Read S'gaw Karen လံာ်ယံးရမံယၤ 41 Bible Online

လံာ်ယံးရမံယၤ 41 - S'gaw Karen bible

လံာ်ယံးရမံယၤ 41

¹လၢအနံၣ်အဝဲန့ၣ် နွံလါတလါအပူၤန့ၣ်, စီၤအလံၡမၤအလံၤခွါ, စီၤနသၤနံယၤအဖိခွါစီၤယံးၡမၤအ့လး, လၢအမ့ၢ်စီၤပၤအစၢၤ အသွဲၣ်တဂၤ, ဒီးစီၤပၤအပဒိၣ်ဖးဒိၣ်အကျါတဂၤန့ၣ်, လဲၤဆူ ဝ့ၢ်မံးစပၤဃုာ်ဒီၤ ပှၤအဂၤတဆံလၢ ကလဲၤထံၣ်လိာ် စီၤကဒါလယၤ အဂီၢ်န့ၣ်လီၤ. ဖဲအဝဲသ့ၣ် အီၣ်သကိးတၢ်အီၣ်တဘျီ အခါန့ၣ်,

²စီၤယံးၡမၤအ့လးဒီး ပှၤအဂၤတဆံ ထုးထီၣ်အနးတဖၣ် ဒီးမၤသံကွံာ်စီၤကဒါလယၤန့ၣ်လီၤ.

³စီၤယံးၡမၤအ့လး မၤသံကွံာ်စ့ၢ်ကီး ပှၤအံၣ်စရ့လးဖိ အဂၤတဖၣ်လၢ အအိၣ်ဒီးစီၤကဒါလယၤဖဲ ဝ့ၢ်မံးစပး, ဃုာ်ဒီၤပှၤဘၤဘူၤလိၣ် အသုးဖိတဖၣ် လၢအလဲၤဘၣ် အတီၤဖဲန့ၣ်န့ၣ်လီၤ.

⁴လၢခံတနံၤ, တချုးဒံးဘၣ်လၢ ပှၤသ့ၣ်ညါထွဲဒံးတၢ်ဂ့ၢ်ဘၣ်ဃး စီၤကဒါလယၤဘၣ်တၢ်မၤသံအီၤနီတဂၤအခါန့ၣ်,

⁵ပှၤအဂၤဃိးဆံဟဲတုၤဝဲလၢ ဝ့ၢ်ၡက့ၣ်, ဝ့ၢ်ၡံလိၤ, ဒီးဝ့ၢ်ၡၤမရံလီၤ. အဝဲသ့ၣ် လူၤကွံာ်အခၣ်ဆူၣ်, ဖှီယာ်အကူအသိးတဖၣ်, ဒီးဂဲာ်လီၤအသးန့ၣ်လီၤ. အဝဲသ့ၣ်လဲၤစိာ်ဘုခ့ဒီး တၢ်နၢမူလၢ ကလုၢ်ထီၣ်တၢ်လၢ ယွၤအတၢ်လုၢ်ဟံၣ်ပူၤအဂီၢ်လီၤ.

⁶လၢတၢ်န့ၣ်အဃိ, စီၤယံးၡမၤအ့လး ဟးထီၣ်ကွံာ်လၢဝ့ၢ်မံးစပၤ လၢကလဲၤသဂၢၢ်အဝဲသ့ၣ်အဂီၢ်, အိၣ်ဒီးတၢ်ဟီၣ်တၢ်ယၢၤဖဲ အလဲၤတၢ်အခါန့ၣ်လီၤ. ဖဲအဝဲလဲၤတုၤဆူ အဝဲသ့ၣ်အအိၣ်ဒီး, အဝဲစံးဝဲ, “ဝံသးစူၤ ဟဲနုာ်လၢ သုကကွၢ်စီၤကဒါလယၤအဂီၢ် တက့ၢ်.”

⁷ဒီးတုၤအဝဲသ့ၣ်လဲၤနုာ်လၢ ဝ့ၢ်အသးကံၢ်ပူၤတဘျီဃီန့ၣ်, စီၤယံးၡမၤအ့လးဒီး အပှၤတဖၣ် မၤသံကွံာ်အဝဲသ့ၣ်ဒီး ကွံာ်နုာ်အဝဲသ့ၣ်အစိၣ်တဖၣ်ဆူ ထံပူၤတပူၤန့ၣ်လီၤ.

⁸ဘၣ်ဆၣ်ဒီး ပှၤအိၣ်ဆံဆဲၣ်ဂၤလၢ အကျါလၢ အစံးဘၣ် စီၤယံးၡမၤအ့လး, “ဝံသးစူၤ မၤသံပှၤတဂ့ၤ. ပအိၣ်ဒီး ဘုကၠူၣ်, ဘုမုယီၤ, သ့ၣ်စၤယံးအသိ, ဒီးကနဲစီလၢပပာ်ခူသူၣ်အီၤလၢ စံာ်ပျီတဖၣ်အပူၤန့ၣ်လီၤ.” လၢတၢ်န့ၣ်အဃိ, အဝဲပျဲပူၤဖျဲးကွံာ်ဝဲသ့ၣ်န့ၣ်လီၤ.

⁹ထံပူၤလၢ စီၤယံးၡမၤအ့လးကွံာ်နုာ်ပှၤလၢအဝဲမၤသံကွံာ်ဝဲတဖၣ် အစိၣ်န့ၣ်, မ့ၢ်ထံပူၤဖးဒိၣ်တပူၤလၢ စီၤပၤအၤစါခူၣ်တ့ၢ်ဝဲဖဲအဝဲ ဘၣ်တၢ်ဒုးအီၤလၢ ကီၢ်အံၣ်စရ့လးအစီၤပၤဘါၡၤအခါန့ၣ်လီၤ. စီၤယံးၡမၤအ့လးမၤပှဲၤထံပူၤန့ၣ်လၢ ပှၤအစိၣ်တဖၣ်န့ၣ်လီၤ.

¹⁰အန့ၣ်ဝံၤဒီး, စီၤပၤအဖိမုၣ်တဖၣ် ဃုာ်ဒီးဝ့ၢ်မံးစပၤအပှၤဂီၢ် မုၢ်လၢအအိၣ်လီၤတဲာ်ခဲလၢာ်, လၢသုးခိၣ်ဖးဒိၣ် စီၤနဘူစၢ်ရဒၣ်ပာ်ဝဲလၢစီၤကဒါလယၤအတၢ်ပၢဆှၢကဟုကယာ် အပူၤန့ၣ်, အဝဲဒုးကဲထီၣ်အဝဲသ့ၣ်ဆူ ပှၤဃိာ်ဖိတဖၣ်န့ၣ်လီၤ. စီၤယံးၡမၤအ့လးစိာ်မၢကဲကုၢ်အဝဲဆူ ပှၤဧၣ်မိၣ်ဖိအလီၢ်ကဝီၤ အကျဲတခီန့ၣ်လီၤ.

¹¹စီၤယိဃၤနၣ်ဒီး သုးခိၣ်သုးနၢ်ခဲလၢာ်လၢအအိၣ်ဒီးအီၤနၢ်ဟူဘၣ် တၢ်မၤသရူးမၤကမၣ်လၢ စီၤယံးၡမၤအ့လးမၤတ့ၢ်ဝဲန့ၣ်လီၤ.

¹²လၢတၢ်န့ၣ်အဃိ, အဝဲသ့ၣ်လူၤထွဲအီၤဒီးချုးန့ၢ်အီၤဖဲကံးဘိၣ် အနိၣ်ဖးဒိၣ်အကပၤန့ၣ်လီၤ.

¹³ဖဲပှၤတဖၣ်လၢ စီၤယံးၡမၤအ့လး စိာ်မၢကဲကုၢ်အီၤ ထံၣ်ဘၣ် စီၤယိဃၤနၣ်ဒီး အသုးဖိအခိၣ်အနၢ်တဖၣ်လၢ အအိၣ်ဒီးအီၤန့ၣ်, အဝဲသ့ၣ်အသူၣ်ခုသးခုဝဲ,

¹⁴ဒီးဃၣ်ဃီၤအသးဒီး ဃ့ၢ်ဆူအဝဲသ့ၣ်အအိၣ်န့ၣ်လီၤ.

¹⁵ဘၣ်ဆၣ်, စီၤယံးၡမၤအ့လးဒီး အပှၤဃိးဂၤထူၣ်ဖျဲးကွံာ် လၢစီၤယိဃၤနၣ်အစုပူၤဒီး ဃ့ၢ်ပူၤဖျဲးဝဲဆူပှၤဧၣ်မိၣ်ဖိအ ကီၢ်န့ၣ်လီၤ.

¹⁶အန့ၣ်ဒီး, စီၤယိဃၤနၣ်ဒီး အသုးဖိအခိၣ်အနၢ်လၢ အအိၣ်ဒီးအီၤတဖၣ် ဟံးန့ၢ်ဒီး ပၢဆှၢက့ၤပှၤဂီၢ်မုၢ်လၢ စီၤယံးၡမၤအ့လး စိာ်မၢကဲကုၢ်အီၤလၢ ဝ့ၢ်မံးစပၤ, ဖဲအမၤသံကွံာ်စီၤကဒါလယၤ, သုးဖိတဖၣ်, ပိာ်မုၣ်တဖၣ်, ဖိသၣ်တဖၣ်, ဒိးပှၤဒ့ဒံၣ်တဖၣ်ဝံၤ အလီၢ်ခံန့ၣ်လီၤ.

¹⁷မ့ၢ်လၢ စီၤယံးၡမၤအ့လး မၤသံကွံာ် စီၤကဒါလယၤလၢ ကီၢ်ဘၤဘူၤလိၣ် အစီၤပၤပာ်ထီၣ်အီၤဒ် ပဒိၣ်ဖးဒိၣ်လၢ ကီၢ်အဂီၢ်အဃိ, အဝဲသ့ၣ်ပျံၤဘၣ်ပှၤဘၤဘူၤလိၣ်ဖိတဖၣ် ဒိၣ်မးလီၤ.

¹⁸လၢတၢ်န့ၣ်အဃိ အဝဲသ့ၣ်လဲၤဝဲဆူ ကီၢ်အဲၤကူပတူးဒ်သိးဒီး ကယံၤထီၣ်ကွံာ်ဒီၤ ပှၤဘၤဘူၤလိၣ်ဖိတဖၣ်အဂီၢ်လီၤ. လၢကျဲန့ၣ်, အဝဲသ့ၣ်ဆိကတီၢ်ဖဲ ကံးမဟၣ်လၢ အဘူးဒီးဝ့ၢ်ဘ့ၤသလ့ဃ့ၣ်န့ၣ်လီၤ.