Read S'gaw Karen လံာ်ယံးရမံယၤ 40 Bible Online

လံာ်ယံးရမံယၤ 40 - S'gaw Karen bible

လံာ်ယံးရမံယၤ 40

¹ယွၤကတိၤတၢ်ဒီးယၤဖဲသုးခိၣ်ဖးဒိၣ်စီၤနဘူစၢ်ရဒၣ်ပျၢ်ထူၣ် ဖျဲးကွံာ်ယၤဖဲဝ့ၢ်ရၤမါဝံၤအလီၢ်ခံန့ၣ်လီၤ. ယဘၣ်တၢ်စၢဃာ်ယၤလၢထးသွဲ, ဒီးလဲၤစိာ်ဆှၢယၤဖဲန့ၣ်ဃုာ်ဒီး ဝ့ၢ်ယရူၤၡလ့ၣ်ဒီးကီၢ်ယူဒၤအပှၤဂီၢ်မုၢ်အဂၤလၢအဘၣ်တၢ်စိာ် ကွံာ်အီၤဆူကီၢ်ဘၤဘူၤလိၣ်ဒ်ကုၢ်တဖၣ်အသိးန့ၣ်လီၤ.

²သုးခိၣ်ဖးဒိၣ်သုးကစီၤယံၤယၤဒီးစံးဘၣ်ယၤ, “ယွၤနကစၢ်ယွၤမၤပျံၤမၤဖုးတ့ၢ်ထံကီၢ်အံၤလၢတၢ်ဟးဂူာ်ဟး ဂီၤန့ၣ်လီၤ.

³ဒီးအခဲအံၤ, အဝဲမၤတ့ၢ်လံတၢ်လၢအစံးဘၣ်တ့ၢ်ဝဲလၢအကမၤဝဲ န့ၣ်လီၤ. တၢ်ခဲလၢာ်အံၤမၤအသးမ့ၢ်လၢနပှၤဂီၢ်မုၢ်မၤတ့ၢ်တၢ်ဒဲးဘးထီ ဒါယွၤဒီးတစူၢ်တ့ၢ်အီၤဘၣ်အဃိန့ၣ်လီၤ.

⁴အခဲအံၤ, ယဘ့ၣ်လီၤကွံာ်ထးသွဲတဖၣ်လၢအအိၣ်လၢနစု ဒ့တဖၣ်အလိၤဒီးပျၢ်ဖျဲးကွံာ်နၤန့ၣ်လံ. နမ့ၢ်သးအိၣ်လဲၤဃုာ် ဒီးယၤဆူကီၢ်ဘၤဘူၤလိာ်န့ၣ်, နမၤနဲသ့ဒီးယကအံးထွဲကွၢ်ထွဲ နခံလီၤ. ဘၣ်ဆၣ်ဒီး, နမ့ၢ်တသးအိၣ်လဲၤဘၣ်ဒီးနလဲၤအလီၢ်တအိၣ် ဘၣ်လီၤ. နအိၣ်ဒီးထံကီၢ်ဒီဘ့ၣ်ညါလၢနမဲာ်ညါလၢနကဃုထၢအိၣ်ဆိးနဲ ဒီးဖဲနသးအိၣ်လဲၤန့ၣ်နလဲၤနဲသ့လီၤ.”

⁵ဖဲယတစံးဆၢအီၤဘၣ်နီတမံၤဘၣ်န့ၣ်, စီၤနဘူစၢ်ရဒၣ်စံးဘၣ်ယၤ, “က့ၤကဒါက့ၤဆူစီၤၡၤဖၣ်အလံၤ, စီၤအဃံကၣ်အဖိခွါ, စီၤကဒါလယၤ, လၢကီၢ်ဘၤဘူၤလိၣ်အစီၤပၤဒုးကဲထီၣ်အီၤလၢပှၤပၢကီၢ် ယူဒၤအဝ့ၢ်တဖၣ်အအိၣ်န့ၣ်တက့ၢ်. နအိၣ်ဒီးအီၤဒီးနအိၣ်လၢပှၤဂီၢ်မုၢ်အကျါမ့ၢ်ဂ့ၤ, နလဲၤဆူတၢ်လီၢ်တပူၤပူၤလၢနဆိကမိၣ်နကြၢးလဲၤမ့ၢ်ဂ့ၤန့ၣ် သ့ဝဲလီၤ.” ဝံၤဒီးအဝဲဟ့ၣ်လီၤယၤတၢ်ဟ့ၣ်တမံၤဒီးတၢ်အီၣ်တနီၤလၢ ယကစိာ်ဃုာ်ဒီးယၤ, ဒီးပျဲယၤလၢယလဲၤလၢယကျဲဒၣ်ယဲန့ၣ်လီၤ.

⁶ယလဲၤဒီးအိၣ်လၢစီၤကဒါလယၤအသကိးလၢဝ့ၢ်မံးစပၤအပူၤဒီး အိၣ်လၢပှၤဂီၢ်မုၢ်လၢအအိၣ်လီၤတဲာ်လၢကီၢ်ပူၤအကျါန့ၣ်လီၤ.

⁷ပှၤယူဒၤဖိအသုးခိၣ်သုးနၢ်တနီၤဒီးအသုးဖိတဖၣ်တပာ်လီၤအ စုကဝဲၤဘၣ်. အဝဲသ့ၣ်နၢ်ဟူဘၣ်ဝဲလၢကီၢ်ဘၤဘူၤလိၣ် အစီၤပၤပာ်ထီၣ်စီၤကဒါလယၤလၢကီၢ်အပဒိၣ်ဖးဒိၣ်, ပာ်အီၤဒ်ပှၤကွၢ်ထွဲ ပၢဆှၢပှၤခဲလၢာ်လၢအတဘၣ်တၢ်စိာ်ကွံာ်အီၤဆူကီၢ်ဘၤဘူၤလိၣ်, ပှၤဂီၢ်မုၢ်လၢအဖှီၣ်ယာ်ကတၢၢ်လၢကီၢ်အံၤအပူၤတဖၣ်န့ၣ်လီၤ.

⁸လၢတၢ်န့ၣ်အဃိ, စီၤနသၤနံယၤအဖိခွါစီၤယံးၡမၤအ့လး, စီၤကါရ့ၤအဖိခွါစီၤယိၤဃၤနၣ်, စီၤတးနဃူမ့းအဖိခွါစီၤစရါယၤ, ပှၤနတိဖၤဖိစီၤဧ့ၤဖ့ၤအဖိခွါတဖၣ်, ဒီးပှၤမၤကးဖိစီၤယစၤနယၤ, လဲၤတၢ်ဒီးအပှၤတဖၣ်ဆူစီၤကဒါလယၤအအိၣ်လၢဝ့ၢ်မံးစပၤန့ၣ် လီၤ.

⁹စီၤကဒါလယၤစံးဘၣ်အဝဲသ့ၣ်, “ယအုၣ်ခီၣ်လီၤယသးလၢအလီၢ် တအိၣ်လၢသုကပျံၤတၢ်ဒ်သိးသုကဟ့ၣ်လီၤသုသးဆူ ပှၤဘၤဘူၤလိၣ်ဖိတဖၣ်အစုပူၤန့ၣ်ဘၣ်. အိၣ်ဆိးဖဲကီၢ်အံၤအ ပူၤ, မၤကီၢ်ဘၤဘူၤလိၣ်အစီၤပၤအတၢ်မၤ, ဒီးတၢ်ခဲလၢာ်ကလဲၤအသးဂ့ၤဂ့ၤဘၣ်ဘၣ်လၢသုဂီၢ်န့ၣ်လီၤ.

¹⁰ယကစၢ်ဒၣ်ယဲယကအိၣ်ဖဲဝ့ၢ်မံးစပၤဒီးကဲထီၣ်သုခၢၣ်စးဖဲ ပှၤဘၤဘူၤလိၣ်ဖိတဖၣ်ဟဲဖဲအံၤန့ၣ်လီၤ. ဘၣ်ဆၣ်ဒီး, သုထၢဖှိၣ်ဒီးပာ်ဖှိၣ်ပာ်တံၤစပံးထံ, တၤသူတၤသၣ်ဒီးသ့ၣ်စၤယံးအသိ, ဒီးအိၣ်ဖဲဒူသဝီတဖၣ်လၢသုမၤန့ၢ်အီၤအပူၤသ့ဝဲလီၤ.”

¹¹ဖဲန့ၣ်အခါ, ပှၤအံၣ်စရ့လးဖိခဲလၢာ်လၢအအိၣ်ဆိးလၢကီၢ်မိၤ အး, ကီၢ်ဧၣ်မိၣ်, ကီၢ်အဒိၣ်, ဒီးကီၢ်အဂၤတဖၣ်အပူၤန့ၣ်, နၢ်ဟူဝဲလၢကီၢ်ဘၤဘူၤလိၣ်အစီၤပၤပျဲပှၤအံၣ်စရ့လးဖိတနီၤ ကအိၣ်ဒံးဝဲလၢကီၢ်ယူဒၤဒီးအဝဲပာ်ထီၣ်စီၤကဒါလယၤလၢကီၢ် အပဒိၣ်ဖးဒိၣ်န့ၣ်လီၤ.

¹²လၢတၢ်န့ၣ်အဃိ, အဝဲသ့ၣ်ဟးထီၣ်ကွံာ်လၢတၢ်လီၢ်တဖၣ်ဖဲ အဝဲသ့ၣ်ဘၣ်တၢ်မၤလီၤပြံလီၤပြါတ့ၢ်အီၤဒီးဟဲက့ၤကဒါက့ၤ ဆူကီၢ်ယူဒၤန့ၣ်လီၤ. အဝဲသ့ၣ်ဟဲဆူစီၤကဒါလယၤအအိၣ်ဖဲ ဝ့ၢ်မံးစပၤ, ဒီးဖဲန့ၣ်အဝဲသ့ၣ်ထၢဖှိၣ်ပာ်ဖှိၣ်စပံးထံဒီး တၤသူတၤသၣ်တဖၣ်အါအါဂီၢ်ဂီၢ်န့ၣ်လီၤ.

¹³တၢ်အံၤဝံၤအလီၢ်ခံဒီးစီၤယိဃၤနၣ်ဒီးပှၤသုးဖိအခိၣ်အနၢ် တဖၣ်လၢတပာ်လီၤဘၣ်အစုကဝဲၤန့ၣ်ဟဲဆူစီၤကဒါလယၤ အအိၣ်ဖဲဝ့ၢ်မံးစပၤ,

¹⁴ဒီးစံးဘၣ်အီၤ, “မ့ၢ်နတသ့ၣ်ညါဘၣ်လၢကီၢ်ဧၣ်မိၣ်အစီၤပၤ ဘဧၤလံၣ်မၢလီၤစီၤယံးၡမၤအ့လးလၢကမၤသံနၤန့ၣ်ဘၣ်ဧါ.” ဘၣ်ဆၣ်ဒီးစီၤကဒါလယၤတနာ်ဘၣ်တၢ်အံၤဘၣ်.

¹⁵အန့ၣ်ဒီး, စီၤယိဃၤနၣ်စံးဘၣ်အီၤလၢတၢ်ခူသူၣ်အပူၤ, “ပျဲယလဲၤဒီးမၤသံစီၤယံးၡမၤအ့လးတက့ၢ်. ဒီးမတၤမၤတၢ်အံၤလဲၣ်န့ၣ်, ပှၤတသ့ၣ်ညါနီတဂၤဘၣ်. ဘၣ်မနုၤအဃိအဝဲဘၣ်တၢ်ကပျဲအီၤလၢကမၤသံနၤန့ၣ်လဲၣ်. တၢ်န့ၣ်ကကဲထီၣ်တၢ်လၢအမၤလီၤပြံလီၤပြါကွံာ်ကယဲၢ် ပှၤယူဒၤဖိလၢအအိၣ်ဝးတရံးနၤတဖၣ်ဒီးတၢ်ကဟဲစိာ်တၢ် တတၢးတနါဆူကယဲၢ်ပှၤဂီၢ်မုၢ်အလိၤလၢအအိၣ်လီၤ တဲာ်လၢကီၢ်ယူဒၤအပူၤန့ၣ်လီၤ.”

¹⁶ဘၣ်ဆၣ်ဒီး, စီၤကဒါလယၤစံးဆၢတၢ်ဒီးစံးဝဲ, “မၤတဂ့ၤ. တၢ်လၢနစံးတၢ်ဘၣ်ဃးစီၤယံးၡမၤအ့လးအဂ့ၢ်န့ၣ်, တမ့ၢ်တတီဝဲဘၣ်.”