Read S'gaw Karen လံာ်တၢ်ဘူၣ်ထီၣ်ဘါထီၣ် 5 Bible Online

လံာ်တၢ်ဘူၣ်ထီၣ်ဘါထီၣ် 5 - S'gaw Karen bible

လံာ်တၢ်ဘူၣ်ထီၣ်ဘါထီၣ် 5

¹ပှၤတဂၤဂၤမ့ၢ်ဘၣ်ကဲထီၣ်ပှၤအုၣ်အသးလၢတၢ်လၢအထံၣ်ဘၣ်ဝဲမ့ၢ်ဂ့ၤ, သ့ၣ်ညါဝဲမ့ၢ်ဂ့ၤ, အဂ့ၢ်ဒီးတတဲဖျါထီၣ်ဝဲလၢကွီၢ်ဘျီၣ်ပူၤန့ၣ်, ကဘၣ်တူၢ်အတၢ်ဒဲးဘးဒၣ်ဝဲန့ၣ်လီၤ.

²ပှၤတဂၤဂၤမ့ၢ်ထိးဘၣ်တၢ်တကဆှီတ့ၢ်တမံၤမံၤဒ်ဆၣ်ဖိကီၢ်ဖိ အမံၤတကဆှီဘၣ်တဒုအသံစိၣ်, မ့တမ့ၢ်ဆၣ်ဖိကီၢ်ဖိအဒၢတက ဆှီဘၣ်တဒုအသံစိၣ်မ့ၢ်ဂ့ၤ, တၢ်အစွါအစွဲတဖၣ်လၢအတကဆှီ ဘၣ်အစိၣ်မ့ၢ်ဂ့ၤလၢတၢ်တတိာ်သူၣ်ပာ်သးအပူၤန့ၣ်ဒီး, အဝဲကဲထီၣ်ဝဲတၢ်တကဆှီဘၣ်ဒီးအတၢ်ဒဲးဘးအိၣ်ဝဲလီၤ.

³ပှၤတဂၤဂၤမ့ၢ်ထိးဘၣ်ပှၤအဂၤတဂၤအတၢ်တကဆှီဘၣ်တမံၤမံၤလၢတၢ် တတိာ်သူၣ်ပာ်သးအပူၤဘၣ်ဆၣ်, တုၤအသ့ၣ်ညါက့ၤဝဲန့ၣ်ဒီးအတၢ်ဒဲးဘးအိၣ်ဝဲလီၤ.

⁴ပှၤတဂၤဂၤမ့ၢ်ဆိၣ်လီၤအသးချ့သဒံးလၢတၢ်အၢအဂီၢ်မ့ၢ်ဂ့ၤ, တၢ်ဂ့ၤအဂီၢ်မ့ၢ်ဂ့ၤ, လၢတၢ်တပလီၢ်သူၣ်ပလီၢ်သးအပူၤဘၣ်န့ၣ်, တုၤအသ့ၣ်ညါက့ၤဝဲဒီး, အတၢ်ဒဲးဘးအိၣ်ဝဲလီၤ.

⁵တုၤပှၤတဂၤအတၢ်ဒဲးဘးအိၣ်လၢတၢ်တမံၤမံၤအံၤအပူၤန့ၣ်အဝဲ ကဘၣ်အၢၣ်လီၤအတၢ်ဒဲးဘးလၢအမၤတ့ၢ်ဝဲလီၤ.

⁶ဒီးကဘၣ်ဟဲစိာ်သိဖိမ့ၢ်ဂ့ၤ, မဲာ်တဲးလဲးဖိမ့ၢ်ဂ့ၤ, အမိၢ်တဒု လၢတၢ်လုၢ်တၢ်ပျၢ်တၢ်ဒဲးဘးအဂီၢ်ဆူယွၤအအိၣ်န့ၣ်လီၤ. ဒီးပှၤလုၢ်တၢ်အခိၣ်ကလုၢ်ထီၣ်တၢ်လုၢ်တၢ်ပျၢ်တၢ်ဒဲးဘးလၢအဝဲ အဂီၢ်ဒီးအတၢ်ဒဲးဘးအဂီၢ်န့ၣ်လီၤ.

⁷ဘၣ်ဆၣ်ဒီး, လုၢ်ထီၣ်ဝဲသိဖိမ့တမ့ၢ်မဲာ်တဲးလဲးဖိမ့ၢ်တန့ၢ် န့ၣ်, ကဘၣ်ဟဲစိာ်ထိၣ်လွံၢ်ဘုၣ်ခံဘ့ၣ်မ့တမ့ၢ်ထိၣ်ကးက့ၣ်ဖိခံဘ့ၣ်, တဘ့ၣ်လၢတၢ်လုၢ်တၢ်ပျၢ်တၢ်ဒဲးဘးအဂီၢ်ဒီးအဂၤတဘ့ၣ်လၢတၢ်လုၢ် မ့ၣ်အူအဂီၢ်ဆူယွၤအအိၣ်န့ၣ်လီၤ.

⁸ဒီးကဘၣ်ဟဲစိာ်ဝဲဆူပှၤလုၢ်တၢ်အခိၣ်အအိၣ်လၢအကလုၢ်ထီၣ်ဆိဝဲ တဘ့ၣ်လၢတၢ်လုၢ်တၢ်ပျၢ်တၢ်ဒဲးဘးအဂီၢ်န့ၣ်လီၤ. ဒီးကဘၣ်ဝံာ်ကၢ်ဝဲအကိာ်ဘၣ်ဆၣ်ဒီးတဘၣ်မၤထီၣ်တဲာ်ဝဲအခိၣ်ဘၣ်.

⁹ဒီးကဘၣ်ဖှံတၢ်သွံၣ်တနီၤဖဲတၢ်လုၢ်လီၢ်ကပၤန့ၣ်လီၤ. တၢ်သွံၣ်အိၣ်လီၤတဲာ်တဖၣ်န့ၣ်ကဘၣ်တၢ်ဂၢ်လီၤအီၤဖဲတၢ်လုၢ်လီၢ် အခီၣ်ထံးန့ၣ်လီၤ. တၢ်အံၤမ့ၢ်တၢ်လုၢ်တၢ်ပျၢ်တၢ်ဒဲးဘးန့ၣ်လီၤ.

¹⁰အန့ၣ်ဝံၤဒီးကဘၣ်လုၢ်ထီၣ်ဝဲထိၣ်ခံဘ့ၣ်တဘ့ၣ်လၢတၢ်လုၢ်မ့ၣ်အူ ဒ်တၢ်သိၣ်တၢ်ဘျၢအိၣ်ဝဲအသိးန့ၣ်လီၤ. ဒီးပှၤလုၢ်တၢ်အခိၣ်ကလုၢ်ထီၣ်တၢ်လုၢ်တၢ်ပျၢ်တၢ်ဒဲးဘးလၢအဝဲ အတၢ်ဒဲးဘးလၢအမၤတ့ၢ်ဝဲအဂီၢ်, ဒီးအတၢ်ဒဲးဘးကဘၣ်တၢ်ပျၢ်ကွံာ်အီၤန့ၣ်လီၤ.

¹¹ဘၣ်ဆၣ်ဒီးလုၢ်ထီၣ်ဝဲထိၣ်လွံၢ်ဘုၣ်ခံဘ့ၣ်မ့ၢ်ဂ့ၤ, ထိၣ်ကးက့ၣ်ခံဘ့ၣ်မ့ၢ်ဂ့ၤမ့ၢ်တန့ၢ်ဘၣ်ဒီးကဘၣ်ဟဲစိာ်ဝဲကိၣ် ကမူၣ်လၢအဂ့ၤတအ့ဖးဆံဆဲၣ်ပူတပူလၢတၢ်လုၢ်တၢ်ပျၢ်တၢ်ဒဲးဘးအဂီၢ်န့ၣ်လီၤ. တဘၣ်ဒၢနုာ်ဝဲသိမ့ၢ်ဂ့ၤ, တၢ်နၢမူမ့ၢ်ဂ့ၤဘၣ်, မ့ၢ်လၢအမ့ၢ်တၢ်လုၢ်တၢ်ပျၢ်တၢ်ဒဲးဘးဒီးတမ့ၢ်တၢ်လုၢ်ဘုဧိၤ ဟုဧိၤအဃိန့ၣ်လီၤ.

¹²ဒီးကဘၣ်ဟဲစိာ်ဝဲဆူပှၤလုၢ်တၢ်အခိၣ်အအိၣ်လၢအကဟံးန့ၢ်ကိၣ် တစှီၤဒ်တၢ်ပနီၣ်လၢအဘၣ်တၢ်လုၢ်ထီၣ်တ့ၢ်လံအီၤခဲလၢာ်ဆူယွၤ အသိးဒီးဆိၣ်ကဲၤထီၣ်အီၤလၢတၢ်လုၢ်လီၢ်အဖီခိၣ်န့ၣ်လီၤ. တၢ်အံၤမ့ၢ်တၢ်လုၢ်တၢ်ပျၢ်တၢ်ဒဲးဘးန့ၣ်လီၤ.

¹³ပှၤလုၢ်တၢ်အခိၣ်ကလုၢ်ထီၣ်တၢ်ဒ်သိးအံၤလၢတၢ်လုၢ်တၢ်ပျၢ်တၢ်ဒဲး ဘးလၢပှၤတဂၤအံၤအတၢ်ဒဲးဘးအဂီၢ်, ဒီးအတၢ်ဒဲးဘးကဘၣ်တၢ်ပျၢ်ကွံာ်အီၤန့ၣ်လီၤ. ဒီးကိၣ်ကမူၣ်လၢအအိၣ်လီၤတဲာ်န့ၣ်မ့ၢ်ပှၤလုၢ်တၢ်အခိၣ်အတၢ်ဒ်တၢ် အိၣ်လီၤတဲာ်လၢတၢ်လုၢ်ဘုဧိၤဟုဧိၤအသိးန့ၣ်လီၤ.

¹⁴ယွၤဟ့ၣ်လီၤစီၤမိၤၡ့လၢတၢ်သိၣ်တၢ်ဘျၢတဖၣ်ဒ်လၢလာ်အသိးန့ၣ်လီၤ.

¹⁵ပှၤတဂၤဂၤမ့ၢ်မၤဘၣ်တၢ်ဒဲးဘးလၢတၢ်တတိာ်သူၣ်ပာ်သးအပူၤခီ ဖျိတၢ်တဟ့ၣ်ဆၢက့ၤတၢ်လၢအစီဝဲဆှံဝဲလၢယွၤအမဲာ်ညါန့ၣ်, ကဘၣ်ဟဲစိာ်ဝဲသိဖါတဒုမ့တမ့ၢ်မဲာ်တဲးလဲးဖါတဒုလၢမဲၣ်သူ မဲၣ်ဂီၤတအိၣ်ဘၣ်ဒ်တၢ်ဟ့ၣ်ဆၢက့ၤအသိးလၢတၢ်လုၢ်တၢ်ပျၢ်တၢ်ကမၣ် ဆူယွၤအအိၣ်, ဒီးတၢ်ကပာ်အပှ့ၤအနီၣ်ထိၣ်အိၣ်ဝဲအသိးန့ၣ်လီၤ. တၢ်အံၤမ့ၢ်တၢ်လုၢ်တၢ်ပျၢ်တၢ်ကမၣ်န့ၣ်လီၤ.

¹⁶ဒီးကဘၣ်ဟ့ၣ်အါထီၣ်စ့ၢ်ကီးဝဲတၢ်အပှ့ၤယဲၢ်ပူတပူလၢတၢ်ဟ့ၣ် ဆၢက့ၤအပှ့ၤအဖီခိၣ်လီၤ. ဒီးကဘၣ်ဟ့ၣ်ဝဲဆူပှၤလုၢ်တၢ်အခိၣ်အအိၣ်ဒီးပှၤလုၢ်တၢ်အခိၣ် ကလုၢ်ထီၣ်သိဖါတဒုမ့တမ့ၢ်မဲာ်တဲးလဲးဖါတဒုန့ၣ်လၢတၢ်လုၢ် တၢ်ကမၣ်အဂီၢ်ဒီးအတၢ်ကမၣ်ကဘၣ်တၢ်ပျၢ်ကွံာ်အီၤလီၤ.

¹⁷ပှၤတဂၤမ့ၢ်မၤတၢ်ဒဲးဘးလၢတၢ်တတိာ်သူၣ်ပာ်သးအပူၤခီဖျိတၢ် လဲၤခီပတာ်ယွၤအတၢ်မၤလိာ်တမံၤလၢ်လၢ်န့ၣ်, အတၢ်ကမၣ်အိၣ်ဒီးကဘၣ်တူၢ်အတၢ်ကမၣ်ဒၣ်ဝဲန့ၣ်လီၤ.

¹⁸ဒီးကဘၣ်ဟဲစိာ်ဝဲသိဖါတဒု မ့တမ့ၢ်မဲာ်တဲးလဲးဖါတဒုလၢမဲၣ်သူမဲၣ်ဂီၤတအိၣ်ဘၣ်, ဒ်တၢ်ဟ့ၣ်ဆၢက့ၤအသိးဆူပှၤလုၢ်တၢ်အခိၣ်အအိၣ်န့ၣ်လီၤ. ဒီးအပှ့ၤအနီၣ်ထိၣ်တၢ်ပာ်ကအီၤ ဒ်တၢ်လုၢ်တၢ်ပာ်အလုၢ်အပှ့ၤကဘၣ်အိၣ်ဝဲအသိးလၢတၢ်လုၢ်တၢ်ပျၢ်တၢ်ကမၣ် လၢအမၤဘၣ်ဝဲ လၢတၢ်တတိာ်သူၣ်ပာ်သးအပူၤအဂီၢ်ဒီးအတၢ်ကမၣ်ကဘၣ်တၢ်ပျၢ်ကွံာ်အီၤလီၤ.

¹⁹တၢ်အံၤမ့ၢ်တၢ်ဟ့ၣ်ဆၢက့ၤတၢ်လုၢ်တၢ်ပျၢ်တၢ်ကမၣ်လၢတၢ်ဒဲးဘး လၢအထီဒါဘၣ်ယွၤန့ၣ်လီၤ.