Read S'gaw Karen လံာ်ယံးရမံယၤ 37 Bible Online

လံာ်ယံးရမံယၤ 37 - S'gaw Karen bible

လံာ်ယံးရမံယၤ 37

¹ကီၢ်ဘၤဘူၤလိၣ်အစီၤပၤ နဘူးကးန့စ့ၢ်ပာ်ထီၣ်စီၤစံးဒကံယၤ လၢအမ့ၢ်စီၤယိၤၡံယၤအဖိခွါဒ် ကီၢ်ယူဒၤအစီၤပၤ အသိးလၢ စီၤယဟိၤယါခံၣ်အလီၢ်န့ၣ်လီၤ.

²ဘၣ်ဆၣ်ဒီး, စီၤစံးဒကံယၤမ့ၢ်ဂ့ၤ, အပဒိၣ်ပပှၢ်တဖၣ်မ့ၢ်ဂ့ၤ, ပှၤဂီၢ်မုၢ်မ့ၢ်ဂ့ၤ တစူၢ်ဘၣ်တၢ်ကစီၣ်လၢ ယွၤဟ့ၣ်လီၤတ့ၢ်ယၤန့ၣ်ဘၣ်.

³စီၤပၤစံးဒကံယၤမၢလီၤ စီၤၡလ့မယၤအဖိခွါစီၤယဟူၤကၤလး ဒီးပှၤလုၢ်တၢ်အခိၣ်စီၤစဖါနယၤလၢ အမ့ၢ်စီၤမၤစ့ယၤ အဖိခွါဆူ ယအိၣ်လၢ ကမၢယၤဒ်သိးယကဃ့ထုကဖၣ်ဆူယွၤ, ပကစၢ်ယွၤအအိၣ်လၢပပှၤကလုာ်အခၢၣ်စးန့ၣ်လီၤ.

⁴ယတဘၣ်တၢ်တ့ၢ်နုာ်ယၤဆူ ဃိာ်ပူၤဒံးဘၣ်, ဒီးဟးထီၣ်က့ၤလီၤဒံးလၢ ပှၤဂီၢ်မုၢ်အကျါလၢတၢ်သဘျ့အပူၤန့ၣ်လီၤ.

⁵ကီၢ်ဘၤဘူၤလိၣ်အသုးမုၢ်ကဝီၤ တ့ၢ်ဃာ်ဝ့ၢ်ယရူၤၡလ့ၣ်, ဘၣ်ဆၣ်ဒီး ဖဲအဝဲသ့ၣ် နၢ်ဟူဘၣ်ဝဲလၢ ကီၢ်အဲၤကူပတူးအသုးမုၢ် ဟဲခီဂာ်တ့ၢ်ကီၢ်အဲၤကူပတူးအကီၢ်ဆၢဒီး, အဝဲသ့ၣ်ဂုၤက့ၤ အလီၢ်ခံန့ၣ်လီၤ.

⁶အန့ၣ်ဒီးယွၤ, အံၣ်စရ့လးအကစၢ်ယွၤ စံးဘၣ်ယၤလၢ

⁷ယကစံးဘၣ်စီၤစံးဒကံယၤဒ်အံၤ, “ကီၢ်အဲၤကူပတူး အသုးမုၢ်ဟဲထီၣ်လံလၢ ကမၤစၢၤနၤအဂီၢ်လံ, ဘၣ်ဆၣ်ဒီး ကက့ၤကဒါက့ၤ ဆူအကီၢ်ဒၣ်ဝဲလီၤ.

⁸အန့ၣ်ဒီး, ပှၤဘၤဘူၤလိၣ်ဖိတဖၣ် ကဟဲက့ၤကဒါက့ၤ, ကထီၣ်ဒုးဝ့ၢ်အံၤ, မၤနၢၤမၤန့ၢ်အီၤ, ဒီးဒွဲၣ်အူထီၣ်ကွံာ်အီၤလၢမ့ၣ်အူန့ၣ်လီၤ.

⁹ယၤ, ယွၤအံၤ, ယဟ့ၣ်ပလီၢ်သုလၢ သုသုတလီလီၤ သုသးခီဖျိတၢ်ဆိကမိၣ်လၢ ပှၤဘၤဘူၤလိၣ်ဖိတဖၣ် တဟဲကဒါက့ၤ လၢၤဘၣ်န့ၣ်တဂ့ၤ. အဂ့ၢ်ဒ်အံၤ, အဝဲသ့ၣ် ကဟဲဝဲလီၤ.

¹⁰သုမ့ၢ်မၤနၢၤကွံာ်ပှၤဘၤဘူၤလိၣ်အသုးမုၢ်ဒီဖုညါတုၤလၢ အဝဲသ့ၣ်အဒဲတဖၣ်အပူၤအိၣ်မံလီၤတ့ၢ်ဒၣ်ထဲ ပှၤလၢအဘၣ်ဒိ ဘၣ်ထံးတဖၣ်ဧိၤဒၣ်လဲာ်န့ၣ်, ပှၤတဖၣ်န့ၣ်ကဂဲၤဆၢထၢၣ်ဒံးဝဲ ဒီးဒွဲၣ်အူထီၣ်ဝ့ၢ်အံၤလၢ မ့ၣ်အူလၢာ်လၢာ်ဆ့ဆ့န့ၣ်လီၤ.”

¹¹ပှၤဘၤဘူၤလိၣ်ဖိ အသုးမုၢ်ဂုၤက့ၤအလီၢ်ခံလၢဝ့ၢ်ယရူၤၡလ့ၣ် မ့ၢ်လၢကီၢ်အဲၤကူပတူးအသုးမုၢ်ဟဲဘူးထီၣ်လံအဃိန့ၣ်လီၤ.

¹²လၢတၢ်န့ၣ်အဃိ, ယဟးထီၣ်လၢ ဝ့ၢ်ယရူၤၡလ့ၣ် ဒီၤလဲၤဆူပှၤဘံၣ်ယၤမံၣ် အဒူၣ်အလီၢ်ကဝီၤအပူၤဒ် သိးယကဟံးန့ၢ်တၢ်နီၤဖး လၢယဂီၢ်လၢ ဒူၣ်ဖိထၢဖိ အစုလီၢ်ခီၣ်ခိၣ်အကျါန့ၣ်လီၤ.

¹³ဘၣ်ဆၣ်ဒီး, ဖဲယလဲၤတုၤဆူ ဘံၣ်ယၤမံၣ်အတြဲၤန့ၣ်, သုးခိၣ်လၢအပၢသုးဖိတဖၣ်လၢ အခိးတၢ်ဖဲန့ၣ်, လၢ အမံၤမ့ၢ်စီၤယရံယၤ, လၢအမ့ၢ်စီၤၡလ့မယၤအဖိခွါဒီး စီၤဃနၤနယၤအလံၤခွါန့ၣ်, ဒုးအိၣ်ကတီၢ်ယၤဒီၤစံးဝဲဒၣ်, “နမ့ၢ်ပှၤလၢအဟးသဒၣ်ဒီး ပာ်တ့ၢ်ကွံာ်ပှၤဒီးနခီဃီၤဆူ ပှၤဘၤဘူၤလိၣ်ဖိတဖၣ်အအိၣ်လီၤ.”

¹⁴ယစံးဆၢအီၤ, “တမ့ၢ်ဒ်န့ၣ်ဘၣ်. ယတဟးသဒၣ်ဒီး ပာ်တ့ၢ်ကွံာ်သုဘၣ်.” ဘၣ်ဆၣ်ဒီး စီၤယရံယၤတဒိ ကနၣ်ယၤဘၣ်. အခိၣ်တလိာ်, အဝဲတီၢ်ယၤဒီၤ ဆှၢယၤဆူပဒိၣ်ပပှၢ်တဖၣ်အအိၣ်န့ၣ်လီၤ.

¹⁵အဝဲသ့ၣ်အသးဒိၣ်ထီၣ်ယၤ နးနးကလဲာ်ဒီး မၢပှၤတီၢ်ယၤ ဒီး ဒုးဃာ်ယၤလၢ ကွီၢ်ဘျီၣ်အပှၤကွဲးလံာ်စီၤယိၤနၤသၣ်အ ဟံၣ်, ဟံၣ်လၢအဘၣ်တၢ်ဒုးကဲထီၣ်အီၤလၢ ဃိာ်တဖျၢၣ်န့ၣ်လီၤ.

¹⁶ယဘၣ်တၢ်ဒၢနုာ်ယၤလၢ ဒၢးဆံးဆံးဖိတဒၢးလၢတၢ်ခူၣ်န့ၣ်အီၤ လၢဟီၣ်ခိၣ်လာ်, အပူၤ, ဒီးယဘၣ်တၢ်ပၢၤယၤဖဲန့ၣ်ဖးယံာ် ဖးထၢန့ၣ်လီၤ.

¹⁷လၢခံဒီး, စီၤပၤစံးဒကံယၤမၢပှၤလဲၤကိးယၤ, ဒီးဖဲန့ၣ်လၢနူၢ်အပူၤန့ၣ်, အဝဲသံကွၢ်ခူသူၣ်ယၤ, “မ့ၢ်တၢ်ကစီၣ်အိၣ်တမံၤမံၤလၢ ယွၤအအိၣ်ဧါ.” ယစံးဆၢအီၤ, “အိၣ်လီၤ.” ဒီးယစံးအါထီၣ်အီၤ, “နကဘၣ်တၢ်ဟ့ၣ်လီၤကွံာ်နၤဆူ ကီၢ်ဘၤဘူၤလိၣ်အစီၤပၤအစုပူၤန့ၣ်လီၤ.”

¹⁸အန့ၣ်ဒီး ယသံကွၢ်အီၤ, “တၢ်ကမၣ်လၢ ယမၤဘၣ်တ့ၢ်ထီဒါနၤမ့ၢ်ဂ့ၤ, နပဒိၣ်ပပှၢ်တဖၣ်မ့ၢ်ဂ့ၤ, ပှၤဂီၢ်မုၢ်အံၤမ့ၢ်ဂ့ၤလၢ နကဒၢနုာ် ယၤ ဆူဃိာ်ပူၤမ့ၢ်တၢ်ကမၣ်မနုၤတမံၤလဲၣ်.

¹⁹နဝံတဖၣ်လၢ အတဲဘၣ်တ့ၢ်နၤလၢ ကီၢ်ဘၤဘူၤလိၣ်အစီၤပၤ တဟဲထီၣ်ဒုးနၤမ့ၢ်ဂ့ၤ, နထံနကီၢ်မ့ၢ်ဂ့ၤန့ၣ်, တၢ်မၤတ့ၢ်အသးဒီး အဝဲသ့ၣ်ဒ်လဲၣ်.

²⁰ဒီးအခဲအံၤ, နဲဒၣ်တၢ်ဒိၣ်စီၤပၤဧၢ, ယဃ့ကညးနၤလၢ နကဒိကနၣ်ယၤဒီး မၤတၢ်လၢ ယဃ့နၤန့ၣ်လီၤ. ဝံသးစူၤတဘၣ်ဆှၢကဒါက့ၤ ယၤဆူဃိာ်လၢ စီၤယိၤနၤသၣ်အဟံၣ်န့ၣ်တဂ့ၤ. နမ့ၢ်မၤဒ်န့ၣ်ဒီး, ယကသံဖဲန့ၣ်သပှၢ်ကတၢၢ်လီၤ.”

²¹လၢတၢ်န့ၣ်အဃိ, စီၤပၤစံးဒကံယၤဟ့ၣ်လီၤအကလုၢ်လၢ ယကဘၣ်တၢ်ဒုးဃာ်ယၤဖဲနူၢ်အဂၢၢ်ပူၤန့ၣ်လီၤ. ယအိၣ်ယဲဖဲန့ၣ်, ဒီးတၢ်ဟ့ၣ်အီၣ်ယၤလၢကိၣ်, တနံၤတလိၣ်လၢ အဟဲဝဲ လၢပှၤကုၢ်ကိၣ်အလီၢ်ကိးနံၤဒဲးတုၤကိၣ်ခဲလၢာ်လၢ ဝ့ၢ်ပူၤလၢာ်ကွံာ်တစုန့ၣ်လီၤ.