Read S'gaw Karen လံာ်ယံးရမံယၤ 29 Bible Online

လံာ်ယံးရမံယၤ 29 - S'gaw Karen bible

လံာ်ယံးရမံယၤ 29

¹ယကွဲးဃီၤလံာ်ပရၢတဘ့ၣ်ဆူ ပှၤလုၢ်တၢ်အခိၣ်တဖၣ်, ဝံတဖၣ်, ပှၤဂီၢ်မုၢ်အခိၣ်အနၢ်တဖၣ်, ဒီးဆူပှၤအဂုၤအဂၤတဖၣ်လၢ စီၤနဘူၤကးန့စၢ်က့ၤကိးအီၤဒ်ပှၤဘၣ်တၢ်စိာ်မၢကဲကုၢ်အီၤအသိး တဖၣ်, လၢဝ့ၢ်ယရူၤရှလ့ၣ်ဆူ ကီၢ်ဘၤဘူၤလိၣ်အအိၣ်န့ၣ်လီၤ.

²ယကွဲးတ့ၢ်အီၤဖဲ စီၤပၤယဟိၤယါခံၣ်, အဝဲအမိၢ်, နူၢ်ဧိၤစီၤဧိၤ အပဒိၣ်ပပှၢ်တဖၣ်, ကီၢ်ယူဒၤဒီးဝ့ၢ်ယရူၤရှလ့ၣ်အခိၣ်အနၢ်တဖၣ်ဒီး ပှၤမၤတၢ်စုသ့ခီၣ်သ့ အတၢ်မၤတဖၣ်, ဒီးပှၤမၤတၢ်ဖိလၢ အသ့လီၤဆီ တဖၣ်, ဘၣ်တၢ်စိာ်မၢကဲကုၢ်အီၤဝံၤ အလီၢ်ခံန့ၣ်လီၤ.

³ယအးလီၤလံာ်ပရၢန့ၣ် ဆူစီၤၡၤဖၣ်အဖိခွါ စီၤအ့လၤစၤ ဒီး, စီၤဃံးလကံယၤအဖိခွါ စီၤကမၤရယၤအစုပူၤ, ပှၤတဖၣ် လၢကီၢ်ယူဒၤအစီၤပၤ စံးဒကံယၤမၢလီၤအီၤဒ်သိးကလဲၤ ဆူကီၢ်ဘၤဘူၤလိၣ်အစီၤပၤ နဘူၤကးန့စၢ်, အအိၣ်အဂီၢ်န့ၣ် လီၤ. လံာ်ပရၢစံးတၢ်ဒ်အံၤ,

⁴ယွၤသ့တၢ်လၢာ်, “အံၣ်စရ့လးအကစၢ်ယွၤ စံးဘၣ်ပှၤဂီၢ်မုၢ် ခဲလၢာ်လၢ အဝဲပျဲတ့ၢ်စီၤနဘူၤကးန့စၢ်ကက့ၤစိာ်မၢကဲကုၢ် အီၤ လၢဝ့ၢ်ယရူၤရှလ့ၣ်ဆူ ကီၢ်ဘၤဘူၤလိၣ်အံၤ,

⁵‘ဘှီထီၣ်ဟံၣ်ဧိၤဃီဧိၤတဖၣ်ဒီး သူၣ်လီၤသုအိၣ်သုဆိး အလီၢ်တက့ၢ်. သူၣ်လီၤဖျးလီၤတၤသၣ်လီၢ်တဖၣ်ဒီးအီၣ်တၢ်လၢသု သူၣ်လီၤဖျးလီၤအီၤလၢ အပူၤန့ၣ်တက့ၢ်.

⁶ဆီဟံၣ်ဆီဃီဒီး မၤန့ၢ်ဖိတဖၣ်တက့ၢ်. အန့ၣ်ဝံၤဒီး ပျဲသုဖိသုလံၤ ဆီဟံၣ်ဆီဃီဒ်သိး အဝဲသ့ၣ်စ့ၢ်ကီး အဖိအလံၤ ကအိၣ်ဝဲန့ၣ်တက့ၢ်. သုကဘၣ်အါထီၣ်လၢ နီၣ်ဂံၢ်ဒီး တဘၣ်စှၤလီၤဘၣ်.

⁷မၤတၢ်အဂ့ၤလၢ ဝ့ၢ်တဖၣ်အဂီၢ်, တၢ်လီၢ်ဖဲယမၢသုလဲၤအိၣ် လဲၤဆိးဒ် ပှၤဘၣ်တၢ်စိာ်မၢကဲကုၢ်တဖၣ်အသိး, န့ၣ်တက့ၢ်. ဘါထုကဖၣ်တၢ်ဆူ ယအိၣ်လၢအဝဲသ့ၣ်အခၢၣ်စးတက့ၢ်. အဂ့ၢ်ဒ်အံၤ, အဝဲသ့ၣ်မ့ၢ် ဘီၣ်ထီၣ်ညီထီၣ်ဒီး, သုကဘီၣ် ထီၣ်ညီထီၣ် စ့ၢ်ကီးန့ၣ်လီၤ.

⁸ယၤ, ယွၤ, အံၣ်စရ့လးအကစၢ်ယွၤအံၤ, ဟ့ၣ်ပလီၢ်သုဒ်သိး လၢဝံတဖၣ်လၢ အအိၣ်ဝဲဆိးဝဲလၢ သုကျါမ့ၢ်ဂ့ၤ, ပှၤအဂၤ တဖၣ် လၢအစံးလီၤအသးလၢ အဝဲသ့ၣ်ကတိၤဆိပာ် တၢ်ကမၤအသး ဆူညါအဂ့ၢ်သ့ဝဲ, မ့ၢ်ဂ့ၤ, သုတလီန့ၢ်သုတဂ့ၤ န့ၣ်လီၤ. ကနၣ်ဃုာ်အဝဲသ့ၣ်အတၢ်မံမီၢ်တဖၣ်န့ၣ်တဂ့ၤ.

⁹အဝဲသ့ၣ်တဲဘၣ်သုတၢ်လီတၢ်ဝ့ၤတဖၣ်လၢ ယမံၤအပူၤန့ၣ်လီၤ. ယတမၢလီၤဘၣ်အဝဲသ့ၣ်ဘၣ်. ယၤ, ယွၤသ့တၢ်လၢာ်အံၤ, ကတိၤလံတၢ်လံ.’

¹⁰ယွၤစံးဝဲဒၣ်, ‘ဖဲအနံၣ်နွံဆံလၢ ကီၢ်ဘၤဘူၤလိၣ်အပူၤ ပှဲၤထီၣ်ဝဲန့ၣ်, ယကဒုးနဲၣ် ယတၢ်သးအိၣ်ဘၣ်သုဒီး ဟံးဃာ်ဂၢၢ်ကျၢၤယတၢ်အၢၣ်လီၤလၢ ယကက့ၤစိာ်ကဒါက့ၤသုဆူ ဟံၣ်န့ၣ်လီၤ.

¹¹ယအိၣ်ဒီး ယတၢ်ကူၣ်ကျဲၤတဖၣ်လၢ သုဂီၢ်ဒီး ပှၤသ့ၣ်ညါဒၣ်ထဲ ယၤတဂၤဧိၤန့ၣ်လီၤ. မ့ၢ်တၢ်ကူၣ်ကျဲၤတဖၣ်လၢ ကဟဲစိာ်န့ၢ် သုတၢ်ဘီၣ်ထီၣ်ညီထီၣ်ဒီး တမ့ၢ်ဘၣ်တၢ်တတၢးတနါန့ၣ်ဘၣ်. မ့ၢ်တၢ်ကူၣ်ကျဲၤတဖၣ်လၢကဟဲစိာ်ခါဆူညါအတၢ်မုၢ်လၢ်လၢ သုဂီၢ်န့ၣ်လီၤ.

¹²အန့ၣ်ဒီး သုကကိးထီၣ်တၢ်ဆူ ယအိၣ်လီၤ. သုကဟဲဒီးဃ့ထုကဖၣ်တၢ်ဆူ ယအိၣ်ဒီးယကစံးဆၢသုန့ၣ်လီၤ.

¹³သုကဃုယၤဒီး သုကထံၣ်န့ၢ်ယၤ, မ့ၢ်လၢသုကဃုယၤလၢ သုသးဒီဖျၢၣ်ညါ အဃိန့ၣ်လီၤ.

¹⁴မ့ၢ်လံ, ယစံးယဲလၢ, သုကထံၣ်န့ၢ်ယၤ, ဒီးယကပာ်ကဒါက့ၤ သုလၢသုထံသုကီၢ်န့ၣ်လီၤ. ယကထၢဖှိၣ်သုလၢ ကယဲၢ်ကီၢ် ကိးဘ့ၣ်ဒဲး, ဒီးလၢကယဲၢ်တၢ်လီၢ်ကိးပူၤဒဲးလၢယမၤလီၤပြံလီၤပြါတ့ၢ်သု, ဒီးယကဟဲစိာ်ကဒါက့ၤသုဆူထံကီၢ်အပူၤလၢ ယတၢ်လီၢ်ဖဲ ယဆှၢဖျိးတ့ၢ်သုလၢတၢ်စိာ်မၢကဲကုၢ်အပူၤန့ၣ်လီၤ. ယၤ, ယွၤအံၤ, ကတိၤလံတၢ်လံ.”

¹⁵သုကစံးလၢ ယွၤဟ့ၣ်လီၤသုဝံတဖၣ်လၢ ကီၢ်ဘၤဘူၤလိၣ်အပူၤန့ၣ်လီၤ.

¹⁶ဒိကနၣ်တၢ်လၢ ယွၤစံးဝဲဘၣ်ဃးစီၤပၤလၢ အပၢဘီမုၢ်လၢ စီၤဒၤဝံးပၢတ့ၢ်ဝဲ အဂ့ၢ်ဒီးဘၣ်ဃးဒီး ဝ့ၢ်အံၤအပှၤဂီၢ်မုၢ်, လၢအမ့ၢ်, သုဘူးသုတံၢ်တဖၣ်လၢ အတဘၣ်တၢ် စိာ်ကွံာ်အီၤဃုာ်ဒီး သုဆူတၢ်စိာ်မၢကဲကုၢ်အပူၤဘၣ်, အဂ့ၢ်န့ၣ်တက့ၢ်.

¹⁷ယွၤသ့တၢ်လၢာ်စံးဝဲ, ယဒုးလီၤဘၣ်တၢ်ဒုး တၢ်ယၤ, တၢ်သၣ်ဝံၤလီၤဒိ, ဒီးတၢ်ဆူးတၢ်ဆါ လၢ အဝဲသ့ၣ်အလိၤဒီး ယကဒုးကဲထီၣ်အဝဲသ့ၣ် ဒ်သိးချၢၣ်ဒၢသၣ်တဖၣ်လၢ အအုၣ်ကဲၣ်ဆိးတုၤ ပှၤအီၣ်အီၤတသ့ဘၣ်န့ၣ်လီၤ.

¹⁸ယကလူၤအဝဲသ့ၣ်လၢ တၢ်ဒုးတၢ်ယၤ, တၢ်သၣ်ဝံၤ လီၤဒိ, ဒီးတၢ်ဆူးတၢ်ဆါဒီး ကယဲၢ်ပှၤကလုာ်လၢ ဟီၣ်ခိၣ်ချၢကဘၣ် တၢ်မၤပျံၤမၤဖုးအီၤလၢ တၢ်လၢ အဝဲသ့ၣ်ထံၣ်ဘၣ်ဝဲအဃိန့ၣ်လီၤ. တပူၤလၢ်လၢ် ဖဲယမၤလီၤပြံလီၤပြါအဝဲသ့ၣ်န့ၣ် ပှၤဂီၢ်မုၢ်ကကမၢကမၣ်ဒီး အိၣ်ဒီးတၢ်ပျံၤတၢ်ဖုးလၢ တၢ်လၢအမၤတ့ၢ်အသးဒီး အဝဲသ့ၣ်အဃိန့ၣ်လီၤ. ပှၤဂီၢ်မုၢ်ကဒုၣ်ဒွဲၣ်အဝဲသ့ၣ်ဒီး သူအဝဲသ့ၣ်အမံၤဒ် တၢ်ဆိၣ်အၢ တမံၤအသိးန့ၣ်လီၤ.

¹⁹တၢ်အံၤကမၤအသးဒီး အဝဲသ့ၣ်, မ့ၢ်လၢအဝဲသ့ၣ် တစူၢ်ဘၣ် တၢ်ကစီၣ်လၢ ယဆှၢန့ၢ် အဝဲသ့ၣ်တထံၣ်ဃီခီဖျိ ယခ့ယပှၤဝံတဖၣ် အဃိန့ၣ်လီၤ. အဝဲသ့ၣ်ဂ့ၢ်လိာ်တ့ၢ်ဝဲလၢ ကဒိကနၣ်အီၤန့ၣ်လီၤ.

²⁰ကယဲၢ်သုဝဲလၢ ယဆှၢဃီၤအီၤဆူ တၢ်စိာ်မၢကဲကုၢ် အလီၢ်လၢ ကီၢ်ဘၤဘူၤလိၣ်အပူၤသ့ၣ်ဧၢ, ဒိကနၣ်တၢ်လၢယၤ, ယွၤ, စံးဝဲန့ၣ်တက့ၢ်.’

²¹ယွၤသ့တၢ်လၢာ်, အံၣ်စရ့လးအကစၢ်ယွၤ, ကတိၤတ့ၢ်တၢ် ဘၣ်ဃးစီၤကိၤလါယၤအဖိခွါ စီၤအၤဃာ်ဒီးစီၤမၤစ့ယၤအဖိခွါ စီၤစံးဒကံယၤ, ပှၤတဖၣ်လၢအတဲဘၣ်သုလၢ တၢ်လီတၢ်ဝ့ၤ တဖၣ်လၢ ယွၤအမံၤအပူၤ, အဂ့ၢ်န့ၣ်လီၤ. ယွၤစံးတ့ၢ်ဝဲလၢ သါကဟ့ၣ်လီၤကွံာ်အဝဲသ့ၣ်ဆူကီၢ်ဘၤဘူၤလိၣ်အစီၤပၤ နဘူၤကးန့စၢ် အတၢ်စိတၢ်ကမီၤအပူၤဒီး အဝဲကမၤသံကွံာ် အဝဲသ့ၣ်လၢ သုမဲာ်ညါန့ၣ်လီၤ.

²²တုၤပှၤဂီၢ်မုၢ်လၢ အဘၣ်တၢ်စိာ်ထီၣ်ကွံာ်အီၤလၢဝ့ၢ်ယရူၤရှလ့ၣ် ဆူကီၢ်ဘၤဘူၤလိၣ်ဒ် ပှၤဘၣ်တၢ်စိာ်မၢကဲကုၢ်တဖၣ်သးအိၣ်ဆိၣ် အၢပှၤတဂၤန့ၣ်, အဝဲသ့ၣ်ကစံးဆၢဝဲ, ‘မ်ယွၤမၤနၤဒ်စီၤစံးဒကံယၤဒီး စီၤအၤဃာ်, ပှၤတဖၣ်လၢ ကီၢ်ဘၤဘူၤလိၣ် အစီၤပၤ, ဃိမူဒံးအီၤအသိးန့ၣ်တက့ၢ်.’

²³တၢ်အံၤကမ့ၢ်အဝဲသ့ၣ်အဘူၣ်အတီၢ်မ့ၢ်လၢ အဝဲသ့ၣ်အတၢ် ကမၣ် အိၣ်လၢ အမၤတၢ်ဒဲးဘးလၢ အလီၤပျံၤလီၤဖုးတဖၣ် အဃိန့ၣ်လီၤ. အဝဲသ့ၣ်မၤကမၣ်မုၣ်ကမၣ်ခွါဒီး တဲတၢ်လီတၢ်ဝ့ၤတဖၣ် လၢယွၤအမံၤအပူၤန့ၣ်လီၤ. တၢ်အံၤမ့ၢ်တၢ်ထီဒါယွၤအတၢ် ဘၣ်အသးန့ၣ်လီၤ. ယွၤသ့ၣ်ညါတၢ်လၢဝဲသ့ၣ်မၤတ့ၢ်ဝဲ, ဒီးအဝဲမ့ၢ်ပှၤအုၣ်အသးထီဒါအဝဲသ့ၣ်န့ၣ်လီၤ.”

²⁴ယွၤသ့တၢ်လၢာ်, အံၣ်စရ့လးအကစၢ်ယွၤ, ဟ့ၣ်ယၤတၢ်ကစီၣ် တမံၤလၢပှၤန့ဃလၣ်ဖိစီၤၡမါယၤအဂီၢ်န့ၣ်လီၤ.

²⁵အဝဲဆှၢလီၤတ့ၢ်လံာ်ပရၢတဘ့ၣ်လၢအကစၢ် ဒၣ်ဝဲအမံၤအပူၤ, ဆူကယဲၢ်ပှၤဂီၢ်မုၢ်လၢ ဝ့ၢ်ယရူၤ ရှလ့ၣ်အအိၣ်ဒီး ဆူစီၤမၤစ့ယၤအဖိခွါ ပှၤလုၢ်တၢ်အခိၣ် စီၤစဖါနယၤအအိၣ်, ဒီးဆူပှၤလုၢ်တၢ်အခိၣ်အဂၤ တဖၣ်ခဲလၢာ်အအိၣ်လီၤ. လၢလံာ်အံၤအပူၤန့ၣ်, စီၤၡမါယၤကွဲးတၢ်ဆူ စီၤစဖါနယၤအအိၣ်ဒီးစံးဝဲဒၣ်,

²⁶“ယွၤဒုးကဲထီၣ်တ့ၢ်နၤလၢ ပှၤလုၢ်တၢ်ခိၣ်တဂၤလၢစီၤယဟိယဒါအလီၢ်, ဒီးအခဲအံၤ နမ့ၢ်ပှၤအခိၣ်အဒိၣ်ကတၢၢ်လၢ ယွၤအတၢ်လုၢ်ဟံၣ်အပူၤန့ၣ်လီၤ. တၢ်အံၤမ့ၢ် နမူနဒါလၢ နကဘၣ်ကွၢ်ဃုာ်လၢ, ကယဲၢ်ပှၤအပျုၢ်တဂၤလၢ်လၢ်လၢ အပာ်မၤအသးဒ်အမ့ၢ်ဝံတဂၤအသိးန့ၣ်, ကဘၣ်တၢ်စၢဃာ်အီၤလၢ ထးသွဲတဖၣ်အိၣ်ဒီးထးကိာ်ကျီၤလၢ အကိာ်လိၤန့ၣ်လီၤ.

²⁷ဘၣ်မနုၤအဃိ နတမၤဘၣ်ဒ်သိးအံၤ ဆူပှၤဧၤနသိးဖိ စီၤယံးရမံယၤလၢ အကတိၤတ့ၢ်တၢ်ဒ် ဝံတဂၤအသိး ဆူပှၤဂီၢ်မုၢ်န့ၣ်လဲၣ်.

²⁸အဝဲကြၢးဘၣ်တၢ်တြီအီၤမ့ၢ်လၢ အဝဲဒၣ်တဲဘၣ် တ့ၢ်ပှၤဂီၢ်မုၢ်လၢ ကီၢ်ဘၤဘူၤလိၣ်အပူၤလၢ, အဝဲသ့ၣ် ကမ့ၢ်ကုၢ်တဖၣ်ဖဲန့ၣ် ဖးယံာ်ဖးထၢဒီး ကြၢးဘှီထီၣ် ဟံၣ်ဧိၤဃီဧိၤ, သူၣ်လီၤအလီၢ်အိၣ်လီၢ်ဆိး, သူၣ်လီၤဖျး လီၤတၤသၣ်လီၢ်တဖၣ်, ဒီးအီၣ်တၢ်လၢ အဝဲသ့ၣ်သူၣ်လီၤ ဝဲအဃိန့ၣ်လီၤ.”

²⁹စီၤစဖါနယၤဖးန့ၢ် ယၤလံာ်ပရၢန့ၣ်လီၤ, အန့ၣ်ဝံၤဒီး ယွၤစံးဘၣ်ယၤလၢ,

³¹ယကဆှၤလီၤတၢ်ကစီၣ်အံၤ ဆူပှၤလၢအဘၣ် တၢ်စိာ်မၢကဲကုၢ်အီၤလၢ ကီၢ်ဘၤဘူၤလိၣ်ခဲလၢာ် အအိၣ်ဘၣ်ဃးဒီး စီၤၡမါယၤ အဂ့ၢ်န့ၣ်လီၤ. “ယၤ, ယွၤအံၤ, ကစံၣ်ညီၣ်စီၤၡမါယၤဒီး အစၢၤအသွဲၣ်ခဲ လၢာ်လီၤ. ယတမၢလီၤဘၣ်အီၤဘၣ်. ဘၣ်ဆၣ် အဝဲ ကတိၤတၢ်ဒီးသု, မၤအသးဒ်အမ့ၢ်ဝံတဂၤအသိး ဒီးအဝဲမၢသုနာ်တၢ်လီတၢ်ဝ့ၤတဖၣ်န့ၣ်လီၤ.

³²အဝဲအစၢၤအသွဲၣ်တဖၣ် တဘၣ်အိၣ်လၢသုကျါနီတဂၤဘၣ်. အဝဲတအိၣ်မူထံၣ်ဘၣ်တၢ်အဂ့ၤ တဖၣ်လၢ ယကမၤအီၤလၢ ယပှၤဂီၢ်မုၢ်အဂီၢ်ဘၣ်, မ့ၢ်လၢအဝဲတဲဘၣ် အဝဲသ့ၣ်လၢကပူ ထီၣ်တၢ်ထီဒါယၤအဃိန့ၣ်လီၤ. ယၤ, ယွၤအံၤ, ကတိၤလံတၢ်လံ.”