Read S'gaw Karen လံာ်ယံးရမံယၤ 13 Bible Online

လံာ်ယံးရမံယၤ 13 - S'gaw Karen bible

လံာ်ယံးရမံယၤ 13

¹ယွၤတဲဘၣ်တ့ၢ်ယၤလၢယကလဲၤဒီးပှ့ၤဖျီၣ်ခံလုၣ်အဖုၣ်တနီၤ လၢယဂီၢ်ဒၣ်ယဲဒီးကူထီၣ်အီၤ, ဘၣ်ဆၣ်ဒီးတဲဘၣ်ယၤလၢယသု တမၤဘၣ်စီၣ်အီၤလၢထံတဂ့ၤန့ၣ်လီၤ.

²အဃိ, ယပှ့ၤအီၤဒီးကူထီၣ်အီၤလီၤ.

³အန့ၣ်ဝံၤဒီး, ယွၤကတိၤကဒီးတၢ်ဒီးယၤဒီးစံးဝဲဒၣ်,

⁴“လဲၤဆူထံကျိဖးဒိၣ်ဖရၤသးဒီးပာ်ခူသူၣ်ဖျီၣ်ခံအဖုၣ်တဖၣ်န့ၣ် လၢတၢ်ပူၤတပူၤလၢလၢၢ်ကျါလ့ကျါန့ၣ်တက့ၢ်.”

⁵သတးဒီး, ယလဲၤဒီးပာ်ခူသူၣ်အီၤဘူးဒီးထံကျိဖးဒိၣ်ဖရၤသးန့ၣ်လီၤ.

⁶လၢခံတယံာ်ဘၣ်ဒီးယွၤတဲဘၣ်ယၤလၢယကလဲၤကဒါက့ၤဆူ ထံကျိဖးဒိၣ်ဖရၤသးဒီးဟံးန့ၢ်က့ၤဖျီၣ်ခံအဖုၣ်တဖၣ်န့ၣ်လီၤ.

⁷သတးဒီးယလဲၤကဒါက့ၤ, ဒီးတုၤယထံၣ်တၢ်လီၢ်လၢယပာ်ခူသူၣ် တ့ၢ်အီၤဒီး, ယထံၣ်ဘၣ်လၢအဝဲသ့ၣ်ဟးဂီၤကွံာ်လၢာ်လံဒီး တဂ့ၤလၢၤဘၣ်န့ၣ်လီၤ.

⁸အန့ၣ်ဒီးယွၤကတိၤကဒီးတၢ်လၢယၤဒီးစံးဝဲဒၣ်,

⁹“လၢကျဲတမံၤဃီဒ်သိးအံၤန့ၣ်, ယကမၤဟးဂီၤကီၢ်ယူဒၤအတၢ်ပာ်ကဖၢလၢအသး ဒီးဝ့ၢ်ယရူၤၡလ့ၣ်အတၢ်ပာ်ကဖၢလၢအသးဒိၣ်ဒိၣ်မုၢ်မုၢ်န့ၣ်လီၤ.

¹⁰ပှၤဂီၢ်မုၢ်လၢအအၢအသီတဖၣ်အံၤတစူၢ်ယၤဘၣ်. အဝဲသ့ၣ် အခိၣ်ကိၤဒီးအၢဝဲသီဝဲဒၣ်ဒ်အမၤညီနုၢ်ဝဲလၢညါအသိးဒီးဘူၣ်ထီၣ် ဘါထီၣ်ဒီးမၤကစၢ်အဂၤတဖၣ်အတၢ်လီၤ. လၢတၢ်န့ၣ်အဃိဒီး, အဝဲသ့ၣ်ကကဲထီၣ်ဒ်ဖျီၣ်ခံအဖုၣ်တဖၣ်အံၤလၢအတဂ့ၤလၢၤဘၣ် အသိးန့ၣ်လီၤ.

¹¹ဒ်ဖျီၣ်ခံအဖုၣ်တဖၣ်အံၤဘၣ်တၢ်ကူကျၢၤတံၢ်ဃးအီၤလၢပှၤအယီၢ်ဒ့ အလိၤအသိးန့ၣ်, ယပာ်လီၤတ့ၢ်လံယသးလၢပှၤဂီၢ်မုၢ်ခဲလၢာ်လၢ ကီၢ်အံၣ်စရ့လးဒီးကီၢ်ယူဒၤကဖီၣ်ဃံးတံၢ်ယၤန့ၣ်လီၤ. ယမၤတ့ၢ်တၢ်အံၤဒ်သိးအဝဲသ့ၣ်ကမ့ၢ်ယပှၤဂီၢ်မုၢ်ဒီးကဟဲ စိာ်တၢ်စံးထီၣ်ပတြၢၤဒီးတၢ်လၤကပီၤလၢယမံၤအဂီၢ်လီၤ. ဘၣ်ဆၣ်ဒီးအဝဲသ့ၣ်တစူၢ်ယၤဘၣ်.”

¹²ယွၤ, ကစၢ်ယွၤစံးဘၣ်ယၤ, “စီၤယံးရမံယၤဧၢ, တဲဘၣ်ကီၢ်အံၣ်စရ့လးအပှၤဂီၢ်မုၢ်လၢစ ပံးထံကိကိးဖျၢၣ်ဒဲးကြၢးဘၣ်တၢ်မၤပှဲၤအီၤဒီးစပံးထံန့ၣ်တက့ၢ်. အဝဲသ့ၣ်ကစံးဆၢဝဲလၢအဝဲသ့ၣ်, သ့ၣ်ညါလၢစပံးထံကိ ကိးဖျၢၣ်ဒဲးကြၢးဘၣ်တၢ်မၤပှဲၤအီၤဒီးစပံးထံကစီဒီန့ၣ်လီၤ.

¹³အန့ၣ်ဒီး, တဲဘၣ်အဝဲသ့ၣ်လၢယၤ, ယွၤအံၤ, ယကမၤပှဲၤပှၤဂီၢ်မုၢ်လၢထံကီၢ်အံၤအ ပူၤဒီးစပံးထံကအိမူၤအသး, ပှၤတဖၣ်လၢအမ့ၢ်စီၤပၤတဖၣ်လၢ အလီၤစၢၤလီၤသွဲၣ်လၢစီၤဒၤဝံး, ပှၤလုၢ်တၢ်အခိၣ်တဖၣ်, ဝံတဖၣ်ဒီးပှၤဂီၢ်မုၢ်လၢဝ့ၢ်ယ ရူၤၡလ့ၣ်ပူၤခဲလၢာ်န့ၣ်လီၤ.

¹⁴အန့ၣ်ဝံၤဒီးဒ်ကိတဖၣ်စုးဘၣ်ဒိဘၣ်လိာ်အ သးတဖျၢၣ်ဒီးတဖျၢၣ်အသိး, ယကမၤသဘှံးပှၤသးပှၢ်ဒီး ပှၤသးစၢ်တမံၤဃီစ့ၢ်ကီးန့ၣ်လီၤ. ဒ်သိးယသုတမၤသံအဝဲသ့ၣ် တဂ့ၤဒီးတၢ်လိးကီမ့ၢ်ဂ့ၤ, တၢ်သးအိၣ်မ့ၢ်ဂ့ၤ, တၢ်သးကညီၤမ့ၢ်ဂ့ၤဆိကတီၢ်ယၤတန့ၢ်ဘၣ်.”

¹⁵ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ယွၤကတိၤလံတၢ်လံ. ဆီၣ်လီၤသုသးဒီးဒိကနၣ်အီၤတက့ၢ်.

¹⁶တချုးဒံးဘၣ်လၢအဝဲဟဲစိာ်တၢ်ခံးတၢ်နၤဒီးသုခီၣ်ဘၣ်တိၢ်ဘၣ်ထံး လၢကစၢၢ်တဖၣ်အဖီခိၣ်, တချုးဒံးဘၣ်လၢအဝဲဒုးကဲထီၣ်အီၤတၢ်ကပီၤလၢ သုမုၢ်လၢ်န့ၣ်အီၤဆူတၢ်ခံးယိာ်ဒံးဘၣ်ဒီး, မၤလၤကပီၤယွၤ, သုကစၢ်ယွၤတက့ၢ်.

¹⁷သုမ့ၢ်တဒိကနၣ်တၢ်ဘၣ်ဒီး, ယကဟီၣ်ခူသူၣ်လၢသုတၢ်ပာ်ထီၣ်ထီသုသး အဃိလီၤ. ယကဟီၣ်ကယၢၤနးနးကလဲာ်ဒီးယမဲာ်ထံကယွၤလီၤဝဲ မ့ၢ်လၢယွၤအပှၤဂီၢ်မုၢ်ဘၣ်တၢ်စိာ်မၢကဲကုၢ်အီၤအဃိန့ၣ်လီၤ.

¹⁸ယွၤစံးဘၣ်ယၤ, “တဲဘၣ်စီၤပၤဒီးအမိၢ်လၢအကစံၣ်လီၤလၢ အလီၢ်ပစိာ်တဖၣ်အဖီခိၣ်တက့ၢ်. အဂ့ၢ်ဒ်အံၤအတၢ်လၤကပီၤ အခိၣ်သလုးဃံလၤတဖၣ်လီၤတဲာ်ကွံာ်လၢအဝဲသ့ၣ်အခိၣ်တဖၣ် အလိၤလံန့ၣ်လီၤ.

¹⁹ကီၢ်ယူဒၤကလံၤထံးအဝ့ၢ်တဖၣ်ဘၣ်တၢ်ကဝီၤဃာ်အီၤလံ. ပှၤလဲၤခီဂာ်အဝဲသ့ၣ်တသ့နီတဂၤဘၣ်. ကီၢ်ယူဒၤအပှၤဂီၢ်မုၢ် ခဲလၢာ်ဘၣ်တၢ်စိာ်ကွံာ်အီၤဆူတၢ်မၢကဲကုၢ်အပူၤလံန့ၣ်လီၤ.

²⁰ဝ့ၢ်ယရူၤၡလ့ၣ်ဧၢ, ကွၢ်တက့ၢ်. နဒုၣ်နဒါတဖၣ်ဟဲလီၤလၢကလံၤစိးတခီလံ. ပှၤဂီၢ်မုၢ်လၢတၢ်ပာ်အီၤလၢနစုပူၤလၢနကကဟုကယာ်အီၤအဂီၢ်, နပှၤဂီၢ်မုၢ်လၢနပာ်ထီၣ်ထီနသးလၢအဃိအါမးတဖၣ်, မ့ၢ်အအိၣ်ဖဲလဲၣ်.

²¹ဖဲပှၤဂီၢ်မုၢ်လၢနဆိကမိၣ်လၢအမ့ၢ်နတံၤသကိးတဖၣ်မၤနၢၤနၤဒီး ပၢဘၣ်နၤဒီး, နကစံးဒ်လဲၣ်. နကအိၣ်လၢတၢ်ဆူးတၢ်ဆါအပူၤ ဒ်ပိာ်မုၣ်တဂၤလၢအဆံးစၢ်ထီၣ်အဖိအသိးန့ၣ်လီၤ.

²²နမ့ၢ်သံကွၢ်, ဘၣ်မနုၤအဃိတၢ်သ့ၣ်တဖၣ်အံၤမၤအသးဒီးနၤလဲၣ်, ဘၣ်မနုၤအဃိနကူနကၤတဖၣ်ဘၣ်တၢ်ဖှီယာ်အီၤဒီးနဘၣ်တၢ်မၤ တရီတပါနၤလဲၣ်ဒီး, တၢ်အံၤမ့ၢ်ဒၣ်လၢနတၢ်ဒဲးဘးလီၤပျံၤလီၤဖုး ဒိၣ်မးအဃိန့ၣ်လီၤ.

²³ပှၤသူဖံးဖိတဂၤလဲလိာ်ကွံာ်အဖံးအလွဲၢ်မ့ၢ်ဂ့ၤ, ခ့စံၣ်ပိၣ်တဒုသုးကွံာ် အဖံးအကံၣ်ဃ့အဖျၢၣ်မ့ၢ်ဂ့ၤဘၣ်ကသ့ဧါ. အဝဲသ့ၣ်မၤဝဲမ့ၢ်သ့ဒီး နဲဒၣ်လၢအမၤထဲတၢ်အၢဒီးတမၤတၢ်အဂၤနီတမံၤဘၣ်န့ၣ်, မၤလိမၤတၢ်အဘၣ်ကသ့စ့ၢ်ကီးလီၤ.

²⁴ယွၤကမၤလီၤပြံလီၤပြါကွံာ်နၤဒ်ဘုလီၢ်လၢအ ဘၣ်တၢ်အူဒံအူဖျိးကွံာ်အီၤလၢမဲးမုၢ်ခိၣ်အကလံၤအသိးန့ၣ် လီၤ.

²⁵အဝဲဒၣ်စံးတ့ၢ်ဝဲလၢတၢ်အံၤကမ့ၢ်နတၢ်ဘူၣ်တၢ်တီၢ်လီၤ. အအံၤမ့ၢ်တၢ်လၢအဝဲစံၣ်ညီၣ်တဲာ်တ့ၢ်လံဝဲလၢကမၤနၤဒ်လဲၣ် အဂ့ၢ်န့ၣ်လီၤ. အဂ့ၢ်ဒ်အံၤ, နသးပ့ၤနီၣ်ကွံာ် အီၤနသန့ၤတ့ၢ်နသးလၢကစၢ်တတီတလိၤတဖၣ်အဃိလီၤ.

²⁶ယွၤအကစၢ်ဒၣ်ဝဲကဘ့ၣ်ကွံာ်နကူနကၤတဖၣ်ဒီးပာ်ဖျါနတၢ် အိၣ်ဘ့ၣ်ဆ့လၢနတၢ်မၤမဲာ်ဆှးနၤအဂီၢ်န့ၣ်လီၤ.

²⁷အဝဲထံၣ်တ့ၢ်နမၤတၢ်တဖၣ်လၢအဝဲသးဟ့ဝဲန့ၣ်လီၤ. အဝဲထံၣ်တ့ၢ်နလူၤပိာ်ထွဲပှၤတစူၢ်တနာ်ယွၤ အကစၢ်တဖၣ်အခံလၢတၢ်လူၢ်ဒီခိၣ်တဖၣ်ဒီးလၢစံာ်ပျီပူၤတဖၣ်, ဒ်ပှၤတဂၤလၢအသးကတၢထီၣ်ထွဲပှၤလၢအဃၢၤအမါအခံအသိးမ့ၢ်ဂ့ၤ, ကသ့ၣ်ဖါတဒုလၢအလူၤထွဲကသ့ၣ်မိၢ်တဒုအခံအသိးမ့ၢ်ဂ့ၤန့ၣ်လီၤ. ဝ့ၢ်ယရူၤၡလ့ၣ်အပှၤဂီၢ်မုၢ်သ့ၣ်ဧၢ, သုဘၣ်တၢ်စံၣ်ညီၣ်ဃါမနၤလီၤ. မ့ၢ်သုကကဆှီထီၣ်အခါဖဲလဲၣ်.”