Read S'gaw Karen လံာ်ယံးရမံယၤ 14 Bible Online

လံာ်ယံးရမံယၤ 14 - S'gaw Karen bible

လံာ်ယံးရမံယၤ 14

¹ဘၣ်ထွဲဒီးတၢ်ယီၤဃ့န့ၣ်, ယွၤစံးဘၣ်ယၤဒ်အံၤ,

²“ကီၢ်ယူဒၤဟီၣ်တၢ်ယၢၤတၢ်လီၤ. အဝ့ၢ်တဖၣ်ဟါမၢ်ကွံာ်လၢာ်လံ. အပှၤဂီၢ်မုၢ်မံလီၤလၢဟီၣ်ခိၣ်လိၤလၢတၢ် သူၣ်အုးသးအုးအပူၤဒီးဝ့ၢ်ယရူၤၡလ့ၣ် ကိးထီၣ်လၢတၢ်မၤစၢၤအဂီၢ်လီၤ.

³ပှၤထူးပှၤတီၤတဖၣ်မၢလီၤအကုၢ်အပှၤတဖၣ် လၢကလဲၤဃုမၤန့ၢ်ထံအဂီၢ်လီၤ. အဝဲသ့ၣ်လဲၤဆူထံပူၤတဖၣ်, ဘၣ်ဆၣ်တထံၣ်န့ၢ်ထံနီတစဲးဘၣ်. အဝဲသ့ၣ်ဟဲက့ၤကဒါက့ၤဒီးအသပၢၤထံတဖၣ်လၢအအိၣ်ကလီန့ၣ်လီၤ. လၢတၢ်သးဟးဂီၤဒီးသးကဒံကဒါအပူၤ, အဝဲသ့ၣ်မၤဘၢအမဲာ်သၣ်တဖၣ်န့ၣ်လီၤ.

⁴မ့ၢ်လၢတၢ်တစူၤဘၣ် ဒီးဟီၣ်ခိၣ်ဃ့ထီကွံာ်အဃိ, ပှၤထူစံာ်ဖိတဖၣ်အသးလီၤစၢ်လီၤဘဲဝဲ ဒီးမၤဘၢအမဲာ်သၣ်တဖၣ်န့ၣ်လီၤ.

⁵လၢစံာ်ပျီအပူၤန့ၣ်တၤဟိမိၢ် ပာ်လီၤတဲာ်ကွံာ်အဖိလၢအဖှံလီၤဝဲသီသီ, မ့ၢ်လၢနီၣ်ဧိၤမံၤဧိၤတအိၣ်ဘၣ်အဃိန့ၣ်လီၤ.

⁶ကသ့ၣ်ယီၤအမံၤတဖၣ်ဆၢထၢၣ်လၢတၢ်လူၢ်ဒီခိၣ် ဒီးသါဟဲၤဟီၤဝဲဒ်ထွံၣ်ဟီၣ်ခိၣ်တဖၣ်အသိးလီၤ. အဝဲသ့ၣ်အမဲာ်ချံအတၢ်ထံၣ်တအိၣ်လၢၤဘၣ် မ့ၢ်လၢအဝဲသ့ၣ်အတၢ်အီၣ်တအိၣ်လၢၤဘၣ်အဃိလီၤ.

⁷ယပှၤဂီၢ်မုၢ်ကိးထီၣ်ယၤ, ယွၤဧၢ, ဒ်နအၢၣ်လီၤတ့ၢ်ပှၤအသိး, မၤစၢၤပှၤတက့ၢ်. ပဃၣ်ကွံာ်ပသးလၢနၤအါဘျီလံ. ပမၤတ့ၢ်တၢ်ဒဲးဘးထီဒါနၤလီၤ.

⁸နမ့ၢ်ကီၢ်အံၣ်စရ့လးအတၢ်မုၢ်လၢ်ထဲတမံၤဧိၤလီၤ. နမ့ၢ်ပှၤထဲတဂၤဧိၤလၢအအုၣ်က့ၤခီၣ်က့ၤပှၤလၢ တၢ်တတၢးတနါန့ၣ်လီၤ. ဘၣ်မနုၤအဃိနလီၤဂာ်ဒ်ပှၤစီစၣ်တဂၤအသိးလၢပထံပကီၢ်အပူၤ, နလီၤဂာ်ဒ်ပှၤလဲၤတၢ်ဖိတဂၤအသိးလၢအအိၣ်ဝဲဆိးဝဲထဲတနၤဧိၤန့ၣ်လဲၣ်.

⁹ဘၣ်မနုၤအဃိနလီၤဂာ်ဒ်ပှၤတဂၤလၢအကမၢကမၣ်ဒီးသးလီၤကတုၤအသိး, နလီၤဂာ်ဒ်ပှၤသုးဖိတဂၤလၢတအိၣ်ဒီးအစိကမီၤလၢ ကမၤစၢၤတၢ်အသိးန့ၣ်လဲၣ်. ယွၤဧၢ, နအိၣ်ဒီးပှၤသပှၢ်ကတၢၢ်လီၤ. ပမ့ၢ်နပှၤဂီၢ်မုၢ်လီၤ. ပာ်လီၤတဲာ်ကွံာ်ပှၤတဂ့ၤ.”

¹⁰ယွၤစံးတၢ်ဘၣ်ဃးပှၤဂီၢ်မုၢ်သ့ၣ်တဖၣ်ဒ်အံၤ, “အဝဲသ့ၣ်အဲၣ်ဒိး ထွးထီၣ်ဃ့ၢ်ကွံာ်လၢယအိၣ်, ဒီးအဝဲသ့ၣ်တပၢၤအသးလၢၤဘၣ်. လၢတၢ်န့ၣ်အဃိ, ယတဘၣ်သူၣ်ဘၣ်သးအဝဲသ့ၣ်လၢၤဘၣ်. ယကသ့ၣ်နီၣ်ထီၣ်တၢ်ကမၣ်တဖၣ်လၢအဝဲသ့ၣ်မၤတ့ၢ်ဝဲဒီးစံၣ်ညီၣ် အဝဲသ့ၣ်လၢအတၢ်ဒဲးဘးတဖၣ်အဃိန့ၣ်လီၤ.”

¹¹ယွၤစံးဘၣ်ယၤ, “တဘၣ်ဃ့ဘါထုကဖၣ်ယၤလၢယကမၤစၢၤပှၤဂီၢ်မုၢ်သ့ၣ်တဖၣ်အံၤတဂ့ၤ.

¹²အဝဲသ့ၣ်မ့ၢ်ဒုၣ်တၢ်အီၣ်တၢ်အီဒၣ်လဲာ်, ယတဒိကနၣ်အဝဲသ့ၣ် အတၢ်ကိးထီၣ်လၢတၢ်မၤစၢၤအဂီၢ်ဘၣ်. အဝဲသ့ၣ်မ့ၢ်လုၢ်ထီၣ်ယၤ လၢတၢ်လုၢ်မ့ၣ်အူတဖၣ်ဒီးတၢ်လုၢ်ဘုဧိၤဟုဧိၤတဖၣ်ဒၣ်လဲာ်, တမ့ၢ်ယကဘၣ်သူၣ်ဘၣ်သးလၢအဝဲသ့ၣ်န့ၣ်ဘၣ်. အခိၣ်တလိာ်, ယကမၤသံအဝဲသ့ၣ်လၢတၢ်ဒုးတၢ်ယၤအပူၤ, ဒီးခီဖျိတၢ်သၣ်ဝံၤ လီၤဒိဒီးတၢ်ဆူးတၢ်ဆါန့ၣ်လီၤ.”

¹³အန့ၣ်ဒီးယစံး, “ယွၤပၢဘၣ်တၢ်ခဲလၢာ်ကစၢ်ဧၢ, နသ့ၣ်ညါလၢဝံတဖၣ်တဲဘၣ်ပှၤဂီၢ် မုၢ်လၢတၢ်ဒုးတၢ်ယၤဒီးတၢ်သၣ်ဝံၤလီၤဒိတအိၣ်လၢၤဘၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ်စံးဝဲ, နအၢၣ်လီၤတ့ၢ်လၢ, သပှၢ်ကတၢၢ်လၢပထံပကီၢ်အပူၤအံၤန့ၣ်, ကအိၣ်ထဲတၢ်ဃူတၢ်ဖိးဧိၤန့ၣ်လီၤ.”

¹⁴ဘၣ်ဆၣ်ဒီးယွၤစံးဆၢက့ၤဝဲ, “ဝံတဖၣ်န့ၣ်ကတိၤလီတၢ်လၢယမံၤအပူၤလီၤ. ယတမၢလီၤဘၣ်အဝဲသ့ၣ်မ့ၢ်ဂ့ၤ, ဟ့ၣ်လီၤအဝဲသ့ၣ်လၢယကလုၢ်တမံၤမံၤမ့ၢ်ဂ့ၤ, ကတိၤတၢ်တဘီဒၣ်လဲာ်ဒီးအဝဲသ့ၣ်မ့ၢ်ဂ့ၤန့ၣ်ဘၣ်. တၢ်ထံၣ်လၢညါခီတဖၣ်လၢအဝဲသ့ၣ်စံးကတိၤဝဲလၢ အဂ့ၢ်န့ၣ်တဟဲလၢယအိၣ်ဘၣ်. အဝဲသ့ၣ်အတၢ်ကတိၤဆိ ပာ်တၢ်တဖၣ်န့ၣ်မ့ၢ်တၢ်တဖၣ်လၢအလုၢ်အပှ့ၤတအိၣ် ဘၣ်လၢအဆိကမိၣ်ထီၣ်န့ၢ်ဒၣ်ဝဲန့ၣ်လီၤ.

¹⁵ယၤ, ယွၤအံၤ, တဲဘၣ်နၤတၢ်လၢယကမၤဘၣ်ဝံတဖၣ်န့ၣ်လၢ ယတမၢလီၤအီၤဘၣ်, ဘၣ်ဆၣ်အဝဲသ့ၣ်မ့ၢ်ပှၤကတိၤတၢ်လၢယမံၤ အပူၤ, ဒီးစံးဝဲလၢတၢ်ဒုးတၢ်ယၤဒီးတၢ်သၣ်ဝံၤ လီၤဒိတမၤဘၣ်ဒိထံကီၢ်အံၤဘၣ်န့ၣ်လီၤ. ယကမၤသံအဝဲသ့ၣ်လၢ တၢ်ဒုးတၢ်ယၤအပူၤဒီးခီဖျိတၢ်သၣ်ဝံၤလီၤဒိန့ၣ်လီၤ.

¹⁶ဒ်န့ၣ်အသိးပှၤဂီၢ်မုၢ်လၢအဝဲသ့ၣ်စံးဘၣ်တ့ၢ်အီၤတၢ်သ့ၣ်တဖၣ်အံၤ စ့ၢ်ကီးကဘၣ်တၢ်မၤသံအီၤလၢကျဲတဘိဃီန့ၣ်လီၤ. အဝဲသ့ၣ် အစိၣ်တဖၣ်ကဘၣ်တၢ်ကွံာ်အီၤလၢဝ့ၢ်ယရူၤၡလ့ၣ်အကျဲဘိတဖၣ် အပူၤ, ဒီးပှၤကခူၣ်လီၤအဝဲသ့ၣ်တအိၣ်နီတဂၤဘၣ်န့ၣ်လီၤ. တၢ်အံၤကမၤအသးဒီးအဝဲသ့ၣ်ခဲလၢာ်, ဃုာ်ဒီးအမါတဖၣ်, အဖိခွါတဖၣ်, ဒီးအဖိမုၣ်တဖၣ်န့ၣ်လီၤ. ယကမၢအဝဲသ့ၣ်ဟ့ၣ်တၢ်အပှ့ၤလၢအဝဲသ့ၣ်အတၢ်အၢတၢ်သီအဃိလီၤ.”

¹⁷ယွၤမၤလိာ်တ့ၢ်ယၤလၢယကတဲဘၣ်ပှၤဂီၢ်မုၢ်ဘၣ်ဃးယတၢ်သူၣ်အုး သးအုးအဂ့ၢ်ဒီးစံး, “မ်မဲာ်ထံတဖၣ်ယွၤလီၤလၢယမဲာ်ချံတဖၣ်အပူၤလၢမုၢ်ဆါဆဲးလၢမုၢ်နၤ, ဒီးမ်ယသုတဆိကတီၢ်တၢ်ဟီၣ်တၢ်ယၢၤနီတစုတဂ့ၤ. အဂ့ၢ်ဒ်အံၤ, ယပှၤဂီၢ်မုၢ်တဖၣ်ဘၣ်ဒိဘၣ်ထံးနးနးကလဲာ်ဒီး တၢ်မၤဘၣ်ဒိဆါအီၤအၢအၢသီသီန့ၣ်လီၤ.

¹⁸ဖဲယလဲၤဟးထီၣ်လၢစံာ်ပျီတဖၣ်အပူၤဒီး, ယထံၣ်ဘၣ်ပှၤလၢအသံလၢတၢ်ဒုး တၢ်ယၤအပူၤတဖၣ်အစိၣ်န့ၣ်လီၤ. ဖဲယလဲၤနုာ်ဆူဝ့ၢ်တဖၣ်အပူၤဒီး, ယထံၣ်ဘၣ်ပှၤဂီၢ်မုၢ်သၣ်ဝံၤလီၤဒိဘူးလၢ အကသံန့ၣ်လီၤ. အဂ့ၢ်ဒ်အံၤ, ဝံတဖၣ်ဒီးပှၤလုၢ်တၢ်အခိၣ်တဖၣ် မၤဒံးဒၣ်အဝဲသ့ၣ်အတၢ်မၤ, ဘၣ်ဆၣ်ဒီးမၤတၢ်မနုၤလဲၣ်န့ၣ်အဝဲသ့ၣ်, တသ့ၣ်ညါဝဲဘၣ်.”

¹⁹ယွၤဧၢ, မ့ၢ်နညိကွံာ်ကီၢ်ယူဒၤလၢာ်လၢာ်ဆ့ဆ့လံဧါ. မ့ၢ်နသးဟ့ဝ့ၢ်စံယိၣ်အပှၤဂီၢ်မုၢ်လံဧါ. ဘၣ်မနုၤအဃိနမၤဘၣ်ဒိဘၣ်ထံးပှၤအၢအၢသီသီ တုၤဒၣ်လဲာ် တၢ်မၤဘျါက့ၤပှၤတသ့န့ၣ်လဲၣ်. ပကွၢ်လၢ်တၢ်ဃူတၢ်ဖိး, ဘၣ်ဆၣ်တၢ်အဂ့ၤတမၤအသးနီတမံၤဘၣ်. ပမုၢ်လၢ်တၢ်မၤဘျါက့ၤ, ဘၣ်ဆၣ်တၢ်မၤပျံၤမၤဖုးဟဲလၢအလီၢ်န့ၣ်လီၤ.

²⁰ယွၤဧၢ, ပမၤတ့ၢ်တၢ်ဒဲးဘးထီဒါနၤလီၤ. ပအၢၣ်လီၤပတၢ်ဒဲးဘးဒၣ်ပဝဲတဖၣ် ဒီးပမိၢ်ပၢ်ဖံဖုလၢပျၢၤတဖၣ်အတၢ်ဒဲးဘးတဖၣ်န့ၣ်လီၤ.

²¹သ့ၣ်နီၣ်ထီၣ်က့ၤနတၢ်အၢၣ်လီၤအီလီၤတဖၣ်ဒီးသးဘၣ်အၢပှၤတဂ့ၤ. ဟဲစိာ်တၢ်မဲာ်ဆှးဆူဝ့ၢ်ယရူၤၡလ့ၣ်, တၢ်လီၢ်လၢအမ့ၢ်နတၢ်လၤကပီၤအလီၢ်ပစိာ် အဖီခိၣ်တဂ့ၤ. မၤဟးဂီၤကွံာ်တၢ်အၢၣ်လီၤအီလီၤလၢနမၤတ့ၢ်ဒီး ပှၤန့ၣ်တဂ့ၤ.

²²ပှၤကလုာ်တဖၣ်အတၢ်ဂီၤတၢ်ဖီၣ်တဖၣ်လၢအဒုးစူၤလီၤတၢ်သ့န့ၣ်, တအိၣ်ဘၣ်. မူကပိာ်လိၤအကစၢ်ဒၣ်ဝဲဒုးလီၤသဖှံၣ်မူခိၣ်ထံ တသ့စ့ၢ်ကီးဘၣ်. အိ, ယွၤပကစၢ်ယွၤဧၢ, ပပာ်ပတၢ်မုၢ်လၢ်လၢနပူၤလီၤ. အဂ့ၢ်ဒ်အံၤ, နမ့ၢ်ပှၤတဂၤလၢအမၤတၢ်သ့ၣ်တဖၣ်အံၤန့ၣ်လီၤ.