Read S'gaw Karen လံာ်ယံးရမံယၤ 52 Bible Online

လံာ်ယံးရမံယၤ 52 - S'gaw Karen bible

လံာ်ယံးရမံယၤ 52

¹စီၤစံးဒကံယၤအသးအိၣ် ခံဆံတနံၣ်ဖဲအဝဲကဲထီၣ် ကီၢ်ယူဒၤအစီၤပၤဒီး အဝဲပၢတ့ၢ်တၢ်လၢ ဝ့ၢ်ယရူၤၡလ့ၣ်အပူၤတဆံတနံၣ်လီၤ. အဝဲအမိၢ်အမံၤမ့ၢ်ဝဲ နီၢ်ဃမူတလး, လၢအမ့ၢ်ဝဲ စီၤယံးရမံယၤလၢ အအိၣ်ဝဲလၢဝ့ၢ်လံးဘနၤတခီအဖိမုၣ်န့ၣ်လီၤ.

²စီၤပၤစံးဒကံယၤမၤတ့ၢ်တၢ်ဒဲးဘးထီဒါယွၤ, ဒ်စီၤယဟိၤယါကံၣ်မၤတ့ၢ်ဝဲအသိးန့ၣ်လီၤ.

³ယွၤသးထီၣ်ဘၣ် ဝ့ၢ်ယရူၤၡလ့ၣ်ဒီး ကီၢ်ယူဒၤ အပှၤဂီၢ်မုၢ်ဒိၣ်ဒိၣ်ကလဲာ်တုၤဒၣ်လဲာ် ဟီထီၣ်ကွံာ်ဝဲလၢအမဲာ်ညါန့ၣ်လီၤ. စီၤစံးဒကံယၤပူထီၣ်တၢ်ထီဒါ ကီၢ်ဘၤဘူၤလိၣ် အစီၤပၤနဘူၤကးန့စၢ်.

⁴ဒီးလၢတၢ်န့ၣ်အဃိ, စီၤနဘူၤကးန့စၢ်ဟဲဝဲဒီး အသုးမုၢ်ခဲလၢာ်ဒီး ထီၣ်ဒုးဝ့ၢ်ယရူၤၡလ့ၣ်ဖဲစီၤစံးဒကံယၤပၢတၢ်ပှဲၤထီၣ် ခွံနံၣ်တနံၣ်, ဆံဆဲလါတလါ, လါထီၣ်ဆံဆဲၣ်သီတသီအနံၤန့ၣ်လီၤ. အဝဲသ့ၣ်သူၣ်ဒဲဖဲဝ့ၢ်အချၢ, ဒီးသူၣ်ထီၣ်တိာ်အဒူၣ်တဖၣ်ဝးတရံးအီၤ,

⁵ဒီးပာ်အီၤလၢ တၢ်ဝီၤဃာ်အပူၤတုၤ စီၤစံးဒကံယၤပၢတၢ်ပှဲၤ ထီၣ်တဆံတနံၣ်န့ၣ်လီၤ.

⁶နံၣ်တနံၣ်ဃီန့ၣ်, ဖဲလါလွံၢ်လါတလါ, လါထီၣ်ခွံသီတသီအနံၤ န့ၣ်, တၢ်သၣ်ဝံၤလီၤဒိနးမးမၤအသးဒီး တၢ်အီၣ်လၢပှၤဂီၢ်မုၢ် ကအီၣ်တအိၣ်လီၤတဲာ်နီတမံၤလၢၤဘၣ်.

⁷ဒီးဝ့ၢ်အခိၣ်ဒူ တဖၣ်ဘၣ်တၢ်မၤလီၤပှီၢ်ဘၢၣ်ဖျိအီၤန့ၣ်လီၤ. ပှၤဘၤဘူၤလိၣ်ဖိတဖၣ် မ့ၢ်ကဝီၤဃာ်ဝ့ၢ်ဒၣ်လဲာ်န့ၣ်, ပှၤ သုးဖိခဲလၢာ် ဃ့ၢ်ထူၣ်ဖျဲးဝဲလၢ မနၤခီအဆၢကတီၢ်လီၤ. အဝဲသ့ၣ်ဟးထီၣ်ကွံာ်ဝဲလၢ စီၤပၤအတၤသၣ်လီၢ်အကျဲ, လဲၤခီဖျိကျဲစၢၤလၢ အဒုးစဲဘူးတၢ်ဒူၣ်ခံခါ, ဒီးထွးထီၣ်ဃ့ၢ် ကွံာ်ဆူ ထံကျိယၢ်ဒ့ၣ်အတြီၤန့ၣ်လီၤ.

⁸ဘၣ်ဆၣ်ဒီး, ကီၢ်ဘၤဘူၤလိၣ်အသုးမုၢ် လူၤစီၤပၤစံးဒကံယၤ, ဖီၣ်န့ၢ်အီၤဖဲ ပျီပူၤဘူးဒီး ဝ့ၢ်ယရံၤဃိ, ဒီးအဝဲအသုးဖိခဲလၢာ်ဃ့ၢ်သဒၣ်ကွံာ်အီၤန့ၣ်လီၤ.

⁹စီၤစံးဒကံယၤဘၣ်တၢ်က့ၤကိးအီၤဆူ စီၤပၤနဘူၤကးန့ စၢ်အအိၣ်လၢအအိၣ်ဝဲဖဲဝ့ၢ်ရံးဘလးလၢ ဃမါသးအလီၢ်ကဝီၤအပူၤ, ဒီးဖဲန့ၣ်စီၤနဘူၤကးန့စၢ် စံၣ်ညီၣ်အီၤန့ၣ်လီၤ.

¹⁰ဖဲဝ့ၢ်ရံးဘလးန့ၣ်, အဝဲမၤသံကွံာ် စီၤစံးဒကံယၤအဖိခွါ တဖၣ်လၢ အမဲာ်ညါဒၣ်ဝဲ, ဒီးအဝဲမၢသံစ့ၢ်ကီးကီၢ်ယူဒၤ ပဒိၣ်ပပှၢ်တဖၣ်န့ၣ်လီၤ.

¹¹အန့ၣ်ဝံၤဒီး, အဝဲမၢပှၤအူခွဲးထီၣ်ကွံာ်စီၤစံးဒကံယၤအမဲာ်ချံတဖၣ်, မၢပှၤစၢဃာ်အီၤလၢထးသွဲတဖၣ်ဒီး က့ၤစိာ်ကွံာ်အီၤဆူ ကီၢ်ဘၤဘူၤလိၣ်န့ၣ်လီၤ. စီၤစံးဒကံယၤအိၣ်ဝဲလၢ ကီၢ်ဘၤဘူၤလိၣ်အဃိာ်ပူၤတုၤမုၢ်တနံၤလၢ အသံဝဲတစုန့ၣ်လီၤ.

¹²လၢကီၢ်ဘၤဘူၤလိၣ်အစီၤပၤ စီးနဘူၤကးန့စၢ် မၤတၢ်ပှဲၤထီၣ်တဆံနွံနံၣ်တနံၣ်, လါယဲၢ်လါတလါ, လါထီၣ်တဆံသီအနံၤန့ၣ်, စီၤနဘူစၢ်ရဒၣ်လၢအမ့ၢ် ပှၤဟ့ၣ်ကူၣ်စီၤပၤဒီး မ့ၢ်စ့ၢ်ကီးသုးမုၢ်အသုးခိၣ်ဖးဒိၣ်, ဟဲနုာ်လီၤဆူ ဝ့ၢ်ယရူၤၡလ့ၣ်အပူၤလီၤ.

¹³အဝဲဒွဲၣ်အူထီၣ်ကွံာ် ယွၤအတၢ်လုၢ်ဟံၣ်, စီၤပၤအနူၢ်, ဒီးပှၤဂီၢ်မုၢ်လၢ အကါဒိၣ်လၢအအိၣ်ဆိးလၢ ဝ့ၢ်ယရူၤရှလ့ၣ်အပူၤခဲလၢာ်အဟံၣ်အဃီတဖၣ်,

¹⁴ဒီးအသုးဖိတဖၣ် မၤလီၤပှီၢ်ကွံာ် ဝ့ၢ်အခိၣ်ဒူတဖၣ်န့ၣ်လီၤ.

¹⁵ဝံၤဒီး, စီၤနဘူစၢ်ရဒၣ်က့ၤ ကိးကွံာ်ပှၤဂီၢ်မုၢ်လၢအအိၣ်လီၤတဲာ် လၢဝ့ၢ်အပူၤ, ပှၤမၤတၢ်ဖိအသ့အဘၣ်လၢ အအိၣ်တီၢ်တဖၣ်, ဒီးပှၤအဂၤတဖၣ်လၢ အပာ်လီၤတဲာ်အကီၢ်ဒီး ခီနုာ်ဆူပှၤဘၤဘူၤလိၣ်ဖိတဖၣ်အကျါန့ၣ်လီၤ.

¹⁶ဘၣ်ဆၣ်လၢ ကီၢ်ယူဒၤအပူၤန့ၣ်, အဝဲပာ်တီၢ်ပှၤဂီၢ်မုၢ်လၢ အဖှီၣ်အယာ်ကတၢၢ်တနီၤ, ပှၤလၢအစုလီၢ်ခီၣ်ခိၣ်တအိၣ်နီတမံၤတဖၣ်, ဒီးအဝဲပာ်လီၤပှၤသ့ၣ်တဖၣ်အံၤ လၢကမၤတၢ်လၢ စပံးလီၢ် တဖၣ်ဒီး စံာ်ပျီတဖၣ်အပူၤန့ၣ်လီၤ.

¹⁷ထူၣ်တိၢ်ဘီတဖၣ်ဒီး လ့ၣ်တဖၣ်လၢအအိၣ်လၢယွၤအတၢ်လုၢ်ဟံၣ်ပူၤ ဃုာ်ဒီးတိၢ်ဘီထံဒၢဖးဒိၣ်န့ၣ်, ပှၤဘၤဘူၤလိၣ်ဖိတဖၣ် မၤကၢ်လီၤကလဲကွံာ်ဝဲ, ဒီးအဝဲသ့ၣ်စိာ်ကွံာ်တိၢ်ဘီခဲလၢာ်ဆူ ကီၢ်ဘၤဘူၤလိၣ်န့ၣ်လီၤ.

¹⁸အဝဲသ့ၣ်စိာ်ကွံာ်စ့ၢ်ကီး နီၣ်တရီာ်ဟီၣ်ခိၣ်တဖၣ် ဒီးဖၣ်ဆါအသပၢၤ တဖၣ်လၢ တၢ်သူအီၤလၢတၢ်မၤကဆှဲကဆှီတၢ်လုၢ်လီၢ်အဂီၢ်, တၢ်ပီးတၢ်လီတဖၣ်လၢ တၢ်သူအီၤလၢ တၢ်အံး ထွဲကွၢ်ထွဲမ့ၣ်အူဒၢတဖၣ်အဂီၢ်, သလၢတဖၣ်လၢတၢ်သူအီၤလၢ တၢ်ကဒီဃာ်တၢ်လုၢ်တၢ်ပာ်တဖၣ် အသွံၣ်အဂီၢ်, သလၢတဖၣ်လၢ တၢ်သူအီၤလၢ တၢ်ဆိၣ်ကဲၤတၢ်နၢမူအဂီၢ်, ဒီးတိၢ်ဘီတၢ်ပီးတၢ်လီအဂၤခဲလၢာ်လၢတၢ်သူအီၤလၢ ယွၤအတၢ်လုၢ်ဟံၣ်ပူၤတၢ်မၤအဂီၢ်န့ၣ်လီၤ.

¹⁹အဝဲသ့ၣ် ဟံးန့ၢ်ကွံာ်တၢ်ကိးမံၤဒဲးလၢ အဘၣ်တၢ်မၤအီၤလၢ ထူဒီးစ့လၢအမ့ၢ်သလၢအဆံးဖိတဖၣ်, သပၢၤဘံၣ်သလၣ်လၢ တၢ်သူအီၤလၢ တၢ်စိာ်လၢၢ်သွဲၣ်လးကဲၤကဖးအဂီၢ်, သလၢတဖၣ်လၢကပဒၢးဃာ်တၢ်လုၢ်တၢ်ပာ်အသွံၣ်အဂီၢ်တဖၣ်, ဖၣ်ဆါအသပၢၤတဖၣ်, မ့ၣ်အူဒၢအထူၣ်တဖၣ်, သလၢတဖၣ်လၢ တၢ်သူအီၤလၢတၢ်လုၢ်နၢမူအဂီၢ်, ဒီးသလၢတဖၣ် လၢတၢ်သူအီၤလၢတၢ်လူလီၤတၢ်လုၢ်စပံးထံတဖၣ်အဂီၢ်န့ၣ်လီၤ.

²⁰တၢ်ပီးတၢ်လီတဖၣ် လၢစီၤပၤၡလိၤမိၤမၤတ့ၢ်ဝဲ လၢတိၢ်ဘီလၢ ယွၤအတၢ်လုၢ်ဟံၣ်အဂီၢ်လၢ အမ့ၢ်ဝဲ, ထူၣ်ခံထူၣ်, လ့ၣ်ကဟၣ်တဖၣ်, ထံဒၢ ဖးဒိၣ်, ဒီးဂီၤဖံးတဆံခံဒုလၢ အပၢၢ်ဃာ်အီၤန့ၣ်, အတယၢၢ်ဃၢကဲၣ်ဆိးလၢ တၢ်ကစီၤကွၢ်အီၤအဂီၢ် န့ၣ်လီၤ.

²¹ထူၣ်ခံထူၣ်န့ၣ်လီၤဂာ်လိာ်အသးလီၤ. တခါစုာ်စုာ်န့ၣ် အထီမ့ၢ်ဝဲ တဆံဃိးပျၢ်ဒီး အကဝီၤန့ၣ် မ့ၢ်ဝဲတဆံခံပျၢ်န့ၣ်လီၤ. အဝဲသ့ၣ် မ့ၢ်ထူၣ်အကအိတဖၣ် လၢအတီၣ်မ့ၢ်တိၢ်စ့ထးဃါဃုာ် အသးသၢစုမုၢ်ဒိၣ်န့ၣ်လီၤ.

²²လၢထူၣ်တထူၣ်စုာ်စုာ်အခိၣ်စိးန့ၣ် အိၣ်ဒီးတိၢ်ဘိအခိၣ်ထိးလၢ အထီအိၣ်ယဲၢ်ပျၢ်, ဒီးဝးတရံးအီၤန့ၣ် အိၣ်ဒီးတၢ်ထ့ဃ့တၢ်လၢ ထးဘိလၢအဘၣ်တၢ်ကယၢကယဲအီၤဒီး သလဲသၣ်တဖၣ်လၢ အဘၣ်တၢ်မၤအီၤလၢတိၢ်ဘီခဲလၢာ်န့ၣ်လီၤ.

²³ထူၣ်တထူၣ်စုာ်စုာ်အတၢ်ထ့ဃ့ထးအဖီခိၣ်န့ၣ်, အိၣ်ဒီးသလဲသၣ်ခဲလၢာ်အဖျၢၣ်တကယၤ, ဒီးလၢအကျါခွံဆံဃုဖျၢၣ်န့ၣ်, ပအိၣ်ကွၢ်လၢဟီၣ်ခိၣ်လိၤဒီး ပထံၣ်လၢပမဲာ်သ့ဝဲလီၤ.

²⁴အါန့ၢ်အန့ၣ်, စီၤနဘူစၢ်ရဒၣ်လၢ အမ့ၢ်သုးခိၣ် ဖးဒိၣ်, စိာ်မၢကဲကုၢ် ကွံာ်ပှၤလုၢ်တၢ်အခိၣ်အဒိၣ် ကတၢၢ်စီၤစရါယၤ, ဒီးပှၤလုၢ်တၢ်အခိၣ် ခံဂၤတဂၤလၢ အမ့ၢ်စီၤစဖါနယၤ, ဒီးယွၤအတၢ်လုၢ်ဟံၣ်အပဒိၣ် ပပှၢ်လၢအကါဒိၣ်အဂၤသၢဂၤန့ၣ်လီၤ.

²⁵ပှၤအိၣ်တ့ၢ်ဒံးအဂၤလၢ ဝ့ၢ်ပူၤလၢအဝဲစိာ်ကွံာ်န့ၣ်မ့ၢ်ဝဲ, သုးခိၣ်တဂၤလၢအပၢၤဘၣ်သုးဖိတဖၣ်, စီၤပၤအပှၤဟ့ၣ်ကူၣ်ဟ့ၣ်ဖး တၢ်နွံဂၤလၢအအိၣ်ဒံးဒၣ်လၢ ဝ့ၢ်ပူၤ, ပှၤတဂၤလၢ အမၤစၢၤသုးခိၣ်ကျၢၢ်လၢအမ့ၢ်ပှၤအခိၣ်လၢ အကွၢ်ထွဲသုးအတၢ်ကွဲးနီၣ်ကွဲးဃါတဖၣ်, ဒီးပှၤအဂၤလၢအကါဒိၣ်အဂၤဃုဆံန့ၣ်လီၤ.

²⁶စီၤနဘူစၢ်ရဒၣ်က့ၤစိာ်အဝဲသ့ၣ်ဆူ ကီၢ်ဘၤဘူၤလိၣ်အစီၤပၤ လၢအအိၣ်လၢဝ့ၢ်ရံးဘလၤ,

²⁷လၢဃမါသးအလီၢ်ကဝီၤပူၤန့ၣ်လီၤ. ဖဲန့ၣ်, စီၤပၤမၢပှၤဒိအီၤ တီၢ်အီၤဒီးမၤသံအီၤလီၤ. လၢတၢ်န့ၣ်အဃိ, ကီၢ်ယူဒၤအပှၤဂီၢ်မုၢ်ဘၣ်တၢ်စိာ်ကွံာ်အီၤလၢ အထံအကီၢ်ဆူတၢ်စိာ်မၢကဲကုၢ် အပူၤန့ၣ်လီၤ.

²⁸အအံၤမ့ၢ်တၢ်ကွဲးနီၣ်ကွဲးဃါ ဘၣ်ဃးပှၤဂီၢ်မုၢ်လၢ စီၤနဘူၤကးန့စၢ် စိာ်မၢကဲကုၢ်အီၤတဖၣ်န့ၣ်လီၤ. လၢအဝဲပၢတၢ်ဒ် စီၤပၤနွံနံၣ်တနံၣ်အပူၤန့ၣ်, အဝဲစိာ်ကွံာ်ဝဲ ပှၤ သၢကထိခံဆံသၢဂၤန့ၣ်လီၤ.

²⁹လၢအဝဲပၢတၢ်ဃိးနံၣ်တနံၣ်န့ၣ်, ပှၤ ဃိးကယၤသၢဆံခံဂၤလၢ ဝ့ၢ်ယရူၤၡလ့ၣ်လီၤ.

³⁰ဒီးလၢအပၢတၢ်ခံဆံသၢနံၣ်တနံၣ်န့ၣ်, ပှၤနွံကယၤလွံၢ်ဆံယဲၢ်ဂၤ ဘၣ်တၢ်စိာ်ကွံာ်အီၤလၢစီၤနဘူစၢ်ရဒၣ်လီၤ. ပှၤခဲလၢာ်မ့ၢ်, ပှၤ လွံၢ်ကထိဃုကယၤဂၤလၢအဘၣ်တၢ်စိာ်ကွံာ်အီၤန့ၣ်လီၤ.

³¹နံၣ်လၢစီၤအ့ဝလးမရၤဒိးကဲထီၣ်စီၤပၤလၢ ကီၢ်ဘၤဘူၤလိၣ်အပူၤန့ၣ်, အဝဲဒုးနဲၣ်တၢ်သးကညီဆူ ကီၢ်ယူဒၤအစီၤပၤယဟိၤယါခံၣ်ခီဖျိတၢ်ပျၢ်ဖျဲးကွံာ်အီၤလၢ ဃိာ်ပူၤန့ၣ်လီၤ. တၢ်အံၤမၤအသးဖဲ စီၤယဟိၤယါခံၣ်ဘၣ်တၢ်စိာ်ကွံာ် အီၤဒ်ပှၤဃိာ်ဖိတဂၤအသိးပှဲၤထီၣ်သၢဆံနွံနံၣ်, တဆံခံလါတလါ, လါထီၣ်ခံဆံယဲၢ်သီတသီနံၤန့ၣ်လီၤ.

³²စီၤအ့ဝလးမရၤဒိးမၤဘၣ်အီၤလၢ တၢ်သးကညီၤအပူၤ ဒီးဟ့ၣ်အီၤတၢ်လီၢ်တၢ်လၤလၢ အလၤကပီၤ ဒိၣ်န့ၢ်ဒံးအဝဲဟ့ၣ်စီၤပၤအဂၤတဖၣ် တက့ၢ်လၢ အဘၣ်တၢ်စိာ်မၢကဲကုၢ်ဒီးအီၤလၢ ကီၢ်ဘၤဘူၤလိၣ်အပူၤန့ၣ်လီၤ.

³³လၢတၢ်န့ၣ်အဃိ, စီၤယဟိၤယါခံၣ်န့ၢ်ဘၣ် တၢ်ပျဲလၢကလဲလိာ်ကွံာ်အဃိာ်အကူအသိး တဖၣ်ဒီးကအီၣ်သကီးတၢ်လၢ စီၤပၤအစီၢ်နီၤခိၣ်လၢ အဝဲအသးသမူလၢ အအိၣ်လီၤတဲာ်အပူၤန့ၣ်လီၤ.

³⁴တနံၤဘၣ်တနံၤဖဲ အဝဲအိၣ်မူဒံးဝဲန့ၣ်, အဝဲဘၣ်တၢ်ဟ့ၣ် အီၤလၢ တၢ်ဟ့ၣ်ဘၣ်ဆၢဘၣ်ကတီၢ်တဖၣ်ဒ် အဝဲအတၢ်လိၣ်ဘၣ်အိၣ်ဝဲ အသိးန့ၣ်လီၤ.