S'gaw Karen bible online

လံာ်ယံးရမံယၤ 51

¹ယွၤစံးဝဲဒၣ်, “ယဟဲစိာ်ကလံၤမၤဟးဂီၤတၢ်ထီဒါ ကီၢ်ဘၤဘူၤလိၣ် အပှၤဂီၢ်မုၢ်န့ၣ်လီၤ.

²ယကမၢလီၤပှၤတခီဘီမုၢ်ဖိတဖၣ်ဒ်သိး ကမၤဟးဂီၤကီၢ်ဘၤဘူၤလိၣ်ဒ် ကလံၤအူဒံ ကွံာ်ဘုလီၢ်အသိးန့ၣ်လီၤ. ဖဲတၢ်မၤဟးဂီၤအမုၢ် တနံၤဟဲတုၤဝဲန့ၣ်, အဝဲသ့ၣ်ကဟဲထီၣ်ဒုး တၢ်လၢတၢ်လီၢ်ကိးကပၤဒဲးဒီး ပာ်တီၢ်ထံ ကီၢ်လ့ၤကဒိန့ၣ်လီၤ.

³ဟ့ၣ်အသုးဖိတဖၣ်တၢ်ဆၢကတီၢ်လၢကခးအပျၢ်တဖၣ် မ့တမ့ၢ် ကကူထီၣ်သိးထီၣ်အဝဲသ့ၣ်အသဃိးကတီၤတဂ့ၤ. ပျဲပူၤပိာ်ခွါ သးစၢ်တဖၣ်တဂ့ၤ. မၤဟးဂီၤကွံာ်သုးမုၢ် ဒီတဖုန့ၣ်တက့ၢ်.

⁴အဝဲသ့ၣ်ကဘၣ်ဒိဘၣ်ထံးဒီး သံလၢအဝဲသ့ၣ် အဝ့ၢ်တဖၣ်အကျဲဘိတဖၣ်အပူၤန့ၣ်လီၤ.

⁵ယၤ, ယွၤကစၢ်ယွၤသ့တၢ်လၢာ်အံၤ, တစူးကွံာ်ညိကွံာ်ကီၢ်အံၣ်စရ့လးဒီးကီၢ်ယူဒၤဘၣ်. အဝဲသ့ၣ်မ့ၢ်မၤတ့ၢ်တၢ်ဒဲးဘးထီဒါယၤ, အံၣ်စရ့လးအတၢ်စီဆှံတဂၤ, ဒၣ်လဲာ်န့ၣ်, ယတညိကွံာ်ဘၣ်အဝဲသ့ၣ်ဘၣ်.

⁶ထွးထီၣ်ဃ့ၢ်ကွံာ်လၢကီၢ်ဘၤဘူၤလိၣ်တက့ၢ်. လၢကီၢ်ဘၤဘူၤလိၣ်အတၢ်ဒဲးဘးအဃိန့ၣ်, ခီၣ်သံသုသးတဂ့ၤ. ခဲကနံၣ်အံၤ, ယဟ့ၣ်ကၣ်တၢ်ဒီး စံၣ်ညီၣ်အီၤဒ်အကြၢးဘၣ်တၢ်စံၣ် ညီၣ်အီၤအသိးန့ၣ်လီၤ.

⁷ကီၢ်ဘၤဘူၤလိၣ်လီၤဂာ်ဒီး လီခီထူတဖျၢၣ်လၢယစုပူၤ, လၢအဒုးအီမူၤဟီၣ်ခိၣ်ဒီဘ့ၣ်ညါန့ၣ်လီၤ. ပှၤကလုာ်တဖၣ် အီစပံးထံဒီး ပျုၢ်ထီၣ်ဝဲခဲလၢာ်န့ၣ်လီၤ.

⁸သတူၢ်ကလာ်, ကီၢ်ဘၤဘူၤလိၣ်လီၤပှီၢ်ဝဲဒီး ဘၣ်တၢ်မၤဟးဂီၤ အီၤလံ. ဟီၣ်တၢ်ယၢၤတၢ်လၢအဃိတက့ၢ်. မၤန့ၢ်ကသံၣ်ကသီလၢအပူၤလီၢ်ပူၤကျဲတဖၣ်အဂီၢ်, ဒီးဘၣ်သ့ၣ်သ့ၣ်, ဘျါက့ၤဝဲကသ့လီၤ.

⁹ပှၤတခီဘီမုၢ်ဖိလၢ အအိၣ်ဆိးဖဲန့ၣ်တဖၣ် စံးဝဲဒၣ်, ‘ပကျဲးစၢးမၤစၢၤတ့ၢ်ကီၢ်ဘၤဘူၤလိၣ်, ဘၣ်ဆၣ်စဲၤခံကဲၣ်ဆိးလံ. မ်ပပာ်တီၢ်အီၤအခဲအံၤ, ဒီးက့ၤကဒါက့ၤဆူ ဟံၣ်တက့ၢ်. ကစၢ်ယွၤစံၣ်ညီၣ်လံ ကီၢ်ဘၤဘူၤလိၣ်လၢအဂံၢ်ဆူၣ်ဘါဆူၣ်အပူၤဒီး မၤဟးဂီၤကွံာ်အီၤလၢာ်လၢာ်ဆ့ဆ့လံန့ၣ်လီၤ.’ ”

¹⁰ယွၤစံးဝဲဒၣ်, “ယပှၤဂီၢ်မုၢ်ကိးထီၣ်စံးဝဲလၢ, ‘ယွၤဒုးနဲၣ်တ့ၢ်လၢပအိၣ် လၢတၢ်အဘၣ်အပူၤလီၤ. မ်ပလဲၤဒီး တဲဘၣ်ပှၤဂီၢ်မုၢ်လၢ ဝ့ၢ်ယရူၢ်ၡလ့ၣ်အပူၤလၢတၢ်လၢယွၤပကစၢ်မၤတ့ၢ်ဝဲန့ၣ်တက့ၢ်.’ ”

¹¹ယွၤထိၣ်ဂဲၤထီၣ်ကီၢ်မၤဒဲအစီၤပၤတဖၣ်အသး, မ့ၢ်လၢအဝဲတိာ်ပာ်လၢ ကမၤဟးဂီၤဘၤဘူၤလိၣ်အဃိန့ၣ်လီၤ. တၢ်န့ၣ်မ့ၢ်ကျဲလၢ အဟ့ၣ်ကၣ်က့ၤတၢ်လၢ တၢ်မၤဟးဂီၤတၢ်လုၢ်ဟံၣ်အဃိဒ်လဲၣ်န့ၣ်လီၤ. သုးခိၣ်တဖၣ်လၢ အထီၣ်ဒုးတၢ်ဟ့ၣ်လီၤအကလုၢ်စံးဝဲ, “မၤစူထီၣ်သုပျၢ်တဖၣ်, ကတဲာ်ကတီၤဃာ်သုကတီၤတဖၣ်တက့ၢ်.

¹²ဟ့ၣ်လီၤတၢ်ပနီၣ်လၢ တၢ်ကထီၣ်ဒုးဝ့ၢ်ဘၤဘူၤလိၣ်အခိၣ်ဒူတဖၣ် အဂီၢ်န့ၣ်တက့ၢ်. မၤဆူၣ်ထီၣ်ပှၤပၢၤတၢ်ဖိအတိၤ, ဒီးပာ်လီၤပှၤခိးတၢ်ဖိတဖၣ်တက့ၢ်. ကတဲာ်ကတီၤပှၤခိးခူ သူၣ်တၢ်တဖၣ်တက့ၢ်. ယွၤမၤတ့ၢ်လံတၢ်လၢ အဝဲစံးဝဲလၢ ကမၤဘၣ်ကီၢ်ဘၤဘူၤလိၣ် အပှၤဂီၢ်မုၢ်န့ၣ်လီၤ.”

¹³ထံကီၢ်အဝဲန့ၣ်အိၣ်ဒီးအထံကျိတဖၣ်ဒီး အတၢ်ထူးတၢ်တီၤတဖၣ် အါမးဘၣ်ဆၣ်, အတၢ်ဆၢကတီၢ်လၢာ်ကွံာ်လံ, ဒီးအသးသမူအလုၣ်ဖျ့ဘၣ်တၢ်မၤထီၣ်တဲာ်ကွံာ်အီၤလံ.

¹⁴ယွၤသ့တၢ်လၢာ်ဆိၣ်တၢ်လၢ အကစၢ်ဒၣ်ဝဲအမံၤအပူၤလၢ အဝဲကပျဲပှၤအါဂၤ ကဟဲထီၣ်ဒုးကီၢ်ဘၤဘူၤလိၣ်ဒ် ဒွဲၣ်အဖုအဂီၢ်အသိး, ဒီးအဝဲသ့ၣ်ကကိးထီၣ်အိၣ်ဒီးတၢ်မၤနၢၤန့ၣ်လီၤ.

¹⁵ယွၤတ့လီၤ ဟီၣ်ခိၣ်လၢအစိကမီၤဒၣ်ဝဲလီၤ. လၢအတၢ်ကူၣ်သ့ဒၣ်ဝဲန့ၣ်, အဝဲတ့လီၤပာ်လီၤဟီၣ်ခိၣ်ဒီး သလၣ်ထီၣ်မူခိၣ်အလီၢ်တဖၣ်လီၤ.

¹⁶ဖဲအဝဲထုထီၣ်အကလုၢ်န့ၣ်, ထံတဖၣ်လၢ မူကပိာ်လိၤ အဖီခိၣ်သီၣ်ထီၣ်ဝဲရုၢ်ရုၢ်လီၤ. အဝဲဟဲစိာ်တၢ်အၢၣ်တဖၣ်လၢ ဟီၣ်ခိၣ်အကတၢၢ်လီၤ. အဝဲဒုးအိၣ်ထီၣ်လီၤဝၢ်ဒံးလၢ တၢ်စူၤအပူၤ ဒီးဆှၢထီၣ်ကလံၤလၢ အတၢ်ပာ်ဖှိၣ်အလီၢ်န့ၣ်လီၤ.

¹⁷ဖဲပှၤထံၣ်ဘၣ်တၢ်အံၤန့ၣ်, ပှၤကညီမၤအသးဒ် ပှၤဟးဂီၤဖိဒီး ပှၤလၢအတၢ်သူၣ်ဆးသးဆးတအိၣ် ဘၣ်အသိးန့ၣ်လီၤ. ပှၤတဖၣ်လၢ အတ့တၢ်ဂီၤတၢ်ဖီၣ်တဖၣ်န့ၣ် ဘၣ်မဲာ်ဆှးဝဲ မ့ၢ်လၢကစၢ်တဖၣ်လၢ အဝဲသ့ၣ်မၤဝဲတဖၣ်မ့ၢ်တၢ်ကဘျံးကဘျၣ်ဒီး အတၢ်သါတအိၣ်ဘၣ်အဃိန့ၣ်လီၤ.

¹⁸အဝဲသ့ၣ်အလုၢ်အပှ့ၤတအိၣ်ဘၣ် ဒီးကြၢးဘၣ်တၢ်သး ဘၣ်အၢအီၤန့ၣ်လီၤ. အဝဲသ့ၣ်ကဘၣ်တၢ်မၤဟးဂီၤအီၤဖဲ ယွၤဟဲဝဲဒ်သိးကမၤဘၣ်အဝဲသ့ၣ်န့ၣ်လီၤ.

¹⁹စီၤယၤကိာ်အကစၢ်ယွၤ တဒ်သိးဘၣ်အဝဲသ့ၣ်ဘၣ်. အဝဲမ့ၢ်ပှၤတဂၤလၢ အတ့လီၤပာ်လီၤတၢ်ခဲလၢာ်, ဒီးအဝဲဃုထၢတ့ၢ်လံ အံၣ်စရ့လးလၢ ကမ့ၢ်အပှၤဂီၢ် မုၢ်ဒၣ်ဝဲန့ၣ်လီၤ. ယွၤသ့တၢ်လၢာ်မ့ၢ်အမံၤန့ၣ်လီၤ.

²⁰ယွၤစံးဝဲဒၣ်, “ကီၢ်ဘၤဘူၤလိၣ်ဧၢ, နမ့ၢ်ယခံၣ်ခူၣ်, ယတၢ်ဒုးသုး အစုကဝဲၤလီၤ. ယသူတ့ၢ်နၤလၢ တၢ်မၤသဘှံးပှၤကလုာ် တဖၣ်ဒီးဘီဧိၤမုၢ်ဧိၤတဖၣ်,

²¹လၢတၢ်မၤဟးဂီၤကသ့ၣ်တဖၣ်ဒီး ပှၤဒိးအီၤတဖၣ်, လၢတၢ်မၤဟးဂီၤ လ့ၣ်ကဟၣ်ဒီး ပှၤဝီအီၤတဖၣ်,

²²လၢတၢ်မၤသံပိာ်ခွါဒီး ပိာ်မုၣ်တဖၣ်, လၢတၢ်မၤသံပှၤသးပှၢ်ဒီး ပှၤသးစၢ်, လၢတၢ်မၤသံပိာ်ခွါဖိသၣ်တဖၣ်ဒီး ပိာ်မုၣ်ဖိသၣ်တဖၣ်,

²³လၢတၢ်မၤသံပှၤကွၢ်သိတဖၣ်ဒီး အသိအဖုအဂီၢ်တဖၣ်, လၢတၢ်မၤသဘှံးပှၤပၢတၢ်တဖၣ်ဒီး ပဒိၣ်ဖးဒိၣ်တဖၣ်အဂီၢ်န့ၣ်လီၤ.”

²⁴ယွၤစံးဝဲဒၣ်, “သုကထံၣ်ဘၣ်ယမၤဆၢက့ၤ ကီၢ်ဘၤဘူၤလိၣ်ဒီး အပှၤဂီၢ်မုၢ်လၢ တၢ်အၢတၢ်သီ ခဲလၢာ်လၢအဝဲသ့ၣ် မၤဘၣ်တ့ၢ် ဝ့ၢ်ယရူၤၡလ့ၣ်အဃိန့ၣ်လီၤ.

²⁵ကီၢ်ဘၤဘူၤလိၣ်ဧၢ, နမၤနသးဒ်ကစၢၢ်တဖျၢၣ်လၢ အမၤဟးဂီၤဟီၣ်ခိၣ်ဒီဘ့ၣ်, ဘၣ်ဆၣ်ယၤ, ယွၤအံၤ, မ့ၢ်နဒုၣ်နဒါန့ၣ်လီၤ. ယကဟံးဃာ်နၤ, တလ့ၣ်လီၤနၤလၢ တၢ်လီၢ်ထီၣ်ထီဆူဟီၣ်ခိၣ်အလိၤ, ဒီးဒုးကဲထီၣ်နၤလၢဖၣ် ဆါန့ၣ်လီၤ.

²⁶လၢၢ်တဖၣ်လၢ နတၢ်ဟးဂီၤအပူၤန့ၣ်, တၢ်တသူကဒါကဒီးအီၤ နီတဖျၢၣ်လၢတၢ်သူၣ်ထီၣ်ဘှီထီၣ်အဂီၢ်ဘၣ်. နကမၤနသးဒ် မဲးမုၢ်ခိၣ်အသိးလီၤစိၤလီၤဃၣ်န့ၣ်လီၤ. ယၤ, ယွၤအံၤ, ကတိၤလံတၢ်လံ.

²⁷ဟ့ၣ်တၢ်ပနီၣ်လၢ တၢ်ကထီၣ်ဒုးတၢ်အဂီၢ်တက့ၢ်. အူထီၣ်ကွဲၤဒ်သိး ပှၤကလုာ်တဖၣ်နၢ်ဟူဝဲကသ့အဂီၢ်တက့ၢ်. ကတဲာ်ကတီၤပှၤကလုာ်တဖၣ်လၢ တၢ်ဒုးတၢ်ထီဒါ ကီၢ်ဘၤဘူၤလိၣ်အဂီၢ်တက့ၢ်. တဲဘၣ်ဘီဧိၤမုၢ်ဧိၤတဖၣ်လၢအမ့ၢ် ဝဲအရၤရး, မံးနံး, ဒီးအၤၡကံနးလၢ ကလဲၤထီၣ်ဒုးတၢ်အဂီၢ်တ က့ၢ်. ဃုထၢပာ်လီၤသုးခိၣ်တဂၤလၢ ကဆှၢတၢ်လၢတၢ်ဒုး အဂီၢ်တက့ၢ်. ဒုးဟဲထီၣ်ကသ့ၣ်တဖၣ်ဒ်ဒွဲၣ်အဖုအဂီၢ်အသိးန့ၣ်တက့ၢ်.

²⁸ကတဲာ်ကတီၤပှၤကလုာ်တဖၣ်လၢ တၢ်ဒုးထီဒါကီၢ်ဘၤဘူၤလိၣ် အဂီၢ်န့ၣ်တက့ၢ်. မၤလိာ်ကီၢ်မၤဒဲအစီၤပၤတဖၣ်, အဝဲသ့ၣ်အခိၣ်နၢ်တဖၣ်, ဒီးအပဒိၣ်ပပှၢ်တဖၣ်, ဒီးကယဲၢ်ထံကီၢ်လၢအဝဲသ့ၣ် ပၢဝဲခဲလၢာ်အသုးမုၢ်တဖၣ်န့ၣ်တက့ၢ်.

²⁹ဟီၣ်ခိၣ်ကနိးကစုာ်ဒီး ဟူးဝးဝဲ, မ့ၢ်လၢယွၤမၤထွဲအတၢ်ကူၣ်ကျဲၤ ဒ်သိးကဒုးကဲထီၣ်ကီၢ်ဘၤဘူၤလိၣ်လၢမဲးမုၢ်ခိၣ်တတီၤဖဲပှၤ တအိၣ်တဆိးနီတဂၤဘၣ်အဃိန့ၣ်လီၤ.

³⁰ကီၢ်ဘၤဘူၤလိၣ်အသုးဖိတဖၣ် ဆိကတီၢ်ဒုးတၢ်ဒီး အိၣ်ဒၣ်လၢအတိာ်တဖၣ်အပူၤန့ၣ်လီၤ. အဝဲသ့ၣ် အတၢ်သးဒူဟးသဒၣ်ကွံာ်အီၤဒီး ကဲထီၣ်ဒ်ပိာ်မုၣ်တဖၣ် အသိးန့ၣ်လီၤ. ဝ့ၢ်အတြဲၤတဖၣ်ဘၣ်တၢ်မၤလီၤပှီၢ် ကွံာ်အီၤဒီး ဟံၣ်တဖၣ်မ့ၣ်အူအီၣ်ကွံာ်လံ.

³¹ပှၤစိာ်တၢ်ကစီၣ်တဂၤဝံၤတဂၤဃ့ၢ်ဝဲဒ်သိးကတဲဘၣ်ကီၢ်ဘၤဘူၤလိၣ် အစီၤပၤလၢအထံၣ်, ဝ့ၢ်ဘၣ်တၢ်မၤလီၤပှီၢ်ကွံာ်ကိးကပၤလံန့ၣ်လီၤ.

³²ဒုၣ်ဒါမၤန့ၢ်ကွံာ် ထံကျိၤလၢခီဂာ်တၢ်အဂီၢ်ဒီးဒွဲၣ်အူထီၣ် တိာ်ဧိၤတာ်ဧိၤတဖၣ်လၢ မ့ၣ်အူလံန့ၣ်လီၤ. ကီၢ်ဘၤဘူၤလိၣ် အသုးဖိတဖၣ် တၢ်ပျံၤတၢ်ဖုးလီၤဘၣ်အီၤလံန့ၣ်လီၤ.

³³တယံာ်လၢၤဘၣ်န့ၣ်, ဒုၣ်ဒါကကျီလီၤကွံာ်အဝဲသ့ၣ်ဒီး ကယီၢ်တံၢ်အီၤဒ် ဘုဧိၤဟုဧိၤလၢကြဲၢ်ပူၤအသိးန့ၣ်လီၤ. ယၤ, ယွၤသ့တၢ်လၢာ်, အံၣ်စရ့လးအကစၢ်ယွၤ, ကတိၤလံတၢ်လံ.”

³⁴ကီၢ်ဘၤဘူၤလိၣ်အစီၤပၤကျီကွံာ်တ့ၢ်ဝ့ၢ်ယရူၤရှလ့ၣ် ဒီးအီၣ်ကွံာ်တ့ၢ်အီၤလီၤ. အဝဲလူလီၤကွံာ်တ့ၢ်ဝ့ၢ်အံၤဒ် ထံလၢသပၢၤထံပူၤအသိးဒီး ဒ်တၢ်မုၢ်ဃၢ်ဖးဒိၣ်အသိးအဝဲယူၢ်လီၤကွံာ်တ့ၢ်အီၤလီၤ. အဝဲဟံးန့ၢ်ကွံာ်တၢ်လၢ အသးလီဝဲ ဒီးစူးကွံာ်တ့ၢ်လံတၢ်အဂၤတဖၣ်န့ၣ်လီၤ.

³⁵ပျဲဝ့ၢ်စံယိၣ်အပှၤဂီၢ်မုၢ်တဖၣ်စံးဝဲ, “မ်မူဒါအိၣ်လၢကီၢ်ဘၤဘူၤလိၣ်အလိၤ လၢတၢ်မၤဆူၣ်မၤစိးလၢအမၤဘၣ်တ့ၢ် ပှၤအဃိန့ၣ်တက့ၢ်. ပျဲဝ့ၢ်ယရူၤၡလ့ၣ်အပှၤဂီၢ်မုၢ်စံးဝဲ, မ်မူဒါအိၣ်လၢကီၢ်ဘၤဘူၤလိၣ်အလိၤလၢတၢ်လၢ ပတူၢ်ဘၣ်ခီၣ်ဘၣ်တ့ၢ်အဃိန့ၣ်တက့ၢ်.”

³⁶မၤသးဒ်န့ၣ်ဒီး, ယွၤစံးဘၣ်ဝ့ၢ်ယရူၤရှလ့ၣ်အပှၤဂီၢ်မုၢ်, “ယကဟံးထီၣ်သုကွီၢ်, ဒီးမၢသုဒုၣ်သုဒါဟ့ၣ်ဆၢက့ၤတၢ် အပှ့ၤလၢတၢ်လၢအဝဲသ့ၣ်မၤဘၣ်တ့ၢ်သုအဂီၢ်န့ၣ်လီၤ. ယကမၤလီၤသံးကွံာ် ဝ့ၢ်ဘၤဘူၤလိၣ်အထံဟဲထီၣ် အဂံၢ်ထံးဒီး မၤဃ့ထီကွံာ်အထံကျိတဖၣ်န့ၣ်လီၤ.

³⁷ထံကီၢ်န့ၣ် ကကဲထီၣ်တၢ်ဟးဂီၤတဖၣ်အတၢ်ပူၣ် ထီၣ်အသးတပူၣ်ဖဲဆၣ်ဖိကီၢ်ဖိအမံၤတဖၣ်အိၣ်ဆိး ဝဲန့ၣ်လီၤ. ကမ့ၢ်တၢ်ထံၣ်အလီၢ်လၢ အလီၤပျံၤလီၤဖုးဝဲ တတီၤလီၤ. ပှၤကအိၣ်ကဆိးဖဲန့ၣ် တအိၣ်နီတဂၤဘၣ်. ဒီးပှၤလၢ အထံၣ်ဘၣ်အီၤခဲလၢာ်န့ၣ်, ကပျံၤတၢ်ဖုးတၢ်လီၤ.

³⁸ပှၤဘၤဘူၤလိၣ်ဖိတဖၣ် ကကညီၤတၢ်ဒ် ခ့ယုၢ်တဖၣ်အသိး, ဒီးကိးပသူထီၣ်ဒ် ခ့ယုၢ်ဖိတဖၣ်အသိးန့ၣ်လီၤ.

³⁹မ့ၢ်အဝဲသ့ၣ်သးကွံအီၣ်တၢ်အီတၢ်ဧါ. ယကတဲာ်ကတီၤန့ၢ် အဝဲသ့ၣ်တၢ်အီၣ်အမူး တမူးဒီးဒုးအီမူၤအီဘှီးအဝဲသ့ၣ်ဒီး မၤသူၣ်ဖှံသးညီအီၤလီၤ. အဝဲသ့ၣ်ကမံဝဲဒီးတပၢၢ်ထီၣ်နီတစုလၢၤဘၣ်.

⁴⁰ယကလဲၤစိာ်အဝဲသ့ၣ်လၢ တၢ်ကမၤသံအီၤအဂီၢ်ဒ်သိဖိတဖၣ်, မဲာ်တဲးလဲးတဖၣ်, ဒီးသိဖါတဖၣ်အသိးန့ၣ်လီၤ. ယၤ, ယွၤအံၤ, ကတိၤလံတၢ်လံ.”

⁴¹ယွၤစံးတၢ်ဘၣ်ဃးကီၢ်ဘၤဘူၤလိၣ်အဂ့ၢ်ဒ်အံၤ, “ဝ့ၢ်လၢဟီၣ်ခိၣ်ဒီဘ့ၣ်စံးထီၣ်ပတြၢၤအီၤအံၤ ဘၣ်တၢ်မၤန့ၢ်အီၤလံ. ဝ့ၢ်ဘၤဘူၤလိၣ်ကဲထီၣ် ကွံာ်လံတၢ်လီၤပျံၤလီၤဖုးအလီၢ်တပူၤလၢ ပှၤကလုာ် တဖၣ်အဂီၢ်လံ.

⁴²ပီၣ်လဲၣ်ထွၣ်တလ့ၣ်ထီၣ်အသးလၢ ဘၤဘူၤလိၣ် အဖီခိၣ်ဒီး လုၣ်ဘၢအီၤဒီးလပီလၢအသီၣ်ထီၣ်ရုၢ် ရုၢ်တဖၣ်န့ၣ်လီၤ.

⁴³ဝ့ၢ်တဖၣ်ကဲထီၣ်တၢ်ထံၣ်ဘၣ်လၢ အလီၤပျံၤလီၤ ဖုးဒီး မၤအသးဒ် မဲးမုၢ်ခိၣ်လၢ ထံတအိၣ်ဘၣ်, ဖဲပှၤတအိၣ်ဆိးနီတဂၤမ့ၢ်ဂ့ၤ, ပှၤတလဲၤတၢ် က့ၤတၢ်ဒၣ်လဲာ်လၢ အပူၤမ့ၢ်ဂ့ၤအသိးန့ၣ်လီၤ.

⁴⁴ယကစံၣ်ညီၣ်ဘၤဘူၤလိၣ်အယွၤဘ့လးဒီး မၢအဟ့ၣ်က့ၤတၢ်ဖိတၢ်လံၤလၢ အဟုၣ်တ့ၢ်ဝဲတဖၣ်လီၤ. ပှၤကလုာ်တဖၣ်တဘူၣ်ထီၣ်ဘါထီၣ်လၢၤအီၤနီတစုလၢၤဘၣ်. ဝ့ၢ်ဘၤဘူၤလိၣ်အခိၣ်ဒူတဖၣ်လီၤပှီၢ်လံ.

⁴⁵ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ဃ့ၢ်ထွးထီၣ်ကွံာ်ဖဲန့ၣ်တက့ၢ်. ဃ့ၢ်ထီၣ်ကွံာ်လၢ သုသးသမူအဂီၢ်ဒီး လၢယတၢ်သးကဲၤထီၣ် အအိၣ်န့ၣ်တက့ၢ်.

⁴⁶လၢတၢ်ကစီၣ်ပစိၣ်ပစ့လၢ သုနၢ်ဟူဘၣ်အဃိန့ၣ်သးဟးဂီၤဒီးပျံၤတၢ်တဂ့ၤ. ကိးနံၣ်ဒဲးန့ၣ်, တၢ်ကစီၣ်ပစိၣ်ပစ့လီၤဆီရၤလီၤအသး ဘၣ်ဃးတၢ်မၤဆူၣ်မၤစိးအဂ့ၢ်လၢ ထံလီၢ်ကီၢ်ပူၤ, ဒီးဘၣ်ဃးဒီးစီၤပၤတဂၤဒုးလိာ်အသးဒီး စီၤပၤ အဂၤတဂၤအဂ့ၢ်န့ၣ်လီၤ.

⁴⁷လၢတၢ်န့ၣ်အဃိ, တၢ်ဆၢကတီၢ်ဟဲလံဝဲလၢ ယကမၤ ဘၣ်ဒိဘၣ်ထံး ကီၢ်ဘၤဘူၤလိၣ်အတၢ်ဂီၤတၢ်ဖီၣ်တဖၣ် န့ၣ်လီၤ. ထံကီၢ်ဒီဘ့ၣ်ညါကဘၣ်တၢ်မၤမဲာ်ဆှးအီၤ, ဒီးအပှၤဂီၢ်မုၢ်ခဲလၢာ် ကဘၣ်တၢ်မးသံအီၤန့ၣ်လီၤ.

⁴⁸ကီၢ်ဘၤဘူၤလိၣ်မၤသံတ့ၢ်ပှၤဂီၢ်မုၢ်လၢ ဟီၣ်ခိၣ်ဒီဘ့ၣ်ညါ, ဒီးခဲကနံၣ်အံၤကီၢ်ဘၤဘူၤလိၣ်ကလီၤဝဲ, မ့ၢ်လၢအမၤသံတ့ၢ်ပှၤအံၣ်စရ့လးဖိအါမးအဃိန့ၣ်လီၤ. ယၤ, ယွၤအံၤ, ကတိၤလံတၢ်လံ.”

⁴⁹ကီၢ်ဘၤဘူၤလိၣ် ဒုးလီၤဘၣ်တၢ်သံ ဆူကယဲ့ၢ်ပှၤဂီၢ်မုၢ် ခဲလၢာ်လၢ ဟီၣ်ခိၣ်ချၢအလိၤ, ဒီးခဲကနံၣ်အံၤကီၢ်ဘၤဘူၤလိၣ် ကလီၤကွံာ်မ့ၢ်လၢ အဒုးလီၤဘၣ်တၢ်သံဆူ ပှၤအံၣ်စရ့လးဖိ အါဂၤအလိၤအဃိန့ၣ်လီၤ. ယၤ, ယွၤအံၤကတိၤလံတၢ်လံ.”

⁵⁰ယွၤစံးဘၣ်အပှၤဂီၢ်မုၢ်လၢ ကီၢ်ဘၤဘူၤလိၣ် အပူၤ, “သုထူၣ်ဖျဲးတ့ၢ်လၢတၢ်သံလံ. အခဲကနံၣ်အံၤ လဲၤတၢ်တက့ၢ်. တဘၣ်အိၣ်ခိးတၢ်တဂ့ၤ. သုမ့ၢ်အိၣ်ယံၤ ဒီးဟံၣ်ဒၣ်လဲာ်န့ၣ်, ဆိကမိၣ်တၢ်ဘၣ်ဃးဒီးယၤ, သုကစၢ်, ဒီးသ့ၣ်နီၣ်ထီၣ်က့ၤ ဝ့ၢ်ယရူၤရှလ့ၣ်န့ၣ်တက့ၢ်.

⁵¹သုစံးလၢ, ‘ပဘၣ်တၢ်ဒုၣ်ဒွဲၣ်ဒီး တၢ်မၤမဲာ်ဆှးတ့ၢ်ပှၤလီၤ. ပစုကတၢၢ်ခီၣ်ကတၢၢ်ဒီး မၤစၢၤလီၤပသးတဘၣ်, မ့ၢ်လၢပှၤတခီဘီမုၢ်ဖိတဖၣ် ဟံးန့ၢ်ကွံာ်တၢ်လီၢ်စီ ဆှံတဖၣ်လၢ ယွၤအတၢ်လုၢ်ဟံၣ်အပူၤလံအဃိန့ၣ်လီၤ.’

⁵²လၢတၢ်န့ၣ်အဃိဒီး, ယစံးယဲလၢတၢ်ဆၢကတီၢ်တုၤအိၣ်လံဝဲလၢ, ယကမၤဘၣ်ဒိဘၣ်ထံးကီၢ်ဘၤဘူၤလိၣ်အတၢ်ဂီၤတၢ်ဖီၣ်တဖၣ်, ဒီးပှၤလၢအဘၣ်ဒိဘၣ်ထံးတဖၣ် ကကအုကစွါထီၣ်ဝဲလၢထံကီၢ်ဒီ ဘ့ၣ်ညါအပူၤန့ၣ်လီၤ.

⁵³ကီၢ်ဘၤဘူၤလိၣ်လဲၤ ထီၣ်ဆူမူကပိာ်လိၤဒီးဘှီထီၣ်တိာ်ဂံၢ်ဆူၣ် ဘါဆူၣ်တဖျၢၣ်ဖဲန့ၣ်မ့ၢ်သ့ဒၣ်လဲာ်, ယကမၢလီၤဒံးပှၤဂီၢ်မုၢ်လၢ ကမၤဟးဂီၤအီၤန့ၣ်လီၤ. ယၤ, ယွၤအံၤ, ကတိၤလံတၢ်လံ.”

⁵⁴ယွၤစံးဝဲဒၣ်, “ဒိကနၣ်တၢ်ဟီၣ်တၢ်ယၢၤအသီၣ်လၢ ကီၢ်ဘၤဘူၤလိၣ်အပူၤ ဒီးတၢ်ဘၣ်မိၢ်ဘၣ်မးလၢ ထံကီၢ်အတၢ်ဟးဂီၤ လၢထံလီၢ်ကီၢ်ပူၤအဃိန့ၣ်တက့ၢ်.

⁵⁵ယမၤဟးဂီၤလံကီၢ်ဘၤဘူၤလိၣ် ဒီးမၤဘှ့ၣ်ကွံာ်အတၢ်သီၣ်လံ. သုးမုၢ်တဖၣ်ဃ့ၢ်သဖှိနုာ်ဒ်လပီတဖၣ် အတၢ်သီၣ်ရုၢ်ရုၢ်အသိး, ဒီးဟဲထီၣ်ဒုးတၢ်အိၣ်ဒီးတၢ်ကိးသီၣ်ကိးသဲ ဖးဒိၣ်န့ၣ်လီၤ.

⁵⁶အဝဲသ့ၣ်ဟဲဝဲလၢ ကမၤဟးဂီၤကီၢ်ဘၤဘူၤလိၣ်အဂီၢ်လီၤ. အသုးဖိတဖၣ်ဘၣ်တၢ်ဖီၣ်န့ၢ်အီၤဒီးအချံၣ်တဖၣ်ကၢ်ကွံာ်ဝဲလံ. ယမ့ၢ်ကစၢ်ယွၤလၢ အစံၣ်ညီၣ်တၢ်အၢတၢ်သီ, ဒီးယကမၤဘၣ်ကီၢ်ဘၤဘူၤလိၣ်ဒ် တၢ်လၢအကြၢး ဒီးအီၤအသိးန့ၣ်လီၤ.

⁵⁷ယကဒုးအီၤမူအီဘှီးအပှၤပၢတၢ်တဖၣ် လၢအမ့ၢ်ပှၤလၢ အကူၣ်တၢ်သ့, ခိၣ်နၢ်တဖၣ်ဒီး သုးဖိသံၣ်ဖိတဖၣ်န့ၣ်လီၤ. အဝဲသ့ၣ်ကမံဝဲဒီး တဖုသံနီၣ်ထီၣ်နီတစုလၢၤဘၣ်. ယၤ, စီၤပၤအံၤ, ကတိၤလံတၢ်လံ. ယမ့ၢ်ယွၤသ့တၢ်လၢာ်န့ၣ်လီၤ.

⁵⁸ဝ့ၢ်ဘၤဘူၤလိၣ်အခိၣ်ဒူဖးလဲၢ် ကဘၣ်တၢ်မၤလီၤ ပှီၢ်အီၤဆူဟီၣ်ခိၣ်လိၤ ဒီးအတြဲၤဖးထီတဖၣ်မ့ၣ်အူကအီၣ်ကွံာ်အီၤလီၤ. ပှၤကလုာ်တဖၣ်အတၢ်မၤကကဲထီၣ်တၢ်ကလီကလီ ဒီးအတၢ်ကျဲးစၢးခဲလၢာ်ကကဲထီၣ်မ့ၣ်အူဆၣ်န့ၣ်လီၤ. ယၤ, ယွၤသ့တၢ်လၢာ်အံၤ, ကတိၤလံတၢ်လံၤ. ”

⁵⁹စီၤပၤစံးဒကံယၤ အပှၤကွၢ်ထွဲမၤစၢၤအီၤမ့ၢ် ဝဲ စီၤစရါယၤလၢအမ့ၢ်စီၤန့ၤရံယၤ အဖိခွါဒီး စီၤမၤစ့ယၤအလံၤခွါန့ၣ်လီၤ. ဖဲစီၤစံးစကံယၤ ကဲစီၤပၤလၢကီၢ်ယူဒၤပှဲၤထီၣ်လွံၢ်နံၣ်တနံၣ်အပူၤန့ၣ်, စီၤစရါယၤလဲၤဃုာ်တၢ်ဒီး အီၤဆူကီၢ်ဘၤဘူၤလိၣ်ဒီး ယဟ့ၣ်လီၤအီၤတၢ်သိၣ်လိနဲၣ်ယုၤတနီၤန့ၣ်လီၤ.

⁶⁰ယကွဲးလီၤတၢ်လၢလံာ်တဘ့ၣ်အပူၤန့ၣ်, ယကျဲၤလီၤတၢ်ဂ့ၢ်ဘၣ်ဃးဒီးတၢ်ဟးဂီၤခဲလၢာ်လၢ အကဘၣ်ကီၢ်ဘၤဘူၤလိၣ်, ဃုာ်ဒီးတၢ်အဂၤတဖၣ်ခဲလၢာ်ဘၣ်ဃးဒီး ကီၢ်ဘၤဘူၤလိၣ်န့ၣ်လီၤ.

⁶¹ယတဲဘၣ်တ့ၢ် စီၤစရါယၤဒ်အံၤ, “ဖဲနလဲၤတုၤဆူ ကီၢ်ဘၤဘူလိၣ်န့ၣ်, တၢ်ကိးမံၤဒဲးလၢ တၢ်ကွဲးလီၤတ့ၢ်အီၤ ဖဲအံၤန့ၣ်, ဖးန့ၢ်ပှၤဂီၢ်မုၢ်လၢ နကလုၢ်ဖးဒိၣ်သပှၢ်တၢၢ်န့ၣ်တက့ၢ်.

⁶²ဝံၤဒီး ဘါထုကဖၣ်တၢ်ဒီး စံးလၢ, ‘ယွၤဧၢ, နစံးတ့ၢ်လၢ နကမၤဟးဂီၤတၢ်လီၢ်အံၤ ဒ်သိးပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တအိၣ်ဆိးလၢၤလၢအပူၤဘၣ်ဒီး ကလီၤဂာ်ဒီးတၢ်အိၣ်သယုၢ်အလီၢ်အစိၤစိၤအဃၣ်ဃၣ်န့ၣ်လီၤ.’

⁶³စီၤစရါယၤဧၢ, ဖဲနဖးန့ၢ်ပှၤဂီၢ်မုၢ်လၢ လံာ်အံၤဝံၤန့ၣ်, စၢထီၣ်အီၤလၢ လၢၢ်တဖျၢၣ်အလိၤဒီး ကွံာ်လီၤအီၤဆူ ထံကျိဖရၤအသးအပူၤ,

⁶⁴ဒီးစံး, ‘တၢ်အံၤမ့ၢ် တၢ်လၢအကမၤအသးဒီး ကီၢ်ဘၤဘူၤလိၣ်န့ၣ် လီၤ. ကလီၤဒးဝဲဒီၤ တထီၣ်ဖီကဒီးလၢၤ နီတစုဘၣ်, မ့ၢ်လၢတၢ်ဟးဂီၤလၢ ယွၤကဒုးလီၤဘၣ်အီၤလၢအလိၤအဃိန့ၣ်လီၤ.’ ” စီၤယံးရမံယၤ အတၢ်ကတိၤတဖၣ် ကတၢၢ်ကဝဲဖဲအံၤလီၤ.

Read S'gaw Karen လံာ်ယံးရမံယၤ 51 Bible Online

လံာ်ယံးရမံယၤ 51 - S'gaw Karen bible

လံာ်ယံးရမံယၤ 51