Read S'gaw Karen လံာ်ယံးရမံယၤ 35 Bible Online

လံာ်ယံးရမံယၤ 35 - S'gaw Karen bible

လံာ်ယံးရမံယၤ 35

¹ဖဲစီၤပၤယိၤၡံယၤ အဖိခွါ စီၤယဟိၤယါကံၣ်ကဲစီၤပၤ လၢကီၢ်ယူဒၤန့ၣ်, ယွၤစံးဘၣ်ယၤ,

²“လဲၤဆူပှၤရ့ကးဖိအဒူၣ်ထၢ အဟံၣ်ဖိဃီဖိတဖၣ်အအိၣ်ဒီး ကတိၤတၢ်ဒီး အဝဲသ့ၣ်တက့ၢ်. ဝံၤဒီးဟဲက့ၤ ကိးအဝဲ သ့ၣ်ဆူဒၢးအကျါတဒၢးလၢ ယွၤအတၢ်လုၢ်ဟံၣ်အပူၤဒီး ဟ့ၣ်အီအဝဲသ့ၣ် လၢစပံးထံတနီၤတက့ၢ်.”

³လၢတၢ်န့ၣ်အဃိ, ယကိးထီၣ်ပှၤရ့ကးဖိဒီဒူၣ်လၢအမ့ၢ်ဝဲ စီၤယၤစါနယၤ (စီၤယံးရမံယၤအဂၤတဂၤလၢ အပၢ်အမံၤမ့ၢ်ဝဲ စီၤဃဘၤစံနယၤ, အဖိခွါ) ဒီးအဒီပုၢ်ဝဲၢ်ခဲလၢာ်ဒီးအဖိခွါတဖၣ်,

⁴ဒီးဟဲက့ၤကိးအဝဲသ့ၣ်ဆူ ယွၤအတၢ်လုၢ်ဟံၣ်အပူၤန့ၣ်လီၤ. ယကိးဃီၤအဝဲသ့ၣ်ဆူစီၤယံးကဒးလယၤ အဖိခွါဝံဃၤနၣ် အပျဲၢ်အဘီၣ်တဖၣ်အဒၢးပူၤလီၤ. ဒၢးအဝဲအံၤအိၣ်လၢ စီၤၡၤလူၣ်အဖိခွါ, ပှၤပၢၤတြဲၤအခိၣ်စီၤမၤစ့ယၤအ ဒၢးအဖီခိၣ်ဒီး အိၣ်ဘူးဒီး ပဒိၣ်ဖးဒိၣ်အဂၤတဖၣ် အဒၢးန့ၣ်လီၤ.

⁵အန့ၣ်ဝံၤဒီး, ယပာ်လီၤလီခီဒီး သလၢတဖၣ်ပှဲၤဒီး စပံးထံလၢ ပှၤရ့ကးဖိတဖၣ်အမဲာ်ညါ, ဒီးယစံးဘၣ် အဝဲသ့ၣ်, အီစပံးထံတက့ၢ်.”

⁶ဘၣ်ဆၣ်ဒီး, အဝဲသ့ၣ်စံးဆၢဝဲ, ပတအီစပံးထံဘၣ်. အဂ့ၢ်ဒ်အံၤ, စီၤရ့ကးအဖိခွါ ပပၢ်ဖးဒိၣ်လၢပျၢၤ စီၤယိၤနဒာ်စံးဘၣ်တ့ၢ်ပှၤလၢ ပဝဲမ့ၢ်ဂ့ၤ, ပစၢၤပသွဲၣ်တဖၣ်မ့ၢ်ဂ့ၤပတဘၣ်အီစပံးထံတမံၤဂ့ၤတမံၤဂ့ၤ နီတဘျီဘၣ်.

⁷အဝဲစံးဘၣ်တ့ၢ်စ့ၢ်ကီး ပှၤလၢပတဘၣ်သူၣ်ထီၣ်ဟံၣ်ဧိၤဃီဧိၤတဖၣ်မ့ၢ်ဂ့ၤ, ထူစံာ်ထူပှဲၤမ့ၢ်ဂ့ၤ, ဒီးသူၣ်လီၤစပံးလီၢ်တဖၣ်မ့ၢ်ဂ့ၤ, ပှ့ၤအီၤမ့ၢ်ဂ့ၤန့ၣ်ဘၣ်. အဝဲမၤလိာ်တ့ၢ် ပှၤထီဘိလၢပကအိၣ်ဆိး လၢဒဲတဖၣ်အပူၤ ဖဲပကအိၣ်ဒံးလၢထံကီၢ်အံၤ, လၢပအိၣ်ဆိးလၢ အပူၤဒ်ပှၤတခီဘီမုၢ်ဖိတဖၣ်အသိးန့ၣ်လီၤ.

⁸ပစူၢ်တ့ၢ်ကယဲၢ်တၢ်သိၣ်လိနဲၣ်ယုၤတဖၣ် လၢစီၤယိၤနဒာ် ဟ့ၣ်လီၤတ့ၢ်ပှၤန့ၣ်လီၤ. ပကစၢ်ဒၣ်ဝဲ ပတအီစပံးထံ နီတစုဘၣ်. ဒီးပမါတဖၣ်မ့ၢ်ဂ့ၤ, ပဖိခွါတဖၣ်မ့ၢ်ဂ့ၤ, ဒီးပဖိမုၣ် တဖၣ်မ့ၢ်ဂ့ၤ တအီစ့ၢ်ကီးဝဲ နီတစုဘၣ်.

⁹ပတသူၣ်လီၤဟံၣ်ဧိၤဃီဧိၤတဖၣ် ဒ်ပအိၣ်ပဆိး အလီၢ်တဖၣ်အသိးဘၣ်. ပအိၣ်ဆိးဒၣ်လၢ ဒဲတဖၣ် အပူၤဒီးပတအိၣ်ဒီးစပံးလီၢ်, စံာ်ပျီဒီးဘုဧိၤဟုဧိၤနီတမံၤဘၣ်.

¹⁰ပစူၢ်တၢ်ခဲလၢာ်ခဲဆ့လၢ ပပၢ်ဖးဒိၣ်လၢ ပျၢၤစီၤယိၤနဒာ်မၤလိာ် တ့ၢ်ပှၤလၢလၢပှဲၤပှဲၤန့ၣ်လီၤ.

¹¹ဘၣ်ဆၣ်ဒီး, ဖဲစီၤပၤနဘူၤကးန့စၢ်ဟဲထီၣ်ဒုးထံကီၢ်အံၤန့ၣ်, ပစံၣ်ညီၣ်တဲာ်လၢပကဟဲဆူ ဝ့ၢ်ယရူၤၡလ့ၣ် ဒ်သိး ပကယံၤထီၣ်ကွံာ်ဒီး ကီၢ်ဘၤဘူၤလိၣ်ဒီး ကီၢ်စူၤရံ အသုးမုၢ်တဖၣ်အဂီၢ်န့ၣ်လီၤ. လၢတၢ်န့ၣ်အဃိ ပအိၣ်ပဆိးလၢဝ့ၢ်ယရူၤၡလ့ၣ်အပူၤန့ၣ်လီၤ.”

¹²အန့ၣ်ဝံၤဒီး ယွၤသ့တၢ်လၢာ်, အံၣ်စရ့လးအကစၢ်ယွၤ, တဲဘၣ်ယၤလၢ,

¹³ယကလဲၤဒီး စံးဘၣ်ကီၢ်ယူဒၤဒီး ဝ့ၢ်ယရူၤၡလ့ၣ် အပှၤဂီၢ်မုၢ်ဒ်အံၤ, “ယၤ, ယွၤအံၤ, ယသံကွၢ်သုလၢ ဘၣ်မနုၤအဃိ သုတဒိကနၣ်ယၤဒီး တစူၢ်ဘၣ်ယ တၢ်သိၣ်လိနဲၣ်ယုၤတဖၣ်န့ၣ်လီၤ.

¹⁴စီၤယိၤနဒာ်အစၢၤတဖၣ် စူၢ်တ့ၢ်အဝဲအတၢ်မၤလိာ် ဒ်သိးအသုတအီစပံးအထံတဂ့ၤဒီး တုၤလီၤလၢ မုၢ်တနံၤအံၤဒၣ်လဲာ်, အဝဲသ့ၣ်တအီဝဲနီတဂၤဘၣ်. ဘၣ်ဆၣ်ဒီး ယကတိၤဒံးတၢ်ဒီး သုဒီးသုတစူၢ် ဘၣ်ယကလုၢ်ဘၣ်.

¹⁵ယဆှၢလီၤန့ၢ်သုလၢယခ့ယပှၤဝံတဖၣ် တပယူာ်ဃီ, ဒီးအဝဲသ့ၣ်တဲဘၣ်တ့ၢ်သုလၢ သုကညိကွံာ်သုကျဲ အအၢအသီတဖၣ်, ဒီးကမၤတၢ်လၢ အဘၣ်န့ၣ်လီၤ. အဝဲသ့ၣ်ဟ့ၣ်ပလီၢ်တ့ၢ်သုလၢ သုတဘၣ်ဘူၣ်ထီၣ် ဘါထီၣ်ဒီး မၤကစၢ်အဂၤတဖၣ် အတၢ်မၤဘၣ်, ဒ်သိးသုကအိၣ်ဆိးဘၣ်ဒံးလၢကီၢ်ပူၤ, ကီၢ်လၢယဟ့ၣ်လီၤတ့ၢ် သုဒီးသုမိၢ်ပၢ်ဖံဖုလၢပျၢၤတဖၣ်န့ၣ်လီၤ. ဘၣ်ဆၣ်ဒီး သုတဒိကနၣ် ယၤဘၣ်ဒီးတကနၣ်ဃုာ်တၢ်လၢ ယစံးန့ၣ်ဘၣ်.

¹⁶စီၤယိၤနဒာ်အစၢၤအသွဲၣ်တဖၣ် စူၢ်တ့ၢ်တၢ်မၤလိာ် လၢအမိၢ်ပၢ်ဖံဖုလၢပျၢၤတဖၣ် ဟ့ၣ်လီၤတ့ၢ် အဝဲသ့ၣ်, ဘၣ် ဆၣ်ဒီး သုဝဲပှၤဂီၢ်မုၢ်သုတစူၢ်ယၤဘၣ်.

¹⁷လၢတၢ်န့ၣ်အဃိဒီး အခဲအံၤ, ယၤ, ယွၤသ့တၢ်လၢာ်, အံၣ်စရ့လးအကစၢ်ယွၤ, ယကဒုးလီၤဘၣ်သုဝဲ ပှၤဂီၢ်မုၢ်လၢ ကီၢ်ယူဒၤဒီး ဝ့ၢ်ယရူၤၡလ့ၣ်ဆူ တၢ်ဟးဂီၤခဲလၢာ်လၢ ယအၢၣ်လီၤတ့ၢ်အီၤအပူၤန့ၣ်လီၤ. ယကမၤတၢ်အံၤမ့ၢ် လၢဖဲယကတိၤတၢ်ဒီး သုန့ၣ်သုတဒိကနၣ်ဘၣ်အဃိလီၤ. ဒီးဖဲယကိးထီၣ်သုန့ၣ်, သုတစံးဆၢယၤဘၣ်အဃိလီၤ.”

¹⁸အန့ၣ်ဒီး, ယတဲဘၣ်ပှၤရ့ကးအဒူၣ်ထၢလၢ ယွၤသ့တၢ်လၢာ်, အံၣ်စရ့လးအကစၢ်ယွၤစံးတ့ၢ်ဝဲဒၣ်, “သုစူၢ်တ့ၢ်သုပၢ်ဖးဒိၣ် လၢပျၢၤစီၤယိၤနဒာ်အတၢ်မၤလိာ်လၢ အဟ့ၣ်လီၤတ့ၢ်သု, ဒီၤသုပိာ်ထွဲအဝဲအတၢ်သိၣ်လိနဲၣ်ယုၤခဲလၢာ်, ဒီးသုမၤ တ့ၢ်တၢ်ခဲလၢာ်လၢ အဝဲဒၣ်မၤလိာ်တ့ၢ်သုန့ၣ်လံ.

¹⁹အဃိဒီး, ယွၤ, ယွၤသ့တၢ်လၢာ်, အံၣ်စရ့လးအကစၢ်ယွၤ အၢၣ်လီၤအီလီၤလၢ စီၤရ့ကးအဖိခွါစီၤယိၤနဒာ်ကအိၣ်ဒီး အစၢၤအသွဲၣ်ပိာ်ခွါတဂၤထီဘိလၢကမၤယတၢ်မၤအဂီၢ်န့ၣ်လီၤ.”