Read S'gaw Karen လံာ်ယံးရမံယၤ 38 Bible Online

လံာ်ယံးရမံယၤ 38 - S'gaw Karen bible

လံာ်ယံးရမံယၤ 38

¹စီၤမးတၣ်အဖိခွါ စီၤၡဖၤတယၤ, စီၤပၣ်ၡဃူၢ်အဖိခွါ စီၤကဒါလယၤ, စီၤၡလ့မယၤ အဖိခွါ စီၤယူကၤလး, ဒီး စီၤမၤလကံယၤအဖိခွါ စီၤပၣ်ၡဃူၢ် နၢ်ဟူတၢ်လၢ ယတဲဘၣ်ပှၤဂီၢ်မုၢ်ဒ်အံၤ,

²ယွၤစံးတ့ၢ်ဝဲဒၣ်, “မတၤဂ့ၤမတၤဂ့ၤလၢ အအိၣ်ဆိးလၢ ဝ့ၢ်အံၤအပူၤန့ၣ် ကသံလၢတၢ်ဒုးအပူၤ မ့တမ့ၢ်, လၢ တၢ်သၣ်ဝံၤလီၤဒိအဃိ မ့တမ့ၢ်, လၢတၢ်ဆူးတၢ်ဆါအဃိန့ၣ်လီၤ. ဘၣ်ဆၣ်ဒီး မတၤဂ့ၤမတၤဂ့ၤလၢ အဟးထီၣ်ဒီး ဟ့ၣ်လီၤအသးဆူ ပှၤဘၤဘူၤလိၣ်ဖိ အစုပူၤန့ၣ် တဘၣ်တၢ်မၤသံကွံာ်ဘၣ်. အစှၤကတၢၢ်အသးသမူ ကပူၤဖျဲးဝဲလီၤ.”

³ယစံးဘၣ်တဲဘၣ်စ့ၢ်ကီး အဝဲသ့ၣ်လၢ ယွၤစံးတ့ၢ်ဝဲဒၣ်, “ယကဟ့ၣ်လီၤကွံာ်ဝ့ၢ်အံၤဆူကီၢ်ဘၤဘူၤလိၣ်သုးမုၢ်အစုပူၤ, ဒီး အဝဲသ့ၣ်ကမၤနၢၤမၤန့ၢ်အီၤန့ၣ်လီၤ.”

⁴အန့ၣ်ဒီး, ပဒိၣ်ပပှၢ်တဖၣ် လဲၤဆူစီၤပၤအအိၣ်ဒီး စံးဝဲ, “ပှၤတဂၤအံၤ ကြၢးဘၣ်တၢ်မၤသံအီၤလီၤ. မ့ၢ်လၢအဝဲဒၣ် ကတိၤတၢ်ဒ်သိးအံၤအဃိန့ၣ်, အဝဲမၤလီၤမၢ်ကွံာ် ပှၤသုးဖိလၢအအိၣ်လၢ ဝ့ၢ်ပူၤတဖၣ် အတၢ်သးဒူန့ၣ်လီၤ. ဒီးအဝဲမၤတၢ်တမံၤအံၤဆူ ပှၤအဂၤခဲလၢာ်လၢ အအိၣ်လီၤ တဲာ်လၢ ဝ့ၢ်အံၤအပူၤန့ၣ်လီၤ. အဝဲတကျဲးစၢးမၤစၢၤပှၤဂီၢ်မုၢ် ဘၣ်. အဝဲအဲၣ်ဒိးမၤဘၣ်ဒိဘၣ်ထံး ထဲအဝဲသ့ၣ်တခီန့ၣ်လီၤ.”

⁵စီၤပၤစံးဒကံယၤစံးဆၢဝဲ, “မ့မ့ၢ်ဒ်န့ၣ်ဒီး, ဂ့ၤလံ. တၢ်လၢသုသးအိၣ်မၤအီၤန့ၣ်, မၤဘၣ်တက့ၢ်. ယတြီဘၣ်သုတသ့ဘၣ်.”

⁶လၢတၢ်န့ၣ်အဃိ, အဝဲသ့ၣ်ဟံးန့ၢ်ယၤဒီးစဲၤလီၤယၤလၢ ပျံၤဆူ စီၤပၤဖိခွါစီၤမၤလကံယၤအထံပူၤလၢ အအိၣ်ဝဲလၢ နူၢ်အဂၢၤပူၤန့ၣ်လီၤ. လၢထံပူၤန့ၣ်ထံတအိၣ်ဘၣ်. အိၣ်ဒၣ်ထဲကပံာ်ဒီးယလီၤဘျၢလၢ ကပံာ်အကျါန့ၣ်လီၤ.

⁷မ့ၢ်နာ်သက့ဒ်န့ၣ်ဒီး, ပှၤဒ့ဒံၣ်ဖိလၢ အမၤတၢ်လၢစီၤပၤအနူၢ်ပူၤ ပှၤကီၢ်ကူၤၡးဖိ စီၤဧ့ၤဘ့းမ့လ့းနၢ်ဟူဝဲလၢ အဝဲသ့ၣ်ဒၢနုာ်ယၤလၢ ထံပူၤန့ၣ်လီၤ. အခါဖဲန့ၣ်, စီၤပၤဆ့ၣ်နီၤစံၣ်ညီၣ်ဝဲ ကွီၢ်ဖဲဘံၣ်ယၤမံၣ်အတြဲၤန့ၣ်လီၤ.

⁸လၢတၢ်န့ၣ်အဃိ, စီၤဧ့ၤဘ့းမ့လ့းလဲၤဖဲန့ၣ်ဒီးစံးဘၣ်စီၤပၤ,

⁹“နဲဒၣ်တၢ်ဒိၣ်စီၤပၤဧၢ, တၢ်လၢပှၤတဖၣ်အံၤမၤဝဲန့ၣ်ကမၣ်လီၤ. အဝဲသ့ၣ်ဒၢနုာ် စီၤယံးရမံယၤလၢထံပူၤ, ဒီးဖဲန့ၣ်အဝဲကသံဝဲ သပှၢ်ကတၢၢ်လၢအသၣ်ဝံၤလီၤဒိအဃိ, မ့ၢ်လၢ တၢ်အီၣ်တအိၣ် လၢၤဘၣ်လၢ ဝ့ၢ်အံၤအပူၤအဃိန့ၣ်လီၤ.”

¹⁰အန့ၣ်ဒီး, စီၤပၤဟ့ၣ်လီၤအကလုၢ်လၢ စီၤဧ့ၤဘ့း မ့လ့းကကိးဃုာ် ပှၤသၢဂၤဒီးအီၤ ဒ်သိးကထုးထီၣ် က့ၤယၤလၢ ထံပူၤတချုး လၢယသံဒံးဘၣ်န့ၣ်လီၤ.

¹¹လၢတၢ်န့ၣ်အဃိ, စီၤဧ့ၤဘ့းမ့လ့းလဲၤဃုာ်ဒီး ပှၤတဖၣ်န့ၣ်ဆူ နူၢ်အတၢ်ပာ်ဖှိၣ် အဒၢးဒီၤ မၤန့ၢ်တၢ်ကူတၢ်ကၤ အလီၢ်လံၤတနီၤ လၢအစဲၤလီၤဝဲဆူ ယအိၣ်ခီဖျိပျံၤတဖၣ်န့ၣ်လီၤ.

¹²အဝဲတဲဘၣ်ယၤလၢ ယကပာ်တၢ်ကံးယာ်အက့အခီတဖၣ်လၢ ယစုတီၤဖီလာ် ဒ်သိးပျံၤအသုတမၤဘၣ်ဒိဘၣ်ထံးယၤတဂ့ၤ အဂီၢ်လီၤ. ယမၤယဲဒ်န့ၣ်,

¹³ဒီးအဝဲသ့ၣ်ထုးထီၣ်ကွံာ်ယၤလၢ ထံပူၤန့ၣ်လီၤ. တၢ်အံၤဝံၤ အလီၢ်ခံဒီး, ယဘၣ်တၢ်ပာ်ယၤလၢဃိာ်လၢအအိၣ်လၢနူၢ် အဂၢၤပူၤန့ၣ်လီၤ.

¹⁴လၢတၢ်မၤအသးအဂၤတဘျီန့ၣ်, စီၤပၤစံးဒကံယၤ မၢပှၤလဲၤကိးယၤလၢ ယကလဲၤဆူ အအိၣ်ဖဲကျဲစၢၤ လဲၤနုာ်ဆူ ယွၤအတၢ်လုၢ်ဟံၣ်အပူၤသၢပူၤတပူၤ, ဒီးအဝဲဒၣ်စံးဝဲ, “ယကသံကွၢ်နၤတၢ်သံကွၢ် တမံၤလီၤ. ဒီးယအဲၣ်ဒိးလၢနကတဲဘၣ်ယၤ တၢ်မ့ၢ်တၢ်တီလၢာ် လၢာ်ဆ့ဆ့န့ၣ်လီၤ.”

¹⁵ယစံးဆၢအီၤ, “ယမ့ၢ်တဲဘၣ်နၤတၢ်မ့ၢ်တၢ်တီဒီး နကမၤသံယၤ, ဒီးယမ့ၢ်ဟ့ၣ်ကူၣ်နၤဒီး, တမ့ၢ်လၢ နကကနၣ်ယၤန့ၣ်ဘၣ်.”

¹⁶လၢတၢ်န့ၣ်အဃိ, စီၤပၤစံးဒကံယၤအၢၣ်လီၤယၤလၢ တၢ်ခူသူၣ်အပူၤစံးဝဲ, “ယဆိၣ်တၢ်လၢ ကစၢ်ယွၤလၢ အမူဝဲ, ကစၢ်ယွၤလၢ အဟ့ၣ်ပှၤတၢ်မူအမံၤအပူၤ, လၢယတမၤသံနၤမ့ၢ်ဂ့ၤ, ဟ့ၣ်လီၤကွံာ်နၤဆူ ပှၤလၢအသးအိၣ် မၤသံနၤတဖၣ်အစုပူၤမ့ၢ်ဂ့ၤ န့ၣ်ဘၣ်.”

¹⁷အန့ၣ်ဒီး ယတဲဘၣ်စီၤစံးဒကံယၤလၢ, ယွၤသ့တၢ်လၢာ်, အံၣ်စရ့လးအကစၢ်ယွၤစံးတ့ၢ်ဝဲဒ်အံၤ, “နမ့ၢ်ဟ့ၣ်လီၤနသးဆူ ကီၢ်ဘၤဘူၤလိၣ် အစီၤပၤအပဒိၣ်ပပှၢ်တဖၣ်အစုပူၤဒီၤ, နသးသမူကပူၤဝဲဒီး ဝ့ၢ်အံၤတဘၣ်တၢ်ဒွဲၣ်အူ ထီၣ်ကွံာ်အီၤဘၣ်. နၤဒီးနဟံၣ်ဖိဃီဖိကပူၤဝဲလီၤ.

¹⁸မ့မ့ၢ်နမ့ၢ်တဟ့ၣ်လီၤကွံာ်နသးဘၣ်ဒီး, ဝ့ၢ်အံၤကဘၣ်တၢ်ဟ့ၣ်လီၤကွံာ်အီၤဆူပှၤဘၤဘူၤလိၣ်ဖိတဖၣ်လၢ အကဒွဲၣ်အူကွံာ်အီၤ အစုပူၤဒီး နတထူၣ်ဖျဲးလၢ အဝဲ သ့ၣ်အစုပူၤဘၣ်လီၤ.”

¹⁹ဘၣ်ဆၣ်ဒီး စီၤပၤစံးဆၢဝဲ, “ယပျံၤဘၣ်ယပှၤထံဖိကီၢ်ဖိတဖၣ်လၢ အဟးသဒၣ်ကွံာ် ပှၤဒီးလဲၤခီဃီၤဆူ ပှၤဘၤဘူၤလိၣ်ဖိတဖၣ် အအိၣ်န့ၣ်လီၤ. ယကဘၣ်တၢ်ဟ့ၣ်လီၤကွံာ်ဘၣ်ဖုးယၤဆူ အဝဲသ့ၣ်အစုပူၤဒီး အဝဲသ့ၣ်ကမၤဆူး မၤဆါဘၣ် ဖုးယၤန့ၣ်လီၤ.”

²⁰ယစံးယဲ, “နတဘၣ်တၢ်ဟ့ၣ်လီၤကွံာ် နၤဆူအဝဲသ့ၣ်အစုပူၤဘၣ်. ယဃ့ကညးနၤလၢ နကစူၢ်ယွၤအတၢ်ကစီၣ်န့ၣ်လီၤ. အန့ၣ်ဒီး, တၢ်ခဲလၢာ်ကလဲၤအသးဂ့ၤဂ့ၤဘၣ်ဘၣ်လၢ နဂီၢ်, ဒီးနသးသမူကပူၤဝဲလီၤ.

²¹ဘၣ်ဆၣ်ဒီး ယွၤဒုးထံၣ်ယၤ တၢ်ထံၣ်လၢညါတမံၤလၢ တၢ်ကမၤအသးဒီးနၤဒ်လဲၣ်ဖဲနမ့ၢ်တဟ့ၣ်လီၤနသးဘၣ် အခါန့ၣ်လီၤ.

²²လၢတၢ်ထံၣ်လၢညါ ခီအံၤအပူၤန့ၣ်, ယထံၣ်ဘၣ် လၢပိာ်မုၣ်တဖၣ် လၢအအိၣ်တီၢ်လၢ ကီၢ်ယူဒၤ အစီၤပၤအနူၢ်ပူၤန့ၣ် ဘၣ်တၢ်ဆှၢထီၣ်အီၤဆူကီၢ် ဘၤဘူၤလိၣ်အစီၤပၤ အပဒိၣ်ပပှၢ်တဖၣ် အအိၣ်န့ၣ်လီၤ. ဒီးဖဲအဝဲသ့ၣ်လဲၤတၢ်အခါ စံးကတိၤတၢ်မနုၤလဲၣ်န့ၣ်, ဒိကနၣ်တက့ၢ်. စီၤပၤအတံၤသကိး အဂ့ၤကတၢၢ်တဖၣ်ဆှၢကမၣ်အီၤ, အဝဲသ့ၣ်ထီဒါကွံာ်အဝဲအတၢ်စံၣ်ညီၣ်လံ. ဒီးခဲအံၤ, ဖဲအဝဲအခီၣ်လီၤဘျၢကွံာ်လၢ ကပံာ်အကျါန့ၣ်, အတံၤသကိးတဖၣ် ဟးသဒၣ်ကွံာ်အီၤလံ”

²³အန့ၣ်ဒီး ယတဲအါထီၣ်အီၤ, “ကယဲၢ်နပှၤပိာ်မုၣ်ခဲလၢာ်ဒီး နဖိနလံၤတဖၣ် ကဘၣ်တၢ်စိာ်ကွံာ်အီၤဆူ ပှၤဘၤဘူၤလိၣ်ဖိတဖၣ် အအိၣ်, ဒီးနဲနကစၢ်ဒၣ်နဲ နတထူၣ်ဖျဲးလၢအဝဲသ့ၣ်အစုပူၤဘၣ်. ကီၢ်ဘၤဘူၤလိၣ် အစီၤပၤ ကစိာ်ထီၣ်ကွံာ်နၤဒ် ပှၤဃိာ်ဖိအသိး, ဒီၤဝ့ၢ်အံၤကဘၣ်တၢ်ဒွဲၣ်အူထီၣ်ကွံာ်အီၤလၢာ် လၢာ်ဆ့ဆ့န့ၣ်လီၤ.”

²⁴စီၤစံးဒကံယၤစံးဆၢကဒါက့ၤဝဲ, “ဒုးသ့ၣ်ညါပှၤနီတဂၤလၢ ပတၢ်ကတိၤသကိးအံၤ အဂ့ၢ်တဂ့ၤ. အန့ၣ်ဒီး, နသးသမူ ကပူၤဖျဲးလၢ တၢ်ဘၣ်ယိၣ်ဘၣ်ဘီအပူၤန့ၣ်လီၤ.

²⁵ပဒိၣ်ပပှၢ်တဖၣ် မ့ၢ်နၢ်ဟူဝဲလၢ ယကတိၤတၢ်ဒီးနၤန့ၣ်, အဝဲသ့ၣ် ကဟဲဒီးသံကွၢ်နၤလၢ ပစံးကတိၤတ့ၢ်တၢ် မနုၤလဲၣ်န့ၣ်လီၤ. အဝဲသ့ၣ် ကအၢၣ်လီၤဝဲလၢ နမ့ၢ်တဲ ဘၣ်အီၤ တၢ်ခဲလၢာ်ဒီး, အဝဲသ့ၣ်တမၤသံဘၣ်နၤဘၣ်န့ၣ်လီၤ.

²⁶တဲဘၣ်အဝဲသ့ၣ်, မ့ၢ်ဒၣ်နဃ့ကညးယၤဧိၤလၢ ယသုတဆှၢ ကဒါက့ၤနၤဆူ ဃိာ်ပူၤလၢ နကသံဖဲန့ၣ်အဂီၢ်တဂ့ၤလီၤ.”

²⁷အန့ၣ်ဒီး, ပဒိၣ်ပပှၢ်ခဲလၢာ် ဟဲဒီၤသံကွၢ်ယၤ, ဒီးယတဲဘၣ် အဝဲသ့ၣ်ခဲလၢာ်ဒ် စီၤပၤစံးဘၣ်တ့ၢ်ယၤလၢ ယကစံးဘၣ် အဝဲသ့ၣ်န့ၣ်လီၤ. အန့ၣ်ဒီၤ, အဝဲသ့ၣ်မၤတၢ် အဂၤတသ့နီ တမံၤလၢၤဘၣ်, အဂ့ၢ်ဒ်အံၤ, ပှၤတနၢ်ဟူထွဲပတၢ်ကတိၤနီတဂၤ ဘၣ်အဃိလီၤ.

²⁸ဒီးတၢ်ပာ်ယၤလၢ ဃိာ်ပူၤလၢအအိၣ်လၢနူၢ်အဂၢၤပူၤ တုၤမုၢ်တနံၤလၢ ဝ့ၢ်ယရူၤၡလ့ၣ်ဘၣ်တၢ်မၤန့ၢ်အီၤတစု န့ၣ်လီၤ.