Read S'gaw Karen လံာ်ယံးရမံယၤ 27 Bible Online

လံာ်ယံးရမံယၤ 27 - S'gaw Karen bible

လံာ်ယံးရမံယၤ 27

¹ဖဲစီၤယိၤၡံယၤ အဖိခွါ စီၤစံးဒကံယၤကဲထီၣ် ကီၢ်ယူဒၤ အစီၤပၤဝံၤ တယံာ်ဘၣ်န့ၣ်, ယွၤတဲဘၣ်ယၤလၢ,

²ယကမၤနီၣ်ယိးဘိတဘိလၢ ယဂီၢ်ဒၣ်ယဲလၢ ပျံၤတၢ်ဖံးဒီးသ့ၣ် အဘိဒီးယကယိးထီၣ်အီၤလၢ ယကိာ်လိၤန့ၣ်လီၤ.

³အန့ၣ်ဝံၤဒီး ယွၤတဲဘၣ်ယၤလၢ ယကဆှၢလီၤတၢ်ကစီၣ် တမံၤဆူ စီၤပၤတဖၣ်လၢ ကီၢ်အဒိၣ်, ကီၢ်မိၤအး, ကီၢ်ဧၣ်မိၣ်, ဝ့ၢ်ထါယၢၣ်ဒီး ဝ့ၢ်စံဒိၣ်, ခီဖျိအဝဲသ့ၣ်အမီၣ်သီမီၣ်လါတဖၣ် လၢ အဟဲတ့ၢ်ဆူ ဝ့ၢ်ယရူၤရှလ့ၣ်ဒ်သိး ကထံၣ်စီၤပၤစံးဒကံယၤ အဂီၢ်န့ၣ်လီၤ.

⁴ယွၤသ့တၢ်လၢာ်, အံၣ်စရ့လး အကစၢ်ယွၤ, တဲဘၣ်ယၤလၢ ယကမၤလိာ်အဝဲသ့ၣ်ဒ်သိး အကတဲဘၣ် အစီၤပၤတဖၣ်လၢ ယွၤစံးတ့ၢ်ဝဲဒ်အံၤ,

⁵“လၢယစိဒိၣ်ကမီၤဒိၣ်ဒီး ယဂံၢ်ယဘါဒၣ်ယဲန့ၣ်, ယတ့လီၤပာ်လီၤ ဟီၣ်ခိၣ်, ပှၤကညီ, ဒီးဆၣ်ဖိကီၢ်ဖိခဲလၢာ်လၢအအိၣ်ဆိးလၢ ဟီၣ် ခိၣ်အဖီခိၣ်, ဒီးယဟ့ၣ်လီၤအီၤဆူ ပှၤတဂၤလၢ်လၢ်လၢယဃုထၢအီၤ န့ၣ်လီၤ.

⁶ယမ့ၢ်ပှၤတဂၤလၢ အပာ်လီၤပှၤကလုာ်ခဲလၢာ်အံၤလၢယခ့ယပှၤ ကီၢ်ဘၤ ဘူၤလိၣ်အစီၤပၤနဘူၤကးန့ စၢ်အစိကမီၤအဖီလာ်ဒီးယဒုးမၤဒၣ်လဲာ် ဆၣ်ဖိကီၢ်ဖိအမံၤတဖၣ်လၢ အဝဲအတၢ်မၤန့ၣ်လီၤ.

⁷ပှၤကလုာ်ခဲလၢာ် ကမၤအဝဲအတၢ်, ဒီးအဝဲသ့ၣ် ကမၤအဝဲအဖိခွါဒီး အဝဲအလံၤအတၢ်တုၤလီၤလၢ တၢ်ဆၢကတီၢ် ဟဲတုၤဝဲလၢ အဝဲအပှၤကလုာ်ဒၣ်ဝဲ ကလီၤပှီၢ်န့ၣ်လီၤ. ဝံၤဒီး အဝဲအပှၤကလုာ်ကမၤ ပှၤကလုာ်ဒိၣ်စိဒိၣ်ကမီၤတဖၣ် ဒီး စီၤပၤဖးဒိၣ်တဖၣ် အတၢ်န့ၣ်လီၤ.

⁸ဘၣ်ဆၣ်ဒီး, ပှၤကလုာ်တကလုာ်လၢ်လၢ်မ့ၢ်ဂ့ၤ, ဘီမုၢ်တဘ့ၣ် လၢ်လၢ်မ့ၢ်ဂ့ၤ, မ့ၢ်တဆီၣ်လီၤအသးလၢ အဝဲအတၢ်ပၢအဖီလာ် ဘၣ်ဒီး, ယကစံၣ်ညီၣ်ပှၤကလုာ်အဝဲန့ၣ်ခီဖျိ တၢ်ဒုးတၢ်ယၤ, တၢ် သၣ်ဝံၤလီၤဒိ, ဒီးတၢ်ဆူးတၢ်ဆါတုၤလီၤလၢယပျဲစီၤနဘူၤကးန့ စၢ်မၤဟးဂီၤကွံာ်အီၤလၢာ်လၢာ်ဆ့ဆ့ တစုန့ၣ်လီၤ.

⁹ဒိကနၣ်သုဝံတဖၣ် မ့တမ့ၢ်, ပှၤတဂၤဂ့ၤတဂၤဂ့ၤလၢ အစံးဝဲလၢ သါကတိၤဆိပာ်တၢ်ကမၤအသးဆူညါ သ့ဝဲခီဖျိလၢ တၢ်မံမီၢ်တဖၣ်မ့ၢ်ဂ့ၤ, ခီဖျိလၢ တၢ်ကိးထီၣ်ပှၤသံအလၤတဖၣ် မ့ၢ်ဂ့ၤ, ဒီးခီဖျိလၢ တၢ်မၤကဒါမဲာ်မ့ၢ်ဂ့ၤ အကလုၢ်န့ၣ်တဂ့ၤ. အဝဲသ့ၣ်ခဲလၢာ်တဲဘၣ် သုလၢသုတဘၣ်ဆီၣ်လီၤသုသးလၢ ကီၢ်ဘၤဘူၤလိၣ်အစီၤပၤအဖီလာ် တဂ့ၤန့ၣ်လီၤ.

¹⁰အဝဲသ့ၣ်လီန့ၢ်သုဒီး ကဒုးလီၤဘၣ်သုလၢ တၢ်စိာ်ထီၣ်ကွံာ်သုဆူ တၢ်လီၢ်လၢ အယံၤဒီး သုထံသုကီၢ်န့ၣ်လီၤ. ယကနီၣ်ထီၣ်ဟီထီၣ် ကွံာ်သုဒီး သုကဘၣ်တၢ်မၤဟးဂီၤကွံာ်သုန့ၣ်လီၤ.

¹¹ဘၣ်ဆၣ်ဒီး, ပှၤတကလုာ်လၢ်လၢ်မ့ၢ်, ဆီၣ်လီၤအသးလၢ ကီၢ်ဘၤဘူၤလိၣ်အစီၤပၤအဖီလာ်ဒီး မၤဝဲအတၢ်မၤဒီး, ယကပျဲအီၤလၢကအိၣ်ဘၣ်ဆိးဘၣ်ဒံး ဝဲလၢအထံအကီၢ်ဒၣ်ဝဲအပူၤ, လၢကထူစံာ်ထူပှဲၤဒီးအိၣ်ဝဲဆိးဝဲဖဲန့ၣ်အဂီၢ်န့ၣ်လီၤ. ယၤ, ယွၤအံၤ, ကတိၤလံတၢ်လံ.

¹²ယစံးတ့ၢ်တၢ်တမံၤဃီၤအံၤ ဆူကီၢ်ယူဒၤအစီၤပၤစံးဒကံယၤ, ဆီၣ်လီၤနသးလၢ ကီၢ်ဘၤဘူၤလိၣ်အစီၤပၤအဖီလာ်တက့ၢ်. မၤအဝဲအတၢ်ဒီး အပှၤဂီၢ်မုၢ်အတၢ်ဒီး နကမူနဲလီၤ.

¹³ဘၣ်မနုၤအဃိ နဲဒၣ်ဒီးနပှၤဂီၢ်မုၢ် ဘၣ်သံလၢ တၢ်ဒုးတၢ်ယၤအပူၤမ့ၢ်ဂ့ၤ, လၢတၢ်သၣ်ဝံၤလီၤဒိအဃိမ့ၢ်ဂ့ၤ, လၢတၢ်ဆူးတၢ်ဆါ အဃိမ့ၢ်ဂ့ၤန့ၣ်လဲၣ်. တၢ်န့ၣ်မ့ၢ်တၢ်လၢယွၤစံးတ့ၢ်ဝဲလၢ အကမၤအသးဒီး ပှၤတကလုာ်ဂ့ၤတကလုာ်ဂ့ၤလၢ အတဆီၣ်လီၤ ဘၣ်အသးလၢ ကီၢ်ဘၤဘူၤလိၣ်အစီၤပၤအဖီလာ်န့ၣ်လီၤ.

¹⁴ဒိကနၣ်ဝံတဖၣ်လၢ အတဲဘၣ်သုလၢ သုတဟ့ၣ်လီၤသုသးလၢ အဝဲအစုပူၤတဂ့ၤ, အကလုၢ်န့ၣ်တဂ့ၤ. အဝဲသ့ၣ်လီန့ၢ်သုလီၤ.

¹⁵ယွၤအကစၢ်ဒၣ်ဝဲ စံးတ့ၢ်လၢ, သါတမၢလီၤဘၣ်အဝဲသ့ၣ်န့ၣ်ဘၣ်. ဒီးမ့ၢ်ဒၣ်အဝဲသ့ၣ်လီန့ၢ် သုလၢသါမံၤအပူၤန့ၣ်လီၤ. လၢတၢ်န့ၣ်အဃိ, အဝဲကနီၣ်ထီၣ်ဟီထီၣ်ကွံာ်သု, ဒီးတၢ်ကမၤသံသုဝဲဒီး ဝံတဖၣ်လၢ အတဲဘၣ်သုတၢ်လီတၢ်ဝ့ၤတဖၣ်အံၤလီၤ.”

¹⁶အန့ၣ်ဝံၤဒီး, ယတဲဘၣ်ပှၤလုၢ်တၢ်အခိၣ်တဖၣ်ဒီးပှၤဂီၢ်မုၢ်လၢ တၢ်လၢယွၤစံးတ့ၢ်ဝဲဒ်အံၤ, “ဒိကနၣ်ဝံတဖၣ်လၢ, အစံးဘၣ် သုလၢတယံာ်လၢၤဘၣ်န့ၣ် ယွၤအတၢ်လုၢ်ဟံၣ် အတၢ်လုၢ်ဒိၣ် ပှ့ၤဒိၣ်တဖၣ် ကဘၣ်တၢ်ဟဲက့ၤစိာ်ကဒါက့ၤအီၤလၢကီၢ်ဘၤဘူၤ လိၣ်လီၤ, အကလုၢ်န့ၣ်တဂ့ၤ. အဝဲသ့ၣ်လီန့ၢ်ဒၣ်သုလီၤ.

¹⁷ဒိကနၣ်အဝဲသ့ၣ်တဂ့ၤ. ဆီၣ်လီၤသုသးလၢ ကီၢ်ဘၤဘူၤလိၣ် အစီၤပၤအဖီလာ်ဒီး သုကမူလီၤ. ဘၣ်မနုၤအဃိ ဝ့ၢ်အံၤကဘၣ် ကဲထီၣ်တၢ်ဟးဂီၤတဖၣ်အပူၣ်တပူၣ်န့ၣ်လဲၣ်.

¹⁸အဝဲသ့ၣ်မ့မ့ၢ်ဝံနီၢ်နီၢ်တဖၣ်ဒီး အဝဲသ့ၣ်မ့ၢ်အိၣ်ဒီးယတၢ်ကစီၣ်န့ၣ်ဒီး, မ်အဝဲသ့ၣ်ဃ့ကညးယၤ, ယွၤသ့တၢ်လၢာ်လၢ, ယသုတပျဲ တၢ်စိာ်ထီၣ်ကွံာ်တၢ်လုၢ်ဒိၣ်ပှ့ၤဒိၣ်တဖၣ်လၢ အအိၣ်တ့ၢ်ဒံးလၢ ယွၤအတၢ်လုၢ်ဟံၣ်အပူၤ ဒီးစီၤပၤအနူၢ်ပူၤန့ၣ်, ဆူကီၢ်ဘၤဘူၤလိၣ်တဂ့ၤ, န့ၣ်တက့ၢ်.

¹⁹(မ့ၢ်လၢ ယွၤစံးတ့ၢ်ဝဲလၢ, ထူၣ်တဖၣ်, ထံဒၢတိၢ်ဖးဒိၣ်, လ့ၣ်တဖၣ် ဒီးယွၤအတၢ်လုၢ်ဟံၣ် အတၢ်လုၢ်ဒိၣ်ပှ့ၤဒိၣ် အဂၤတနီၤကဘၣ်တၢ် ပာ်တ့ၢ်အီၤဖဲဝ့ၢ်ပူၤအဃိ,

²⁰ဖဲစီၤပၤနဘူၤကးန့စၢ်က့ၤကိးကွံာ်စီၤယဟိၤယါကံၣ်အဖိခွါ, ကီၢ်ယူဒၤအစီၤပၤ စီၤယဟိၤယါခံၣ်ဒီး ကီၢ်ယူဒၤဒီးဝ့ၢ်ယရူၤရှလ့ၣ် အပှၤခိၣ်ပှၤနၢ်တဖၣ် ဆူကီၢ်ဘၤဘူၤလိၣ်အခါန့ၣ်, အဝဲတက့ၤစိာ် ဘၣ်တၢ်တဖၣ်န့ၣ်ဘၣ်.)

²¹ဒိကနၣ်တၢ်လၢယၤ, ယွၤသ့တၢ်လၢာ်, အံၣ်စရ့လးအကစၢ်ယွၤ စံးတၢ်ဘၣ်ဃးတၢ်လုၢ်ဒိၣ်ပှ့ၤဒိၣ်တဖၣ်လၢ အဘၣ်တၢ်ပာ်လီၤတဲာ် အီၤလၢ ယွၤအတၢ်လုၢ်ဟံၣ်အပူၤဒီး စီၤပၤအနူၢ်ပူၤလၢဝ့ၢ်ယရူၤရှလ့ၣ် အပူၤအဂ့ၢ်န့ၣ်တက့ၢ်.

²²တၢ်သ့ၣ်တဖၣ်အံၤ ကဘၣ်တၢ်စိာ်ထီၣ်ကွံာ်အီၤဆူ ကီၢ်ဘၤဘူၤလိၣ် ဒီးကအိၣ်ဖဲန့ၣ် တုၤယဆိကမိၣ်ဒီး သ့ၣ်နီၣ်ထီၣ်က့ၤ အဝဲသ့ၣ်တစုန့ၣ်လီၤ. အန့ၣ်ဝံၤဒီး, ယကဟဲစိာ်ကဒါက့ၤအီၤဒီး ပာ်ကဒါက့ၤအဝဲသ့ၣ်လၢတၢ်လီၢ်အံၤန့ၣ်လီၤ. ယၤ, ယွၤအံၤ, ကတိၤလံတၢ်လံ.