Read S'gaw Karen လံာ်ယံးရမံယၤ 16 Bible Online

လံာ်ယံးရမံယၤ 16 - S'gaw Karen bible

လံာ်ယံးရမံယၤ 16

¹ယွၤကတိၤတၢ်ဒီးယၤဒီးစံးဝဲ,

²လၢတၢ်လီၢ်ဒ်သိးအံၤအပူၤန့ၣ်, ဒိးတ့ဒိးဖျီနသးမ့ၢ်ဂ့ၤ, ထီၣ်ဖိထီၣ်လံၤမ့ၢ်ဂ့ၤန့ၣ်တဂ့ၤ.

³ယကတဲဘၣ်နၤတၢ်လၢအကမၤအသး ဒီးဖိသၣ်တဖၣ်လၢအအိၣ်ဖျဲၣ်ထီၣ်ဖဲအံၤ, ဒီးအဝဲသ့ၣ်အမိၢ်အပၢ်တဖၣ်န့ၣ်လီၤ.

⁴အဝဲသ့ၣ်ကသံဝဲလၢတၢ်ဆူးတၢ်ဆါလီၤပျံၤလီၤဖုးတဖၣ်အဃိ, ဒီးပှၤဟီၣ်တၢ်ယၢၤတၢ်လၢအဝဲသ့ၣ်အဂီၢ်မ့ၢ်ဂ့ၤ, ပှၤခူၣ်လီၤဘါလီၤအဝဲသ့ၣ်မ့ၢ်ဂ့ၤတအိၣ်ဘၣ်နီတဂၤဘၣ်. အဝဲသ့ၣ်အစိၣ်တဖၣ်ကအိၣ်မံလီၤဒ်တၢ်အ့ၣ်တၢ်ဆံၣ်အပူၣ်တဖၣ် လၢဟီၣ်ခိၣ်လိၤအသိးန့ၣ်လီၤ. အဝဲသ့ၣ်ကဘၣ်တၢ်မၤသံ အီၤလၢတၢ်ဒုးတၢ်ယၤအပူၤမ့တမ့ၢ်ကသံလၢတၢ်သၣ်ဝံၤလီၤဒိ အဃိဒီးအဝဲသ့ၣ်အစိၣ်တဖၣ်ကမ့ၢ်တၢ်အီၣ်လၢထိၣ်တဖၣ်ဒီးဆၣ် ဖိကီၢ်ဖိအမံၤတဖၣ်အဂီၢ်န့ၣ်လီၤ.

⁵နတဘၣ်လဲၤနုာ်ဆူဟံၣ်တဖျၢၣ်လၢတၢ်ဟီၣ်တၢ်ယၢၤအိၣ်ဝဲန့ၣ်ဘၣ်. သူၣ်အုးသးအုးလၢပှၤနီတဂၤအဃိတဂ့ၤ. ယတဆိၣ်ဂ့ၤ လၢၤယပှၤဂီၢ်မုၢ်လၢတၢ်ဃူတၢ်ဖိးမ့ၢ်ဂ့ၤ, ဒုးနဲၣ်အဝဲသ့ၣ်လၢ တၢ်အဲၣ်ဒီးတၢ်သးကညီၤမ့ၢ်ဂ့ၤနီတစုလၢၤဘၣ်.

⁶ပှၤထူးပှၤတီၤဒီးပှၤဖှီၣ်ဖိယာ်ဖိကသံလၢထံကီၢ်အံၤအပူၤ, ဘၣ်ဆၣ် ပှၤတခူၣ်လီၤအဝဲသ့ၣ်မ့ၢ်ဂ့ၤ, ဟီၣ်တၢ်ယၢၤတၢ်လၢအဝဲသ့ၣ်အဂီၢ် မ့ၢ်ဂ့ၤနီတဂၤဘၣ်. ပှၤတဂဲာ်လီၤအသးမ့ၢ်ဂ့ၤ, လူၤအခိၣ်လၢတၢ်ဒုးနဲၣ်အတၢ်သးအုးအဃိမ့ၢ်ဂ့ၤနီတဂၤဘၣ်.

⁷ပှၤတအီၣ်ဃုာ်တၢ်မ့ၢ်ဂ့ၤ, အီဃုာ်တၢ်မ့ၢ်ဂ့ၤနီတဂၤဒီးပှၤတဂၤ ဂၤလၢတၢ်မၤမုာ်ထီၣ်က့ၤအဂီၢ်ဖဲပှၤလၢအအဲၣ်ဝဲတဂၤသံန့ၣ်ဘၣ်. လၢပှၤတဂၤလၢအပၢ်သံအဃိမ့ၢ်ဂ့ၤ, အမိၢ်သံအဃိမ့ၢ်ဂ့ၤအဂီၢ်ဒၣ် လဲာ်, ပှၤတဒုးနဲၣ်အတၢ်သူၣ်ဘၣ်ဒိသးဘၣ်ထံးနီတဂၤဘၣ်.

⁸လဲၤနုာ်လၢဟံၣ်တဖျၢၣ်ဖဲပှၤဂီၢ်မုၢ်အီၣ်တၢ်အီတၢ်န့ၣ်တဂ့ၤ. ဆ့ၣ်နီၤဃုာ်ဒီးအဝဲသ့ၣ်လၢနကအီၣ်တၢ်အီတၢ်အဂီၢ်တဂ့ၤ.

⁹ဒိကနၣ်တၢ်လၢယၤ, ယွၤသ့တၢ်လၢာ်, အံၣ်စရ့လးအကစၢ်ယွၤ, ကစံးဘၣ်ဝဲန့ၣ်တက့ၢ်. ယကမၤဘှ့ၣ် မၤဘှီၣ်ကွံာ်တၢ်သးခုဒီးတၢ်သူၣ်ဖှံသးညီအသီၣ်တဖၣ်ဒီးတၢ် တ့တၢ်ဖျီအတၢ်အီၣ်အမူးတဖၣ်အတၢ်သူၣ်ဖှံသးညီအသီၣ်န့ၣ်လီၤ. ပှၤဂီၢ်မုၢ်ဖဲအံၤကအိၣ်မူထံၣ်ဘၣ်တၢ်အံၤမၤအသးန့ၣ်လီၤ.

¹⁰ဖဲနတဲဘၣ်အဝဲသ့ၣ်တၢ်အံၤခဲလၢာ်ဒီး, အဝဲသ့ၣ်ကသံကွၢ်နၤလၢ ဘၣ်မနုၤအဃိယပာ်လီၤတ့ၢ်ယသးလၢယကစံၣ်ညီၣ်အဝဲ သ့ၣ်ဆါဆါထဲအံၤညါလဲၣ်န့ၣ်လီၤ. အဝဲသ့ၣ်ကသံကွၢ်ဝဲလၢမ့ၢ် အဝဲသ့ၣ်မၤသရူးကမၣ်ဘၣ်တၢ်မနုၤလဲၣ်ဒီးအဝဲသ့ၣ် မၤတ့ၢ်တၢ်ဒဲးဘးမနုၤထီဒါယွၤ, အဝဲသ့ၣ်အကစၢ်ယွၤလဲၣ်န့ၣ်လီၤ.

¹¹အန့ၣ်ဒီးတဲဘၣ်အဝဲသ့ၣ်လၢယွၤစံးဝဲဒၣ်, သုမိၢ်ပၢ်ဖံဖုလၢ ပျၢၤတဖၣ်ဃၣ်ကွံာ်အသးလၢယၤဒီးဘူၣ်ထီၣ်ဘါထီၣ်ဒီးမၤကစၢ်အဂၤ တဖၣ်အတၢ်လီၤ. အဝဲသ့ၣ်ပာ်လီၤတဲာ်ကွံာ်ယၤ, ဒီးတစူၢ်ဘၣ်ယတၢ်သိၣ်လိသီလိတဖၣ်ဘၣ်.

¹²ဘၣ်ဆၣ်ဒီးသုမၤတ့ၢ်တၢ်အၢဒိၣ်န့ၢ် ဒၣ်လဲာ်သုမိၢ်ပၢ်ဖံဖုလၢပျၢၤတဖၣ်န့ၣ်လီၤ. သုဝဲခဲလၢာ်သုခိၣ်ကိၤဒီးအၢ ဝဲသီဝဲဒီးသုတစူၢ်ဘၣ်ယၤဘၣ်.

¹³လၢတၢ်န့ၣ်အဃိဒီး, ယကဟီထီၣ်ကွံာ်သုလၢကီၢ်တဘ့ၣ်အံၤအပူၤ, ဆူကီၢ်တဘ့ၣ်လၢသုဝဲမ့ၢ်ဂ့ၤ, သုမိၢ်ပၢ်ဖံဖုလၢပျၢၤမ့ၢ်ဂ့ၤတသ့ၣ်ညါ တ့ၢ်အီၤနီတစုဘၣ်န့ၣ်လီၤ. ဒီးဖဲန့ၣ်, သုကမၤကစၢ်အဂၤတဖၣ် အတၢ်လၢမုၢ်ဆါဆဲးလၢမုၢ်နၤဒီးယတဒုးနဲၣ်သုတၢ်သးကညီၤ နီတစဲးဘၣ်လီၤ.”

¹⁴ယွၤစံးဝဲဒၣ်, “တၢ်ဆၢကတီၢ်ဟဲဝဲဖဲပှၤဂီၢ်မုၢ်တ ဆိၣ်လီၤလၢၤအသးလၢယမံၤအပူၤဒီးပာ်ယၤဒ်အမ့ၢ်ကစၢ်ယွၤလၢ အမူဝဲလၢအဟဲစိာ်ထီၣ်ကွံာ်ကီၢ်အံၣ်စရ့လးအပှၤ ဂီၢ်မုၢ်လၢကီၢ်အဲၤကူပတူးအပူၤန့ၣ်ဘၣ်လီၤ.

¹⁵အခိၣ်တလိာ်, အဝဲသ့ၣ်ကဆိၣ်လီၤအသး လၢယမံၤအပူၤဒ်ယမ့ၢ်ကစၢ်ယွၤလၢ အမူဝဲလၢအဟဲစိာ်ထီၣ်ကွံာ်ကီၢ်အံၣ်စရ့လးအပှၤဂီၢ်မုၢ်လၢကီၢ်လၢက လံၤစိးတခီဒီးလၢထံကီၢ်အဂၤတဖၣ်ဖဲယမၤပြံမၤပြါအဝဲသ့ၣ်န့ၣ်လီၤ. ယကဆှၢကဒါက့ၤအဝဲသ့ၣ်ဆူအထံအကီၢ်ဒၣ်ဝဲ, ကီၢ်တဘ့ၣ်လၢယဟ့ၣ်လီၤ တ့ၢ်အမိၢ်ပၢ်ဖံဖုလၢပျၢၤတဖၣ်န့ၣ်လီၤ. ယၤ, ယွၤအံၤ, ကတိၤလံတၢ်လံ.”

¹⁶ယွၤစံးဝဲဒၣ်, “ယမၤလိာ်လံပှၤမၤညၣ်ဖိအါဂၤလၢ ကဟဲဒီးမၤန့ၢ်ပှၤဂီၢ်မုၢ်သ့ၣ်တဖၣ်အံၤန့ၣ်လီၤ. အန့ၣ်ဝံၤဒီးယ ကမၤလိာ်ပှၤဟးခးအီၣ်တၢ်ဖိအါဂၤလၢကလူၤခးအဝဲသ့ၣ်လၢက စၢၢ်ဒီးတၢ်လူၢ်ကိးဖျၢၣ်ဒဲးအဒီခိၣ်ဒီးလၢတၢ်ကအိပူၤတဖၣ်လၢလၢၢ် ဧိၤလ့ဧိၤအကျါန့ၣ်လီၤ.

¹⁷ယထံၣ်တၢ်ခဲလၢာ်လၢအဝဲသ့ၣ်မၤဝဲလီၤ. တၢ်တအိၣ်သဒၢလၢယမဲာ်ညါနီတမံၤဘၣ်. အဝဲသ့ၣ်အတၢ်ဒဲးဘးတဖၣ်အိၣ်သဒၢ လၢယမဲာ်အတၢ်ထံၣ်တန့ၢ်ဘၣ်.

¹⁸ယကမၢအဝဲသ့ၣ်ဟ့ၣ်က့ၤတၢ်အပှ့ၤခံစး လၢအဝဲသ့ၣ်အတၢ်ဒဲးဘး ဒီးအတၢ်တတီတလိၤအဂီၢ်, မ့ၢ်လၢအဝဲသ့ၣ်မၤဘၣ်အၢဘၣ်သီ တ့ၢ်ယကီၢ်လၢတၢ်ဂီၤတၢ်ဖီၣ်တဖၣ်လၢအတၢ်မူတအိၣ်ဘၣ်ဒ်ပှၤ အစိၣ်တဖၣ်အသိး, ဒီးမၤပှဲၤအီၤဒီးအဝဲသ့ၣ်အကစၢ် ကဘျံးကဘျၣ်တဖၣ်အဃိန့ၣ်လီၤ.”

¹⁹ယွၤဧၢ, နမ့ၢ်ပှၤတဂၤလၢအဒီဒၣ်အိၣ်ပှိၤယၤဒီးဟ့ၣ်ယၤတၢ်ဂံၢ် တၢ်ဘါန့ၣ်လီၤ. နမၤစၢၤယၤလၢတၢ်ကီတၢ်ခဲအဆၢကတီၢ် တဖၣ်လီၤ. ပှၤကလုာ်တဖၣ်ကဟဲဆူနအိၣ်လၢဟီၣ်ခိၣ်အကတၢၢ် တဖၣ်ဒီးစံး, “ပမိၢ်ပၢ်ဖံဖုလၢပျၢၤတဖၣ်တအိၣ်ဒီးတၢ်နီတမံၤဘၣ်. မ့မ့ၢ်တၢ်အိၣ်ဒီးအဝဲသ့ၣ်မ့ၢ်ဒၣ်ထဲကစၢ်ကဘျံးကဘျၣ်တဖၣ်ဒီး တၢ်ဂီၤတၢ်ဖီၣ်တဂိာ်တသီၣ်တဖၣ်လၢအတမၤဂ့ၤအဝဲသ့ၣ်နီတမံၤဘၣ် န့ၣ်လီၤ.

²⁰ပှၤကညီတဂၤမၤကဲထီၣ်ကစၢ်တဖၣ်လၢအဂီၢ်ဒၣ်ဝဲကသ့ဧါ. အဝဲမ့ၢ်မၤတ့ၢ်ဒ်န့ၣ်ဒီး, တၢ်သ့ၣ်တဖၣ်န့ၣ်မ့ၢ်ကစၢ်နီၢ်နီၢ် တဖၣ်တသ့ဝဲဘၣ်.”

²¹ယွၤစံးဝဲဒၣ်, “မ့မ့ၢ်ဒ်န့ၣ်ဒီး, ယကဒုးသ့ၣ်ညါပှၤကလုာ်တဖၣ် လၢယစိယကမီၤဒီးယဂံၢ်ယဘါထဲတဘျီအံၤဒီးအကတၢၢ်တဘျီဒ်သိး အဝဲသ့ၣ်ကသ့ၣ်ညါလၢယမ့ၢ်ယွၤန့ၣ်လီၤ.”