Read S'gaw Karen လံာ်ယံးရမံယၤ 45 Bible Online

လံာ်ယံးရမံယၤ 45 - S'gaw Karen bible

လံာ်ယံးရမံယၤ 45

¹လၢစီၤယိၤၡံယၤ အဖိခွါ ကီၢ်ယူဒၤအစီၤပၤစီၤယဟိၤယါ ကံၣ်ပၢတၢ်လွံၢ်နံၣ်တနံၣ်အပူၤန့ၣ်, စီၤဘၤရူးကွဲးလီၤတၢ် လၢယကိးထီၣ်န့ၢ်အီၤန့ၣ်လီၤ.

²အန့ၣ်ဝံၤဒီး, ယစံးဘၣ်အီၤလၢယွၤ, အံၣ်စရ့လးအကစၢ်ယွၤစံးတ့ၢ်ဝဲဒ်အံၤ,

³“စီၤဘၤရူးဧၢ, ‘နစံးနဲလၢ, ယပျဲစုပျဲခီၣ်လံ. ယွၤပာ်ဖှိၣ်အါထီၣ်တၢ်သးအုးလၢ ယတၢ်ကိၢ်တၢ်ဂီၤတဖၣ်အဖီခိၣ်လံ. ယလီၤဘှံးလီၤတီၤလၢ တၢ်ကအုကစွါအဃိ, ဒီးယတထံၣ်န့ၢ်တၢ်အိၣ်ဘှံးနီ တတီၤဘၣ်န့ၣ်လီၤ.’

⁴ဘၣ်ဆၣ်ဒီး, ယၤယွၤအံၤ, ယကမၤလီၤပှီၢ်တၢ်လၢ ယသူၣ်ထီၣ်တ့ၢ်အီၤဒီးထဲးထီၣ်ကွံာ်တၢ်လၢ ယသူၣ်လီၤဖျးလီၤတ့ၢ်အီၤန့ၣ်လီၤ. ယကမၤတၢ်အံၤလၢဟီၣ်ခိၣ်ဒီဘ့ၣ်ညါန့ၣ်လီၤ.

⁵မ့ၢ်နဃုထံၣ်န့ၢ်တၢ်လၢကမၤန့ၢ်နၤ တၢ်လီၤလီၤဆီ ဆီလၢနဂီၢ်န့ၣ်ဧါ. မၤဒ်န့ၣ်တဂ့ၤ. ယဟဲစိာ်တၢ်တတၢးတနါလၢ ဟီၣ်ခိၣ်ဖိခဲလၢာ် အဖီခိၣ်လီၤ. ဘၣ်ဆၣ်ဒီး, အစှၤကတၢၢ်နသးသမူ ကပူၤဖျဲးဝဲဖဲနလဲၤတၢ်တပူၤလၢ်လၢ်န့ၣ်လီၤ. ယၤ, ယွၤအံၤ, ကတိၤလံတၢ်လံ.”