Read S'gaw Karen လံာ်ယံးရမံယၤ 15 Bible Online

လံာ်ယံးရမံယၤ 15 - S'gaw Karen bible

လံာ်ယံးရမံယၤ 15

¹အန့ၣ်ဒီးယွၤစံးဘၣ်ယၤ, “စီၤမိၤၡ့ဒီးစီၤၡမူၤအ့လးမ့ၢ် ဆၢထၢၣ်ဖဲအံၤဒီးဃ့သကွံၢ်ကညးယၤဒၣ်လဲာ်, ယတဒုးနဲၣ်ဘၣ်ပှၤဂီၢ်မုၢ် အံၤတၢ်သးကညီၤနီတမံၤဘၣ်. မၢအဝဲသ့ၣ်ဟးကွံာ်တက့ၢ်. မၢအဝဲသ့ၣ်ဟးထီၣ်ကွံာ်လၢယမဲာ်ညါတက့ၢ်.

²ဖဲအဝဲသ့ၣ်သံကွၢ်နၤလၢအဝဲသ့ၣ်ကဘၣ်လဲၤဖဲလဲၣ်န့ၣ်, တဲဘၣ် အဝဲသ့ၣ်လၢယစံးယဲဒ်အံၤတက့ၢ်. အဝဲသ့ၣ်တနီၤလၢကသံလၢတၢ်ဆူးတၢ်ဆါအဃိဃါမနၤန့ၣ်, ကလဲၤဆူတၢ်ဆူးတၢ်ဆါအအိၣ်, ပှၤအဂၤတဖၣ်လၢကသံလၢတၢ်ဒုးတၢ်ယၤအပူၤ ဃါမနၤန့ၣ်, ကလဲၤဆူတၢ်ဒုးတၢ်ယၤအပူၤ, ပှၤအဂၤတနီၤလၢကသံလၢတၢ်သၣ်ဝံၤလီၤဒိအဃိ ဃါမနၤန့ၣ်, ကလဲၤဆူတၢ်သၣ်ဝံၤလီၤဒိအအိၣ်, ပှၤအဂၤတဖၣ်လၢကဘၣ်တၢ်စိာ်မၢကဲကုၢ်အီၤဒ်ပှၤဘၣ်တၢ်စၢဃာ် တဖၣ်ဃါမနၤန့ၣ်, ကလဲၤဆူတၢ်စိာ်မၢကဲကုၢ်အလီၢ်န့ၣ်လီၤ.

³ယၤယွၤအံၤ, စံၣ်ညီၣ်တဲာ်တ့ၢ်လံလၢတၢ်လီၤပျံၤလီၤဖုးလွံၢ်မံၤ ကမၤသးဒီးအဝဲသ့ၣ်န့ၣ်လီၤ. အဝဲသ့ၣ်ကဘၣ်တၢ်မၤသံအီၤလၢ တၢ်ဒုးတၢ်ယၤအပူၤ, အဝဲသ့ၣ်အစိၣ်တဖၣ်ကဘၣ်တၢ်တွံၢ်ကွံာ်အီၤ လၢထွံၣ်တဖၣ်, ထိၣ်တဖၣ်ကအီၣ်ကွံာ်အဝဲသ့ၣ်, ဒီးဆၣ်ဖိကီၢ်ဖိ အမံၤတဖၣ်ကအီၣ်ကွံာ်တၢ်လၢအအိၣ်လီၤတဲာ်န့ၣ်လီၤ.

⁴ယကဒုးကဲထီၣ်အဝဲသ့ၣ်လၢတၢ်လီၤပျံၤလီၤဖုးအဒိအတဲာ် တမံၤလၢပှၤဂီၢ်မုၢ်လၢဟီၣ်ခိၣ်ချၢခဲလၢာ်အဂီၢ်, မ့ၢ်လၢ, တၢ်လၢ စီၤဃံးစကံယၤအဖိခွါစီၤမနၤၡ့ၤမၤတ့ၢ်ဝဲလၢဝ့ၢ်ယရူၤရှလ့ၣ်အပူၤ, ဖဲအဝဲကဲကီၢ်ယူဒၤအစီၤပၤအဆၢကတီၢ်, အဃိန့ၣ်လီၤ.”

⁵ယွၤစံးဝဲဒၣ်, “ဝ့ၢ်ယရူၤရှလ့ၣ်အပှၤဂီၢ်မုၢ်သ့ၣ်ဧၢ, မ့ၢ်မတၤ ကသးကညီၤသုလဲၣ်, ဒီးမ့ၢ်မတၤကသူၣ်အုးသးအုးလၢသုဃိန့ၣ်လဲၣ်. မ့ၢ်မတၤကအိၣ်ကတီၢ်တစိၢ်ဒီးသံကွၢ်သု, မ့ၢ်သုအိၣ်မုာ်အိၣ်ခုၣ်ကစီဒီဧါန့ၣ်လဲၣ်.

⁶သုဝဲပှၤဂီၢ်မုၢ်အံၤ, သုညိကွံာ်လံယၤလံ. သုဒီယၤလၢသုချၢန့ၣ်လီၤ. လၢတၢ်န့ၣ်အဃိယယၤထီၣ်ယစုဒီးမၤလီၤသဘှံးသု, မ့ၢ်လၢတၢ်ဘှံးယသးလၢတၢ်ပၢၤဃာ်ယတၢ်သးထီၣ်အဃိန့ၣ်လီၤ.

⁷လၢဝ့ၢ်ကိးဝ့ၢ်ဒဲးလၢကီၢ်အံၤအပူၤန့ၣ်, ယကွံာ်လီၤသုဆူကလံၤကျါဒ်ဘုလီၢ်အသိးန့ၣ်လီၤ. ယပှၤဂီၢ်မုၢ်ဧၢ, ယမၤဟးဂီၤကွံာ်သု, န့ၣ်လီၤ. ယမၤသံသုဖိတဖၣ် မ့ၢ်လၢသုတဆိကတီၢ်သုတၢ်အၢတၢ်သီအကျဲတဖၣ်အဃိန့ၣ်လီၤ.

⁸လၢသုထံသုကီၢ်အပူၤန့ၣ်, မုၣ်ကမဲတဖၣ်အိၣ်အါန့ၢ်ဒံးမဲးဧိၤ ဟီၣ်ဧိၤတဖၣ်လၢပီၣ်လဲၣ်နံၤတက့ၢ်န့ၣ်လီၤ. ယမၤသံကွံာ်သုပှၤပိာ်ခွါသးစၢ်တဖၣ်ဖဲအသးအနံၣ်အလါအ ဂ့ၤကတၢၢ်အခါဒီးဒုးကွၢ်အမိၢ်တဖၣ်လၢတၢ်နးတၢ်ဖှီၣ်န့ၣ်လီၤ. သတူၢ်ကလာ်ယတီၢ်အဝဲသ့ၣ် လၢတၢ်ကိၢ်တၢ်ဂီၤဒီးတၢ်ပျံၤတၢ်ဖုးန့ၣ်လီၤ.

⁹မိၢ်လၢအဖိလီၤမၢ်ကွံာ်န့ၢ်အီၤနွံဂၤန့ၣ်, သံတယူာ်ဘၣ်အသးဒီးဘၣ်ဂုာ်သါဝဲဒၣ်န့ၣ်လီၤ. အဝဲသ့ၣ်အမုၢ်ဆါအတၢ်ကပီၤကဲထီၣ်တၢ်ခံးတၢ်နၤလီၤ. အဝဲဒၣ်ဘၣ်တၢ်မဲာ်ဆှးဒီးအသး ဘၣ်ဒိဘၣ်ထံးဝဲန့ၣ်လီၤ. ယကပျဲသုဒုၣ်သုဒါတဖၣ်မၤသံသုဝဲ လၢအအိၣ်မူဒံးတဖၣ်လီၤ. ယၤ, ယွၤအံၤ, ကတိၤလံတၢ်လံ.”

¹⁰ယမ့ၢ်ပှၤတဂၤလၢအသးဘၣ်ဖှီၣ်လီၤ. ဘၣ်မနုၤအဃိယမိၢ် ဆံးစၢ်ထီၣ်ယၤလၢဟီၣ်ခိၣ်ချၢအံၤန့ၣ်လဲၣ်. ယဘၣ်အ့ၣ်လိာ် ယသးဒီးဂ့ၢ်လိာ်တၢ်ဒီးပှၤကိးဂၤဒဲးလၢကီၢ်အံၤအပူၤန့ၣ်လီၤ. ယတဟ့ၣ်လိၢ်လီၤစ့မ့ၢ်ဂ့ၤ, ဃ့လိၢ်စ့မ့ၢ်ဂ့ၤနီတမံၤဘၣ်. အန့ၣ်ဒၣ်လဲာ်, ပှၤကိးဂၤဒဲးဆိၣ်အၢယၤန့ၣ်လီၤ.

¹¹ယွၤဧၢ, ယမ့ၢ်တမၤတ့ၢ်နတၢ်မၤဂ့ၤဂ့ၤဘၣ်ဘၣ်, ယမ့ၢ်တဃ့ သကွံာ်ကညးတ့ၢ်နၤလၢယဒုၣ်ယဒါတဖၣ်အခၢၣ်စးဖဲအဝဲသ့ၣ် အိၣ်လၢတၢ်ကီတၢ်ခဲဒီးတၢ်ဘၣ်ကိၢ်ဘၣ်ဂီၤအကတီၢ်ဘၣ်န့ၣ်ဘၣ်ဒီး, မ်အဝဲသ့ၣ်အတၢ်ဆိၣ်အၢခဲလၢာ်ကလၢထီၣ်ပှဲၤထီၣ်ဒၣ်ဝဲတက့ၢ်.

¹²(ပှၤမၤကၢ်ထး, လီၤဆီဒၣ်တၢ်ထးလၢအဃါဃုာ်အသးဒီးတိၢ်ဘီ, လၢအဟဲလၢကလံၤစိးတခီန့ၣ်, တန့ၢ်နီတဂၤဘၣ်.)

¹³ယွၤစံးဘၣ်ယၤ, “ယကမၢလီၤဒုၣ်ဒါလၢကစိာ်ထီၣ်ကွံာ် ယပှၤဂီၢ်မုၢ်အတၢ်ထူးတၢ်တီၤဒီးအတၢ်လုၢ်ဒိၣ်ပှ့ၤဒိၣ်တဖၣ်, ဒ်သိးယကစံၣ်ညီၣ်အဝဲသ့ၣ်လၢတၢ်ဒဲးဘးတဖၣ်လၢအဝဲသ့ၣ်မၤတ့ၢ်ဝဲ, လၢထံကီၢ်ဒီဘ့ၣ်အဃိန့ၣ်လီၤ.

¹⁴ယကဒုးမၤအဝဲသ့ၣ်လၢအဒုၣ်အဒါတဖၣ်တဖၣ်အတၢ်မၤလၢ ကီၢ်တဘ့ၣ်လၢအဝဲသ့ၣ်တသ့ၣ်ညါအဂ့ၢ်နီတမံၤအပူၤ, မ့ၢ်လၢ ယတၢ်သးဒိၣ်ထီၣ်န့ၣ်လီၤဂာ်ဒီးမ့ၣ်အူဒီးကအီၣ်တၢ်လီၤစိၤ လီၤထီအဃိန့ၣ်လီၤ.”

¹⁵အန့ၣ်ဒီးယစံး, “ယွၤဧၢ, နသ့ၣ်ညါနၢ်ပၢၢ်နဲလီၤ. သ့ၣ်နီၣ်ထီၣ်ယၤဒီးမၤစၢၤယၤတက့ၢ်. ပျဲယဟ့ၣ်ကၣ်ပှၤလၢအမၤအၢမၤနးယၤတဖၣ်န့ၣ်, တက့ၢ်. ဝံသးစူၤအဝဲသ့ၣ်ကဲၣ်ဆိးတုၤလၢအဝဲသ့ၣ်မၤသံယၤကန့ၢ်န့ၣ်တဂ့ၤ. သ့ၣ်နီၣ်ထီၣ်က့ၤလၢယဘၣ်တၢ်ဒုၣ်ဒွဲၣ်ယၤမ့ၢ်လၢနဃိန့ၣ်တက့ၢ်.

¹⁶နကတိၤတ့ၢ်တၢ်ဒီးယၤ, ဒီးယဒိကနၣ်နတၢ်ကတိၤကိးထံၣ်ဒဲး န့ၣ်လီၤ. ယွၤ, သ့တၢ်လၢာ်ကစၢ်ယွၤဧၢ, ယဘၣ်ဃးဒီးနၤသတးဒီးနတၢ် ကတိၤတဖၣ်မၤပှဲၤယသးဒီးတၢ်သးခုဒီးတၢ်သူၣ်ဖှံသးညီန့ၣ်လီၤ.

¹⁷ယတမၤလၢာ်ယတၢ်ဆၢကတီၢ်ဒီးပှၤအဂၤတဖၣ်လၢတၢ်နံၤကဝဲၤ ပျီၢ်ကဒီဒီးတၢ်မၤမုာ်လၤယသးအပူၤန့ၣ်ဘၣ်. လၢယတၢ်စူၢ်နတၢ်ဟ့ၣ်လီၤနကလုၢ်တဖၣ်အပူၤန့ၣ်, ယအိၣ်ဒၣ်ယတၢ်ဒၣ်ယဲဒီးယပှဲၤဆၢၣ်ကလာ်ဒီးတၢ်သူၣ်ဒိၣ်သးဖျိးန့ၣ်လီၤ.

¹⁸ဘၣ်မနုၤအဃိယတူၢ်ဘၣ်ဒံးဒၣ်တၢ်နးတၢ်ဖှီၣ်န့ၣ်လဲၣ်. ဘၣ်မနုၤ အဃိတဘျါက့ၤဝဲန့ၣ်လဲၣ်. မ့ၢ်နပာ်လီၤနသးလၢနကမၤ သးဟးဂီၤယၤဒ်ထံကျိဖိတဘိလၢအလီၤသံးကွံာ်ဝဲလၢတၢ်ကိၢ်ခါ အသိးန့ၣ်ဧါ.”

¹⁹တၢ်ဂ့ၢ်အံၤယွၤစံးဆၢက့ၤဝဲဒ်အံၤ, “နမ့ၢ်ဟဲက့ၤကဒါက့ၤဒီး, ယကဟံးန့ၢ်က့ၤနၤ, ဒီးနကကဲထီၣ်က့ၤကဒီးယခ့ယပှၤန့ၣ်လီၤ. လၢနကကတိၤတၢ်နါစိၤနါပြာ်တၢ်အလီၢ် နမ့ၢ်တဲဖျါတၢ်ကစီၣ်လၢအလုၢ်အပှ့ၤအိၣ်ဒီး, နကမ့ၢ်က့ၤကဒီးယဝံန့ၣ်လီၤ. ပှၤဂီၢ်မုၢ်ကဟဲက့ၤကဒါက့ၤဆူနအိၣ်ဒီးတလိၣ် နလဲၤဆူအဝဲသ့ၣ်အအိၣ်န့ၣ်ဘၣ်.

²⁰ယကဒုးကဲထီၣ်နၤဒ်တၢ်အဒူၣ်တိၢ်ဘီနီၢ်နီၢ်လၢအကျၢၤတခါလၢ ပှၤဂီၢ်မုၢ်အံၤအမဲာ်ညါန့ၣ်လီၤ. အဝဲသ့ၣ်ကဒုးတၢ်ထီဒါနၤ, ဘၣ်ဆၣ်ဒီးအဝဲသ့ၣ်တမၤနၢၤဘၣ်နၤဘၣ်. ယကအိၣ်ဒီးနၤလၢ တၢ်ဒီဒၣ်အိၣ်ပှိၤနၤအဂီၢ်ဒီးမၤပူၤမၤဖျဲးနၤန့ၣ်လီၤ.

²¹ယကမၤပူၤမၤဖျဲးနၤလၢပှၤတတီတလိၤဒီးပှၤမၤတၢ်လၢတၢ်စုဆူၣ် ခီၣ်တကးတဖၣ်အတၢ်စိတၢ်ကမီၤအပူၤန့ၣ်လီၤ. ယၤ, ယွၤအံၤ, ကတိၤလံတၢ်လံ.”