Read S'gaw Karen လံာ်ယံးရမံယၤ 33 Bible Online

လံာ်ယံးရမံယၤ 33 - S'gaw Karen bible

လံာ်ယံးရမံယၤ 33

¹ဖဲယအိၣ်ဒံးလၢဃိာ်ပူၤလၢ ကွီၢ်အဂၢၤပူၤန့ၣ်, ယွၤတၢ်ကစီၣ် ဟဲတုၤအိၣ်ကဒီးယၤန့ၣ်လီၤ.

²ယွၤလၢ အတ့လီၤတ့ၢ်ဟီၣ်ခိၣ်, လၢအဒုးကဲ ထီၣ်တ့ၢ်အီၤဒီး ပာ်လီၤအီၤလၢ အလီၢ်န့ၣ် ကတိၤတ့ၢ်တၢ်ဒီးယၤလီၤ. ပှၤလၢအမံၤမ့ၢ်ယွၤ စံးဝဲဒၣ်,

³ကိးထီၣ်ယၤတက့ၢ် “ဒီးယကစံးဆၢနၤလီၤ. ယကဒုးနဲၣ်နၤလၢ တၢ်အဒိၣ်အထီဒီး တၢ်လီၤ လးတဖၣ်လၢ နတသ့ၣ်ညါ လၢအဂ့ၢ်နီတမံၤ ဘၣ်န့ၣ်လီၤ.

⁴ယၤ, ယွၤ, အံၣ်စရ့လးအကစၢ်ယွၤစံး, လၢဝ့ၢ်ယရူၤၡလ့ၣ် အဟံၣ်တဖၣ်ဒီး ကီၢ်ယူဒၤအစီၤပၤအနူၢ်အစီၤကဘၣ်တၢ်ရူၢ် လီၤကွံာ်အီၤခီဖျိတၢ်ကဝီၤဃာ်ဒီး တၢ်ဟဲထီၣ်ဒုးအီၤအဃိန့ၣ်လီၤ.

⁵ပှၤတနီၤန့ၣ် ကဒုးတၢ်ထီဒါ ပှၤဘၤဘူၤလိၣ်ဖိတဖၣ်, လၢအမ့ၢ်ပှၤလၢ အမၤပှဲၤဟံၣ်ဃီတဖၣ်ဒီး ပှၤအစိၣ်တဖၣ်လၢ ယကမၤသံအီၤလၢ ယတၢ်သးထီၣ်ဒီး တၢ်သးကဲၤထီၣ် အပူၤန့ၣ်လီၤ. ယဃၣ်ယံၤကွံာ်လံ ယသးလၢ ဝ့ၢ်အံၤမ့ၢ်လၢ တၢ်အၢတၢ်သီတဖၣ် လၢဝ့ၢ်အံၤ အပှၤဂီၢ်မုၢ်မၤတ့ၢ်ဝဲ အဃိန့ၣ်လီၤ.

⁶ဘၣ်ဆၣ်ဒီး, ယကမၤဘျါက့ၤဝ့ၢ်အံၤဒီး အပှၤဂီၢ် မုၢ်ဒီး ဟ့ၣ်က့ၤအဝဲသ့ၣ်တၢ်အိၣ်ဆူၣ်အိၣ်ချ့န့ၣ်လီၤ. ယကဒုးနဲၣ်အဝဲသ့ၣ်လၢ တၢ်ဃူတၢ်ဖိးဒီး တၢ်ဘံၣ် တၢ်ဘၢအါအါကလဲာ်လီၤ.

⁷ယကဒုးဘီၣ်ထီၣ်ညီထီၣ် ကီၢ်ယူဒၤဒီး ကီၢ်အံၣ်စရ့လး ဒီး ယကသူၣ်ထီၣ် ဘှီထီၣ်က့ၤ အဝဲသ့ၣ်ဒ်အအိၣ်ပာ်စၢၤတ့ၢ် လၢညါအသိးန့ၣ်လီၤ.

⁸ယကမၤကဆှီထီၣ်အဝဲသ့ၣ်လၢ တၢ်ဒဲးဘးတဖၣ်လၢ အဝဲသ့ၣ်မၤတ့ၢ်ဝဲ ထီဒါယၤ, ဒီးယကပျၢ်ကွံာ် အဝဲသ့ၣ်အတၢ်ဒဲးဘး တဖၣ်ဒီး အတၢ်ပူထီၣ်ယၤန့ၣ်လီၤ.

⁹ဝ့ၢ်ယရူၤၡလ့ၣ်ကမ့ၢ်တၢ်သးခု, တၢ်လၤကပီၤ, ဒီးတၢ်ပာ်ကဖၢလၢ သးအဂံၢ်ထံးတမံၤလၢ ယဂီၢ်န့ၣ်လီၤ. ဒီးပှၤကိးကလုာ်ဒဲး လၢဟီၣ်ခိၣ်ချၢအံၤ ကပျံၤတၢ်ဒီး ကကနိးကစုာ်ဝဲ ဖဲအဝဲသ့ၣ် နၢ်ဟူတၢ်ဘၣ်ဃးတၢ်အဂ့ၤတဖၣ်လၢ ယမၤလၢ ဝ့ၢ်ယရူၤၡလ့ၣ်အပှၤဂီၢ်မုၢ် အဂီၢ်, ဒီးဘၣ်ဃးတၢ်ဘီၣ် တၢ်ညီလၢ ယဟဲစိာ်န့ၢ် ဝ့ၢ်အံၤ, အဂ့ၢ်န့ၣ်လီၤ.”

¹⁰ယွၤစံးဝဲဒၣ်, “ပှၤဂီၢ်မုၢ်စံးဝဲလၢ တၢ်လီၢ်အံၤ လီၤဂာ်ဒီး မဲးမုၢ်ခိၣ်တတီၤ, လၢပှၤကညီမ့ၢ်ဂ့ၤ, ဆၣ်ဖိကီၢ်ဖိတဖၣ်မ့ၢ်ဂ့ၤတအိၣ်ဆိးလၢ အပူၤဘၣ်န့ၣ်လီၤ. ဒီးအဝဲသ့ၣ်စံးတၢ်န့ၣ် ဘၣ်လီၤ. ကီၢ်ယူဒၤအဝ့ၢ်တဖၣ်ဒီး ဝ့ၢ်ယရူၤၡလ့ၣ်အကျဲတဖၣ် အပူၤအိၣ်ကလီဝဲလီၤ. ပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တအိၣ်ဆိးဖဲန့ၣ်ဘၣ်. ဘၣ်ဆၣ်ဒီး, လၢတၢ်လီၢ်တဖၣ်အံၤ အပူၤန့ၣ် နကနၢ်ဟူကဒီး,

¹¹တၢ်သူၣ်ဖှံသးညီဒီး တၢ်သူၣ်ခုသးခုအတၢ်ကိး သီၣ်ထီၣ်တဖၣ်ဒီး တၢ်တ့တၢ်ဖျီအတၢ်သးဖှံ အတၢ်အီၣ်အမူးတဖၣ် အတၢ်ကလုၢ်သီၣ်ထီၣ်ဝဲ န့ၣ်လီၤ. နကနၢ်ဟူဘၣ်ပှၤဂီၢ်မုၢ်သးဝံၣ်တၢ်ဖဲ အဝဲသ့ၣ်ဟဲစိာ်ထီၣ်တၢ်လုၢ်စံးထီၣ်ပတြၢၤတဖၣ် ဆူယတၢ်လုၢ်ဟံၣ်အခါလီၤ. အဝဲသ့ၣ်ကစံးဝဲ, ‘စံးထီၣ်ပတြၢၤယွၤသ့တၢ်လၢာ်တက့ၢ်. အဂ့ၢ်ဒ်အံၤ, အဝဲဒၣ်ဂ့ၤဝဲလီၤ. ဒီးအတၢ်အဲၣ်မ့ၢ်တၢ်အထူအယိာ်လီၤ’ န့ၣ်လီၤ. ယကဒုးဘီၣ်ထီၣ်ညီထီၣ် ကီၢ်အံၤ ဒ်အအိၣ်ပာ် စၢၤတ့ၢ်လံဝဲ လၢညါအသိးန့ၣ်လီၤ. ယၤ, ယွၤအံၤ, ကတိၤလံတၢ်လံ.”

¹²ယွၤသ့တၢ်လၢာ်စံးဝဲဒၣ်, “လၢကီၢ်လၢအလီၤဂာ်ဒီး မဲးမုၢ်ခိၣ်တတီၤအံၤအပူၤ, ဒီးလၢတၢ်လီၢ်ဖဲပှၤကညီ မ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တအိၣ်ဘၣ်လၢအပူၤအံၤန့ၣ်, တၢ်အီၣ်ဆၣ်အလီၢ်လါဟ့ တဖၣ်လၢပှၤကွၢ်သိတဖၣ် ကဒုးကိာ်လီၤအသိန့ၣ် ကအိၣ်ထီၣ်က့ၤကဒီးဝဲလီၤ.

¹³လၢဝ့ၢ်လၢ အအိၣ်လၢတၢ်လူၢ်တၢ်တြီၤတဖၣ်အပူၤ, လၢတၢ်လီၢ်တဖၣ်လၢ တၢ်လူၢ်အခီၣ်ထံးဒီး လၢကီၢ် ယူဒၤကလံၤထံးအပူၤ, လၢဘံၣ်ယၤမံၣ်အဒူၣ်အလီၢ် ကဝီၤပူၤ, လၢဝ့ၢ်ယရူၤၡလ့ၣ်အခိၣ်အဃၢၤဒူသဝီတဖၣ်အပူၤ, ဒီးလၢကီၢ်ယူဒၤအဝ့ၢ်တဖၣ် အပူၤန့ၣ်, ပှၤကွၢ်သိတဖၣ် ကဂံၢ်ကဒီး အသိတဖၣ်အသီတဘျီလီၤ. ယၤ, ယွၤအံၤ, ကတိၤလံတၢ်လံ.”

¹⁴ယွၤစံးဝဲဒၣ်, “တၢ်ဆၢကတီၢ်ဟဲလံဝဲလၢ ယကမၤလၢပှဲၤ တၢ်အၢၣ်လီၤလၢ ယမၤတ့ၢ်ဒီး ကီၢ်အံၣ်စရ့လးဒီး ကီၢ်ယူဒၤ အပှၤဂီၢ်မုၢ်န့ၣ်လီၤ.

¹⁵ဖဲတၢ်ဆၢကတီၢ်အဝဲန့ၣ်, ယကဃုထၢပှၤအတီအလိၤတဂၤလၢ အလီၤစၢၤလၢ စီၤဒၤဝံးဒ်စီၤပၤတဂၤအသိးန့ၣ်လီၤ. စီၤပၤအဝဲန့ၣ်ကမၤတၢ်လၢ အဘၣ်ဒီးတီဝဲလိၤဝဲ, လၢကီၢ်ဒီဘ့ၣ်ညါအပူၤန့ၣ်လီၤ.

¹⁶ကီၢ်ယူဒၤဒီး ဝ့ၢ်ယရူၤၡလ့ၣ်အပှၤဂီၢ်မုၢ်ကဘၣ်တၢ်မၤထူၣ်ဖျဲးအီၤ ဒီးကအိၣ်ဝဲဆိးဝဲလၢ တၢ်ဘံၣ်တၢ်ဘၢအပူၤန့ၣ်လီၤ. ဝ့ၢ်န့ၣ် ကဘၣ်တၢ်ကိးအီၤလၢ, ယွၤ, ပတၢ်အုၣ်က့ၤခီၣ်က့ၤ’ န့ၣ်လီၤ.

¹⁷ယၤ, ယွၤအံၤ, ယအၢၣ်လီၤလၢ စီၤဒၤဝံးအစၢၤအသွဲၣ်တဂၤ ကအိၣ်ဝဲထီဘိလၢ ကကဲကီၢ်အံၣ်စရ့လးအစီၤပၤအဂီၢ်.

¹⁸ဒီးလၢပှၤလုၢ်တၢ်အခိၣ်တဖၣ် လၢလ့ၤဝံအဒူၣ်တခီကအိၣ်ဝဲထီဘိ လၢကမၤယတၢ်မၤဒီး ကလုၢ်ထီၣ်တၢ်လုၢ်မ့ၣ်အူတဖၣ်, တၢ်လုၢ်ဘုဧိၤဟုဧိၤတဖၣ်, ဒီးတၢ်လုၢ်တၢ်ပာ်တဖၣ် အဂီၢ်န့ၣ်လီၤ.”

¹⁹ယွၤစံးဘၣ်တ့ၢ်ယၤ, “တၢ်အၢၣ်လီၤအီလီၤဘၣ်ထွဲဒီး မုၢ်နံၤဒီးမုၢ်နၤအဂ့ၢ်လၢ ယမၤတ့ၢ်အီၤလၢ အဝဲသ့ၣ်ဟဲဝဲထီဘိ ဘၣ်ဆၢ ဘၣ်ကတီၢ်ကသ့န့ၣ်, တၢ်မၤဟးဂီၤအီၤတန့ၢ်နီတစုဘၣ်.

²¹ဒ်န့ၣ်အသိး, ယမၤတ့ၢ်စ့ၢ်ကီး တၢ်အၢၣ်လီၤအီလီၤတမံၤဒီး ယခ့ယပှၤစီၤဒၤဝံး, လၢထီဘိအဝဲကအိၣ်ဒီး အစၢၤအသွဲၣ် တဂၤ လၢကကဲစီၤပၤအဂီၢ်, ဒီးယမၤတၢ်အၢၣ်လီၤအီလီၤတမံၤဒီး ပှၤလုၢ်တၢ်အခိၣ်တဖၣ်လၢ လ့ၤဝံအဒူၣ်တခီလၢ ထီဘိအဝဲ သ့ၣ်ကမၤယတၢ်မၤန့ၣ်လီၤ. ဒီးတၢ်အၢၣ်လီၤအီလီၤတဖၣ်အံၤ တၢ်မၤဟးဂီၢ်အီၤတန့ၢ်ဘၣ်နီတစုဘၣ်.

²²ယကမၤအါထီၣ်ယခ့ယပှၤ စီၤဒၤဝံးအစၢၤအသွဲၣ် တဖၣ်အနီၣ်ဂံၢ်, တုၤဒၣ်လဲာ် ပှၤဂံၢ်အဝဲသ့ၣ်တသ့ လၢၤဘၣ်. ဒ်ပှၤဂံၢ်ဆၣ်တဖၣ်လၢ မူကပိာ်လိၤ မ့ၢ်ဂ့ၤ, မဲးဧိၤဟီၣ်ဧိၤလၢ ပီၣ်လဲၣ်ကၢၢ်နံၤမ့ၢ်ဂ့ၤ, တသ့ဝဲဘၣ် အသိးန့ၣ်လီၤ.”

²³ယွၤစံးဘၣ်တ့ၢ်ယၤ, “မ့ၢ်နပာ်သူၣ်ပာ်သးတ့ၢ်လၢ ပှၤဂီၢ်မုၢ်စံးဝဲလၢယညိကွံာ်လံ အံၣ်စရ့လးဒီး ယူဒၤ, ဘီမုၢ်ခံဘ့ၣ်လၢ ယဃုထၢတ့ၢ်အီၤ ဒ်လဲၣ် န့ၣ်ဧါ. လၢတၢ်န့ၣ်အဃိ, အဝဲသ့ၣ်ကွၢ်ဃီၤယပှၤဂီၢ်မုၢ်လၢ တၢ်သးဘၣ်အၢအပူၤဒီး တပာ်လၢၤဘၣ်အဝဲသ့ၣ်ဒ် ပှၤတကလုာ်အသိးန့ၣ်ဘၣ်.

²⁵ဘၣ်ဆၣ်ဒီး, ယၤ, ယွၤအံၤ, ယအိၣ်ဒီးတၢ်အၢၣ် လီၤအီလီၤ ဘၣ်ထွဲဒီး မုၢ်နံၤဒီးမုၢ်နၤ, ဒီးယ ဒုးအိၣ်ထီၣ်တၢ်သိၣ်တၢ်သီတဖၣ်လၢ အပၢၤဟီၣ်ခိၣ်ဒီး မူကပိာ်လိၤန့ၣ်လီၤ.

²⁶ဒီးဒ်ယမ့ၢ်တ့ၢ်တၢ်အံၤ သပှၢ်ကတၢၢ်အသိး, ယကဟံးဃာ် ဂၢၢ်ကျၢၤယတၢ်အၢၣ်လီၤအီလီၤဒီး စီၤယၤကိာ်အစၢၤအသွဲၣ် တဖၣ်, ဒီးယခ့ယပှၤစီၤဒၤဝံးန့ၣ်လီၤ. ယကဃုထၢ စီၤဒၤဝံး အစၢၤအသွဲၣ်အကျါတဂၤလၢကပၢစီၤအၤဘြၤဟၣ်, စီၤအံၤစဲး ဒီးစီၤယၤကိာ်အစၢၤအသွဲၣ် တဖၣ်န့ၣ်လီၤ. ယကသူၣ်ကညီၤသးကညီၤ ယပှၤဂီၢ်မုၢ်ဒီး ဒုးဘီၣ်ထီၣ် ကဒီးအဝဲသ့ၣ်န့ၣ်လီၤ.”