Read S'gaw Karen လံာ်ယံးရမံယၤ 20 Bible Online

လံာ်ယံးရမံယၤ 20 - S'gaw Karen bible

လံာ်ယံးရမံယၤ 20

¹ဖဲပှၤလုၢ်တၢ်အခိၣ်စီၤအံးမ့ၢ်အဖိခွါစီၤပၣ်ၡဃူၢ်, လၢအမ့ၢ်ယွၤ အတၢ်လုၢ်ဟံၣ်အခိၣ်, နၢ်ဟူတၢ်လၢယစံးကတိၤတဖၣ်ဒီး,

²အဝဲဟ့ၣ်လီၤအကလုၢ်လၢပှၤကဒိယၤတီၢ်ယၤဒီးစၢဃာ်ယၤလၢ ထးသွဲတဖၣ်ဘူးဒီးဘံၣ်ယၤမံၣ်အတြဲၤထီတတီၤလၢယွၤ အတၢ်လုၢ်ဟံၣ်အပူၤန့ၣ်လီၤ.

³လၢခံတဂီၤ, ဖဲစီၤပၣ်ၡဃူၢ်ပျၢ်ထူၣ်ဖျဲးယၤလၢထး သွဲတဖၣ်ဝံၤအလီၢ်ခံန့ၣ်, ယစံးဘၣ်အီၤ, “ယွၤတကိးနမံၤလၢ စီၤပၣ်ၡဃူၢ်ဘၣ်. မံၤလၢအဝဲဒၣ်ဟ့ၣ်နၤန့ၣ်မ့ၢ်ဝဲ, “မၤကိၢ်မံစဘံာ်” လၢအခီပညီမ့ၢ်ဝဲ, တၢ်လီၢ်ပျံၤလီၤဖုးလၢ တၢ်လီၢ်ကိးပူၤဒဲး န့ၣ်လီၤ.”

⁴ယွၤအကစၢ်ဒၣ်ဝဲစံးဝဲဒၣ်, “ယကဒုးကဲထီၣ်နၤလၢတၢ်ပျံၤတၢ် ဖုးတမံၤလၢနဂီၢ်ဒၣ်နဲဒီးလၢနတံၤသကိးတဖၣ်အဂီၢ်, ဒီးနကထံၣ်ဘၣ် အဝဲသ့ၣ်ခဲလၢာ်ဘၣ်တၢ်မၤသံအီၤလၢအဒုၣ်အဒါတဖၣ်အါမးန့ၣ်လီၤ. ယကပာ်ကီၢ်ယူဒၤအပှၤဂီၢ်မုၢ်ခဲလၢာ်လၢကီၢ်ဘၤဘူၤလိၣ်အစီၤပၤ အစိကမီၤအဖီလာ်လီၤ. အဝဲကက့ၤစိာ်ကွံာ်အဝဲသ့ၣ်တနီၤဆူ အထံအကီၢ်ဒ်ပှၤဘၣ်တၢ်စိာ်မၢကဲကုၢ်တဖၣ်အသိးဒီးပှၤအဂၤ တဖၣ်န့ၣ်ကမၤသံကွံာ်ဝဲလီၤ.

⁵ယကပျဲစ့ၢ်ကီးအဝဲသ့ၣ်အဒုၣ်အဒါတဖၣ်လၢကဂုာ်ဆူၣ်ပျီဆူၣ် ဝ့ၢ်အံၤအတၢ်ထူးတၢ်တီၤခဲလၢာ်ဒီးဟံးန့ၢ်ကွံာ်ကယဲၢ်အတၢ် စုလီၢ်ခီၣ်ခိၣ်ဒီးအတၢ်ဖိတၢ်လံၤခဲလၢာ်တုၤဒၣ်လဲာ်လၢကီၢ်ယူဒၤ အစီၤပၤတဖၣ်အတၢ်လုၢ်ဒိၣ်ပှ့ၤဒိၣ်တဖၣ်ဒီးစိာ်ကွံာ်တၢ်ခဲလၢာ်န့ၣ် ဆူကီၢ်ဘၤဘူၤလိၣ်လီၤ.

⁶မ့မ့ၢ်နဲဒၣ်စီၤပၣ်ၡဃူၢ်ဧၢ, နၤဒီးနဒူၣ်ဖိထၢဖိခဲလၢာ်ကဘၣ် တၢ်ဖီၣ်န့ၢ်စ့ၢ်ကီးအီၤဒီးစိာ်ကွံာ်အီၤဆူကီၢ်ဘၤဘူၤလိၣ် န့ၣ်လီၤ. ဖဲန့ၣ်, နကသံဒီးနကဘၣ်တၢ်ခူၣ်လီၤကွံာ်နၤဃုာ်ဒီး နတံၤသကိးခဲလၢာ်လၢနကတိၤလီန့ၢ်အတၢ်အါမးန့ၣ်လီၤ.”

⁷ယွၤဧၢ, နလံၣ်န့ၢ်လီန့ၢ်ယၤ ဒီးယဘၣ်တၢ်လံၣ်န့ၢ်လီန့ၢ်ယၤလံ. နဂံၢ်ဆူၣ်ဘါဆူၣ်န့ၢ်ယၤတက့ၢ် ဒီးနမၤနၢၤကွံာ်ယၤလီၤ. ပှၤခဲလၢာ်နံၤဘၣ်ဖၣ်လဲယၤ ဒီးဒုၣ်ဒွဲၣ်ပယွဲယၤကိးမုၢ်နံၤမုၢ်နၤဒဲးန့ၣ်လီၤ.

⁸ဖဲယကတိၤတၢ်တဘျီဂ့ၤတဘျီဂ့ၤန့ၣ်, ယဘၣ်ကိးထီၣ်ဒီးကိးသတြီထီၣ်, “တၢ်မၤဆူၣ်မၤစိးဒီးတၢ်မၤလီၤပှီၢ်ဟးဂီၤ” န့ၣ်လီၤ. ယွၤဧၢ, ယဘၣ်တၢ်ကတိၤဒုၣ်ဒွဲၣ်စံးအၢယၤဒီး တၢ်တပာ်ကဲဘၣ်ယၤထီဘိတထံၣ်ဃီ မ့ၢ်လၢယစံးကတိၤနတၢ်ကစီၣ်အဃိန့ၣ်လီၤ.

⁹ဘၣ်ဆၣ်ဒီးဖဲယစံး, “ယကသးပ့ၤနီၣ်ကွံာ်ယွၤဒီးယတကတိၤလၢၤ တၢ်လၢအမံၤအပူၤလၢၤဘၣ်” န့ၣ်ဒီး, နတၢ်ကစီၣ်န့ၣ်လီၤဂာ်ဒ်မ့ၣ်အူ လၢအအီၣ်တၢ်လၢယသးကံၢ်ပူၤအသိးန့ၣ်လီၤ. ယကျဲးစၢးကီၤယသးအဂ့ၤကတၢၢ်လၢ ယသုတကတိၤဘၣ်အီၤ ဘၣ်ဆၣ်ယပၢၤတံၢ်ဃာ်အီၤတန့ၢ်လၢၤဘၣ်.

¹⁰ယနၢ်ဟူဘၣ်ပှၤကိးဂၤဒဲးကတိၤကသွံကသွါတၢ်ဒီးစံး, “တၢ်လီၤပျံၤလီၤဖုးအိၣ်ဝဲလၢတၢ်လီၢ်ကိးပူၤဒဲးလီၤ. အဃိဒီးမ်ပလဲၤဘိးဘၣ်သ့ၣ်ညါအဝဲအဂ့ၢ်ဆူပှၤ န့ၢ်စိန့ၢ်ကမီၤတဖၣ်အအိၣ်တက့ၢ်.” ယတံၤသကိးလၢအဘူးကတၢၢ်ဒီးယၤတဖၣ်ဒၣ်လဲာ် အိၣ်ခိးကွၢ်လၢ်ယတၢ်ဟးဂီၤန့ၣ်လီၤ. အဝဲသ့ၣ်စံးဝဲ, “ဘၣ်သ့ၣ်သ့ၣ်ပလီန့ၢ်ဝ့ၤန့ၢ်အတၢ်ကန့ၢ်လီၤ. အန့ၣ်ဒီးပကဖီၣ်န့ၢ်အီၤဒီးမၤကၣ်က့ၤအီၤန့ၣ်လီၤ.”

¹¹ဘၣ်ဆၣ်ဒီးနဲဒၣ်ယွၤဧၢ, နအိၣ်လၢယအိၣ်တခီ, ဂံၢ်ဆူၣ်ဘါဆူၣ် ဒီးစိဒိၣ်ကမီၤထီ, ဒီးပှၤလၢအမၤအၢမၤနးယၤတဖၣ်ကဃၣ်ကွံာ် ဝဲန့ၣ်လီၤ. အဝဲသ့ၣ်ကဘၣ်တၢ်မၤမဲာ်ဆှးအီၤလီၤထူလီၤယိာ်, မ့ၢ်လၢအဝဲသ့ၣ်မၤန့ၢ်မၤနၢၤတၢ်တသ့ဘၣ်အဃိန့ၣ်လီၤ.

¹²ဘၣ်ဆၣ်ဒီး, သ့တၢ်လၢာ်ယွၤဧၢ, နမၤကွၢ်ပှၤကညီလၢ တၢ်စံၣ်ညီၣ်တီအပူၤလီၤ. နသ့ၣ်ညါတၢ်လၢအအိၣ်လၢအဝဲသ့ၣ် အသးဒီးအတၢ်ဆိကမိၣ်တဖၣ်အပူၤန့ၣ်လီၤ. လၢတၢ်န့ၣ်အဃိ, ပျဲယထံၣ်ဘၣ်နဟ့ၣ်ကၣ်ယဒုၣ်ယဒါတဖၣ်, မ့ၢ်လၢယပာ်ယကွီၢ်လၢနစုပူၤလံအဃိန့ၣ်တက့ၢ်.

¹³သးဝံၣ်ထီၣ်ယွၤတက့ၢ်. စံးထီၣ်ပတြၢၤယွၤတက့ၢ်. အဝဲဒၣ်အုၣ်က့ၤခီၣ်က့ၤပှၤလၢအဘၣ်တၢ်မၤအၢမၤနး အီၤတဖၣ်လၢပှၤအအၢအသီတဖၣ်အစိကမီၤအပူၤန့ၣ်လီၤ.

¹⁴ဆိၣ်အၢမုၢ်တနံၤလၢယအိၣ်ဖျဲၣ်န့ၣ်တက့ၢ်. သးပ့ၤနီၣ်ကွံာ်မုၢ်တနံၤလၢယမိၢ်ဆံးစၢ်ထီၣ်ယၤ န့ၣ်တက့ၢ်.

¹⁵ဆိၣ်အၢပှၤတဂၤလၢအမၤသးခုတ့ၢ်ယပၢ် ဖဲအဝဲဟဲစိာ်ဃီၤတၢ်ကစီၣ်စံးဝဲ, “မ့ၢ်အပိာ်ခွါဖိလီၤ. မၤန့ၢ်နဖိခွါတဂၤလံ” န့ၣ်တက့ၢ်.

¹⁶မ်အဝဲဒၣ်ကလီၤဂာ်ဒီးဝ့ၢ်တဖၣ် လၢယွၤမၤဟးဂီၤတ့ၢ်အီၤတအိၣ်ဒီးတၢ်သးကညီၤဘၣ်န့ၣ်တက့ၢ်. မ်အဝဲဒၣ်ကနၢ်ဟူဘၣ်တၢ်ဆူးတၢ်ဆါအတၢ်ကိးပသူထီၣ်လၢ ဂီၤထၢၣ်သၢအကတီၢ်ဒီးတၢ်ဒုးတၢ်ယၤအတၢ်မၤဖုး မၤပျီၢ်လၢမုၢ်ထူၣ်အကတီၢ်န့ၣ်တက့ၢ်.

¹⁷အဂ့ၢ်ဒ်အံၤ, အဝဲတမၤသံကွံာ်ဘၣ်ယၤတချုးဖဲယအိၣ်ဖျဲၣ်ထီၣ် ဒံးဘၣ်အဃိလီၤ. အဝဲမ့ၢ်မၤသံတ့ၢ်ယၤဒီး, ယမိၢ်အဒၢလီၢ် ကကဲထီၣ်တ့ၢ်ယသွၣ်ခိၣ်န့ၣ်လီၤ.

¹⁸ဘၣ်မနုၤအဃိယအိၣ်ဖျဲၣ်ထီၣ်လဲၣ်. မ့ၢ်အမ့ၢ်ဒၣ်ထဲလၢယကအိၣ်ဒီး တၢ်ကိၢ်တၢ်ဂီၤဒီးတၢ်သူၣ်အုးသးအုးလၢ ကမၤကတၢၢ်ကွံာ်ယတၢ်အိၣ်မူလၢတၢ်မဲာ်ဆှးအပူၤအဂီၢ်ဧိၤန့ၣ်ဧါ.