Read S'gaw Karen လံာ်ယံးရမံယၤ 11 Bible Online

လံာ်ယံးရမံယၤ 11 - S'gaw Karen bible

လံာ်ယံးရမံယၤ 11

¹ယွၤစံးဘၣ်တ့ၢ်ယၤ,

²“ဒိကနၣ်တၢ်အဂ့ၢ်တဖၣ်လၢတၢ်ပာ်လီၤ အီၤလၢတၢ်အၢၣ်လီၤအီလီၤအဂီၢ်တက့ၢ်. စံးဘၣ်တဲဘၣ်ကီၢ်ယူဒၤဒီးဝ့ၢ်ယရူၤၡလ့ၣ် အပှၤဂီၢ်မုၢ်,

³လၢယၤ, ယွၤ, အံၣ်စရ့လးအကစၢ်ယွၤပာ်လီၤ တ့ၢ်တၢ်ဆိၣ်အၢတမံၤလၢကလီၤဘၣ်လၢ ကယဲၢ်ပှၤတဂၤလၢ်လၢ်လၢအတစူၢ်ဘၣ် တၢ်အဂ့ၢ်တဖၣ်လၢတၢ်ပာ်လီၤအီၤလၢ တၢ်အၢၣ်လီၤအီလီၤအဂီၢ်, အဖီခိၣ်န့ၣ်လီၤ.

⁴တၢ်န့ၣ်မ့ၢ်တၢ်အၢၣ်လီၤအီလီၤလၢယမၤ တ့ၢ်ဒီးအဝဲသ့ၣ်အမိၢ်ပၢ်ဖံဖုလၢပျၢၤတဖၣ်ဖဲယဒုးဟးထီၣ်ကွံာ်အဝဲ သ့ၣ်လၢကီၢ်အဲၤကူပတူးအပူၤ, ကီၢ်တဘ့ၣ်လၢအလီၤဂာ်ဒီးမ့ၣ် အူကဲၤအဖၣ်ကပူၤလၢအဝဲသ့ၣ်အဂီၢ်အခါန့ၣ်လီၤ. ယတဲဘၣ်အဝဲသ့ၣ်လၢကစူၢ်ယၤဒီး ကမၤကယဲၢ်တၢ်လၢယမၤလိာ်တ့ၢ်အီၤန့ၣ်လီၤ. ယတဲဘၣ်အဝဲသ့ၣ်လၢ အဝဲသ့ၣ်မ့ၢ်စူၢ်ယၤဒီး, အဝဲသ့ၣ်ကမ့ၢ်ယပှၤဂီၢ်မုၢ်ဒီးယကမ့ၢ် အဝဲသ့ၣ်အကစၢ်န့ၣ်လီၤ.

⁵အန့ၣ်ဒီး, ယကဟံးဃာ်ကျၢၤတၢ်အၢၣ်လီၤအီလီၤ လၢယမၤတ့ၢ်ဒီးအဝဲသ့ၣ်အမိၢ်ပၢ်ဖံဖုလၢပျၢၤတဖၣ်, လၢယကဟ့ၣ်လီၤအဝဲသ့ၣ်လၢကီၢ်တဘ့ၣ်လၢခဲအံၤအဝဲသ့ၣ်အိၣ်ဆိး ဝဲလၢအပူၤလၢအမ့ၢ်ကီၢ်တဘ့ၣ်လၢအထူးဝဲတီၤဝဲဒီး အဟီၣ်ခိၣ်ညၣ်ထ့ၣ်ဂ့ၤဝဲန့ၣ်လီၤ.” ယစံး “မ့ၢ်လီၤ. ယွၤဧၢ.”

⁶အန့ၣ်ဒီးယွၤစံးဘၣ်ယၤ, “လဲၤဆူကီၢ်ယူဒၤအဝ့ၢ်တဖၣ်ဒီးဝ့ၢ်ယရူၤၡလ့ၣ်အကျဲဘိ တဖၣ်အပူၤတက့ၢ်. တဲဖျါထီၣ်ယတၢ်ကစီၣ်ဖဲန့ၣ်, ဒီးတဲဘၣ်ပှၤဂီၢ်မုၢ်လၢကဒိကနၣ်တၢ်အဂ့ၢ်တဖၣ် လၢတၢ်ပာ်လီၤအီၤလၢတၢ်အၢၣ်လီၤအီလီၤအဂီၢ်, ဒီးစူၢ်အီၤန့ၣ်တက့ၢ်.

⁷ဖဲယဒုးဟးထီၣ်ကွံာ်အဝဲသ့ၣ်အမိၢ်ပၢ်ဖံဖု လၢပျၢၤတဖၣ်လၢကီၢ်အဲၤကူပတူးအပူၤအခါန့ၣ်, ယဟ့ၣ်ပလီၢ်အဝဲသ့ၣ်လၢတၢ်သမှံၤသပှၢ်အပူၤလၢကစူၢ်ယၤအဂီၢ်, ဒီးတုၤလီၤလၢမုၢ်မဆါတနံၤအံၤဒၣ်လဲာ်န့ၣ် ယဟ့ၣ်ပလီၢ်ဒံးဒၣ်ပှၤဂီၢ်မုၢ်အဖၢမုၢ်န့ၣ်လီၤ.

⁸ဘၣ်ဆၣ်ဒီး, အဝဲသ့ၣ်တဒိကနၣ်တၢ်မ့ၢ်ဂ့ၤတစူၢ်တၢ်မ့ၢ်ဂ့ၤဘၣ်. အခိၣ်တလိာ်, ပှၤကိးဂၤဒဲးအခိၣ်ကိၤဒံးဒၣ်တၢ်ဒီးအၢဒံးသီဒံး ဒၣ်ဒ်လၢညါအဃိန့ၣ်လီၤ. ယမၤလိာ်တ့ၢ်အဝဲသ့ၣ်ကတိၢ်န့ၢ်ဖံး ဃာ်တၢ်အၢၣ်လီၤအီလီၤဘၣ်ဆၣ်ဒီးအဝဲသ့ၣ်တဒိကနၣ်ဝဲဘၣ်. လၢတၢ်န့ၣ်အဃိ, ယဒုးလီၤဘၣ်ကယဲၢ်တၢ်စံၣ်ညီၣ်တဖၣ်လၢ တၢ်ပာ်ဖျါက့ၤအီၤလၢတၢ်အၢၣ်လီၤအီလီၤအပူၤ, လၢအဝဲသ့ၣ်အလိၤန့ၣ်လီၤ.”

⁹အန့ၣ်ဒီးယွၤစံးဘၣ်ယၤ, “ကီၢ်ယူဒၤဒီးဝ့ၢ်ယရူၤရှလ့ၣ်အပှၤ ဂီၢ်မုၢ်တဖၣ်ကူၣ်ထီၣ်တၢ်အၢထီဒါယၤန့ၣ်လီၤ.

¹⁰အဝဲသ့ၣ်က့ၤကဒါက့ၤဆူအမိၢ်ပၢ်ဖံဖုလၢပျၢၤ တဖၣ်ပှၤတဖၣ်လၢတဒိကနၣ်တၢ်လၢယစံးဘၣ်တ့ၢ်အီၤ, အတၢ်ဒဲးဘးတဖၣ်အအိၣ်န့ၣ်လီၤ. အဝဲသ့ၣ်ဘူၣ်ထီၣ်ဘါထီၣ်ကစၢ်အဂၤတဖၣ်လီၤ. ပှၤကီၢ်အံၣ်စရ့လးဖိဒီးပှၤကီၢ်ယူဒၤဖိခံဖုလိာ်အံၤမၤဟးဂီၤကွံာ် တၢ်အၢၣ်လီၤအီလီၤလၢယမၤတ့ၢ်ဒီးအဝဲသ့ၣ် အမိၢ်ပၢ်ဖံဖုလၢပျၢၤတဖၣ်န့ၣ်လီၤ.

¹¹အဃိဒီးခဲအံၤ, ယၤ, ယွၤအံၤ, ယဟ့ၣ်ပလီၢ် အဝဲသ့ၣ်လၢယကဟဲစိာ်တၢ်ဟးဂီၤလၢအဝဲသ့ၣ်အဖီခိၣ်, ဒီးအဝဲသ့ၣ်တပူၤဖျဲးဝဲဘၣ်. ဒီးဖဲအဝဲသ့ၣ်ကိးထီၣ်ယၤလၢတၢ် မၤစၢၤအဂီၢ်န့ၣ်, ယတဒိကနၣ်အဝဲသ့ၣ်ဘၣ်.

¹²အန့ၣ်ဒီး, ကီၢ်ယူဒၤဒီးဝ့ၢ်ယရူၤရှလ့ၣ်အပှၤဂီၢ်မုၢ်ကလဲၤဆူ ကစၢ်တဖၣ်လၢအဝဲသ့ၣ်လုၢ်ထီၣ်ပာ်ထီၣ်တၢ်လုၢ်တၢ်ပာ် တဖၣ်ဆူအအိၣ်, ဒီးကကိးထီၣ်အဝဲသ့ၣ်လၢတၢ်မၤစၢၤ အဂီၢ်လီၤ. ဘၣ်ဆၣ်ဖဲတၢ်မၤဟးဂီၤအံၤဟဲတုၤဝဲန့ၣ်, ကစၢ်တဖၣ်အံၤမၤပူၤမၤဖျဲးအဝဲသ့ၣ်တသ့ဘၣ်လီၤ.

¹³ကီၢ်ယူဒၤအပှၤဂီၢ်မုၢ်အိၣ်ဒီးအကစၢ်တဖၣ်အါမးဒ်အဝဲသ့ၣ် အိၣ်ဒီးအဝ့ၢ်တဖၣ်အသိး, ဒီးပှၤလၢအအိၣ်ဝဲဆိးဝဲလၢဝ့ၢ်ယရူၤၡလ့ၣ် အပူၤတဖၣ်မၤထီၣ်တၢ်လုၢ်လီၢ်တဖၣ်, လၢတၢ်လုၢ်ထီၣ်ပာ်ထီၣ် တၢ်ဆူအကစၢ်ဘဧၤလးအအိၣ်အဂီၢ်, အါဝဲပှဲၤသိးကျဲအဘိတဖၣ် လၢဝ့ၢ်အပူၤန့ၣ်လီၤ.

¹⁴စီၤယံးရမံယၤဧၢ, ဃ့ထုကဖၣ်တၢ်လၢယၤမ့ၢ်ဂ့ၤဃ့ကညး ယၤမ့ၢ်ဂ့ၤလၢပှၤဂီၢ်မုၢ်အံၤအခၢၣ်စးတဂ့ၤ. ဖဲအဝဲသ့ၣ်အိၣ်လၢတၢ်ကီတၢ်ခဲအပူၤ, ဒီးကိးထီၣ်ယၤလၢတၢ်မၤ စၢၤအဂီၢ်န့ၣ်, ယတကနၣ်အဝဲသ့ၣ်ဘၣ်.”

¹⁵ယွၤစံးဝဲဒၣ်, “ပှၤဂီၢ်မုၢ်လၢယအဲၣ်အီၤမၤတၢ်အၢတၢ်သီတဖၣ်လီၤ. တၢ်ခွဲးတၢ်ယာ်မနုၤအိၣ်ဒီးအဝဲသ့ၣ်လၢကအိၣ်လၢယတၢ် လုၢ်ဟံၣ်ပူၤအဂီၢ်န့ၣ်လဲၣ်. ခီဖျိအဝဲသ့ၣ်မၤတၢ်အၢၣ်လီၤတဖၣ် ဒီးလုၢ်ထီၣ်ပာ်ထီၣ်ဆၣ်ဖိကီၢ်ဖိတၢ်လုၢ်တၢ်ပာ်တဖၣ်အဃိန့ၣ်, မ့ၢ်အဝဲသ့ၣ်ဆိကမိၣ်ဝဲလၢတြီတၢ်တတၢးတနါတဖၣ်ကသ့န့ၣ်ဧါ. တၢ်န့ၣ်မ့ၢ်ကမၤသူၣ်ဖှံသးညီအဝဲသ့ၣ်ဧါ.

¹⁶တဘျီန့ၣ်ယကိးအဝဲသ့ၣ်လၢသ့ၣ်စၤယံးတထံးလၢအလၣ်အါ, လၢအပှဲၤဒီးအသၣ်အဃံအလၤတဖၣ်န့ၣ်လီၤ. မ့မ့ၢ်ခဲကနံၣ်အံၤ, ယကဒွဲၣ်အူအလၣ်တဖၣ်လၢမ့ၣ်အူဒီးမၤကၢ်ကွံာ်အဒ့တဖၣ် ခီဖျိတၢ်သီၣ်ထီၣ်တမံၤဒ်လီသီၣ်အသိးန့ၣ်လီၤ.

¹⁷ယၤ, ယွၤသ့တၢ်လၢာ်အံၤ, ယသူၣ်လီၤတ့ၢ်ကီၢ်အံၣ်စရ့လးဒီး ကီၢ်ယူဒၤန့ၣ်လီၤ. ဘၣ်ဆၣ်ခဲအံၤ, ယမၤပျံၤမၤဖုးအဝဲသ့ၣ် လၢတၢ်တတၢးတနါန့ၣ်လီၤ. မ့ၢ်လၢအဝဲသ့ၣ်မၤတ့ၢ်တၢ်ကမၣ်အဃိ, အဝဲသ့ၣ်ဟဲစိာ်တၢ်အံၤလၢအကစၢ်ဒၣ်ဝဲအဖီခိၣ်လီၤ. အဝဲသ့ၣ် မၤသးဒိၣ်ထီၣ်ယၤ, ခီဖျိအလုၢ်ထီၣ်တၢ်လုၢ်တၢ်ပာ်တဖၣ်ဆူ ဘဧၤလးအအိၣ်န့ၣ်လီၤ.”

¹⁸ယွၤဒုးသ့ၣ်ညါတ့ၢ်ယၤလၢတၢ်ကူၣ်အၢခူသူၣ်တဖၣ်လၢယဒုၣ်ယဒါ တဖၣ်မၤဝဲထီဒါယၤန့ၣ်လီၤ.

¹⁹ယမၤယသးဒ်သိဖိတဒုလၢအနာ်ညီတၢ်လၢအဘၣ်တၢ်ဟံးထီၣ်အီၤ ဒ်သိးတၢ်ကမၤသံအီၤအဂီၢ်, ဒီးယတသ့ၣ်ညါဘၣ်လၢအဝဲသ့ၣ်ကူၣ်ထီၣ်တၢ်အၢတၢ်သီတဖၣ်အံၤ ထီဒါယၤန့ၣ်ဘၣ်လီၤ. အဝဲသ့ၣ်စံးဝဲဒၣ်, “မ်ပကူာ်လီၤကွံာ် သ့ၣ်အံၤဖဲအဂံၢ်အဘါဂ့ၤဒံးအခါတက့ၢ်. မ်ပမၤသံကွံာ်အီၤဒ်သိးပှၤ သုတသ့ၣ်နီၣ်လၢၤအီၤနီတဂၤတဂ့ၤန့ၣ်တက့ၢ်.”

²⁰အန့ၣ်ဒီးယဃ့ဘါထုကဖၣ်တၢ်ဒီးစံး, “သ့တၢ်လၢာ်ယွၤဧၢ, နမ့ၢ်စံၣ်ညီၣ်ကွီၢ်လၢအတီဝဲလိၤဝဲတဂၤလီၤ. နမၤကွၢ်ပှၤဂီၢ်မုၢ်အတၢ်ဆိကမိၣ်ဒီးအတၢ်သူၣ်ဘၣ်ဒိသးဘၣ်ထံးတဖၣ်လီၤ. ယပာ်လီၤယကွီၢ်လၢနစုပူၤလီၤ. လၢတၢ်န့ၣ်အဃိ, ဒုးထံၣ်ဘၣ် ယၤနတၢ်မၤဘၣ်က့ၤလၢပှၤဂီၢ်မုၢ်တဖၣ်အံၤအဖီခိၣ်န့ၣ်တက့ၢ်.”

²¹ပှၤဧၤနသိးဖိတဖၣ်သးအိၣ်ဝဲလၢတၢ်ကမၤသံယၤလီၤ. ဒီးအဝဲသ့ၣ်စံးဘၣ်တဲဘၣ်ယၤလၢယမ့ၢ်တဲဖျါဒံးဒၣ်ယွၤ အတၢ်ကစီၣ်န့ၣ်, အဝဲသ့ၣ်ကမၤသံယၤန့ၣ်လီၤ.

²²မၤသးဒ်န့ၣ်ဒီးယွၤသ့တၢ်လၢာ်စံးဝဲဒၣ်, “ယကစံၣ်ညီၣ်အဝဲသ့ၣ် လီၤ. အပှၤပိာ်ခွါသးစၢ်တဖၣ်ကသံဝဲလၢတၢ်ဒုးတၢ်ယၤအပူၤ, ဒီးအဖိတဖၣ်ကသံဝဲလၢတၢ်သၣ်ဝံၤလီၤဒိအဃိန့ၣ်လီၤ.

²³ယပာ်လီၤတၢ်ဆၢကတီၢ်အကတီၢ်လၢယကဟဲစိာ်တၢ်တတၢးတနါ လၢဧၤနသိးအပှၤဂီၢ်မုၢ်အဖီခိၣ်, ဒီးဖဲတၢ်ဆၢကတီၢ်န့ၣ်ဟဲတုၤ ဝဲဒီး, အဝဲသ့ၣ်တအိၣ်လီၤတဲာ်နီတဂၤဘၣ်.”