Read S'gaw Karen လံာ်ယံးရမံယၤ 39 Bible Online

လံာ်ယံးရမံယၤ 39 - S'gaw Karen bible

လံာ်ယံးရမံယၤ 39

¹လၢစီၤစံးဒကံယၤ ကဲစီၤပၤလၢ ကီၢ်ယူဒၤပှဲၤထီၣ် ခွံနံၣ်တနံၣ်, လါဆံဆဲၣ်လါတလါအပူၤန့ၣ်, ကီၢ်ဘၤဘူၤလိၣ်အစီၤပၤ နဘူၤကးန့ စၢ်ဟဲဝဲဒီၤ အသုးမုၢ်ဒီ ဖုညါဒီး ဒုးဝ့ၢ်ယရူၤရှလ့ၣ်န့ၣ်လီၤ.

²ဒီးလၢစီၤစံးဒကံယၤကဲစီၤပၤတဆံနံၣ်တနံၣ်, လါလွံၢ်လါတလါ, ခွံသီတသီအနံၤန့ၣ်, ဝ့ၢ်အခိၣ်ဒူတဖၣ်ဘၣ်တၢ်ဘၢၣ်ဖျိမၤလီၤပှီၢ် ကွံာ်အီၤလီၤ.

³(ဖဲဝ့ၢ်ယရူၤရှလ့ၣ် ဘၣ်တၢ်မၤန့ၢ်အီၤန့ၣ်, ကီၢ်ဘူၤလိၣ် အစီၤပၤအပဒိၣ်ပပှၢ်ဖးဒိၣ်ခဲလၢာ် ဟဲဒီးဟံးန့ၢ်အလီၢ်ဖဲ တြဲၤလၢ တၢ်ခၢၣ်သးတတီၤန့ၣ်လီၤ.ဒီးပှၤသ့ၣ်တဖၣ်အံၤ မ့ၢ်ဝဲ စီၤန့ရကၤလးၡရ့ၢ်စၢ်, စီၤစၤမကၢ်နဘိ, စီၤစၢ်စကံၣ်, ဒီး စီၤန့ရကၤလးၡရ့ၢ်စၢ်အဂၤတဂၤန့ၣ်လီၤ.)

⁴ဖဲစီၤပၤစံးဒကံယၤဒီး ကယဲၢ်အဝဲသုးဖိတဖၣ်ထံၣ် တၢ်လၢအမၤအသးန့ၣ်ဒီး, အဝဲသ့ၣ်ကျဲးစၢးဃ့ၢ်ပူၤဖျဲး အသးလၢ ဝ့ၢ်န့ၣ် လၢမုၢ်နၤခီအဆၢကတီၢ်လီၤ. အဝဲသ့ၣ်ဟးထီၣ်ကွံာ်ဝဲလၢ စီၤပၤအတၤသၣ်အလီၢ်အကျဲ, လဲၤခီဖျိကွံာ်ကျဲစၢၤဖိလၢ အဒုးစဲဘူးတၢ်ဒူၣ်ခံဒူၣ်ဒီး ပူၤဖျဲးဝဲဆူ ထံကျိယၢ်ဒ့ၣ်အတြီၤပူၤန့ၣ်လီၤ.

⁵ဘၣ်ဆၣ်ဒီး, ကီၢ်ဘၤဘူၤလိၣ် အသုးမုၢ်လူၤ ထွဲအဝဲသ့ၣ်ဒီး ဖီၣ်န့ၢ်စီၤစံးဒကံယၤဖဲ ပျီပူၤဘူးဒီး ဝ့ၢ်ယရံၤဃိန့ၣ်လီၤ. အန့ၣ်ဒီၤ, အဝဲသ့ၣ်လဲၤစိာ်အီၤဆူ စီၤပၤနဘူၤကးန့စၢ်အအိၣ် လၢအအိၣ်ဖဲဝ့ၢ်ရံးဘလၤလၢ ကီၢ်ဃမါသးအပူၤ, ဖဲန့ၣ်, စီၤနဘူးကးန့စၢ် စံၣ်ညီၣ်အီၤန့ၣ်လီၤ.

⁶ဖဲဝ့ၢ်ရံးဘလၤန့ၣ်, အဝဲမၤသံစီၤစံးဒကံယၤအဖိခွါ တဖၣ်လၢ စီၤစံးဒကံယၤအမဲာ်ညါလီၤ. ဒီးအဝဲမၤသံ ကွံာ်စ့ၢ်ကီး ကီၢ်ယူဒၤအပဒိၣ်ပပှၢ်တဖၣ်န့ၣ်လီၤ.

⁷အန့ၣ်ဝံၤဒီး, အဝဲအူခွဲးထီၣ်ကွံာ် စီၤစံးဒကံယၤ အမဲာ်ချံတဖၣ်ဒီး စၢဃာ်အီၤလၢ ထးသွဲတိၢ်ဘီဒ် သိး တၢ်ကက့ၤစိာ်အီၤဆူ ကီၢ်ဘၤဘူၤလိၣ်အဂီၢ်န့ၣ်လီၤ.

⁸ဖဲန့ၣ်အခါ, ပှၤဘၤဘူၤလိၣ်ဖိတဖၣ် ဒွဲၣ်အူထီၣ်ကွံာ် စီၤပၤအနူၢ်ဒီၤ အပှၤဂီၢ်မုၢ်အဟံၣ်တဖၣ်, ဒီးမၤလီၤပှီၢ် ကွံာ်ဝ့ၢ်ယရူၤရှလ့ၣ်အခိၣ်ဒူတဖၣ်န့ၣ်လီၤ.

⁹လၢခံကတၢၢ်, စီၤနဘူစၢ်ရဒၣ်လၢ အမ့ၢ်သုးခိၣ်ကျၢၢ်န့ၣ်, စိာ်ကွံာ်ပှၤဂီၢ်မုၢ်လၢ အိၣ်လီၤတဲာ်လၢ ဝ့ၢ်ပူၤတဖၣ် အဟဲဃ့ၢ်ခီနုာ်ဆူ အဝဲသ့ၣ်အအိၣ်, ဒ်ကုၢ်တဖၣ်အသိးဆူ ကီၢ်ဘၤဘူၤလိၣ်န့ၣ်လီၤ.

¹⁰လၢကီၢ်ယူဒၤအပူၤန့ၣ်, အဝဲပာ်တီၢ်ဝဲပှၤလၢ အဖှီၣ်ကတၢၢ် အကျါတနီၤလၢ အတၢ်ဖိတၢ်လံၤတအိၣ်နီတမံၤဘၣ်, ဒီးအဝဲဟ့ၣ်လီၤအဝဲသ့ၣ်လၢ စပံးလီၢ်တဖၣ်ဒီး စံာ်ပျီတဖၣ်န့ၣ်လီၤ.

¹¹ဘၣ်ဆၣ်ဒီး စီၤပၤနဘူၤကးန့ စၢ်မၤလိာ်ဃီၤ သုးခိၣ်ဖးဒိၣ် စီၤနဘူစၢ်ရဒၣ်လၢ ကဟ့ၣ်လီၤ အကလုၢ်ဒ်လၢ လာ်အံၤအသိးန့ၣ်လီၤ.

¹²လဲၤဒီး ဃုထံၣ်န့ၢ် စီၤယံးရမံယၤဒီး ကွၢ်ထွဲအီၤဂ့ၤဂ့ၤတက့ၢ်. တဘၣ်မၤဆူးမၤဆါအီၤတဂ့ၤ. ဒီးတၢ်လၢအသးလီဝဲန့ၣ် မၤန့ၢ်အီၤခဲ လၢာ်တက့ၢ်.”

¹³လၢတၢ်န့ၣ်အဃိ, စီၤနဘူစၢ်ရဒၣ်ဃုာ်ဒီးပဒိၣ်ဖးဒိၣ်တဖၣ်လၢ အမ့ၢ်ဝဲစီၤနဘူၡၤစဘၣ်ဒီးစီၤန့ရကၤလးၡရ့ၢ်စၢ်ဒီး ကီၢ်ဘၤဘူၤလိၣ် အစီၤပၤအပဒိၣ်ပပှၢ်အဂၤတဖၣ်.

¹⁴ထုးထီၣ်ကွံာ်ယၤလၢ ဃိာ်လၢအအိၣ်လၢ နူၢ်အဂၢၤပူၤန့ၣ်လီၤ. အဝဲသ့ၣ်ပာ်ယၤလၢ စီၤၡၤဖၣ်အလံၤ, စီၤအဃံကၣ်အဖိခွါ, စီၤကဒါလယၤအစုပူၤ လၢကအံးထွဲကွၢ်ထွဲ ကဟုကယာ်ယၤ တုၤယက့ၤတုၤလၢ ဟံၣ်ဂ့ၤဂ့ၤဘၣ်ဘၣ်တစုန့ၣ်လီၤ. ဒီး လၢတၢ်န့ၣ်အဃိဒီး, ယအိၣ်ယဲဖဲန့ၣ်လၢ ပှၤဂီၢ်မုၢ်အကျါန့ၣ်လီၤ.

¹⁵ဖဲယဘၣ်တၢ်ဒုးဃာ်ယၤဖဲ ဃိာ်အိၣ်လၢနူၢ်အဂၢၤပူၤအဖၢမုၢ်န့ၣ်, ယွၤစံးဘၣ်ယၤလၢ,

¹⁶ယကတဲဘၣ်စီၤဧ့ၤဘ့းမ့လ့းလၢ, ယွၤသ့တၢ်လၢာ်, အံၣ်စရ့လးအကစၢ်ယွၤ စံးတ့ၢ်ဝဲဒ်အံၤ, ဒ်ယစံးတ့ၢ်လၢ ယကမၤအသိးန့ၣ်, ယကဒုးဘၣ် တၢ်ဟးဂီၤလၢ ဝ့ၢ်အံၤအလိၤဒီး တမ့ၢ်တၢ်ဘီၣ်တၢ်ညီဘၣ်လီၤ. ဖဲတၢ်အံၤမၤအသးန့ၣ်, နကအိၣ်ဖဲန့ၣ်လၢနကထံၣ်ဘၣ်အီၤ အဂီၢ်န့ၣ်လီၤ.

¹⁷ဘၣ်ဆၣ်ဒီးယၤ, ယွၤအံၤ, ယကဒီဒၣ်အိၣ်ပှိၤနၤ, ဒီးနတဘၣ်တၢ်ဟ့ၣ်လီၤကွံာ်ဘၣ်နၤဆူ ပှၤလၢနပျံၤအီၤတဖၣ်အစုပူၤန့ၣ်ဘၣ်.

¹⁸ယကပာ်နၤပူၤပူၤဖျဲးဖျဲးဒီး နတဘၣ်တၢ်မၤသံနၤဘၣ်. နသးသမူကပူၤဖျဲးဝဲ မ့ၢ်လၢနပာ်တၢ်နာ်လၢ ယပူၤအဃိန့ၣ်လီၤ. ယၤ, ယွၤအံၤ, ကတိၤလံတၢ်လံ.