Read S'gaw Karen လံာ်ယံးရမံယၤ 22 Bible Online

လံာ်ယံးရမံယၤ 22 - S'gaw Karen bible

လံာ်ယံးရမံယၤ 22

¹ယွၤတဲဘၣ်ယၤလၢယကလဲၤဆူစီၤဒၤဝံးအစၢၤအသွဲၣ်, ကီၢ်ယူဒၤအစီၤပၤ, အနူၢ်အစီၤန့ၣ်လီၤ.

²ဒီးဖဲန့ၣ်မၢယတဲဘၣ်စီၤပၤ, အပဒိၣ်ပပှၢ်တဖၣ်, ဒီးဝ့ၢ်ယရူၤၡလ့ၣ် အပှၤဂီၢ်မုၢ်လၢကဒိကနၣ်တၢ်လၢယွၤစံးတ့ၢ်ဝဲန့ၣ်လီၤ.

³“ယၤ, ယွၤအံၤ, ယမၤလိာ်သုဒ်သိးသုကမၤတၢ်စံၣ်ညီၣ်တီဒီးတၢ် အဘၣ်န့ၣ်လီၤ. အိၣ်ပှိၤမၤစၢၤပှၤတဂၤလၢအဘၣ်တၢ်လီ န့ၢ်အီၤ, လၢပှၤတဂၤလၢအလီန့ၢ်အီၤအစုပူၤတက့ၢ်. မၤအၢမၤသီမ့ၢ်ဂ့ၤမၤနးမၤဖှီၣ်ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်မ့တမ့ၢ်ပှၤမုၣ်ကမဲတဖၣ်တဂ့ၤ. ဒီးမၤသံပှၤလၢအတၢ်ကမၣ်တအိၣ်တဖၣ် လၢတၢ်လီၢ်စီဆှံအံၤအပူၤန့ၣ်တဂ့ၤ.

⁴သုမ့ၢ်မၤဒ်ယမၤလိာ်တ့ၢ်သုနီၢ်နီၢ်ဒီး, စီၤဒၤဝံးအစၢၤ အသွဲၣ်တဖၣ်ကမ့ၢ်ဒံးဒၣ်စီၤပၤတဖၣ်ဆူညါပှီၢ်ပှီၢ်န့ၣ်လီၤ. ဒီးအဝဲသ့ၣ်, ဃုာ်ဒီးအပဒိၣ်ပပှၢ်တဖၣ်ဒီးအပှၤဂီၢ် မုၢ်တဖၣ်ကနုာ်က့ၤဟးထီၣ်ဒံးဒၣ်လၢနူၢ်ဧိၤစီၤဧိၤအံၤအတြဲၤ တဖၣ်လၢလ့ၣ်ကဟၣ်တဖၣ်အပူၤဒီးလၢကသ့ၣ်တဖၣ်အဖီခိၣ်န့ၣ်လီၤ.

⁵ဘၣ်ဆၣ်ဒီးသုမ့ၢ်တစူၢ်ယတၢ်မၤလိာ်တဖၣ်ဘၣ်ဒီး, ယဆိၣ်တၢ်ဒီးသုလၢနူၢ်ဧိၤစီၤဧိၤအံၤကလီၤပှီၢ် ဟးဂီၤကွံာ်ဝဲန့ၣ်လီၤ. ယၤ, ယွၤအံၤ, ကတိၤလံတၢ်လံ.

⁶လၢယဂီၢ်န့ၣ်, ကီၢ်ယူဒၤအစီၤပၤအနူၢ်ဧိၤစီၤဧိၤအံၤ ဃံဝဲလၤဝဲဒ်ကီၢ်ကံးလဧးဒီးဒ်လဘၤနိၣ်အကစၢၢ်ကလိတဖၣ် အသိးန့ၣ်လီၤ. ဘၣ်ဆၣ်ဒီးယကဒုးကဲထီၣ်အီၤလၢတၢ်လီၢ် အိၣ်သယုၢ်သညိတတီၤဖဲပှၤတအိၣ်တဆိးဝဲနီတဂၤဘၣ်န့ၣ်လီၤ.

⁷ယဆှၢလီၤပှၤကညီတဖၣ်လၢကမၤဟးဂီၤကွံာ်အီၤန့ၣ်လီၤ. အဝဲသ့ၣ်ခဲလၢာ်ကဟဲစိာ်အကွါတဖၣ်, ကကူာ်လီၤကွံာ်အသ့ၣ်ဆှိ အ့ရ့းအထူၣ်အဃံအလၤတဖၣ်, ဒီးကွံာ်လီၤကွံာ်အီၤဆူမ့ၣ်အူ အပူၤန့ၣ်လီၤ.

⁸တၢ်န့ၣ်အလီၢ်ခံ, ပှၤတခီဘီမုၢ်ဖိအါဂၤကလဲၤခီဂာ်တၢ်ဒီး သံကွၢ်လိာ်သးတဂၤဒီးတဂၤ, ဘၣ်မနုၤအဃိလၢယၤ, ယွၤအံၤ, ယမၤဘၣ်တ့ၢ်ဝ့ၢ်ဖးဒိၣ်အံၤလၢတၢ်ဒ်သိးအံၤတမံၤလဲၣ်န့ၣ်လီၤ.

⁹အန့ၣ်ဒီး, အဝဲသ့ၣ်ကစံးဆၢဝဲဒၣ်လၢ, တၢ်အံၤမ့ၢ်လၢနၤလဲၤ သဒၣ်ကွံာ်နတၢ်အၢၣ်လီၤအီလီၤဒီးယၤ, နကစၢ်ယွၤဒီးဘူၣ်ထီၣ်ဘါထီၣ်ဒီးမၤကစၢ်အဂၤတဖၣ်အတၢ် အဃိန့ၣ်လီၤ.”

¹⁰ကီၢ်ယူဒၤအပှၤဂီၢ်မုၢ်သ့ၣ်ဧၢ, ဟီၣ်တၢ်ယၢၤတၢ်လၢစီၤပၤ စီၤယိၤၡံယၤအဂီၢ်တဂ့ၤ. သူၣ်အုးသးအုးလၢအဝဲအတၢ်သံအဃိန့ၣ်တဂ့ၤ. မ့မ့ၢ်တခီ, ဟီၣ်နးနးကလဲာ်လၢအဝဲအဖိခွါ စီၤယဟိအါဃးအဃိန့ၣ်တက့ၢ်. အဝဲသ့ၣ်က့ၤစိာ်ကွံာ်အီၤလံ. တဟဲက့ၤနီတဘျီလၢၤဘၣ်ဒီးတထံၣ်ဘၣ်လၢၤထံကီၢ်လၢအဝဲ အိၣ်ဖျဲၣ်ထီၣ်ဝဲန့ၣ်နီတစုလၢၤဘၣ်.

¹¹ယွၤစံးတၢ်ဘၣ်ဃးဒီးစီၤယိၤၡံယၤအဖိခွါစီၤယဟိအါဃးလၢ အထီၣ်က့ၤအပၢ်အလီၢ်ဒ်ကီၢ်ယူဒၤအစီၤပၤအသိးအဂ့ၢ်ဒ်အံၤ, “အဝဲဟးထီၣ်လၢတၢ်လီၢ်ဖဲအံၤဒီးတဟဲက့ၤကဒါက့ၤနီတစုလၢၤဘၣ်.

¹²အဝဲဒၣ်ကသံလၢထံကီၢ်လၢပှၤလဲၤစိာ်ကွံာ်အီၤအပူၤ, ဒီးအဝဲဒၣ်တထံၣ်ဘၣ်ကဒီးထံကီၢ်အံၤနီတစုလၢၤဘၣ်.”

¹³ပှၤတဂၤလၢအသူၣ်ထီၣ်အဟံၣ်လၢတၢ်စံၣ်ညီၣ်တတီဘၣ်အပူၤ, ဒီးမၤလဲၢ်ထီၣ်အီၤလၢတၢ်တတီတလိၤအပူၤ, ပှၤတဂၤလၢအမၢအထံဖိကီၢ်ဖိမၤတၢ် ဒီးတဟ့ၣ်ဘူးဟ့ၣ်လဲဝဲဘၣ်န့ၣ်, ကဘၣ်တၢ်စံၣ်ညီၣ်ဃါမနၤလီၤ.

¹⁴ပှၤတဂၤလၢအစံးဝဲ, “ယကသူၣ်ထီၣ်ဟံၣ်ဒိၣ်ကျိၤသွါတဖျၢၣ်လၢယဂီၢ်ဒၣ်ယဲ အိၣ်ဒီးဒၢးဖးလဲၢ်တဖၣ်လၢအဖီခိၣ်တကထၢန့ၣ်လီၤ. ဝံၤဒီးအဝဲဒၣ်မၤထီၣ်ပဲတြီဖိတဖၣ်လၢအဟံၣ်အပူၤ, မၤထီၣ်ဂီၤပၤတဖၣ်လၢသ့ၣ်ဆှိအ့ရ့း ဒီးဖှူအီၤလၢကသံၣ်အဂီၤန့ၣ်လီၤ. ပှၤတဂၤအံၤဘၣ်တၢ်စံၣ်ညီၣ်ဃါမနၤန့ၣ်လီၤ.

¹⁵နမ့ၢ်သူၣ်ထီၣ်ဟံၣ်တဖၣ်လၢသ့ၣ်ဆှိအ့ရ့းလၢအဂ့ၤန့ၢ်ဒံးပှၤအဂၤ အဟံၣ်တဖၣ်ဒီး, တၢ်န့ၣ်ကဒုးကဲထီၣ်နၤလၢစီၤပၤအဂ့ၤအါဒိၣ်တဂၤဧါ. နပၢ်မုာ်လၤသးခုလၢတၢ်အိၣ်မူအလၢအပှဲၤလီၤ. ထီဘိတထံၣ်ဃီန့ၣ်, အဝဲစံၣ်ညီၣ်တီတၢ်ဒီးတကွၢ်မဲာ်တၢ်ဘၣ်. ဒီးအဝဲဘီၣ်ထီၣ်ညီထီၣ်တ့ၢ်လၢတၢ်ကိးမံၤဒဲးလၢအဝဲမၤတ့ၢ်ဝဲအပူၤန့ၣ်လီၤ.

¹⁶အဝဲစံၣ်ညီၣ်န့ၢ်ပှၤဖှီၣ်ဖိယာ်ဖိတဖၣ်အကွီၢ်တီတီလိၤလိၤ ဒီးတၢ်ခဲလၢာ်လဲၤအသးဂ့ၤဂ့ၤဘၣ်ဘၣ်လၢအဂီၢ်လီၤ. တၢ်န့ၣ်အခီပညီမ့ၢ်တၢ်သ့ၣ်ညါယွၤန့ၣ်လီၤ.

¹⁷မ့မ့ၢ်နဲနထံၣ်သ့ဒၣ်ထဲနတၢ်သး စဲတဖၣ်လၢနတၢ်အဲၣ်လီၤနသးအပူၤန့ၣ်လီၤ. နမၤသံပှၤလၢအတၢ်ကမၣ်တအိၣ်တဖၣ် ဒီးမၤနးမၤဖှီၣ်ဆူၣ်နပှၤဂီၢ်မုၢ်န့ၣ်လီၤ. ယွၤကတိၤလံတၢ်လံ.”

¹⁸လၢတၢ်န့ၣ်အဃိ, ယွၤကတိၤတၢ်ဘၣ်ဃးစီၤယိၤၡံယၤအဖိခွါ, ကီၢ်ယူဒၤအစီၤပၤစီၤယဟိၤယါကံၣ်အဂ့ၢ်ဒီးစံးဝဲ, “ပှၤတသူၣ်အုးသးအုးလၢအဝဲ အတၢ်သံအဃိဒီးစံး, တၢ်နးဒိၣ်မးလဲၣ် ယတံၤသကိးဧၢ, တၢ်နးဒိၣ်မးလဲၣ်, နီတဂၤဘၣ်. ပှၤတဟီၣ်တယၢၤလၢအဃိဒီးကိးထီၣ်, ယကစၢ်ဧၢ, ယစီၤပၤဧၢ, နီတဂၤဘၣ်.

¹⁹အဝဲကအိၣ်ဒီးတၢ်ခူၣ်လီၤအီၤအလၤကပီၤထဲသိးဒၣ်ကသ့ၣ်ယီၤ တဒုန့ၣ်လီၤ. အဝဲကဘၣ်တၢ်တွံၢ်ထုးထီၣ်အီၤ ဒီးကွံာ်ကွံာ်အီၤလၢဝ့ၢ်ယရူၤၡလ့ၣ်အတြဲၤတဖၣ်အချၢန့ၣ်လီၤ.”

²⁰ဝ့ၢ်ယရူၤၡလ့ၣ်အပှၤဂီၢ်မုၢ်သ့ၣ်ဧၢ, လဲၤဆူကီၢ်လဘၤနိၣ်ဒီး ကိးသတြီထီၣ်, လဲၤဆူကီၢ်ဘၤၡၣ်ဒီးကိးထီၣ်တက့ၢ်. ကိးပသူထီၣ်လၢကီၢ်မိၤအးအကစၢၢ်တဖၣ်တက့ၢ်. အဂ့ၢ်ဒ်အံၤ, နသိၣ်နမှံၤခဲလၢာ်ဘၣ်တၢ်မၤနၢၤမၤဃၣ်ကွံာ်အီၤလံ.

²¹ယွၤကတိၤတၢ်ဒီးနၤဖဲနဘီၣ်ထီၣ်ညီထီၣ်အခါ, ဘၣ်ဆၣ်နတဒိကနၣ်ဘၣ်. တၢ်န့ၣ်မ့ၢ်တၢ်လၢနမၤတ့ၢ်အီၤလၢနသးသမူဒီကတီၢ်ညါလီၤ. နတစူၢ်ဘၣ်ယွၤနီတစုဘၣ်.

²²နပှၤခိၣ်ပှၤနၢ်တဖၣ်ကဘၣ်တၢ်အူဒံဖျိးကွံာ်အီၤ လၢကလံၤ, နသိၣ်နမှံၤတဖၣ်ကဘၣ်တၢ်မၤန့ၢ်အီၤဒီးစိာ်ကွံာ်အီၤ ဒ်တၢ်ဒုးတၢ်ယၤအကုၢ်အပှၤတဖၣ်, နဝ့ၢ်ကဘၣ်တၢ်မၤမဲာ်ဆှးအီၤဒီးကဲထီၣ် တၢ်မဲာ်ဆှးအလီၢ်, မ့ၢ်လၢကယဲၢ်တၢ်အၢတၢ်သီခဲလၢာ် လၢနမၤတ့ၢ်တဖၣ်အဃိန့ၣ်လီၤ.

²³နအိၣ်ဂၢၢ်ဆိးကျၢၤလၢသ့ၣ်ဆှိအ့ရ့းတဖၣ်လၢအဘၣ်တၢ်ဟဲက့ၤ စိာ်လၢကီၢ်လဘၤနိၣ်အကျါန့ၣ်လီၤ. ဘၣ်ဆၣ်ဒီး, တၢ်မၤဆူးမၤဆါလၢ အလီၤဂာ်ဒ်ပိာ်မုၣ်တဂၤအဟုးဆါထီၣ်အသိး, မ့ၢ်ဟဲ မၤဘၣ်ဒိဘၣ်ထံးနၤဒီး, နကလီၤသးကညီၤဆံးအါလဲၣ်.

²⁴ယွၤစံးဘၣ်ကီၢ်ယူဒၤအစီၤပၤစီၤယဟိယါကံၣ်အဖိခွါ စီၤယဟိယါခံၣ်, “ဒ်ယမ့ၢ်နီၢ်နီၢ်ကစၢ်ယွၤလၢအမူဝဲတဂၤအသိး, နမ့မ့ၢ်ဒၣ်လဲာ်တၢ်စဲပနီၣ်အပသံးတဘိလၢယစုထွဲအလိၤန့ၣ်, ယကဘ့ၣ်လီၤကွံာ်နၤ,

²⁵ဒီးဟ့ၣ်လီၤနၤဆူပှၤဂီၢ်မုၢ်လၢနပျံၤအီၤ, ပှၤဂီၢ်မုၢ်လၢအသးအိၣ် မၤသံနၤအစုပူၤန့ၣ်လီၤ. ယကဟ့ၣ်လီၤနၤဆူကီၢ်ဘၤဘူၤလိၣ် အစီၤပၤနဘူၤကးန့စၢ်ဒီးအသုးမုၢ်သံၣ်ဘိတဖၣ်အစုပူၤန့ၣ်လီၤ.

²⁶ယကဟီထီၣ်ဆူၣ်ကွံာ်နၤဒီးနမိၢ်ဆူတၢ်စိာ်မၢကဲကုၢ်အပူၤလီၤ. နကလဲၤဆူထံကီၢ်တဘ့ၣ်လၢနၤမ့ၢ်ဂ့ၤ, နမိၢ်မ့ၢ်ဂ့ၤတအိၣ်ဖျဲၣ်ထီၣ်ဘၣ်လၢအပူၤ, ဒီးသုဝဲခံဂၤလိာ်သုကသံဖဲန့ၣ်လီၤ.

²⁷သုကဆၢထံၣ်ဘၣ်က့ၤကဒီးထံကီၢ်အံၤတဘျီ, ဘၣ်ဆၣ်ဒီးသု တဟဲက့ၤဘၣ်နီတစုလၢၤဘၣ်.”

²⁸ယစံးယဲ, “မ့ၢ်စီၤပၤယဟိၤယါခံၣ်ကဲထီၣ်ဒ်သပၢၤသ့ၣ်ဖး တဖျၢၣ်အသိးလၢအဘၣ်တၢ်စူးကွံာ်အီၤဒီးပှၤတသးလီအီၤ နီတဂၤဘၣ်န့ၣ်ဧါ. လၢတၢ်န့ၣ်အဃိ, မ့ၢ်အဝဲဒီးအဖိတဖၣ်ဘၣ်တၢ်စိာ်ကွံာ်အီၤဆူတၢ်မၢကဲကုၢ်အလီၢ်, တၢ်လီၢ်လၢအဝဲသ့ၣ်တသ့ၣ်ညါဝဲလၢအဂ့ၢ်နီတမံၤန့ၣ်ဧါ.”

²⁹အိဟီၣ်ခိၣ်ဧၢ, ဟီၣ်ခိၣ်ဧၢ, ဒိကနၣ်တၢ်လၢယွၤစံးတ့ၢ်ဝဲန့ၣ်တက့ၢ်.

³⁰“ပှၤတဂၤအံၤဘၣ်တၢ်စံၣ်ညီၣ်ဃၣ်အီၤလၢကမ့ၢ်ပှၤတူာ်ဖိ, ဒီးတကဲထီၣ်ပှၤတဂၤလၢကမၤန့ၢ်မၤနၢၤတၢ် နီတစုဘၣ်လီၤ. အဝဲအစၢၤအသွဲၣ်တဖၣ်လၢကပၢဘၣ်တၢ်လၢ ကီၢ်ယူဒၤအပူၤ ဒ်ပှၤထီၣ်က့ၤစီၤဒၤဝံးအလီၢ်ပစိာ်တအိၣ်နီတဂၤဘၣ်. ယွၤအံၤ, ကတိၤလံတၢ်လံ.”