံးနံၤလၢလၢပှဲၤပှဲၤလၢသုဂီၢ်လီၤ.

¹⁶တုၤနွံအိၣ်ဘှံးနံၤပူၤကွံာ်တနံၤ, မုၢ်နံၤ ယဲၢ်ဆံနံၤတနံၤန့ၣ်သုဘၣ်လုၢ်ထီၣ်ကဒီးတၢ်လုၢ်ဘုဧိၤဟုဧိၤ အသီတဘျီန့ၣ်လီၤ.

¹⁷ဒူၣ်ဖိထၢဖိတဒူၣ်စုာ်စုာ်ကဘၣ်ဟဲစိာ်ကိၣ် ခံလိၣ်ဒီးလုၢ်ထီၣ်အီၤဆူယွၤအအိၣ်ဒ်တၢ်ဟ့ၣ်လီၤဆီတမံၤအသိး န့ၣ်လီၤ. ကိၣ်တလိၣ်စုာ်စုာ်ကဘၣ်တၢ်မၤအီၤလၢကိၣ်ကမူၣ်လီၤတယၢၢ်ခံအ့ စရိၣ်ဒီးကုၢ်အီၤလၢကိၣ်မံၣ်, ဒီးလုၢ်ထီၣ်အီၤဆူယွၤအအိၣ်ဒ်တၤသၣ်ဆိအသိးန့ၣ်လီၤ.

¹⁸ဒီးသုဘၣ်လုၢ်ထီၣ်သိဖိလၢအတအိၣ်ဒီးနီၢ်ခိ က့ၢ်ဂီၤအတၢ်လီၤတူာ်လီၤကာ်တနံၣ်ဖိနွံဒုဒီးဂီၤဖံးဖိတဒု, ဒီးသိဖါခံဒုဒီးကိၣ်န့ၣ်လီၤ. ဒီးကဘၣ်တၢ်လုၢ်ထီၣ်အီၤဒ်တၢ်လုၢ်မ့ၣ်အူလၢယွၤအဂီၢ်အသိးဃုာ် ဒီးတၢ်လုၢ်မၤဘူၣ်ကိၣ်ဒီးတၢ်လုၢ်စပံးထံန့ၣ်လီၤ. ဒီးတၢ်လုၢ်အံၤမ့ၢ်တၢ်လုၢ်နၢမူလၢယွၤအဂီၢ်လီၤ.

¹⁹ဒီးသုကဘၣ်လုၢ်ထီၣ်မဲာ်တဲးလဲးဖါတဒုလၢတၢ်လုၢ်တၢ်ဒဲးဘး, ဒီးသိဖါတနံၣ်ဖိခံဒုလၢတၢ်လုၢ်တၢ်မၤဃူမၤဖိးအဂီၢ်န့ၣ်လီၤ.

²⁰ပှၤလုၢ်တၢ်အခိၣ်ကဘၣ်လုၢ်ထီၣ်ကိၣ်ဃုာ်ဒီး သိဖိခံဒုဒ်တၢ်လုၢ်လီၤဆီဆူယွၤအအိၣ်လၢပှၤလုၢ်တၢ်အခိၣ်တဖၣ်အဂီၢ်န့ၣ်လီၤ. တၢ်လုၢ်တဖၣ်အံၤစီဆှံဝဲလီၤ.

²¹ဒီးလၢမုၢ်တနံၤဃီဒၣ်ဝဲန့ၣ်အပူၤမၤမုၢ်ဆ့ၣ်မုၢ်ဂီၤအတၢ်မၤနီ တမံၤတဂ့ၤ. မ့မ့ၢ်ပာ်ဖှိၣ်သုသးလၢတၢ်ဘူၣ်တၢ်ဘါအဂီၢ်တက့ၢ်. သုစၢၤသုသွဲၣ်တဖၣ်ကဘၣ်တိၢ်န့ၢ်တၢ်သိၣ်တၢ်ဘျၢအံၤတဘိ ယူၢ်ဃီဖဲအအိၣ်တပူၤလၢ်လၢ်န့ၣ်လီၤ.

²²ဖဲသုကူးဘုအကတီၢ်န့ၣ်ကူးအီၤတုၤလၢသုစံၣ်အသနၢၣ်တဖၣ် န့ၣ်တဂ့ၤ. ဒီးက့ၤကဒါက့ၤလၢတၢ်ကူးက့ၤဘုစဲၤအိၣ်လီၤတဲာ်တဖၣ်အဂီၢ်န့ၣ်တဂ့ၤ. ပာ်လီၤတဲာ်အီၤလၢပှၤဖှီၣ်ဖိယာ်ဖိဒီးပှၤတခီဘီမုၢ်ဖိတဖၣ်အဂီၢ်တက့ၢ်. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.

²³ဒီးယွၤစံးဘၣ်စီၤမိၤၡ့, “စံးဘၣ်ပှၤအံၣ်စရ့လးဖိ, လၢနွံလါတလါအခီၣ်ထံးတသီန့ၣ်သုဘၣ်တိၢ်န့ၢ်မုၢ်နံၤ လီၤဆီတနံၤလၢတၢ်အိၣ်ဘှံးအဂီၢ်ဒီးဟဲသကိးလၢတၢ်ဘူၣ်ထီၣ်ဘါ ထီၣ်ယွၤအဂီၢ်ဖဲကွဲၤသီၣ်ထီၣ်အကတီၢ်န့ၣ်တက့ၢ်.

²⁵လုၢ်ထီၣ်တၢ်လုၢ်မ့ၣ်အူဆူယွၤအအိၣ်ဒီးသုတမၤမုၢ်ဆ့ၣ်မုၢ်ဂီၤအတၢ်မၤနီတမံၤတဂ့ၤ.”

²⁶ဒီးယွၤစံးဘၣ်စီၤမိၤၡ့, “နွံလါတလါအသီတဆံအနံၤန့ၣ် မ့ၢ်တနံၣ်တဘျီတၢ်ဘူၣ်တၢ်ဘါအလုၢ်အလၢ်ကဘၣ်တၢ်မၤအီၤ အနံၤလၢတၢ်ဟံးထီၣ်ကွံာ်ပှၤဂီၢ်မုၢ်အတၢ်ဒဲးဘးတဖၣ်အဂီၢ်န့ၣ်လီၤ. လၢမုၢ်နံၤအဝဲန့ၣ်အီၣ်တၢ်အီၣ်နီတမံၤတဂ့ၤ. ဟဲသကိးလၢတၢ်ဘူၣ်ထီၣ်ဘါထီၣ်ယွၤအဂီၢ်ဒီးလုၢ်ထီၣ်တၢ်လုၢ်မ့ၣ် အူဆူယွၤအအိၣ်တက့ၢ်.

²⁸မၤတၢ်လၢမုၢ်နံၤအဝဲန့ၣ်အပူၤတဂ့ၤ. အဂ့ၢ်ဒ်အံၤ, မ့ၢ်မုၢ်တနံၤလၢတၢ်မၤတၢ်ဘူၣ်တၢ်ဘါအလုၢ်အလၢ်လၢ တၢ်ဟံးထီၣ်ကွံာ်တၢ်ဒဲးဘးအဂီၢ်န့ၣ်လီၤ.

²⁹ကယဲၢ်ပှၤတဂၤလၢ်လၢ်လၢအအီၣ်တၢ်တမံၤလၢ်လၢ်လၢမုၢ်နံၤအဝဲန့ၣ် န့ၣ်, ကဘၣ်တၢ်ပာ်အီၤဒ်အတမ့ၢ်လၢၤဘၣ်ပှၤတဂၤလၢကစၢ်ယွၤအပှၤဂီၢ်မုၢ် အကျါလၢၤဘၣ်န့ၣ်လီၤ.

³⁰ဒီးကယဲၢ်ပှၤတဂၤလၢ်လၢ်လၢအမၤတၢ်တမံၤလၢ်လၢ်လၢမုၢ်နံၤအဝဲ န့ၣ်အပူၤန့ၣ်ယွၤကမၤသံကွံာ်အီၤန့ၣ်လီၤ.

³¹တၢ်သိၣ်တၢ်ဘျၢအံၤမ့ၢ်လၢသုစၢၤသုသွဲၣ်တဖၣ်အဂီၢ်ဖဲအအိၣ်တပူၤလၢ်လၢ်န့ၣ်လီၤ.

³²စးထီၣ်လၢခွံနံၤတနံၤမုၢ်ဟါလီၤတုၤလီၤလၢတဆံနံၤတနံၤ မုၢ်ဟါလီၤန့ၣ်သုကဘၣ်တိၢ်န့ၢ်အီၤဒ်မုၢ်နံၤလီၤဆီတနံၤလၢတၢ်အိၣ်ဘှံး အဂီၢ်ဒီးသုတဘၣ်အီၣ်တၢ်နီတမံၤဘၣ်.”

³³ဒီးယွၤစံးဘၣ်စီၤမိၤၡ့, “စံးဘၣ်ပှၤအံၣ်စရ့လးဖိတဖၣ် လၢလါနွံလါတလါထီၣ်စးထီၣ်လၢတဆံယဲၢ်နံၤတနံၤ ဒီးလၢနွံနံၤအတီၢ်ပူၤန့ၣ်မ့ၢ်ဘူၣ်ဒဲလၢယွၤအဂီၢ်လီၤ.

³⁵မုၢ်နံၤအခီၣ်ထံးကတၢၢ်တနံၤလၢဘူၣ်ဒဲအကတီၢ်အံၤန့ၣ်ဟဲသကိး လၢတၢ်ဘူၣ်ထီၣ်ဘါထီၣ်ယွၤအဂီၢ်ဒီးသုတမၤမုၢ်ဆ့ၣ်မုၢ်ဂီၤအတၢ် မၤနီတမံၤတဂ့ၤ.

³⁶သုဘၣ်လုၢ်ယွၤလၢတၢ်လုၢ်မ့ၣ်အူလၢနွံနံၤလီၤ. ဒီးလၢဃိးနံၤတနံၤန့ၣ်ဟဲသကိးကဒီး လၢတၢ်ဘူၣ်ထီၣ်ဘါထီၣ်ယွၤအဂီၢ်ဒီးလုၢ်ထီၣ်တၢ်လုၢ်မ့ၣ်အူ တက့ၢ်. မ့ၢ်မုၢ်နံၤတနံၤလၢတၢ်ဘူၣ်ထီၣ်ဘါထီၣ်ယွၤအဂီၢ်ဒီးသုတဘၣ်မၤ တၢ်နီတမံၤဘၣ်.

³⁷တၢ်အံၤမ့ၢ်တၢ်ဘူၣ်တၢ်ဘါအမူးတဖၣ်လၢသုဘၣ်မၤလၤက ပီၤယွၤခီဖျိသုတၢ်ပာ်ဖှိၣ်ထီၣ်သုသးလၢတၢ်ဘူၣ်ထီၣ်ဘါထီၣ် ယွၤအဂီၢ်ဒီးလုၢ်ထီၣ်ယွၤလၢတၢ်ဆိၣ်ကဲၤမ့ၣ်အူလၢအမ့ၢ်, တၢ်လုၢ်မ့ၣ်အူတဖၣ်, တၢ်လုၢ်ဘုဧိၤဟုဧိၤတဖၣ်, တၢ်လုၢ်တၢ်ပာ်တဖၣ်ဒီးတၢ်လုၢ်စပံးထံတဖၣ်ဒ်အနံၤဒၣ်ဝဲအသိးန့ၣ်လီၤ.

³⁸ဒီးမူးတဖၣ်အံၤမ့ၢ်မူးတဖၣ်လၢပှၤအံၣ်စရ့လးဖိညီနုၢ်မၤအီၤလၢအမ့ၢ်မုၢ်အိၣ်ဘှံးနံၤတဖၣ်, တၢ်မၤဘူၣ်တဖၣ်, ဒီးတၢ်မၤဘူၣ်ဘၣ်ဃးဒီးတၢ်ဆိၣ်တၢ်တဖၣ်, ဒီးတၢ်မၤဘူၣ်ဒၣ်တၢ် တဖၣ်အမဲာ်ညါန့ၣ်လီၤ.

³⁹ဖဲသုကူးဘုဝံၤဝဲအကတီၢ်န့ၣ်မၤမူးအံၤနွံနံၤ, စးထီၣ်လၢလါနွံလါတလါတဆံယဲၢ်နံၤတနံၤ န့ၣ်တက့ၢ်. မုၢ်ခီၣ်ထံးအနံၤဒီးဃိးနံၤတနံၤန့ၣ်မ့ၢ်မုၢ်အိၣ်ဘှံးအနံၤလီၤ.

⁴⁰ဒီးလၢမုၢ်ခီၣ်ထံးအနံၤန့ၣ်သုဘၣ်ဟံးန့ၢ်သ့ၣ်အဃံအလၤအတၤသၣ်, သ့ၣ်စူၣ်ပလိၣ်အဒ့, သ့ၣ်ခဲအဒ့ဒီးထံကျိအပံၢ်သလီလီၤ. ဒီးသုဘၣ်သူၣ်ခုသးခုလၢယွၤသုကစၢ်အမဲာ်ညါန့ၣ်လီၤ.

⁴¹ဒီးသုဘၣ်မၤမူးအံၤလၢယွၤအဂီၢ်တနံၣ်န့ၣ်နွံနံၤလီၤ. တၢ်အံၤမ့ၢ်တၢ်သိၣ်တၢ်ဘျၢလၢသုစၢၤသုသွဲၣ်အစိၤစိၤအဃၣ်ဃၣ် တဖၣ်အဂီၢ်လၢသုဘၣ်မၤမူးအံၤလၢလါနွံလါတလါအပူၤန့ၣ်လီၤ.

⁴²ကယဲၢ်အံၣ်စရ့လးအပှၤဂီၢ်မုၢ်ခဲလၢာ်ကဘၣ်အိၣ်လၢဒဲပူၤနွံနံၤ, ဒ်သိးသုစၢၤသုသွဲၣ်တဖၣ်ကသ့ၣ်ညါလၢယဒုးအိၣ်ဒုးဆိးအံၣ်စရ့ လးအပှၤဂီၢ်မုၢ်လၢဒဲပူၤတုၤယဒုးဟးထီၣ်ကွံာ်အီၤလၢကီၢ် အဲၤကူပတူးအပူၤန့ၣ်လီၤ. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.”

⁴⁴အအံၤမ့ၢ်တၢ်လၢစီၤမိၤၡ့စံးဘၣ်တဲဘၣ်အံၣ်စရ့လးအပှၤဂီၢ်မုၢ်လၢယွၤအဘူၣ်အနံၤတဖၣ်အဂ့ၢ်န့ၣ်လီၤ.